ಜೊಹಾನ್ಸ್ಬರ್ಗ್: ದಕ್ಷಿಣ ಆಫ್ರಿಕಾದ ಯುವ ವೇಗಿ ಮಾರ್ಕೊ ಜಾನ್ಸೆನ್ ಮತ್ತು ಅನುಭವಿ ಆಟಗಾರ ಡೀನ್ ಎಲ್ಗರ್ ಅವರ ಅಮೋಘ ಜತೆಯಾಟದ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡ ಭಾರತ ವಿರುದ್ಧ ಮೊದಲ ಇನಿಂಗ್ಸ್ನಲ್ಲಿ 163 ರನ್ ಮುನ್ನಡೆ ಸಾಧಿಸಿದೆ. ಭಾರತ 163 ರನ್ ಹಿನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದೆ.
ಇಲ್ಲಿನ ಸೆಂಚುರಿಯನ್ ಸೂಪರ್ಸ್ಪೋರ್ಟ್ಸ್ ಪಾರ್ಕ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಈ ಟೆಸ್ಟ್ ಪಂದ್ಯದಲ್ಲಿ 5 ವಿಕೆಟ್ಗೆ 256 ರನ್ ಗಳಿಸಿದ್ದಲ್ಲಿಂದ ಮೂರನೇ ದಿನದಾಟ ಆರಂಭಿಸಿದ ದಕ್ಷಿಣ ಆಫ್ರಿಕಾ ಉತ್ತಮ ಆಟವಾಡುವ ಮೂಲಕ 408 ರನ್ ಗಳಿಸಿ 163 ರನ್ ಮುನ್ನಡೆ ಸಾಧಿಸಿಕೊಂಡಿದೆ. ನಾಯಕ ಟೆಂಬ ಬವುಮಾ ಅವರು ಕ್ಷೇತ್ರ ರಕ್ಷಣೆಯ ವೇಳೆ ಗಾಯಗೊಂಡು ಪಂದ್ಯದಿಂದ ಹೊರಗುಳಿದ ಪರಿಣಾಮ 9 ವಿಕೆಟ್ಗೆ ಪಂದ್ಯ ಮುಗಿಯಿತು. ಒಂದೊಮ್ಮೆ ಅವರು ಕೂಡ ಬ್ಯಾಟಿಂಗ್ ನಡೆಸುತ್ತಿದ್ದರೆ ಇನ್ನೂ ಹೆಚ್ಚಿನ ಲೀಡ್ ಪಡೆಯುವ ಜತೆಗೆ ಅಜೇಯ 84 ರನ್ ಗಳಿಸಿದ್ದ ಮಾರ್ಕೊ ಜಾನ್ಸೆನ್ಗೆ ಶತಕ ಬಾರಿಸುವ ಅವಕಾಶ ಇರುತ್ತಿತ್ತು.
ಇದನ್ನೂ ಓದಿ IND vs SA: ದಕ್ಷಿಣ ಆಫ್ರಿಕಾದಲ್ಲಿ ಕನ್ನಡದ ಕಂಪು ಸಾರಿದ ಕೆಎಲ್ ರಾಹುಲ್-ಪ್ರಸಿದ್ಧ್ ಕೃಷ್ಣ
South Africa have a massive lead at the end of their first innings ⚡#WTC25 | #SAvIND 📝: https://t.co/cbcETm0nBv pic.twitter.com/e0ZXvQC9T4
— ICC (@ICC) December 28, 2023
ದ್ವಿಶತಕ ವಂಚಿತನಾದ ಎಲ್ಗರ್
ಮೂರನೇ ದಿನದಾಟದಲ್ಲಿ ದಕ್ಷಿಣ ಆಫ್ರಿಕಾ 152 ರನ್ ಬಾರಿಸಿತು. 140 ರನ್ ಗಳಿಸಿ ಬ್ಯಾಟಿಂಗ್ ಕಾಯ್ದುಕೊಂಡಿದ್ದ ಡೀನ್ ಎಲ್ಗರ್ ಮೂರನೇ ದಿನ 45 ರನ್ ಬಾರಿಸಿದರು. ಅವರ ಒಟ್ಟು ಗಳಿಕೆ 185 ರನ್. ಈ ಸೊಗಸಾದ ಬ್ಯಾಟಿಂಗ್ ಇನಿಂಗ್ಸ್ನಲ್ಲಿ 28 ಬೌಂಡರಿ ದಾಖಲಾಯಿತು. ದ್ವಿಶತಕದತ್ತ ಮುನ್ನುಗ್ಗುತ್ತಿದ್ದ ಅವರನ್ನು ಶಾರ್ದೂಲ್ ಠಾಕೂರ್ ಅವರು ವೈಡ್ ಲೈನ್ನತ್ತ ಬೌಲಿಂಗ್ ಎಸೆದು ಕ್ಯಾಚ್ ನೀಡುವಂತೆ ಮಾಡಿ ವಿಕೆಟ್ ಕಬಳಿಸಿದರು.
ಆಲ್ರೌಂಡರ್ ಪ್ರದರ್ಶನ ತೋರಿದ ಜಾನ್ಸೆನ್
ಬೌಲಿಂಗ್ ಆಲ್ರೌಂಡರ್ ಆಗಿರುವ ಮಾರ್ಕೊ ಜಾನ್ಸೆನ್ ಈ ಪಂದ್ಯದಲ್ಲಿ ಆಲ್ರೌಂಡರ್ ಪ್ರದರ್ಶನ ತೋರುವ ಮೂಲಕ ಅಜೇಯ ಅರ್ಧಶತಕ ಬಾರಿಸಿ ತಂಡದ ಬೃಹತ್ ಮೊತ್ತಕ್ಕೆ ಕಾರಣರಾದರು. ಡೀನ್ ಎಲ್ಗರ್ ಜತೆ ಸೇರಿಕೊಂಡು ಉತ್ತಮ ಇನಿಂಗ್ಸ್ ಕಟ್ಟಿ ಭಾರತೀಯ ಬೌಲರ್ಗಳನ್ನು ಕಾಡಿದರು. ಕೊನೆಗೂ ಅವರು ಅಜೇಯರಾಗಿ ಉಳಿದರು. 11 ಬೌಂಡರಿ ಮತ್ತು 1 ಸಿಕ್ಸರ್ ಬಾರಿಸಿ ಅಜೇಯ 84 ರನ್ ಗಳಿಸಿದರು. ಬವುಮಾ ಗಾಯಗೊಂಡು ಬ್ಯಾಟಿಂಗ್ ನಡೆಸದ ಕಾರಣ ಅವರಿಗೆ ಶತಕ ಬಾರಿಸುವ ಅವಕಾಶ ಕೈ ತಪ್ಪಿತು.
South Africa bowled out for 408.
— Mufaddal Vohra (@mufaddal_vohra) December 28, 2023
Marco Jansen remains unbeaten on 84* (147). Temba Bavuma couldn't come out to bat, unfortunately no century for Jansen. Proteas with the lead of 163, Bumrah picked 4. pic.twitter.com/WTrnJG2rN3
ಮಾರ್ಕೊ ಜಾನ್ಸೆನ್ ಮತ್ತು ಡೀನ್ ಎಲ್ಗರ್ ಜೋಡಿ 6ನೇ ವಿಕೆಟ್ಗೆ ಭರ್ತಿ 111 ರನ್ಗಳ ಜತೆಯಾಟ ನಡೆಸಿತು. ಕೆಣಕಿದ ಪ್ರಸಿದ್ಧ್ ಕೃಷ್ಣಗೆ ಸಿಕ್ಸರ್ ರುಚಿ ತೋರಿಸಿದ ಜೆರಾಲ್ಡ್ ಕೋಟ್ಜಿ ಒಂದು ಹಂತದಲ್ಲಿ ಅಪಾಯಕಾರಿಯಾಗುವ ಸೂಚನೆ ನೀಡುದರೂ ಅವರ ಬ್ಯಾಟಿಂಗ್ ಅವೇಶಕ್ಕೆ ಆರ್.ಅಶ್ವಿನ್ ಬ್ರೇಕ್ ಹಾಕಿದರು. 18 ರನ್ ಗಳಿಸಿ ಸಿರಾಜ್ಗೆ ಕ್ಯಾಚ್ ನೀಡಿ ಪೆವಿಲಿಯನ್ ಸೇರಿದರು. 5 ವಿಕೆಟ್ ಕಿತ್ತು ಮಿಂಚಿದ್ದ ರಬಾಡ ಅವರನ್ನು ಬುಮ್ರಾ ಕ್ಲೀನ್ ಬೌಲ್ಡ್ ಮಾಡಿದರು.
ಮಿಂಚಿದ ಬುಮ್ರಾ
ಭಾರತ ಪರ ಜಸ್ಪ್ರೀತ್ ಬುಮ್ರಾ 69 ನೀಡಿ 4 ವಿಕೆಟ್ ಕಿತ್ತು ಯಶಸ್ವಿ ಬೌಲರ್ ಎನಿಸಿಕೊಂಡರು. ಮೊಹಮ್ಮದ್ ಸಿರಾಜ್ 2 ವಿಕೆಟ್ ಪಡೆದರು. ಉಳಿದಂತೆ ಠಾಕೂರ್, ಅಶ್ವಿನ್ ಮತ್ತು ಪ್ರಸಿದ್ಧ್ ತಲಾ ಒಂದು ವಿಕೆಟ್ ಕಿತ್ತರು. ಶಾದೂಲ್ ಕೊಂಚ ದುಬಾರಿಯಾಗಿ ಕಂಡು ಬಂದರು.