ಚಿತ್ತಗಾಂಗ್ : ಭಾರತ ಹಾಗೂ ಬಾಂಗ್ಲಾದೇಶ ನಡುವಿನ ಟೆಸ್ಟ್ ಸರಣಿಯ (INDvsBAN) ಮೊದಲ ಪಂದ್ಯ ಕುತೂಹಲಕಾರಿ ಘಟ್ಟ ತಲುಪಿದೆ. 513 ರನ್ಗಳ ಗೆಲುವಿನ ಗುರಿಯೊಂದಿಗೆ ಎರಡನೇ ಇನಿಂಗ್ಸ್ ಬ್ಯಾಟ್ ಮಾಡುತ್ತಿರುವ ಬಾಂಗ್ಲಾದೇಶ ತಂಡದ ಆರಂಭಿಕ ಬ್ಯಾಟರ್ಗಳು ಪ್ರವಾಸಿ ತಂಡದ ಬ್ಯಾಟರ್ಗಳನ್ನು ಕಾಡಿದ ಹೊರತಾಗಿಯೂ ನಾಲ್ಕನೇ ದಿನ ಅಂತ್ಯಕ್ಕೆ 102 ಒವರ್ಗಳಲ್ಲಿ 6 ವಿಕೆಟ್ ನಷ್ಟ ಮಾಡಿಕೊಂಡು 272 ರನ್ ಪೇರಿಸಿದೆ. ಆದಾಗ್ಯೂ ಆತಿಥೇಯ ತಂಡ 241 ರನ್ಗಳ ಹಿನ್ನಡೆಯಲ್ಲಿದ್ದು ಕೊನೇ ದಿನ ನಾಲ್ಕು ವಿಕೆಟ್ಗಳನ್ನು ಕಬಳಿಸಿದರೆ ಭಾರತ ತಂಡಕ್ಕೆ ಜಯ ದೊರಕಬಹುದು.
ಚಿತ್ತಗಾಂಗ್ ಜಹೂರ್ ಅಹ್ಮದ್ ಚೌಧರಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆಯುತ್ತಿರುವ ಹಣಾಹಣಿಯಲ್ಲಿ ನಾಲ್ಕನೇ ದಿನವಾದ ಶುಕ್ರವಾರದ ಅಂತ್ಯಕ್ಕೆ ಬಾಂಗ್ಲಾದೇಶ ವಿಕೆಟ್ ನಷ್ಟವಿಲ್ಲದೆ 42 ರನ್ ಗಳಿಸಿತ್ತು. ಅದೇ ಲಹರಿಯಲ್ಲಿ ನಾಲ್ಕನೇ ದಿನವಾದ ಶನಿವಾರ ಬ್ಯಾಟಿಂಗ್ ಮುಂದುವರಿಸಿದ ಆರಂಭಿಕರಾದ ನಜ್ಮುಲ್ ಹೊಸೈನ್ (67) ಹಾಗೂ ಜಾಕಿರ್ ಹಸನ್ (100) ಭಾರತದ ಬೌಲರ್ಗಳನ್ನು ಕಾಡಿದರು. ಭೋಜನ ವಿರಾಮದ ವೇಳೆಗೆ ಈ ಜೋಡಿ ವಿಕೆಟ್ ನಷ್ಟವಿಲ್ಲದೆ 119 ರನ್ ಗಳಿಸಿ ಭಾರತದ ಪಾಳೆಯದಲ್ಲಿ ಆತಂಕ ಮೂಡಿಸಿತು. ಆದರೆ, 47ನೇ ಓವರ್ನಲ್ಲಿ ಯಶಸ್ಸು ಸಾಧಿಸಿದ ಉಮೇಶ್ ಯಾದವ್ ನಜ್ಮುಲ್ ವಿಕೆಟ್ ಕಬಳಿಸಿದರು.
ಮೂರನೇ ಕ್ರಮಾಂಕದಲ್ಲಿ ಇಳಿದ ಯಾಸಿರ್ 5 ರನ್ಗಳಿಗೆ ಸೀಮಿತಗೊಂಡರೆ, ಲಿಟನ್ ದಾಸ್ 19 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಇದೇ ವೇಳೆ ಪದಾರ್ಪಣೆ ಪಂದ್ಯವಾಡುತ್ತಿರುವ ಜಾಕಿರ್ ಹಸನ್ (100) ಶತಕ ಬಾರಿಸಿದರು. ಅಲ್ಲಿಗೆ ಆಟ ಮುಗಿಸಿದ ಅವರು ಆರ್ ಅಶ್ವಿನ್ಗೆ ವಿಕೆಟ್ ಒಪ್ಪಿಸಿದರು. ಮುಷ್ಪಿಕರ್ ರಹೀಮ್ (23) ಗಳಿಸಿದರೆ, ನೂರುಲ್ ಹಸನ್ 3 ರನ್ಗೆ ಸೀಮಿತಗೊಂಡರು.
ದಿನದ ಕೊನೇ ಅವಧಿಯಲ್ಲಿ ಆಲ್ರೌಂಡರ್ ಶಕಿಬ್ ಅಲ್ ಹಸನ್ (40*) ಹಾಗೂ ಮೆಹೆದಿ ಹಸನ್ ಮಿರಾಜ್ (9) ಭಾರತ ತಂಡ ಇನ್ನಷ್ಟು ಯಶಸ್ಸು ಗಳಿಸದಂತೆ ನೋಡಿಕೊಂಡರು. ಭಾನುವಾರ ಪಂದ್ಯದ ಕೊನೇ ದಿನವಾಗಿದ್ದು, ಭಾರತ ತಂಡದ ಗೆಲುವಿಗೆ ನಾಲ್ಕು ವಿಕೆಟ್ಗಳ ಅವಶ್ಯಕತೆ ಇದೆ.
ಸ್ಕೋರ್ ವಿವರ
ಭಾರತ : ಮೊದಲ ಇನಿಂಗ್ಸ್ 404; ಎರಡನೇ ಇನಿಂಗ್ಸ್ 258ಕ್ಕೆ2 ಡಿಕ್ಲೇರ್ಡ್.
ಬಾಂಗ್ಲಾದೇಶ : ಮೊದಲ ಇನಿಂಗ್ಸ್ 150; ಎರಡನೇ ಇನಿಂಗ್ಸ್ 102 ಓವರ್ಗಳಲ್ಲಿ 6 ವಿಕೆಟ್ಗೆ 272 (ನಜ್ಮುಲ್ ಹೊಸೈನ್ 67, ಜಾಕಿರ್ ಹಸನ್ 100, ಶಕಿಬ್ ಅಲ್ ಹಸನ್ 40; ಅಕ್ಷರ್ ಪಟೇಲ್ 50 ರನ್ಗಳಿಗೆ 3).
ಇದನ್ನೂ ಓದಿ | INDvsBAN | ಕೊಹ್ಲಿ ಮರ್ಯಾದೆ ಕಾಪಾಡಿದ ಪಂತ್; ಕೈ ಮುಗಿದು ಅಭಿನಂದಿಸಿದ ನಾಯಕ