ಲಕ್ನೋ: ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ಸರ್ವಾಂಗೀಣ ಪ್ರದರ್ಶನ ತೋರಿದ ಅಫಘಾನಿಸ್ತಾನ(NED vs AFG) ತಂಡ ನೆದರ್ಲೆಂಡ್ಸ್ ವಿರುದ್ಧ 7 ವಿಕೆಟ್ಗಳ ಗೆಲುವು ಸಾಧಿಸಿ ಸೆಮಿಫೈನಲ್ ಸನಿಹಕ್ಕೆ ಬಂದು ನಿಂತಿದೆ. ಇದು ಆಡಿದ 7 ಪಂದ್ಯಗಳಲ್ಲಿ ಆಫ್ಘನ್ಗೆ ಒಲಿದ 4ನೇ ಗೆಲುವಾಗಿದೆ. ಈ ಗೆಲುವಿನೊಂದಿಗೆ ಆಫ್ಘನ್ ಅಂಕಪಟ್ಟಿಯಲ್ಲಿ ಪಾಕಿಸ್ತಾನವನ್ನು ಹಿಂದಿಕ್ಕಿ 5ನೇ ಸ್ಥಾನಕ್ಕೇರಿದೆ. ಇನ್ನುಳಿದ 2 ಪಂದ್ಯಗಳನ್ನು ಗೆದ್ದರೆ ಸೆಮಿ ಟಿಕೆಟ್ ಖಾತ್ರಿಗೊಳ್ಳಲಿದೆ.
ಲಕ್ನೋದ ಭಾರತ ರತ್ನ ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಏಕನಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಸಣ್ಣ ಮೊತ್ತದ ಮೇಲಾಟದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ನೆದರ್ಲೆಂಡ್ಸ್ 46.3 ಓವರ್ಗಳಲ್ಲಿ ಕೇವಲ 179 ರನ್ಗಳಿಸಿ ಸರ್ವಪತನ ಕಂಡಿತು. ಸುಲಭ ಗುರಿ ಬೆನ್ನಟ್ಟಿದ ಆಫ್ಘನ್ ಆರಂಭಿಕ ಆಘಾತ ಕಂಡರೂ ಆ ಬಳಿಕ ಚೇತರಿಕೆ ಕಂಡು 31.3 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 181 ರನ್ ಬಾರಿಸಿ ಜಯಭೇರಿ ಮೊಳಗಿಸಿತು.
Who needs fielders 😎
— ICC Cricket World Cup (@cricketworldcup) November 3, 2023
This Saqib Zulfiqar wicket is one of the moments that could be featured in your @0xFanCraze Crictos Collectible packs!
Visit https://t.co/2yiXAnq84l to own iconic moments from the #CWC23 pic.twitter.com/2xogvcU8ES
ಇದನ್ನೂ ಓದಿ ಮಳೆ ಭೀತಿಯ ಮಧ್ಯೆ ಪಾಕ್-ಕಿವೀಸ್ ಅದೃಷ್ಟ ಪರೀಕ್ಷೆ; ಇತ್ತಂಡಗಳಿಗೂ ಗೆಲುವು ಅತ್ಯಗತ್ಯ
ಚೇಸಿಂಗ್ ವೇಳೆ ಆಫ್ಘನ್ ತಂಡ ಆರಂಭಿಕರಾದ ರಹಮಾನುಲ್ಲಾ ಗುರ್ಬಾಜ್(10) ಮತ್ತು ಇಬ್ರಾಹಿಂ ಜದ್ರಾನ್(20) ಅವರ ವಿಕೆಟ್ ಬೇಗನೆ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಆದರೆ ಆ ಬಳಿಕ ಕ್ರೀಸ್ಗಿಳಿದ ರಹಮತ್ ಶಾ ಮತ್ತು ನಾಯಕ ಹಶ್ಮತುಲ್ಲಾ ಶಾಹಿದಿ ಉತ್ತಮ ಇನಿಂಗ್ಸ್ ಕಟ್ಟಿ ತಂಡಕ್ಕೆ ಹಾನಿಯಾಗದಂತೆ ನೋಡಿಕೊಂಡರು. ಇದೇ ವೇಳೆ ರಹಮತ್ ಶಾ ಅವರು 47 ಎಸೆತಗಳಿಂದ ಅರ್ಧಶತಕ ಪೂರ್ತಿಗೊಳಿಸಿದರು.
ಅರ್ಧಶತಕ ಬಾರಿಸಿ 2 ರನ್ ಗಳಿಸಿಸುವ ವೇಳೆ ರಹಮತ್ ಶಾ ವಿಕೆಟ್ ಕೈಚೆಲ್ಲಿದರು. ಒಟ್ಟು 54 ಎಸೆತ ಎದುರಿಸಿದ ಅವರು 8 ಬೌಂಡರಿ ಚಚ್ಚಿ 52 ರನ್ ಗಳಿಸಿದರು. ಮೂರನೇ ವಿಕೆಟ್ಗೆ ಶಾಹಿದಿ ಜತೆ ಅತ್ಯಮೂಲ್ಯ 74 ರನ್ಗಳನ್ನು ಒಟ್ಟುಗೂಡಿಸಿದರು. ಈ ವಿಕೆಟ್ ಪತನ ಬಳಿಕ ನಾಯಕ ಹಶ್ಮತುಲ್ಲಾ ಅಜೇಯ ಅರ್ಧಶತಕ ಬಾರಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಇವರಿಗೆ ಅಜ್ಮತುಲ್ಲಾ ಒಮರ್ಜಾಯ್ ಉತ್ತಮ ಸಾಥ್ ನೀಡಿದರು. ಒಮರ್ಜಾಯ್ 31 ರನ್ ಬಾರಿಸಿ ಅಜೇಯರಾಗಿ ಉಳಿದರು. ಹಶ್ಮತುಲ್ಲಾ 64 ಎಸೆತಗಳಿಂದ ಅಜೇಯ 56 ಬಾರಿಸಿದರು.
ಬ್ಯಾಟಿಂಗ್ ಜೋಶ್ ಮರೆತ ನೆದರ್ಲೆಂಡ್ಸ್
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ ನೆದರ್ಲೆಂಡ್ಸ್, ಈ ಹಿಂದಿನ ಬ್ಯಾಟಿಂಗ್ ಜೋಶ್ ತೋರುವಲ್ಲಿ ವಿಫಲವಾಯಿತು. ಎಂತಹದ್ದೇ ಬಲಿಷ್ಠ ತಂಡವಾಗಿದ್ದರೂ ಅವರ ಎದುರು ಕನಿಷ್ಟ 250 ಗಡಿ ದಾಟಿದ ಸಾಧನೆ ನೆದರ್ಲೆಂಟ್ಸ್ ತಂಡದ್ದಾಗಿತ್ತು. ಆರಂಭಿಕ ಹಂತದಲ್ಲಿ 50 ಒಳಗಡೆ 5 ವಿಕೆಟ್ ಕಳೆದುಕೊಂಡರೂ ಆ ಬಳಿಕ ಬರುವ ನಾಯಕ ಸ್ಕಾಟ್ ಎಡ್ವರ್ಡ್ಸ್ ಮತ್ತು 7ನೇ ಕ್ರಮಾಂಕದಲ್ಲಿ ಆಡಲಿಳಿಯುವ ವ್ಯಾನ್ ಡೆರ್ ಮೆರ್ವೆ ಸೇರಿಕೊಂಡು ಬೃಹತ್ ಮೊತ್ತದ ಜತೆಯಾಟ ನಡೆಸುವ ಮೂಲಕ ತಂಡಕ್ಕೆ ನೆರವಾಗುತ್ತಿದ್ದರು. ಆದರೆ ಈ ಪಂದ್ಯದಲ್ಲಿ ಉಭಯ ಆಟಗಾರರು ಬೇಗನೆ ವಿಕೆಟ್ ಕಳೆದುಕೊಂಡರು.
ನಂಬುಗೆಯ ಬ್ಯಾಟರ್ ಸ್ಕಾಟ್ ಎಡ್ವರ್ಡ್ಸ್ ಶೂನ್ಯಕ್ಕೆ ಔಟಾದದ್ದು ತಂಡಕ್ಕೆ ಭಾರಿ ಹಿನ್ನಡೆಯಾಯಿತು. ಇವರ ಜತೆಗಾರ ವ್ಯಾನ್ ಡೆರ್ ಮೆರ್ವೆ ಕೂಡ 11 ರನ್ಗೆ ಆಟ ಮುಗಿಸಿದರು. ತಮಡಕ್ಕೆ ಆಸರೆಯಾದದ್ದು ಇಬ್ಬರು ಮಾತ್ರ. ಮ್ಯಾಕ್ಸ್‌ ಓ ಡೌಡ್‌ ಮತ್ತು ಸೈಬ್ರಾಂಡ್ ಎಂಗಲ್‌ಬ್ರೆಕ್ಟ್. ಇವರು ಕೆಲ ಕಾಲ ಕ್ರೀಸ್ ಆಕ್ರಮಿಸಿದ ಕಾರಣ ತಂಡ 150 ಗಡಿ ದಾಟಿತು. ಇಲ್ಲವಾದರೆ 100ರ ಒಳಗಡೆ ಕುಸಿಯುತ್ತಿತ್ತು.
ಎಂಗಲ್‌ಬ್ರೆಕ್ಟ್ ಅರ್ಧಶತಕ
ಮ್ಯಾಕ್ಸ್‌ ಓ ಡೌಡ್‌ 40 ಎಸೆತ ಎದುರಿಸಿ 9 ಬೌಂಡರಿ ನೆರವಿನಿಂದ 42 ರನ್ ಗಳಿಸಿದರು. ಸೈಬ್ರಾಂಡ್ ಎಂಗಲ್‌ಬ್ರೆಕ್ಟ್ ಅವರು 6 ಬೌಂಡರಿ ನೆರವಿನಿಂದ 58 ರನ್ ಬಾರಿಸಿ ಅರ್ಧಶತಕ ಪೂರ್ತಿಗೊಳಿಸಿದರು. ಅಕರ್ಮನ್ 29 ರನ್ ಗಳಿಸಿ ಸಣ್ಣ ಕೊಡುಗೆ ಸಲ್ಲಿಸಿದರು. ನೆದರ್ಲೆಂಡ್ಸ್ ಬ್ಯಾಟಿಂಗ್ ಇನಿಂಗ್ಸ್ನಲ್ಲಿ ಕನಿಷ್ಠ ಒಂದು ಸಿಕ್ಸರ್ ಕೂಡ ದಾಖಲಾಗಲಿಲ್ಲ. ಆಫ್ಘನ್ ಪರ ಅನುಭವಿ ಮತ್ತು ಹಿರಿಯ ಸ್ಪಿನ್ನರ್ ಮೊಹಮ್ಮದ್ ನಬಿ ಒಂದು ಮೇಡನ್ 28 ರನ್ ವೆಚ್ಚದಲ್ಲಿ 3 ವಿಕೆಟ್ ಕಿತ್ತರು. ನೂರ್ ಅಹ್ಮದ್ 31 ರನ್ಗೆ 2 ವಿಕೆಟ್ ಪಡೆದರು. ರಶೀದ್ ಖಾನ್ 10 ಓವರ್ ಬೌಲಿಂಗ್ ನಡೆಸಿದರೂ ವಿಕೆಟ್ ಲೆಸ್ ಎನಿಸಿಕೊಂಡರು.