ಮುಂಬಯಿ : ಟೀಮ್‌ ಇಂಡಿಯಾದ ಮಧ್ಯಮ ವೇಗಿ ಭುವನೇಶ್ವರ್ ಕುಮಾರ್ ಅವರು ಡೆತ್‌ ಓವರ್‌ಗಳಲ್ಲಿ ಯಶಸ್ಸು ಸಾಧಿಸದ ಕಾರಣ ಟೀಕಾಕಾರರ ಬಾಯಿಗೆ ಈಡಾಗಿದ್ದಾರೆ. ಅನುಭವಿ ಬೌಲರ್‌, ತಂಡವನ್ನು ಗೆಲ್ಲಿಸಬೇಕಾದವರು ಸಿಕ್ಕಾಪಟ್ಟೆ ರನ್‌ ಸೋರಿಕೆ ಮಾಡಿ ತಂಡದ ಸೋಲಿಗೆ ಕಾರಣರಾಗುತ್ತಿದ್ದಾರೆ ಎಂಬುದು ಟೀಕಾಕಾರರ ಅಂಬೋಣ. ಅದಕ್ಕೆ ಕೆಲವು ನಿದರ್ಶನಗಳೂ ಇವೆ. ಆದರೆ, ಕ್ರಿಕೆಟ್‌ನಲ್ಲಿ ಎಲ್ಲವೂ ಅಂದುಕೊಂಡಂತೆ ನಡೆಯುವುದಿಲ್ಲ, ಫಾರ್ಮ್‌ ಏಕ ರೀತಿಯಲ್ಲಿಯಲ್ಲಿರುವುದಿಲ್ಲ ಎಂಬುದು ಒಪ್ಪಲೇಬೇಕಾದ ಮಾತು. ಹೀಗಾಗಿ ಭುವಿಯನ್ನು ಬೈಯುವುದರಲ್ಲಿ ಅರ್ಥವಿಲ್ಲ ಎಂಬುದು ನಿಜವಾದ ಕ್ರಿಕೆಟ್‌ ಪ್ರೇಮಿಗಳ ಇಂಗಿತ. ಏತನ್ಮಧ್ಯೆ, ಭುವನೇಶ್ವರ್ ಕುಮಾರ್ ಅವರ ಪತ್ನಿ ನೂಪುರ್ ಅವರು ಗಂಡನಿಗೆ ಬೈದವರ ವಿರುದ್ಧ ಕೆಂಡಾಮಂಡಲರಾಗಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಅವರೆಲ್ಲರಿಗೂ ತಕ್ಕ ಉತ್ತರ ಕೊಟ್ಟಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಕೆಲವು ವ್ಯರ್ಥಾಲಾಪ ಮಾಡುತ್ತಿದ್ದಾರೆ. ಅಂಥವರಿಗೆ ಮಾಡುವುದಕ್ಕೆ ಯಾವುದೇ ಒಳ್ಳೆಯ ಕೆಲಸ ಇರುವುದಿಲ್ಲ. ಅವರಿಗೆಲ್ಲ ಇಲ್ಲದ ಉಸಾಬರಿಯೇ ಹೆಚ್ಚು. ಈ ಮಾದರಿಯ ಮಂದಿಗೆ ನನ್ನ ಸಲಹೆ ಏನೆಂದರೆ, ನಿಮ್ಮ ಮಾತುಗಳಿಂದ ಯಾರಿಗೂ ಏನೂ ಆಗುವುದಿಲ್ಲ. ನಿಮ್ಮ ಅಸ್ತಿತ್ವವನ್ನೂ ಯಾರೂ ಗುರುತಿಸುವುದಿಲ್ಲ. ದಯವಿಟ್ಟು ಏನಾದರೂ ಉತ್ತಮ ಕಾರ್ಯವನ್ನು ಮಾಡಲು ಶುರುಮಾಡಿಕೊಳ್ಳಿ. ಬೇಡದ ಕೆಲಸಕ್ಕೆ ಇಲ್ಲಿ ಜಾಗ ಕಡಿಮೆ,” ಎಂದು ಬರೆದುಕೊಂಡಿದ್ದಾರೆ.
”ಕೆಲವು ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡದಿರುವುದಕ್ಕೆ ಟೀಕೆಗಳನ್ನು ಮಾಡಲು ಶುರು ಮಾಡಿಕೊಂಡಿದ್ದಾರೆ. ಚೆನ್ನಾಗಿ ಆಡಿದ ಸಂದರ್ಭಗಳಲ್ಲಿ ಹೊಗಳುವುದಕ್ಕೆ ಆಗುವುದಿಲ್ಲ ಎಂದಾದರೆ, ಕೆಲವು ಪಂದ್ಯಗಳ ಪ್ರದರ್ಶನ ಮುಂದಿಟ್ಟುಕೊಂಡು ತೆಗಳುವ ಕೆಲಸವೂ ಮಾಡಬೇಡಿ. ಕಣ್ಮುಚ್ಚಿಕೊಂಡು ಕೆಲವು ಪಂದ್ಯಗಳ ಪ್ರದರ್ಶನವನ್ನು ವಿಮರ್ಶೆ ಮಾಡಬಾರದು. ಭುವನೇಶ್ವರ್ ಕುಮಾರ್ ಟೀಮ್‌ ಇಂಡಿಯಾದ ಒಬ್ಬರು ಪರಿಣಾಮಕಾರಿ ಸ್ವಿಂಗ್‌ ಬೌಲರ್‌. ಈ ವಿಷಯ ಎಲ್ಲಿಗೂ ಗೊತ್ತಿದೆ. ಅವರು ಉತ್ತಮ ಪ್ರದರ್ಶನ ನೀಡುತ್ತಾರೆ. ಅವರಿಗೆ ನಮ್ಮ ಬೆಂಬಲವಿದೆ,” ಎಂದು ಅವರು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ | Team India | ಭಾರತಕ್ಕೆ ಭುವಿಯದ್ದೇ ಚಿಂತೆ, ಹೀಗಾದರೆ ಡೆತ್‌ ಓವರ್‌ನಲ್ಲಿ ಬೌಲ್‌ ಮಾಡುವವರು ಯಾರು?