Emerging Asia Cup 2023 : ಪಾಕಿಸ್ತಾನ ವಿರುದ್ಧ ಭಾರತ 128 ರನ್​ ಸೋಲು, ರನ್ನರ್​ ಅಪ್​ ಸ್ಥಾನಕ್ಕೆ ತೃಪ್ತಿ

ಕೊಲೊಂಬೊ: ಬ್ಯಾಟಿಂಗ್​ ಮತ್ತು ಬೌಲಿಂಗ್​ನಲ್ಲಿ ಸಂಪೂರ್ಣ ವೈಫಲ್ಯ ಎದುರಿಸಿದ ಭಾರತ ಎ ತಂಡ ಉದಯೋನ್ಮುಖ ತಂಡಗಳ ಏಷ್ಯಾ ಕಪ್​ (Emerging Asia Cup 2023) ಟೂರ್ನಿಯ ಫೈನಲ್​ನಲ್ಲಿ ಸಾಂಪ್ರದಾಯಿಕ ಪ್ರತಿಸ್ಪರ್ಧಿ ಪಾಕಿಸ್ತಾನ ಎ ವಿರುದ್ಧ 128 ರನ್​ಗಳ ಹೀನಾಯ ಸೋಲಿಗೆ ಒಳಗಾಗಿದೆ. ಈ ಮೂಲಕ ಕಪ್​ ಗೆಲ್ಲುವ ಅವಕಾಶದಿಂದ ವಂಚಿತಗೊಂಡು ನಿರಾಸೆಗೆ ಒಳಗಾಗಿದೆ. ಪಾಕಿಸ್ತಾನ ತಂಡದ ಆಟಗಾರರು ಪಂದ್ಯದುದ್ದಕ್ಕೂ ಪಾರಮ್ಯ ಮೆರೆದು ಭಾರತ ತಂಡಕ್ಕೆ ಸೋಲುಣಿಸಿ ಟ್ರೊಫಿ ಗೆದ್ದು ಸಂಭ್ರಮಿಸಿದರು.

See more

🏆 𝐂𝐇𝐀𝐌𝐏𝐈𝐎𝐍𝐒 🏆

Pakistan Shaheens defend their #ACCMensEmergingTeamsAsiaCup title 🤩💪#BackTheBoysInGreen pic.twitter.com/ReP9mJnEra

— Pakistan Cricket (@TheRealPCB) July 23, 2023

ಇಲ್ಲಿನ ಪ್ರೇಮದಾಸ ಕ್ರಿಕೆಟ್​ ಸ್ಟೇಡಿಯಮ್​ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ತಂಡ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಬ್ಯಾಟಿಂಗ್ ಆಹ್ವಾನ ಪಡೆದ ಪಾಕಿಸ್ತಾನ ತಂಡ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನ ನೀಡಿ 50 ಓವರ್​ಗಳಲ್ಲಿ 8 ವಿಕೆಟ್​ ನಷ್ಟಕ್ಕೆ 352 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಭಾರತ ತಂಡ 40 ಓವರ್​ಗಳಲ್ಲಿ 224 ರನ್​ಗಳಿಗೆ ಆಲ್​ಔಟ್​ ಆಗುವ ಮೂಲಕ ಹೀನಾಯ ಸೋಲಿಗೆ ಒಳಗಾಯಿತು.

ಡೊಡ್ಡ ಮೊತ್ತಕ್ಕೆ ಪ್ರತಿಯಾಗಿ ಬ್ಯಾಟ್​ ಮಾಡಲು ಮುಂದಾದ ಭಾರತ ತಂಡದಿಂದ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ಮೂಡಲಿಲ್ಲ. ಆರಂಭಿಕ ಬ್ಯಾಟರ್​ಗಳಾದ ಸಾಯಿ ಸುದರ್ಶನ್​ (29) ಹಾಗೂ ಅಭಿಷೇಕ್ ಶರ್ಮಾ (61) ಮೊದಲ ವಿಕೆಟ್​ಗೆ 64 ರನ್​ಗಳ ಜತೆಯಾಟ ನೀಡುವ ಮೂಲಕ ವಿಶ್ವಾಸ ಮೂಡಿಸಿದರು. ಆದರೆ, ಆ ಬಳಿಕ ಪಾಕಿಸ್ತಾನದ ಬೌಲರ್​ಗಳು ನಿಧಾನವಾಗಿ ಮೇಲುಗೈ ಸಾಧಿಸಲು ಆರಂಭಿಸಿದರು. ನಿಕಿನ್ ಜೋಸ್​ 11 ರನ್ ಬಾರಿಸಿ ಔಟಾದರೆ, ನಾಯಕ ಯಶ್​ ಧುಲ್ 39 ರನ್ ಪೇರಿಸಿದರು. ಧುಲ್​ ವಿಕೆಟ್ ಪತನಗೊಂಡ ಬಳಿಕ ಭಾರತ ತಂಡದ ಬ್ಯಾಟರ್​ಗಳು ಹೆಚ್ಚು ಪ್ರತಿರೋಧ ತೋರಲಿಲ್ಲ. ನಿಶಾಂತ್ ಸಿಂಧು 10 ರನ್ ಬಾರಿಸಿದರೆ ಧ್ರುವ್ ಜುರೇಲ್ 9 ರನ್​ಗಳಿಗೆ ಸೀಮಿತಗೊಂಡರು. ರಿಯಾನ್ ಪರಾಗ್​ 14 ರನ್ ಬಾರಿಸಿ ಔಟಾದರೆ ಹರ್ಷಿತ್ ರಾಣಾ 14 ರನ್ ಪೇರಿಸಿದರು.

ತೈಯಬ್​ ತಾಹಿರ್ ಶತಕ

ಮೊದಲು ಬ್ಯಾಟ್​ ಮಾಡಲು ಅವಕಾಶ ಪಡೆದ ಪಾಕಿಸ್ತಾನ ತಂಡ ಆರಂಭದಲ್ಲೇ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ಮೊದಲ ವಿಕೆಟ್​ಗೆ 121 ರನ್ ಗಳಿಸಿದ ಪಾಕ್​ ತಂಡ ಭಾರತದ ಬೌಲರ್​ಗಳ ಬೆವರಿಳಿಸಿತು. ಸೈಮ್​ ಅಯೂಬ್​ 59 ರನ್​ ಬಾರಿಸಿದರೆ ಎಸ್​ ಫರ್ಹಾನ್​ 65 ರನ್ ಗಳಿಸಿದರು. ಮೂರನೇ ಕ್ರಮಾಂಕದಲ್ಲಿ ಒಮೈರ್​ ಯೂಸುಫ್​ 5 ರನ್​ ಗಳಿಸಿದರು.

ಇದನ್ನೂ ಓದಿ : World Cup 2023 : ಪಾಕ್​ ತಂಡಕ್ಕೆ ಇನ್ನೂ ಅಭದ್ರತೆ; ಪರಿಶೀಲನೆಗೆ ಬರುತ್ತದಂತೆ ನಿಯೋಗ!

ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಲು ಬಂದ ಪಾಕ್​ ಬ್ಯಾಟರ್ ತೈಯಬ್​ ತಾಹಿರ್​ 71 ಎಸೆತಗಳಲ್ಲಿ 12 ಫೋರ್ ಹಾಗೂ 4 ಸಿಕ್ಸರ್ ಸಮೇತ 108 ರನ್ ಬಾರಿಸಿ ಮಿಂಚಿದರು. ಅವರ ಸ್ಫೋಟಕ ಬ್ಯಾಟಿಂಗ್ ಪ್ರಭಾವದಿಂದ ಪಾಕ್ ತಂಡ ಸ್ಕೋರ್ ಬೋರ್ಡ್​ ಬೆಳೆಯಿತು. ಕೊನೆಯಲ್ಲಿ ಮುಬಾಸಿರ್ ಖಾನ್​ (35 ರನ್​), ಮೆಹ್ರಾನ್​ ಮುಮ್ತಾಜ್​ (13). ಮುಹಮ್ಮದ್​​ ವಾಸಿಮ್​ (17) ವೇಗದಲ್ಲಿ ರನ್ ಗಳಿಸಿ ತಂಡದ ಮೊತ್ತವನ್ನು 350ರ ಗಡಿ ದಾಟಿಸಿದರು.