ದುಬೈ : ಟೀಮ್‌ ಇಂಡಿಯಾದ ಮಾಜಿ ನಾಯಕ ವಿರಾಟ್‌ ಕೊಹ್ಲಿಗೆ ಪಾಕಿಸ್ತಾನದಲ್ಲಿ ಸಾಕಷ್ಟು ಅಭಿಮಾನಿಗಳು ಇದ್ದಾರೆ. ಕ್ರಿಕೆಟ್‌ ಪ್ರೇಮಿಗಳ ದೇಶದಲ್ಲಿ ಮತ್ತೊಂದು ದೇಶದ ಆಟಗಾರನಿಗೆ ಅಭಿಮಾನಿಗಳು ಇರುವುದು ಹೊಸದಲ್ಲ. ಅದರೆ, ಪಾಕಿಸ್ತಾನ ತಂಡದಲ್ಲೇ ಒಬ್ಬರು ವಿರಾಟ್‌ ಕೊಹ್ಲಿಯ ಅಪ್ಪಟ ಅಭಿಮಾನಿಯೊಬ್ಬರಿದ್ದಾರೆ. ಅವರೇ ವೇಗದ ಬೌಲರ್‌ ಮೊಹಮ್ಮದ್‌ ರವೂಫ್. ಭಾನುವಾರ ಪಂದ್ಯ ಮುಗಿದ ಬಳಿಕ ರವೂಫ್ ವಿರಾಟ್‌ ಕೊಹ್ಲಿ ಅವರಿಂದ ಜರ್ಸಿಯನ್ನು ಪಡೆದುಕೊಂಡಿದ್ದಾರೆ.
ವಿರಾಟ್‌ ಅವರಿಂದ ಹಸ್ತಾಕ್ಷರ ಹಾಕಿಸಿಕೊಂಡು ಜರ್ಸಿಯನ್ನು ಪಡೆದುಕೊಳ್ಳುತ್ತಿರುವ ವಿಡಿಯೊವನ್ನು ಬಿಸಿಸಿಐ ಟ್ವೀಟ್‌ ಮಾಡಿದೆ. “ಇದು ಹೃದಯಸ್ಪರ್ಶಿ ಸಂದರ್ಭವಾಗಿದ್ದು, ವಿರಾಟ್‌ ಕೊಹ್ಲಿ ಪಾಕಿಸ್ತಾನ ತಂಡದ ಬೌಲರ್‌ ಮೊಹಮ್ಮದ್‌ ರವೂಫ್ ಅವರಿಗೆ ಸಹಿ ಹಾಕಿ ಜರ್ಸಿ ನೀಡಿದ್ದಾರೆ,” ಎಂದು ಬರೆದುಕೊಂಡಿದ್ದಾರೆ.
ಭಾರತ ಹಾಗೂ ಪಾಕಿಸ್ತಾನ ನಡುವೆ ಭಾನುವಾರ ನಡೆದ ಪಂದ್ಯದಲ್ಲಿ ಭಾರತ ತಂಡ ಪಾಕಿಸ್ತಾನದ ವಿರುದ್ಧ ೫ ವಿಕೆಟ್‌ಗಳ ಜಯ ದಾಖಲಿಸಿತ್ತು. ಮೊದಲು ಬ್ಯಾಟ್‌ ಮಾಡಿದ ಪಾಕಿಸ್ತಾನ ತಂಡ ೧೪೭ ರನ್‌ಗಳಿಗೆ ಆಲ್‌ಔಟ್‌ ಅದರೆ, ಗುರಿ ಬೆನ್ನಟ್ಟಿದ ಭಾರತ ೧೯.೪ ಓವರ್‌ಗಳಲ್ಲಿ ಐದು ವಿಕೆಟ್‌ ನಷ್ಟಕ್ಕೆ ೧೪೮ ರನ್‌ ಬಾರಿಸಿ ಗೆಲುವು ಕಂಡಿತ್ತು.