ಅಹಮದಾಬಾದ್: ಅಮನ್ ಹಕಿಮ್ ಖಾನ್ (51) ಬಾರಿಸಿದ ಸಮಯೋಚಿತ ಅರ್ಧ ಶತಕ ಹಾಗೂ ಬೌಲರ್ಗಳ ಸಾಹಸದಿಂದ ಮಿಂಚಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 44ನೇ ಪಂದ್ಯದಲ್ಲಿ ಗುಜರಾತ್ ಟೈಟನ್ಸ್ ತಂಡದ ವಿರುದ್ಧ 5 ರನ್ಗಳ ರೋಚಕ ವಿಜಯ ದಾಖಲಿಸಿತು. ಇದು ಕೂಡ ಹಾಲಿ ಆವೃತ್ತಿಯ ಐಪಿಎಲ್ನ ಲಾಸ್ಟ್ ಬಾಲ್ ಥ್ರಿಲ್ ಮ್ಯಾಚ್. ಕೊನೇ ಓವರ್ನ ಕೊನೇ ಎಸೆತದ ತನಕವೂ ಈ ಪಂದ್ಯ ಕುತೂಹಲ ಉಳಿಸಿಕೊಂಡಿತ್ತು. ಅಂತಿಮವಾಗಿ ಡೆಲ್ಲಿ ಬೌಲರ್ ಇಶಾಂತ್ ಶರ್ಮಾ ಎದುರಾಳಿಗೆ ಬೇಕಾದ 12 ರನ್ಗಳಲ್ಲಿ ಕೇವಲ ಆರು ರನ್ ನೀಡಿ ಗೆಲುವು ತಂದುಕೊಟ್ಟರು.
ಇಲ್ಲಿನ ನರೇಂದ್ರ ಮೋದಿ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಆದರೆ, ತಂಡದ ಬ್ಯಾಟರ್ಗಳು ನಿರ್ಧಾರಕ್ಕೆ ತಕ್ಕ ಹಾಗೆ ಬ್ಯಾಟಿಂಗ್ ಮಾಡಲಿಲ್ಲ. ಹೀಗಾಗಿ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 130 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಗುಜರಾತ್ ತಂಡ ತನ್ನ ಪಾಲಿನ ಓವರ್ಗಳು ಮುಕ್ತಾಯಗೊಂಡಾಗ 6 ವಿಕೆಟ್ ನಷ್ಟಕ್ಕೆ 125 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು. ಇದು ಕೂಡ ಹಾಲಿ ಆವೃತ್ತಿಯ ಐಪಿಎಲ್ನ ಕಡಿಮೆ ರನ್ಗಳ ಪಂದ್ಯವಾಗಿದೆ. ಡೆಲ್ಲಿ ತಂಡದ ಪರವಾಗಿ ಖಲೀಲ್ ಅಹಮದ್ 24 ರನ್ಗಳಿಗೆ 2 ವಿಕೆಟ್ ಉರುಳಿಸಿದರೆ, ಇಶಾಂತ್ ಶರ್ಮಾ 23 ರನ್ಗಳಿಗೆ 2 ವಿಕೆಟ್ ತೆಗೆದರು.
ದೊಡ್ಡ ಮೊತ್ತದ ರನ್ ಕೂಡಿಕೆ ಮಾಡುವ ಉದ್ದೇಶದೊಂದಿಗೆ ಬ್ಯಾಟ್ ಮಾಡಿದ ಡೆಲ್ಲಿ ತಂಡ ಹೀನಾಯ ಪ್ರದರ್ಶನ ನೀಡಿತು. ಆರಂಭಿಕ ಬ್ಯಾಟರ್ಗಳಾದ ಫಿಲ್ ಸಾಲ್ಟ್ ಶೂನ್ಯಕ್ಕೆ ಔಟಾದರೆ ಡೇವಿಡ್ ವಾರ್ನರ್ ಅನಗತ್ಯ ರನ್ಔಟ್ಗೆ ಬಲಿಯಾದರು. ಪ್ರಿಯಮ್ ಗರ್ಗ್ ಕೊಡುಗೆ 10 ರನ್. ಮಾರ್ಶ್ ಬದಲಿಗೆ ಆಡುವ ಅವಕಾಶ ಪಡೆದ ರಿಲೀ ರೊಸ್ಸೊ ಬಂದ ಹಾಗೆ ಎರಡು ಫೋರ್ ಬಾರಿಸಿ ವಿಶ್ವಾಸ ಮೂಡಿಸಿದರೂ ಹೆಚ್ಚು ಹೊತ್ತು ಕ್ರಿಸ್ನಲ್ಲಿ ನಿಲ್ಲಲಿಲ್ಲ. ಮನೀಶ್ ಪಾಂಡೆಯ ಇನಿಂಗ್ಸ್ 1 ರನ್ಗೆ ಕೊನೆಯಾಯಿತು. 23 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡ ಡೆಲ್ಲಿ 100 ರನ್ ಮಾಡುವುದೂ ಕಷ್ಟ ಎನಿಸಿತ್ತು.
ಅಕ್ಷರ್ ಪಟೇಲ್ ಎಂದಿನಂತೆ ಆಡಿ 27 ರನ್ ಬಾರಿಸಿ ಔಟಾದರು. ಈ ವೇಳೆ ಜತೆಯಾದ ಅಮನ್ ಖಾನ್ ಹಾಗೂ ರಿಪಾಲ್ ಪಟೇಲ್ (23) ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. ಹೀಗಾಗಿ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ತಂಡಕ್ಕೆ ನೆರವಾಯಿತು.
ನೆರವಾದ ಅಮನ್
ಆರಂಭಿಕ ಹಿನ್ನಡೆಯೊಂದಿಗೆ ಕುಸಿದಿದ್ದ ಡೆಲ್ಲಿ ತಂಡಕ್ಕೆ ಅಮನ್ ಖಾನ್ ಅನಿರೀಕ್ಷಿತವಾಗಿ ನೆರವಾದರು. ಅರಂಭದಲ್ಲ ನಿಧಾನವಾಗಿ ಆಡಿದ ಅವರು 3 ಸಿಕ್ಸರ್ ಹಾಗೂ 3 ಫೊರ್ಗಳೊಂದಿಗೆ ಅರ್ಧ ಶತಕ ಬಾರಿಸಿದರು. ಅವರು ರಿಪಾಲ್ ಪಟೇಲ್ ಜತೆ ಸೇರಿ 56 ರನ್ಗಳ ಜತೆಯಾಟ ನೀಡಿದರು.
ಗುಜರಾ್ ತಂಡದ ಪರವಾಗಿ ಮೊಹಮ್ಮದ್ ಶಮಿ 11 ರನ್ಗಳಿಗೆ 4 ವಿಕೆಟ್ ಪಡೆದು ಮಿಂಚಿದರೆ, ಮೋಹಿತ್ ಶರ್ಮಾ 33 ರನ್ಗಳಿಗೆ 2 ವಿಕೆಟ್ ತಮ್ಮದಾಗಿಸಿಕೊಂಡರು.
ರನ್ ಗಳಿಸಲು ಗುಜರಾತ್ ಪರದಾಟ
ಸಣ್ಣ ಮೊತ್ತವನ್ನು ಬೆನ್ನಟ್ಟಲು ಆರಂಭಿಸಿದ ಗುಜರಾತ್ ತಂಡವೂ ಹಿನ್ನಡೆಗೆ ಒಳಗಾಯಿತು. ವೃದ್ದಿಮಾನ್ ಸಾಹಾ ಶೂನ್ಕ್ಕೆ ಔಟಾದರೆ, ಶುಭ್ಮನ್ ಗಿಲ್ 6 ರನ್ಗೆ ಪೆವಿಲಿಯನ್ ಸೇರಿದರು. ಮೂರನೇ ಕ್ರಮಾಂಕದಲ್ಲಿ ಬಂದ ಹಾರ್ದಿಕ್ ಪಾಂಡ್ಯ 59 ರನ್ ಬಾರಿ ಏಕಾಂಗಿ ಹೋರಾಟ ನಡೆಸಿದರೂ ಗೆಲುವು ತಂದುಕೊಡಲು ನಾಯಕನಿಗೆ ಸಾಧ್ಯವಾಗಲಿಲ್ಲ. ವಿಜಯ್ ಶಂಕರ್ 6 ರನ್ಗಳಿಗೆ ಔಟಾದರೆ, ಆಪತ್ಭಾಂದವ ಡೇವಿಡ್ ಮಿಲ್ಲರ್ ಶೂನ್ಯಕ್ಕೆ ಔಟಾದರು. ಅಭಿನವ್ ಮನೋಹರ್ 26 ರನ್ ಕೊಡುಗೆ ಕೊಟ್ಟರು. ಕೊನೇ ಹಂತದಲ್ಲಿ ಮೂರು ಸಿಕ್ಸರ್ ಸಿಡಿಸಿ 20 ರನ್ ಬಾರಿಸಿದ ರಾಹುಲ್ ತೆವಟಿಯಾ ಡೆಲ್ಲಿ ತಂಡಕ್ಕೆ ಭಯ ಹುಟ್ಟಿಸಿದರೂ ಕೊನೇ ಓವರ್ನಲ್ಲಿ ಔಟಾದರು, ರಶೀದ್ ಖಾನ್ 3 ರನ್ ಕೊಡುಗೆ ಕೊಟ್ಟರು.