ಚೆನ್ನೈ: ಐಪಿಎಲ್ 2023 ರ ಹರಾಜಿನಲ್ಲಿ, ಚೆನ್ನೈ ಸೂಪರ್ ಕಿಂಗ್ಸ್ ಆಲ್ರೌಂಡರ್ ಬೆನ್ ಸ್ಟೋಕ್ಸ್ ಅವರನ್ನು ಖರೀದಿಸಲು ದೊಡ್ಡ ಮೊತ್ತವನ್ನು ಪಾವತಿಸಿತ್ತು. ಇಂಗ್ಲೆಂಡ್ನ ಟೆಸ್ಟ್ ತಂಡದ ನಾಯಕ 16.25 ಕೋಟಿ ರೂಪಾಯಿ ಮೊತ್ತ ಪಡೆದು ಫ್ರಾಂಚೈಸಿ ಸೇರಿದರು, ಆದರೆ ತಂಡಕ್ಕೆ ಅವರಿಂದ ಹೆಚ್ಚಿನ ನೆರವು ಸಿಕ್ಕಿರಲಿಲ್ಲ. ಗಾಯದ ಸಮಸ್ಯೆ ಹಾಗೂ ಪ್ರದರ್ಶನ ವೈಫಲ್ಯದ ಕಾರಣ ಹೆಚ್ಚಿನ ಸಮಯ ಅವರು ಬೆಂಚು ಕಾಯುವಂತಾಯಿತು. ಹೀಗಾಗಿ ಸ್ಟೋಕ್ಸ್ ಈ ಋತುವಿನಲ್ಲಿ ಕೇವಲ ಎರಡು ಪಂದ್ಯಗಳನ್ನು ಮಾತ್ರ ಆಡಿದ್ದು, 15 ರನ್ ಗಳಿಸಿದ್ದಾರೆ. ಎಸೆದಿರುವ ಏಕೈಕ ಓವರ್ನಲ್ಲಿ 18 ರನ್ ನೀಡಿದ್ದಾರೆ. ಇದೀಗ ತಂಡ ಪ್ಲೇಆಫ್ ಹಂತಕ್ಕೇರಿದೆ. ಆದರೆ, ವಿಶ್ವ ಕಪ್ ವಿಜೇತ ಆಟಗಾರ ಮುಂದಿನ ಹಂತದಲ್ಲಿ ಆಡುತ್ತಿಲ್ಲ. ಅವರು ತವರಿಗೆ ಮರಳಿದ್ದಾರೆ.
ಜೂನ್ 1ರಿಂದ ಆರಂಭವಾಗಲಿರುವ ಏಕೈಕ ಟೆಸ್ಟ್ ಪಂದ್ಯಕ್ಕಾಗಿ ಇಂಗ್ಲೆಂಡ್ ತಂಡ ಐರ್ಲೆಂಡ್ ತಂಡಕ್ಕೆ ಆತಿಥ್ಯ ವಹಿಸಲಿದೆ. ಅದು ಮುಕ್ತಾಯಗೊಂಡ ಬಳಿಕ ಆ್ಯಷಸ್ ಸರಣಿಗೆ ಚಾಲನೆ ಸಿಗಲಿದೆ. ಟೆಸ್ಟ್ ತಂಡ ತಂಡದ ಜವಾಬ್ದಾರಿ ವಹಿಸಿಕೊಂಡಿರುವ ಸ್ಟೋಕ್ಸ್ ಇಂಗ್ಲೆಂಡ್ ತಂಡದ ಶಿಬಿರ ಸೇರಿಕೊಳ್ಳುವುದಕ್ಕೆ ತವರಿಗೆ ಮರಳಿದ್ದಾರೆ. ಅವರು ಐರ್ಲೆಂಡ್ ವಿರುದ್ಧ ತಂಡವನ್ನು ಮುನ್ನಡೆಸಲಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ತಮ್ಮ ಸೋಶಿಯಲ್ ಮೀಡಿಯಾ ಹ್ಯಾಂಡಲ್ಗಳಲ್ಲಿ ಈ ಮಾಹಿತಿಯನ್ನು ಪ್ರಕಟಿಸಿದೆ. ವಿಶ್ವದ ಬೆಸ್ಟ್ ಆಲ್ರೌಂಡರ್ ರಾಷ್ಟ್ರೀಯ ತಂಡದ ಸೇವೆಗಾಗಿ ಸಲ್ಲಿಸಲು ಮನೆಗೆ ತೆರಳಿದ್ದಾರೆ ಎಂದು ಘೋಷಿಸಿದೆ.
ಇದನ್ನೂ ಓದಿ : IPL 2023 : ಮುಂದಿನ ವರ್ಷ ನಮ್ದೇ ಹವಾ ಎಂಬ ಮಾತು ಉಳಿಸಿಕೊಂಡ ಮಹೇಂದ್ರ ಸಿಂಗ್ ಧೋನಿ!
ರಾಷ್ಟ್ರೀಯ ಸೇವೆಗೆ ಹೊರಟಿರುವ ಬೆನ್ಸ್ಟೋಕ್ಸ್ ಅವರಿಗೆ ಶುಭಾಶಯಗಳ ಎಂದು ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಬರೆದುಕೊಂಡಿದೆ.
ಇಂಗ್ಲೆಂಡ್ ಪ್ರವಾಸದಲ್ಲಿರುವ ಐರ್ಲೆಂಡ್ ತಂಡ ಮೇ 28ರಿಂದ ಎಸೆಕ್ಸ್ ವಿರುದ್ಧ ಪ್ರವಾಸ ಪಂದ್ಯವನ್ನಾಡಲಿದೆ. ನಂತರ ಲಾರ್ಡ್ಸ್ನಲ್ಲಿ ಅಂತಿಮ ಟೆಸ್ಟ್ ಪಂದ್ಯ ನಡೆಯಲಿದೆ. ಐರ್ಲೆಂಡ್ 2023ರ ಸೆಪ್ಟೆಂಬರ್ನಲ್ಲಿ ಮೂರು ಪಂದ್ಯಗಳ ಏಕದಿನ ಸರಣಿಗಾಗಿ ಮರಳಲಿದೆ. ಇದು ಭಾರತದಲ್ಲಿ ನಿಗದಿಯಾಗಿರುವ ವಿಶ್ವ ಕಪ್ಗೆ ಬರಲಿದೆ.
ಬೆನ್ಸ್ಟೋಕ್ಸ್ ವಾಪಾಸಾಗುವುದರಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ತಂಡ ಈಗಾಗಲೇ ಪ್ಲೇಆಫ್ ಸ್ಥಾನ ಪಡೆದುಕೊಂಡಿದೆ. ದೀಪಕ್ ಚಾಹರ್ ಫಿಟ್ ಆಗಿರುವ ಕಾರಣ ವೇಗದ ಬೌಲಿಂಗ್ ಆಲ್ರೌಂಡರ್ ಸ್ಥಾನ ತುಂಬಿದೆ. ಹೀಗಾಗಿ ಅದೇ ಸಂಯೋಜನೆಯ ಜತೆಗೆ ಮುಂದಿನ ಪಂದ್ಯಗಳಲ್ಲಿ ಕಣಕ್ಕೆ ಇಳಿಯುವ ಸಾಧ್ಯತೆಗಳಿವೆ.
ಚೆನ್ನೈನ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ನಡೆಯಲಿರುವ ಕ್ವಾಲಿಫೈಯರ್ 1 ಪಂದ್ಯದಲ್ಲಿ ಸಿಎಸ್ಕೆ ತಂಡ ಗುಜರಾತ್ ಜೈಂಟ್ಸ್ ವಿರುದ್ಧ ಆಡಲಿದೆ.