ದೋಹಾ: ಐದು ಬಾರಿಯ ಫಿಫಾ ವಿಶ್ವ (Fifa World Cup) ಚಾಂಪಿಯನ್ ಬ್ರೆಜಿಲ್ ತಂಡ 16ರ ಸುತ್ತಿನ ಪಂದ್ಯದಲ್ಲಿ ದಕ್ಷಿಣ ಕೊರಿಯಾವನ್ನು 4-1 ಗೋಲುಗಳ ಅಂತರದಿಂದ ಮಣಿಸಿ ಕ್ವಾರ್ಟರ್ ಫೈನಲ್ ತಲುಪಿದೆ. ಕ್ವಾರ್ಟರ್ ಫೈನಲ್ ಕಾದಾಟದಲ್ಲಿ ಕಳೆದ ಬಾರಿಯ ರನ್ನರ್ ಅಪ್ ತಂಡವಾದ ಬಲಿಷ್ಠ ಕ್ರೊವೇಶಿಯಾ ವಿರುದ್ಧ ಅದೃಷ್ಟ ಪರೀಕ್ಷೆಗೆ ಇಳಿಯಲಿದೆ.
ದೋಹಾದ 974 ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಈ ಪಂದ್ಯದಲ್ಲಿ ಬ್ರೆಜಿಲ್ ಗೋಲುಗಳ ಸುರಿಮಳೆಗೈದಿತು. ಎದುರಾಳಿ ದಕ್ಷಿಣ ಕೊರಿಯಾ, ನೇಮರ್ ಪಡೆಯ ಆರ್ಭಟದ ಮುಂದೆ ಯಾವ ಹಂತದಲ್ಲಿಯೂ ತಿರುಗೇಟು ನೀಡುವಲ್ಲಿ ಯಶಸ್ಸು ಕಾಣದೆ ಅಂತಿಮವಾಗಿ ಒಂದು ಗೋಲು ಬಾರಿಸಲಷ್ಟೇ ಸೀಮಿತವಾಯಿತು.
ತಂಡಕ್ಕೆ ಮರಳಿದ ನೇಮರ್
ಸರ್ಬಿಯಾ ವಿರುದ್ಧದ ಆರಂಭಿಕ ಪಂದ್ಯದಲ್ಲಿ ಕಾಲು ಉಳುಕಿನ ಸಮಸ್ಯೆಯಿಂದ ತಂಡದಿಂದ ಹೊರಗುಳಿದಿದ್ದ ನೇಮರ್, ಮಹತ್ವದ ಪಂದ್ಯದಲ್ಲಿ ಕಣ್ಣಕ್ಕಿಳಿಯುವ ಮೂಲಕ ಒಂದು ಗೋಲು ದಾಖಲಿಸಿ ಭರ್ಜರಿ ಕಮ್ಬ್ಯಾಕ್ ಮಾಡಿದರು. ನೇಮರ್ ಆಗಮನದಿಂದ ತಂಡಕ್ಕಿದ್ದ ಬಹುದೊಡ್ಡ ಚಿಂತೆ ನಿವಾರಣೆಯಾಯಿತು.
ಬ್ರೆಜಿಲ್ ಆಕ್ರಮಣಕಾರಿ ಆಟ
ಪಂದ್ಯದ ಮೊದಲಾರ್ಧದ 36 ನಿಮಿಷದಲ್ಲಿ 4 ಗೋಲು ಬಾರಿಸಿದ ಬ್ರಜಿಲ್ ಪಂದ್ಯದಲ್ಲಿ ಸಂಪೂರ್ಣವಾಗಿ ಹಿಡಿತ ಸಾಧಿಸಿತು. ಇದಾಗಲೇ ದಕ್ಷಿಣ ಕೊರಿಯಾ ತಮ್ಮ ಸೋಲನ್ನು ಖಚಿತ ಪಡಿಸಿತ್ತು. ವಿನಿಶಿಯಸ್ ಜೂನಿಯರ್(7ನೇ ನಿಮಿಷ), ನೇಮರ್ (13ನೇ ನಿಮಿಷ), ರಿಚಾರ್ಲಿಸನ್ (29ನೇ ನಿಮಿಷ), ಪ್ಯಾಕ್ವೆಟಾರ (36ನೇ ನಿಮಿಷ) ಅಮೋಘ ಗೋಲು ಬಾರಿಸಿ ಬ್ರೆಜಿಲ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.
ದಕ್ಷಿಣ ಕೊರಿಯಾ ಪರ ಪೈಕ್ ಸೆಯುಂಗ್ 76 ನೇ ನಿಮಿಷದಲ್ಲಿ ಒಂದು ಗೋಲು ದಾಖಲಿಸಿದರು. ದಕ್ಷಿಣ ಕೊರಿಯಾ ಈ ಸೋಲಿನೊಂದಿಗೆ ವಿಶ್ವ ಕಪ್ನಿಂದ ಹೊರಬಿದ್ದ ಕೊನೆಯ ಏಷ್ಯಾ ತಂಡವಾಯಿತು.
ಇದನ್ನೂ ಓದಿ | FIFA World Cup | ಜಪಾನ್‌ ಸೋಲಿಸಿದ ಕ್ರೊಯೇಷ್ಯಾ ತಂಡ ಕ್ವಾರ್ಟರ್‌ಫೈನಲ್ಸ್‌ಗೆ ಪ್ರವೇಶ