ನವ ದೆಹಲಿ: ವಿಶ್ವ ಕ್ರಿಕೆಟ್ ಕ್ಷೇತ್ರಕ್ಕೆ ಇದು ಊಹಿಸಲೂ ಸಾಧ್ಯವಿಲ್ಲದ ವಾರ್ತೆ. ಒಂದು ಕಾಲದಲ್ಲಿ ಕ್ರಿಕೆಟ್ ಕ್ಷೇತ್ರದಲ್ಲಿ ಮೆರೆದಾಡಿದ್ದ ಕೆರಿಬಿಯನ್ ದೈತ್ಯರ ಬಳಗ ಮುಂದಿನ ಏಕ ದಿನ ವಿಶ್ವ ಕಪ್ಗೆ (World Cup 2023) ಅರ್ಹತೆ ಪಡೆಯಲು ವಿಫಲಗೊಂಡಿದೆ. ಭಾರತದ ಆತಿಥ್ಯದಲ್ಲಿ ನಡೆಯಲಿರುವ ಏಕ ದಿನ ವಿಶ್ವ ಕಪ್ಗೆ ರ್ಯಾಂಕ್ ಆಧಾರದಲ್ಲಿ ಅರ್ಹತೆ ಪಡೆಯಲು ವಿಫಲಗೊಂಡಿದ್ದ ವಿಂಡೀಸ್ ಬಳಗ ಇದೀಗ ಅರ್ಹತಾ ಸುತ್ತಿನ ಟೂರ್ನಿಯಲ್ಲೂ ಹೀನಾಯ ಪ್ರದರ್ಶನ ನೀಡುವುದರೊಂದಿಗೆ ಅವಮಾನಕ್ಕೆ ಈಡಾಗಿದೆ. ಒಂದು ಕಾಲದಲ್ಲಿ ಅಸಾಮಾನ್ಯ ಆಟಗಾರರನ್ನು ಹೊಂದುವ ಮೂಲಕ ಸರಿಸಾಟಿಯೇ ಇಲ್ಲದ ತಂಡ ಎನಿಸಿಕೊಂಡಿದ್ದ ವೆಸ್ಟ್ ಇಂಡೀಸ್, ವಿಶ್ವ ಕಪ್ನಲ್ಲಿ ಆಡುವ ಅರ್ಹತೆ ಕಳೆದುಕೊಂಡಿರುವುದು ಕ್ರಿಕೆಟ್ ಪ್ರೇಮಿಗಳ ಪಾಲಿಗೆ ಅಚ್ಚರಿಯ ಸಂಗತಿಯೇ ಹೌದು.
Scotland beat West Indies by 7 wickets to shatter WI World Cup Qualification hopes!
— Nilesh G (@oye_nilesh) July 1, 2023
ICC CWC 23 will be played without 2 time CWC winners – West Indies!#CWC23#SCOvWI#CWCQ pic.twitter.com/8SoqYr2PMh
ಶನಿವಾರ ಇಲ್ಲಿ ನಡೆದ ಅರ್ಹತಾ ಸುತ್ತಿನ ಸೂಪರ್ ಸಿಕ್ಸ್ ಪಂದ್ಯದಲ್ಲಿ ದುರ್ಬಲ ಸ್ಕಾಟ್ಲೆಂಡ್ ವಿರುದ್ಧ ಏಳು ವಿಕೆಟ್ ಗಳಿಂದ ಸೋಲನುಭವಿಸಿದ ವೆಸ್ಟ್ ಇಂಡೀಸ್ ತಂಡ ಮುಖಭಂಗಕ್ಕೆ ಒಳಗಾಯಿತು. 1975 ಮತ್ತು 1979ರ ಆವೃತ್ತಿಗಳ ವಿಶ್ವ ಕಪ್ನಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿರುವ ವೆಸ್ಟ್ ಇಂಡೀಸ್ 48 ವರ್ಷಗಳ ಏಕ ದಿನ ವಿಶ್ವ ಕಪ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿ ಅಗ್ರ 10 ತಂಡಗಳಲ್ಲಿ ಸ್ಥಾನ ಗಳಿಸಿಲ್ಲ. ವಿಂಡೀಸ್ ತಂಡ ಟಿ20 ವಿಶ್ವ ಕಪ್ನಲ್ಲಿ ಎರಡು ಪ್ರಶಸ್ತಿ ಬಾಚಿಕೊಂಡಿದೆ ಎಂಬುದೂ ಇಲ್ಲಿ ಸ್ಮರಣೀಯ.
Scotland trump the West Indies and the two-time champions are out of contention to reach #CWC23 😱#SCOvWI: https://t.co/D0FGi8lXDh pic.twitter.com/zQ0LVGYKCE
— ICC (@ICC) July 1, 2023
ಶನಿವಾರ ನಡೆದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡದ ಬ್ಯಾಟರ್ಗಳು ಮತ್ತೆ ತಮ್ಮ ದೌರ್ಬಲ್ಯ ಪ್ರದರ್ಶಿಸಿದರು. ಮೊದಲು ಬ್ಯಾಟ್ ಮಾಡಿದ ವೆಸ್ಟ್ ಇಂಡೀಸ್ 43.5 ಓವರ್ಗಳಲ್ಲಿ 181 ರನ್ಗಳಿಗೆ ಆಲೌಟ್ ಆಯಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಸ್ಕಾಟ್ಲೆಂಡ್ ತಂಡ ಇನ್ನೂ 6.3 ಓವರ್ಗಳು ಬಾಕಿ ಇರುವಂತೆಯೇ ಏಳು ವಿಕೆಟ್ಗಳ ಭರ್ಜರಿ ವಿಜಯ ಸಾಧಿಸಿತು ಮ್ಯಾಟ್ ಕ್ರಾಸ್ (107 ಎಸೆತಗಳಲ್ಲಿ ಅಜೇಯ 74 ರನ್) ಮತ್ತು ಬ್ರೆಂಡನ್ ಮೆಕ್ ಮುಲ್ಲನ್ (106 ಎಸೆತಗಳಲ್ಲಿ 69 ರನ್) ಎರಡನೇ ವಿಕೆಟ್ ಗೆ 125 ರನ್ ಸೇರಿಸಿ ಗೆಲುವಿನ ರೂವಾರಿಗಳೆನಿಸಿಕೊಂಡರು.
ಇದನ್ನೂ ಓದಿ : ICC World Cup 2023: ವಿಶ್ವ ಕಪ್ ಆರಂಭಕ್ಕೂ ಮುನ್ನವೇ ಭಾರತಕ್ಕೆ ಆಘಾತ
‘ಎ’ ಗುಂಪಿನಲ್ಲಿದ್ದ ವೆಸ್ಟ್ ಇಂಡೀಸ್ ತಂಡ ನೆದರ್ಲ್ಯಾಂಡ್ಸ್ ವಿರುದ್ಧ ಸೂಪರ್ ಓವರ್ನಲ್ಲಿ ಸೋತ ಬಳಿಕ ಜಿಂಬಾಬ್ವೆ ತಂಡಕ್ಕೂ ಮಣಿದಿತ್ತು. ಇದೀಗ ಸ್ಕಾಟ್ಲೆಂಡ್ ತಂಡದ ವಿರುದ್ಧವೂ ಸೋತಿದೆ. ಈ ಮೂಲಕ ಕಳಪೆ ರನ್ರೇಟ್ ಪಡೆದುಕೊಂಡು ಫೈನಲ್ಗೇರಲು ವಿಫಲಗೊಂಡಿತು. ಅರ್ಹತಾ ಸುತ್ತಿನಲ್ಲಿ ಫೈನಲ್ಗೆರಿದ ಎರಡೂ ತಂಡಗಳು 9 ಮತ್ತು 10ನೇ ತಂಡವಾಗಿ ವಿಶ್ವ ಕಪ್ಗೆ ಪ್ರವೇಶ ಪಡೆಯಲಿದೆ.
ಆರಂಭಿಕ ಸೋಲಿನ ಕಾರಣ ವೆಸ್ಟ್ ಇಂಡೀಸ್ ತಂಡದ ವಿಶ್ವ ಕಪ್ ಭವಿಷ್ಯ ಇತರ ಪಂದ್ಯಗಳ ಫಲಿತಾಂಶದ ಮೇಲೆ ಅವಲಂಬಿತವಾಗಿತ್ತು. ಮೊದಲು ಯುಎಸ್ಎ (35 ರನ್) ಮತ್ತು ನೇಪಾಳವನ್ನು (101 ರನ್ಗಳಿಂದ ) ಸೋಲಿಸಿದ್ದ ವೆಸ್ಟ್ ಇಂಡೀಸ್ ನಾಲ್ಕು ಅಂಕಗಳನ್ನು ಹೊಂದಿತ್ತು. ಆದರೆ ‘ಎ’ ಗುಂಪಿನಿಂದ ಸೂಪರ್ ಸಿಕ್ಸ್ಗೆ ಅರ್ಹತೆ ಪಡೆದ ಕೆರಿಬಿಯನ್ ಬಳಗ, ಜಿಂಬಾಬ್ವೆ ಮತ್ತು ನೆದರ್ಲ್ಯಾಂಡ್ಸ್ ವಿರುದ್ಧ ಸೋತ ನಂತರ ಅಂಕಗಳನ್ನು ಸಂಪಾದಿಸುವಲ್ಲಿ ಸೋತು ನಿರ್ಗಮಿಸಿತು.