ಅಹಮದಾಬಾದ್: ಹಕಿಮ್ ಅಮನ್ ಖಾನ್ (51) ಬಾರಿಸಿದ ಸಂದರ್ಭೋಚಿತ ಅರ್ಧ ಶತಕದ ನೆರವು ಪಡೆದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 44ನೇ ಪಂದ್ಯದಲ್ಲಿ ಲಕ್ನೊ ತಂಡದ ವಿರುದ್ಧ 130 ರನ್ ಬಾರಿಸಿದೆ. ಆರಂಭಿಕ ಕ್ರಮಾಂಕದ ಬ್ಯಾಟರ್ಗಳು ಮತ್ತೆ ವಿಫಲಗೊಂಡರು. ಅಮನ್ ಖಾನ್ ಸೇರಿದಂತೆ ಮಧ್ಯಮ ಕ್ರಮಾಂಕದ ಬ್ಯಾಟರ್ಗಳು ತಂಡದ ಮರ್ಯಾದೆ ಕಾಪಾಡಿದರು. ಇದರಿಂದಾಗಿ ಆತಿಥೇಯ ಗುಜರಾತ್ ತಂಡದ ಗೆಲುವಿಗೆ 131 ರನ್ಗಳ ಸಾಧಾರಣ ಸವಾಲು ಎದುರಾಗಿದೆ.
ಇಲ್ಲಿನ ನರೇಂದ್ರ ಮೋದಿ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಆದರೆ, ತಂಡದ ಬ್ಯಾಟರ್ಗಳು ನಿರ್ಧಾರಕ್ಕೆ ತಕ್ಕ ಹಾಗೆ ಬ್ಯಾಟಿಂಗ್ ಮಾಡಲಿಲ್ಲ. ಹೀಗಾಗಿ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 130 ರನ್ ಬಾರಿಸಿತು.
ದೊಡ್ಡ ಮೊತ್ತದ ರನ್ ಕೂಡಿಕೆ ಮಾಡುವ ಉದ್ದೇಶದೊಂದಿಗೆ ಬ್ಯಾಟ್ ಮಾಡಿದ ಡೆಲ್ಲಿ ತಂಡ ಹೀನಾಯ ಪ್ರದರ್ಶನ ನೀಡಿತು. ಆರಂಭಿಕ ಬ್ಯಾಟರ್ಗಳಾದ ಫಿಲ್ ಸಾಲ್ಟ್ ಶೂನ್ಯಕ್ಕೆ ಔಟಾದರೆ ಡೇವಿಡ್ ವಾರ್ನರ್ ಅನಗತ್ಯ ರನ್ಔಟ್ಗೆ ಬಲಿಯಾದರು. ಪ್ರಿಯಮ್ ಗರ್ಗ್ ಕೊಡುಗೆ 10 ರನ್. ಮಾರ್ಶ್ ಬದಲಿಗೆ ಆಡುವ ಅವಕಾಶ ಪಡೆದ ರಿಲೀ ರೊಸ್ಸೊ ಬಂದ ಹಾಗೆ ಎರಡು ಫೋರ್ ಬಾರಿಸಿ ವಿಶ್ವಾಸ ಮೂಡಿಸಿದರೂ ಹೆಚ್ಚು ಹೊತ್ತು ಕ್ರಿಸ್ನಲ್ಲಿ ನಿಲ್ಲಲಿಲ್ಲ. ಮನೀಶ್ ಪಾಂಡೆಯ ಇನಿಂಗ್ಸ್ 1 ರನ್ಗೆ ಕೊನೆಯಾಯಿತು. 23 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡ ಡೆಲ್ಲಿ 100 ರನ್ ಮಾಡುವುದೂ ಕಷ್ಟ ಎನಿಸಿತ್ತು.
ಅಕ್ಷರ್ ಪಟೇಲ್ ಎಂದಿನಂತೆ ಆಡಿ 27 ರನ್ ಬಾರಿಸಿ ಔಟಾದರು. ಈ ವೇಳೆ ಜತೆಯಾದ ಅಮನ್ ಖಾನ್ ಹಾಗೂ ರಿಪಾಲ್ ಪಟೇಲ್ (23) ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. ಹೀಗಾಗಿ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ತಂಡಕ್ಕೆ ನೆರವಾಯಿತು.
ನೆರವಾದ ಅಮನ್
ಆರಂಭಿಕ ಹಿನ್ನಡೆಯೊಂದಿಗೆ ಕುಸಿದಿದ್ದ ಡೆಲ್ಲಿ ತಂಡಕ್ಕೆ ಅಮನ್ ಖಾನ್ ಅನಿರೀಕ್ಷಿತವಾಗಿ ನೆರವಾದರು. ಅರಂಭದಲ್ಲ ನಿಧಾನವಾಗಿ ಆಡಿದ ಅವರು 3 ಸಿಕ್ಸರ್ ಹಾಗೂ 3 ಫೊರ್ಗಳೊಂದಿಗೆ ಅರ್ಧ ಶತಕ ಬಾರಿಸಿದರು. ಅವರು ರಿಪಾಲ್ ಪಟೇಲ್ ಜತೆ ಸೇರಿ 56 ರನ್ಗಳ ಜತೆಯಾಟ ನೀಡಿದರು.
ಗುಜರಾ್ ತಂಡದ ಪರವಾಗಿ ಮೊಹಮ್ಮದ್ ಶಮಿ 11 ರನ್ಗಳಿಗೆ 4 ವಿಕೆಟ್ ಪಡೆದು ಮಿಂಚಿದರೆ, ಮೋಹಿತ್ ಶರ್ಮಾ 33 ರನ್ಗಳಿಗೆ 2 ವಿಕೆಟ್ ತಮ್ಮದಾಗಿಸಿಕೊಂಡರು.