ಹ್ಯಾಂಗ್‌ಝೌ: ಏಷ್ಯನ್ ಗೇಮ್ಸ್ನಲ್ಲಿ(Asian Games 2023) ರೋಹನ್ ಬೋಪಣ್ಣ(Rohan Bopanna) ಮತ್ತು ರುತುಜಾ ಭೋಸಲೆ(Rutuja Bhosale) ಮಿಕ್ಸೆಡ್‌ ಡಬಲ್ಸ್ ಟೆನಿಸ್ನಲ್ಲಿ ಚಿನ್ನದ ಪದಕ ಗೆದ್ದ ಸಾಧನೆ ಮಾಡಿದ್ದಾರೆ. ಇದು ಶನಿವಾರ ಭಾರತಕ್ಕೆ ಒಲಿದ ದ್ವಿತೀಯ ಪದಕವಾಗಿದೆ. ಇದಕ್ಕೂ ಮುನ್ನ ನಡೆದಿದ್ದ 10 ಮೀ. ಏರ್ ಪಿಸ್ತೂಲ್ ಮಿಶ್ರ ತಂಡ ಬೆಳ್ಳಿ ಪದಕ ಜಯಿಸಿತ್ತು.
ಶನಿವಾರ ನಡೆದ ಫೈನಲ್ನಲ್ಲಿ ತೈವಾನ್ನ ಒಂಬತ್ತನೇ ಶ್ರೇಯಾಂಕದ ತ್ಸುಂಗ್-ಹಾವೊ ಹುವಾಂಗ್ ಮತ್ತು ಎನ್-ಶುವೊ ಲಿಯಾಂಗ್ ವಿರುದ್ಧ 2-6, 6-3, 10-4 ಅಂತರದಿಂದ ಗೆದ್ದು ಚಿನ್ನದ ಪದಕ ಗೆದ್ದು ಮೆರೆದಾಡಿದರು. ಸೆಮಿಫೈನಲ್ನಲ್ಲಿ ಬೋಪಣ್ಣ ಮತ್ತು ರುತುಜಾ ಜೋಡಿ ಚೈನಿಸ್ ತೈಪೆಯ ಚಾನ್ ಚಿಂಗ್-ಯು ಸ್ಯು ವಿರುದ್ಧ 6-1, 3-6,(10-4) ಅಂತರದಲ್ಲಿ ಗೆದ್ದು ಫೈನಲ್ ಪ್ರವೇಶ ಪಡೆದಿತ್ತು.
ಮೊದಲ ಸುತ್ತಿನಲ್ಲಿ ಸೋಲು
ಮೊದಲ ಸೆಟ್ ನಲ್ಲಿ 2-6 ರಲ್ಲಿ ಸೋಲು ಕಂಡ ಭಾರತೀಯ ಜೋಡಿ ಎರಡನೇ ಸೆಟ್ನಲ್ಲಿ ಆಕ್ರಮಣ ಆಟಕ್ಕೆ ಒತ್ತು ನೀಡಿ ಪಂದ್ಯದಲ್ಲಿ ಹಿಡಿತ ಸಾಧಿಸಿತು. ನಿರ್ಣಾಯಕ ಸೆಟ್ನಲ್ಲಿ ಟೈ-ಬ್ರೇಕರ್‌ಗೆ ಸಾಗಿದ ಪಂದ್ಯವನ್ನು 10-4 ಅಂತರದಲ್ಲಿ ಗೆಲ್ಲುವಲ್ಲಿ ಭಾರತೀಯ ಜೋಡಿ ಯಶಸ್ವಿಯಾಯಿತು. ಈ ಪಂದ್ಯ 1 ಗಂಟೆ 14 ನಿಮಿಷಗಳಲ್ಲಿ ಅಂತ್ಯ ಕಂಡಿತು. ಈ ಪದಕ ಗೆಲ್ಲುವ ಮೂಲಕ ಕಳೆದ 6 ಏಷ್ಯಡ್ ಟೂರ್ನಿಯಲ್ಲಿ ಟೆನಿಸ್ನಲ್ಲಿ ಭಾರತ ಕನಿಷ್ಠ ಒಂದು ಚಿನ್ನವನ್ನು ಗೆಲ್ಲುತ್ತಿದ್ದ ದಾಖಲೆಯನ್ನು ಮುಂದುವರಿಸಿತು.
𝙂𝙊𝙇𝘿 𝙄𝙏 𝙄𝙎!🥇🌟
— SAI Media (@Media_SAI) September 30, 2023
🇮🇳 mixed doubles duo, @RutujaBhosale12 and #TOPSchemeAthlete @rohanbopanna have clinched GOLD, showcasing their unmatched talent and teamwork on the world stage. 🏆🎾
Let's applaud their remarkable victory at the #AsianGames2022 with pride and passion!… pic.twitter.com/kpZs1JcLq4
43 ವರ್ಷದ ಕೊಡಗಿನವರಾದ ರೋಹನ್ ಬೋಪಣ್ಣ ಅವರು ಕಳೆದ ತಿಂಗಳು ನಡೆದಿದ್ದ ಯುಎಸ್ ಓಪನ್‌ 2023ರ(US Open 2023) ಪುರುಷರ ಡಬಲ್ಸ್ ವಿಭಾಗದಲ್ಲಿ ರನ್ನರ್ಅಪ್ ಸ್ಥಾನ ಪಡೆದಿದ್ದರು. ಇದೇ ವರ್ಷ ದೋಹಾ ಮತ್ತು ಇಂಡಿಯನ್ ವೆಲ್ಸ್‌ನಲ್ಲಿ ಪ್ರಶಸ್ತಿ ಗೆದ್ದಿದ್ದರು.
ಶೂಟಿಂಗ್ನಲ್ಲಿ ಬೆಳ್ಳಿ
ಶನಿವಾರ ಬೆಳಗ್ಗೆ ನಡೆದ 10 ಮೀ. ಏರ್ ಪಿಸ್ತೂಲ್ ಮಿಶ್ರ ತಂಡ ಸ್ಪರ್ಧೆಯಲ್ಲಿ ಕರ್ನಾಟಕದ ದಿವ್ಯಾ ಟಿ.ಎಸ್.(Divya TS ) ಮತ್ತು ಅವರ ಜತೆಗಾರ ಸರಬ್ಜೋತ್ ಸಿಂಗ್(Sarabjot Singh) ಬೆಳ್ಳಿ ಪದಕ ತಮ್ಮದಾಗಿಸಿಕೊಂಡಿದ್ದರು. ಶುಕ್ರವಾರ ಶೂಟಿಂಗ್ನಲ್ಲಿ 2 ಚಿನ್ನ ಹಾಗೂ 3 ಬೆಳ್ಳಿ ಪದಕ ಒಲಿದಿತ್ತು.
ಇದನ್ನೂ ಓದಿ Asian Games 2023: 10 ಮೀ. ಏರ್ ಪಿಸ್ತೂಲ್ ಮಿಶ್ರ ತಂಡಕ್ಕೆ ಒಲಿದ ಬೆಳ್ಳಿ ಪದಕ
ಫೈನಲ್ನಲ್ಲಿ ಚೀನಾ ವಿರುದ್ಧ ಉತ್ತಮ ಪ್ರದಶನ ತೋರಿದ ಭಾರತೀಯ ಜೋಡಿ ಕೇವಲ ನಾಲ್ಕು ಅಂಕಗಳ ಅಂತರದಿಂದ ಚಿನ್ನದ ಪದಕ ತಪ್ಪಿಸಿಕೊಂಡರು. 14-16ರಲ್ಲಿ ಸೋಲು ಕಂಡರು. ಶೂಟಿಂಗ್ನಲ್ಲಿ ಈ ಬಾರಿ ಭಾರತ 6 ಚಿನ್ನ, 8 ಬೆಳ್ಳಿ ಹಾಗೂ 5 ಕಂಚು ಸೇರಿ 19 ಪದಕ ಗೆದ್ದಿದೆ. ಇದು ಈ ಕೂಟದ ಇತಿಹಾಸದಲ್ಲೇ ಭಾರತದ ಶ್ರೇಷ್ಠ ಸಾಧನೆಯಾಗಿದೆ. 2006ರ ದೋಹಾ ಆವೃತ್ತಿಯಲ್ಲಿ ಭಾರತ 14 ಪದಕ ಗೆದ್ದಿದ್ದು, ಭಾರತದ ಈವರೆಗಿನ ಶ್ರೇಷ್ಠ ಪ್ರದರ್ಶನವಾಗಿತ್ತು. ಆದರೆ ಈ ಬಾರಿ ಇದನ್ನು ಮೀರಿ ನಿಂತಿದೆ. ಅಲ್ಲದೆ ಮುಂದಿನ ವರ್ಷ ಪ್ಯಾರಿಸ್ನಲ್ಲಿ ನಡೆಯುವ ಒಲಿಂಪಿಕ್ಸ್ನಲ್ಲಿ ಭಾರತಕ್ಕೆ ಪದಕ ಬರವಸೆಯನ್ನು ಮೂಡಿಸಿದೆ.
ಒಲಿಂಪಿಕ್ಸ್ ಅರ್ಹತೆ ಪಡೆದ ನಿಖತ್ ಜರೀನ್
ಎರಡು ಬಾರಿಯ ವಿಶ್ವ ಚಾಂಪಿಯನ್‌ ಭಾರತದ ಸ್ಟಾರ್ ಮಹಿಳಾ ಬಾಕ್ಸರ್ ನಿಖತ್ ಜರೀನ್ ಅವರು ಶುಕ್ರವಾರ 50 ಕೆ.ಜಿ. ವಿಭಾಗದ ಕ್ವಾರ್ಟರ್ ಫೈನಲ್ನಲ್ಲಿ ಗೆದ್ದು ಸೆಮಿಫೈನಲ್ ಪ್ರವೇಶ ಪಡೆಯುವ ಜತೆಗೆ ಒಲಿಂಪಿಕ್ಸ್ ಅರ್ಹತೆಯನ್ನು ಪಡೆದಿದ್ದರು. ಜತೆಗೆ 2024ರ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದ ಭಾರತದ ಮೊದಲ ಬಾಕ್ಸರ್ ಎನ್ನುವ ಹಿರಿಮೆಗೂ ಪಾತ್ರರಾಗಿದ್ದರು. ಕ್ವಾರ್ಟರ್ ಫೈನಲ್ನಲ್ಲಿ ಜರೀನ್ ಅವರು ಬಲಿಷ್ಠ ಪಂತ್ಗಳ ಮೂಲಕ ಜೊರ್ಡನ್‌ನ ನಸ್ಸರ್‌ ಹನನ್‌ ವಿರುದ್ಧ ಕೇವಲ 2 ನಿಮಿಷಗಳಲ್ಲಿ ಗೆಲುವು ಸಾಧಿಸಿದ್ದರು.