ದೋಹಾ: ಕತಾರ್ ಫಿಫಾ ವಿಶ್ವ ಕಪ್(Fifa World Cup) ಟೂರ್ನಿಯಲ್ಲಿ ಈಗಾಗಲೇ ಅಚ್ಚರಿಯ ಫಲಿತಾಂಶದಿಂದ ಬಲಿಷ್ಠ ತಂಡಗಳನ್ನು ಹೆಡೆಮುರಿಕಟ್ಟಿದ ಮೊರೊಕ್ಕೊ ತಂಡ ಕ್ವಾರ್ಟರ್ ಫೈನಲ್ ಕಾದಾಟದಲ್ಲಿ ಪೋರ್ಚುಗಲ್ ವಿರುದ್ಧ ಸೆಣಸಾಟ ನಡೆಸಲಿದೆ. ಈ ಪಂದ್ಯದಲ್ಲಿಯೂ ಮೊರೊಕ್ಕೊ ಮೇಲುಗೈ ಸಾಧಿಸಿ ಐತಿಹಾಸಿಕ ಗೆಲುವಿನ ಸಾಧನೆಯ ಹಂಬಲದಲ್ಲಿದೆ.
ಅಲ್‌ ತುಮಾಮಾ ಕ್ರೀಡಾಂಗಣದಲ್ಲಿ ಶನಿವಾರ ಈ ಮುಖಾಮುಖಿ ನಡೆಯಲಿದೆ. ಮೊರೆಕ್ಕೊ ಕಳೆದ ಫ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಈ ಬಾರಿಯ ಕಪ್ ಗೆಲ್ಲುವ ನೆಚ್ಚಿನ ತಂಡಗಳಲ್ಲಿ ಒಂದಾಗಿದ್ದ ಸ್ಪೇನ್ ತಂಡವನ್ನು ಮಗುಚಿಹಾಕಿತ್ತು. ಇದೀಗ ಪೋರ್ಚುಗಲ್ಗೂ ಶಾಕ್ ನೀಡಲು ಸಜ್ಜಾಗಿದೆ. ಮತ್ತೊಂಡೆದೆ ಸ್ವಿಜರ್ಲ್ಯಾಂಡ್ ತಂಡವನ್ನು 6-1 ರಿಂದ ಬಗ್ಗುಬಡಿದಿದ್ದ ಪೋರ್ಚುಗಲ್ ತಂಡ ಮೊರೊಕ್ಕೊ ಗೆಲುವಿನ ಓಟಕ್ಕೆ ಬ್ರೇಕ್ ಹಾಕಿ ಸೆಮಿಫೈನಲ್ಗೇರುವ ಯೋಜನೆಯಲ್ಲಿದೆ.
36 ವರ್ಷಗಳ ಹಿಂದೆ ಮೆಕ್ಸಿಕೊದಲ್ಲಿ ನಡೆದಿದ್ದ ಫಿಫಾ ಟೂರ್ನಿಯಲ್ಲಿ 16ರ ಘಟ್ಟ ಪ್ರವೇಶಿಸಿದ್ದ ಮೊರೊಕ್ಕೊ ಈ ಸಾಧನೆ ಮಾಡಿದ ಆಫ್ರಿಕಾದ ಮೊದಲ ದೇಶ ಎಂಬ ಗೌರವ ಪಡೆದುಕೊಂಡಿತ್ತು. ಇದೀಗ ಕತಾರ್ನಲ್ಲಿ ಪೊರ್ಚುಗಲ್ ತಂಡವನ್ನು ಮಣಿಸಿ ಸೆಮಿಫೈನಲ್ ಪ್ರವೇಶಿಸುವ ಮೂಲಕ ಆಫ್ರಿಕಾ ಮತ್ತು ಅರಬ್‌ ನಾಡಿನ ಮೊದಲ ತಂಡ ಎಂಬ ಐತಿಹಾಸಿಕ ಸಾಧನೆ ಮಾಡುವ ವಿಶ್ವಾಸದಲ್ಲಿದೆ. ಮತ್ತೊಂದೆಡೆ 1986ರ ಬಳಿಕ ಮೊದಲ ಬಾರಿಗೆ ಕ್ವಾರ್ಟರ್ ಫೈನಲ್ನಲ್ಲಿ ಆಡುತ್ತಿರುವ ಪೋರ್ಚುಗಲ್ ಕೂಡ ವಿಶ್ವ ಕಪ್ ಗೆಲ್ಲುವ ಹಂಬಲದಲ್ಲಿದೆ.
ಮೊರೆಕ್ಕೊ ಬಲಿಷ್ಠ
ಮೊರೆಕ್ಕೊ ತಂಡ ಈ ಬಾರಿಯ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಅಂಡರ್‌ ಡಾಗ್ಸ್‌ ಎಂದೇ ಕಡೆಗಣಿಸಲಾಗಿತ್ತು. ಆದರೆ ಲೀಗ್ ಹಂತದಿಂದ ಇಲ್ಲಿಯ ವರೆಗೆ ಮೊರೆಕ್ಕೊ ತೋರಿದ ಪ್ರದರ್ಶನವನ್ನು ಗಮನಿಸಿದರೆ ಇದೀಗ ಫಿಫಾ ವಿಶ್ವ ಕಪ್ ಗೆಲ್ಲಲಿದೆ ಎಂಬ ಮಟ್ಟಕ್ಕೆ ಬೆಳೆದು ನಿಂತಿದೆ. ಆಡಿದ ಎಲ್ಲ ಪಂದ್ಯಗಳಲ್ಲೂ ಎದುರಾಳಿ ತಂಡಕ್ಕೆ ಒಂದೂ ಗೋಲ್ ಬಿಟ್ಟುಕೊಡದ ಖ್ಯಾತಿಯನ್ನು ಪಡೆದಿದಿದೆ. ಆದರೆ ಕೆನಡಾ ವಿರುದ್ಧ 2-1ರಲ್ಲಿ ಗೆದ್ದ ಪಂದ್ಯದಲ್ಲಿ ಡಿಫೆಂಡರ್‌ ನಯೇಫ್‌ ಅವರು ಸೆಲ್ಫ್ ಗೋಲ್ ಹೊಡೆದು ಎದುರಾಳಿ ತಂಡಕ್ಕೆ ಗೋಲು ಬಿಟ್ಟುಕೊಡ್ಡಿದ್ದರು. ಈ ಅಂಕಿ ಅಂಶದಿಂದ ಮೊರೆಕ್ಕೊ ತಂಡ ಬಲಿಷ್ಠ ಎನ್ನಲಡ್ಡಿಯಿಲ್ಲ
ರಾಮೋಸ್ ಮೇಲೆ ನಿರೀಕ್ಷೆ
ಕಳೆದ ಫ್ರೀ ಕ್ವಾರ್ಟರ್ ಪಂದ್ಯದಲ್ಲಿ ಸ್ವಿಜರ್ಲ್ಯಾಂಡ್ ವಿರುದ್ಧ ಕ್ರಿಸ್ಟಿಯಾನೋ ರೊನಾಲ್ಡೊ ಬದಲಿಗೆ ಆಡಲಿಳಿದ 21 ವರ್ಷದ ಗೊನ್ಸಾಲೋ ರಾಮೋಸ್ ಹ್ಯಾಟ್ರಿಕ್‌ ಗೋಲ್ ಬಾರಿಸಿ ಮಿಂಚಿದ್ದರು. ಇದೀಗ ಈ ಪಂದ್ಯದಲ್ಲಿಯೂ ಅವರ ಮೇಲೆ ತಂಡ ಹೆಚ್ಚಿನ ನಿರೀಕ್ಷೆ ಇರಿಸಿದೆ. ಜತೆಗೆ ಈ ಪಂದ್ಯದಲ್ಲಿ ಕೋಚ್‌ ಫೆರ್ನಾಂಡೊ ಸಾಂಟೋಸ್‌ ಅವರು ರೊನಾಲ್ಡೊಗೆ ಆಡುವ ಅವಕಾಶ ನೀಡಲಿದ್ದಾರ ಎಂದು ಕಾದು ನೋಡಬೇಕಿದೆ. ಉಳಿದಂತೆ ಜಾವೊ ಫೆಲಿಕ್ಸ್‌ ಮತ್ತು ಬ್ರೂನೊ ಫೆರ್ನಾಂಡಿಸ್‌ ಅವರೂ ಉತ್ತಮ ಲಯದಲ್ಲಿ ಆಡುತ್ತಿದ್ದಾರೆ.
ಇದನ್ನೂ ಓದಿ | Fifa World Cup | ಅರ್ಜೆಂಟೀನಾ ಮತ್ತು ನೆದರ್ಲೆಂಡ್ಸ್ ಪಂದ್ಯದ ವೇಳೆ ಕುಸಿದು ಬಿದ್ದು ಸಾವನ್ನಪ್ಪಿದ ಪತ್ರಕರ್ತ ಗ್ರಾಂಟ್ ವಾಲ್