ಮುಂಬಯಿ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಪ್ಲೇ ಆಫ್ ಗೇರುವ ಚಿಂತೆಯಲ್ಲಿದ್ದರೆ, ಅತ್ತ ಆರ್ಸಿಬಿ ಮತ್ತು ವಿರಾಟ್ ಕೊಹ್ಲಿಯ ಅಭಿಮಾನಿಯೊಬ್ಬ ವಿಶೇಷ ರೀತಿಯಲ್ಲಿ ಕೇಶವಿನ್ಯಾಸ ಮಾಡಿ ಸುದ್ದಿಯಾಗಿದ್ದಾನೆ. ತಲೆಯಲ್ಲಿ ಆರ್ಸಿಬಿ ಮತ್ತು ವಿರಾಟ್ ಕೊಹ್ಲಿಯ ಚಿತ್ರವನ್ನು ಬರೆಯುವ ಮೂಲಕ ವಿಶೇಷ ರೀತಿಯಲ್ಲಿ ಅಭಿಮಾನ ಮೆರೆದಿದ್ದಾನೆ. ಅಭಿಮಾನಿಯ ಈ ಅಭಿಮಾನ ಕಂಡು ವಿರಾಟ್ ಕೊಹ್ಲಿಯೇ ಒಂದು ಕ್ಷಣ ದಂಗಾಗಿದ್ದಾರೆ.
ಆರ್ಸಿಬಿ ತಂಡ ಗುರುವಾರ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಕಣಕ್ಕಿಳಿಯಲಿದೆ. ಆರ್ಸಿಬಿಗೆ ಈ ಪಂದ್ಯ ಪ್ಲೇ ಆಫ್ಗೇರುವ ನಿಟ್ಟಿನಲ್ಲಿ ಮಾಡು ಇಲ್ಲವೇ ಮಡಿ ಪಂದ್ಯವಾಗಿದೆ. ಸದ್ಯ ಆರ್ಸಿಬಿ ಆಟಗಾರರು ಹೈದರಾಬಾದ್ನಲ್ಲಿ ಈ ಪಂದ್ಯಕ್ಕಾಗಿ ಭರ್ಜರಿ ತಾಲೀಮು ನಡೆಸಿದೆ. ಇದೇ ವೇಳೆ ಆರ್ಸಿಬಿ ಮತ್ತು ಕೊಹ್ಲಿ ಅಭಿಮಾನಿಯೊಬ್ಬ ತನ್ನ ಕೇಶವಿನ್ಯಾಸದಲ್ಲಿ ಆರ್ಸಿಬಿ ಎಂದು ಬರೆದು ವಿರಾಟ್ ಕೊಹ್ಲಿ ಚಿತ್ರವನ್ನು ಬಿಡಿಸಿ ಕೊಹ್ಲಿಯನ್ನು ಭೇಟಿ ಮಾಡಿದ್ದಾನೆ. ಆತನನ್ನು ಕಂಡ ವಿರಾಟ್ ಕೊಹ್ಲಿ ಬೆನ್ನು ತಟ್ಟಿ ಒಂದು ಕ್ಷಣ ಅಚ್ಚರಿಗೊಂಡರು. ಈ ವಿಡಿಯೊ ಮತ್ತು ಫೋಟೊಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಇದನ್ನೂ ಓದಿ IPL 2023: ವಧೇರಾಗೆ ವಿಚಿತ್ರ ಶಿಕ್ಷೆ ನೀಡಿದ ಮುಂಬೈ ಇಂಡಿಯನ್ಸ್; ವಿಡಿಯೊ ವೈರಲ್
ಆರ್ಸಿಬಿಗೆ ಗೆಲ್ಲಲ್ಲೇ ಬೇಕಾದ ಒತ್ತಡ
ಆರ್ಸಿಬಿ ತಂಡ 12 ಪಂದ್ಯಗಳನ್ನು ಆಡಿ 12 ಅಂಕದೊಂದಿಗೆ 5ನೇ ಸ್ಥಾನದಲ್ಲಿದೆ. ಪ್ಲೇ ಆಫ್ಗೇರಬೇಕಾದರೆ ಈ ಪಂದ್ಯದಲ್ಲಿ ಗೆಲುವು ಅತ್ಯಗತ್ಯ. ರಾಜಸ್ಥಾನ್ ವಿರುದ್ಧದ ಪಂದ್ಯದಲ್ಲಿ ಭರ್ಜರಿ ಗೆಲುವು ಸಾಧಿಸಿದ ಖುಷಿಯಲ್ಲಿದ್ದರೂ ತಂಡದ ಬ್ಯಾಟಿಂಗ್ ಮಾತ್ರ ಕೇವಲ ಮೂರು ಮಂದಿಯ ಪ್ರದರ್ಶನದ ಮೇಲೆಯೇ ಅವಲಂಬಿತವಾಗಿದೆ. ಆರಂಭದಿಂದಲೂ ಈ ಸಮಸ್ಯೆ ತಂಡದಲ್ಲಿ ಬಗೆಹರಿದಿಲ್ಲ. ತಂಡ ಇಲ್ಲಿಯ ವರೆಗೆ ಬಂದದ್ದೇ ಒಂದು ಅಚ್ಚರಿ. ಒಂದೊಮ್ಮೆ ಫಾಪ್ ಡು ಪ್ಲಸಿಸ್, ಮ್ಯಾಕ್ಸ್ವೆಲ್ ಮತ್ತು ಕೊಹ್ಲಿ ಅವರು ಬೇಗನೆ ಔಟಾದರೆ ತಂಡಕ್ಕೆ ಸೋಲು ಖಚಿತ. ಏಕೆಂದರೆ ಮಧ್ಯಮ ಕ್ರಮಾಂಕದಲ್ಲಿ ದಿನೇಶ್ ಕಾರ್ತಿಕ್, ಮಹಿಪಾಲ್ ಲೋಮ್ರೋರ್ ಹೀಗೆ ಬ್ಯಾಟ್ ಬೀಸುವ ಎಲ್ಲರದ್ದು ಶೂನ್ಯ ಸಾಧನೆ. ಈ ಪಂದ್ಯದಲ್ಲಾದರು ಇವರೆಲ್ಲ ಜವಾಬ್ದಾರಿಯು ಬ್ಯಾಟಿಂಗ್ ನಡೆಸುವ ಅಗತ್ಯವಿದೆ.