ಅಹಮದಾಬಾದ್: ಸೆಮಿಫೈನಲ್ ಪ್ರವೇಶದ ಸಣ್ಣ ಕನಸೊಂದನ್ನು ಕಂಡಿದ್ದ ಹಾಲಿ ಚಾಂಪಿಯನ್ ಇಂಗ್ಲೆಂಡ್(AUS vs ENG) ತಂಡದ ಈ ಕನಸು ಭಗ್ನಗೊಂಡಿದೆ. ಆಸ್ಟ್ರೇಲಿಯಾ ವಿರುದ್ಧ 33 ರನ್ಗಳ ಸೋಲಿಗೆ ತುತ್ತಾಗಿ ಟೂರ್ನಿಯಿಂದ ಅಧಿಕೃತವಾಗಿ ಹೊರಬಿದ್ದಿತು. ಗೆಲುವು ಕಂಡ ಆಸೀಸ್ 10 ಅಂಕ ಸಂಪಾದಿಸಿ ಸೆಮಿ ಫೈನಲ್ ಬಾಗಿಲಿಗೆ ಬಂದು ನಿಂತಿದೆ.
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಆಹ್ವಾನ ಪಡೆದ ಆಸ್ಟ್ರೇಲಿಯಾ ಸಂಘಟಿತ ಬ್ಯಾಟಿಂಗ್ ಪ್ರದರ್ಶನದ ನೆರವಿನಿಂದ 49.3 ಓವರ್ಗಳಲ್ಲಿ 286 ರನ್ ಗಳಿಸಿ ಆಲೌಟ್ ಆಯಿತು. ಸುಲಭ ಮೊತ್ತವನ್ನು ಈ ಬಾರಿಯಾದರೂ ಬೆನ್ನಟ್ಟಿ ಇಂಗ್ಲೆಂಡ್ ಗೆಲುವು ಕಾಣಬಹುದು ಎಂದು ನಿರೀಕ್ಷೆ ಮಾಡಲಾಯಿತು. ಆದರೆ ಆಂಗ್ಲರದ್ದು ಅದೇ ಹಾಡು ಅದೇ ರಾಗ ಎಂಬಂತೆ ಮತ್ತೆ ಕಳಪೆ ಪ್ರದರ್ಶನ ತೋರುವ ಮೂಲಕ 253 ರನ್ಗೆ ಸರ್ವಪತನ ಕಂಡಿತು. ಈ ಸೋಲಿನೊಂದಿಗೆ ಆಂಗ್ಲರು ವಿಶ್ವಕಪ್ನಿಂದ ಹೊರಬಿದ್ದ ಸಂಕಟಕ್ಕೆ ಸಿಲುಕಿದರು.
ಇದನ್ನೂ ಓದಿ ಭಾರತ ವಿರುದ್ಧ ಆಡುವ ಮುನ್ನವೇ ಸೆಮಿಫೈನಲ್ ತಲುಪಿದ ದಕ್ಷಿಣ ಆಫ್ರಿಕಾ
ಸ್ಟೋಕ್ಸ್-ಮಲಾನ್ ಅರ್ಧಶತಕ ವ್ಯರ್ಥ
ಸಾಧಾರಣ ಮೊತ್ತವನ್ನು ಬೆನ್ನಟ್ಟಿದ ಇಂಗ್ಲೆಂಡ್ಗೆ ಆರಂಭಕಾರ ಡೇವಿಡ್ ಮಲಾನ್ ಮತ್ತು ನಿವೃತ್ತಿ ವಾಪಸ್ ಪಡೆದು ಬಂದ 2019 ವಿಶ್ವಕಪ್ ಗೆಲುವಿನ ಹೀರೊ ಬೆನ್ ಸ್ಟೋಕ್ಸ್ ಅರ್ಧಶತಕ ಬಾರಿಸಿ ಒಂದು ಹಂತದಲ್ಲಿ ತಂಡಕ್ಕೆ ಆಸರೆಯಾದರು. ಉಭಯ ಆಟಗಾರು ಕೆಲ ಕಾಲ ಆಸೀಸ್ ಬೌಲರ್ಗಳ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ತಂಡಕ್ಕೆ ಗೆಲುವು ತಂದು ಕೊಡುವ ಸೂಚನೆ ನೀಡಿದರು. ಆದರೆ ಇವರ ವಿಕೆಟ್ ಪತನದ ಬಳಿಕ ತಂಡ ನಾಟಕೀಯ ಕುಸಿತ ಕಂಡಿತು. ಬೆನ್ ಸ್ಟೋಕ್ಸ್ ಅವರು 90 ಎಸೆತ ಎದುರಿಸಿ 3 ಸಿಕ್ಸರ್ ಮತ್ತು 2 ಬೌಂಡರಿ ನೆರವಿನಿಂದ 64 ರನ್ ಬಾರಿಸಿದರು. ಮಲಾನ್ 4 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ ಭರ್ತಿ 50 ರನ್ ಗಳಿಸಿದರು. ನಂಬುಗೆಯ ಬ್ಯಾಟರ್ ಜೋ ರೂಟ್(13) ಮತ್ತು ಜಾನಿ ಬೇರ್ ಸ್ಟೋ ಶೂನ್ಯಕ್ಕೆ ಔಟಾದರು.
ಮೂರು ವಿಕೆಟ್ ಕಿತ್ತ ಜಂಪಾ
ಅಂತಿಮ ಹಂತದಲ್ಲಿ ಮೊಯಿನ್ ಅಲಿ ಮತ್ತು ಕ್ರಿಸ್ ವೋಕ್ಸ್ ಹೋರಾಟ ಜಾರಿಯಲ್ಲಿರಿಸಿದರೂ ಇವರಿಂದ ಪಂದ್ಯವನ್ನು ಗೆಲುವಿನ ಗಡಿ ದಾಟಿಸಲು ಸಾಧ್ಯವಾಗಲಿಲ್ಲ. ಮೊಯಿನ್ ಅಲಿ 42 ರನ್ ಗಳಿಸಿದರೆ, ವೋಕ್ಸ್ 32 ರನ್ ಬಾರಿಸಿದರು. ಆಸೀಸ್ ಪರ ಆ್ಯಡಂ ಜಂಪಾ 21 ರನ್ಗೆ ಮೂರು ವಿಕೆಟ್ ಕಿತ್ತು. ಆಂಗ್ಲರ ಹೆಡೆಮುರಿ ಕಟ್ಟಿದರು. ಇವರಿಗೆ ಮಾರ್ಕಸ್ ಸ್ಟೋಯಿನಿಸ್, ಜೋಶ್ ಹ್ಯಾಜಲ್ವುಡ್ ಮತ್ತು ನಾಯಕ ಪ್ಯಾಟ್ ಕಮಿನ್ಸ್ ತಲಾ 2 ವಿಕೆಟ್ ಕಿತ್ತು ಉತ್ತಮ ಸಾಥ್ ನೀಡಿದರು.
ಆಸೀಸ್ಗೆ ಆಸರೆಯಾದ ಲಬುಶೇನ್-ಗ್ರೀನ್
ಮೊದಲು ಬ್ಯಾಟಿಂಗ್ ನಡೆಸಿದ ಆಸೀಸ್ ತಂಡ ಕೂಡ ನಿರೀಕ್ಷಿತ ಆಟ ಪ್ರದರ್ಶಿಸಲು ವಿಫಲವಾಯಿತು. ಡೇಂಜಸರ್ ಬ್ಯಾಟರ್ಗಳಾದ ಡೇವಿಡ್ ವಾರ್ನರ್(15) ಮತ್ತು ಕಳೆದ ಪಂದ್ಯದ ಶತಕ ವೀರ ಟ್ರಾವಿಸ್ ಹೆಟ್(11) ಅಗ್ಗಕ್ಕೆ ಔಟಾದರು. ಬಳಿಕ ಬಂದ ಸ್ಮಿತ್ ಕೂಡ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸುವಲ್ಲಿ ವಿಫಲರಾದರು. ಅವರ ಗಳಿಕೆ 44.
ತಂಡ ಸಂಕಷ್ಟಕ್ಕ ಸಿಲುಕಿದಾಗ ಮಾರ್ನಸ್ ಲುಬುಶೇನ್ ಅರ್ಧಶತಕ ಬಾರಿಸಿ ಆಸರೆಯಾದರು. ಇವರಿಗೆ ಮತ್ತೊಂದು ತುದಿಯಲ್ಲಿ ಕ್ಯಾಮರೂನ್ ಗ್ರೀನ್ ಉತ್ತಮ ಸಾಥ್ ನೀಡಿದರು. ಲಬುಶೇನ್ 71 ರನ್ ಗಳಿಸಿದರೆ, ಗ್ರೀನ್ 47 ರನ್ಗೆ ಔಟಾಗಿ ಕೇವಲ ಮೂರು ರನ್ ಅಂತರದಿಂದ ಅರ್ಧಶತಕ ತಪ್ಪಿಸಿಕೊಂಡರು. ಅಂತಿಮ ಹಂತದಲ್ಲಿ ಮಾರ್ಕಸ್ ಸ್ಟೋಯಿನಿಸ್(35) ಮತ್ತು ಜಂಪಾ(29) ಅವರ ಬಿರಿಸಿನ ಬ್ಯಾಟಿಂಗ್ ನೆರವಿನಿಂದ ತಂಡ ಸ್ಪರ್ಧಾತ್ಮಕ ಮೊತ್ತಗಳಿಸುವಲ್ಲಿ ಯಶಸ್ಸಿಯಾಯಿತು. ಇಂಗ್ಲೆಂಡ್ ಪರ ಬೌಲಿಂಗ್ನಲ್ಲಿ ಕ್ರಿಸ್ ವೋಕ್ಸ್ 4 ವಿಕೆಟ್ ಕಿತ್ತು ಮಿಂಚಿದರು.