ದೋಹಾ: ಪೋರ್ಚುಗಲ್ನ ಖ್ಯಾತ ಫುಟ್ಬಾಲ್ ಆಟಗಾರ ಕ್ರಿಸ್ಟಿಯಾನೋ ರೊನಾಲ್ಡೊ ಅವರ ಅಪ್ಪಟ ಅಭಿಮಾನಿ, ಅಮೇರಿಕ ಮಾಜಿ ಗಾಲ್ಫ್ ಆಟಗಾರ್ತಿ ಪೈಜ್ ಸ್ಪಿರಾನಾಕ್ ಅವರು ರೊನಾಲ್ಡೊ ರೀತಿಯಲ್ಲಿ ಗೆಲುವಿನ ಸಂಭ್ರಮಾಚರಣೆ ಮಾಡಿದ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಕತಾರ್ನಲ್ಲಿ ನಡೆಯುತ್ತಿರುವ ಫಿಫಾ ಫುಟ್ಬಾಲ್ ವಿಶ್ವಕಪ್ನಲ್ಲಿ ಫೋರ್ಚುಗಲ್ ತಂಡ ಈಗಾಗಲೇ ನಾಕೌಟ್ ಪ್ರವೇಶಿಸಿದೆ. ಈ ತಂಡದ ಸಾರಥ್ಯ ವಹಿಸಿರುವ ರೊನಾಲ್ಡೊ ಅವರು ಉತ್ತಮ ಪ್ರದರ್ಶನ ತೋರುತ್ತಿದ್ದಾರೆ. ಇದೀಗ ಅವರ ಅಭಿಮಾನಿಯಾದ ಸ್ಪಿರಾನಾಕ್ ತಾವು ಧರಿಸಿದ ಟಾಪ್ ತೆಗೆದು ರೊನಾಲ್ಡೊ ರೀತಿಯಲ್ಲಿಯೇ ಸಂಭ್ರಮಾಚರಣೆ ಮಾಡಿದ ವಿಡಿಯೊ ಎಲ್ಲಡೆ ವೈರಲ್ ಆಗಿದೆ.
ರೊನಾಲ್ಡೊ ಅವರ ಮೇಲಿನ ಪ್ರೀತಿಯನ್ನು ತೋರಿಸಲು, ಸ್ಪಿರಾನಾಕ್ ವಿಡಿಯೊವೊಂದನ್ನು ಪೋಸ್ಟ್ ಮಾಡಿದ್ದು ಅದರಲ್ಲಿ ಅವರು ರೊನಾಲ್ಡೊ ಅವರಂತೆ ಫುಟ್ಬಾಲ್ ಚೆಂಡನ್ನು ಕಾಲಿನಿಂದ ಒದ್ದು ಗೋಲ್ ಪೋಸ್ಟ್ಗೆ ಬಾರಿಸಿದ್ದಾರೆ. ಬಳಿಕ ತಮ್ಮ ಟಿಶರ್ಟ್ ತೆಗೆದು ಗೆಲುವಿನ ಸಂಭ್ರಮ ಆಚರಿಸುವ ಬಗೆಯನ್ನು ಅನುಕರಣೆ ಮಾಡಿದ್ದಾರೆ. ಈ ವಿಡಿಯೊ ವೈರಲ್ ಆಗಿದೆ.
ಇದೇ ವೇಳೆ ಮಾತನಾಡಿದ ಸ್ಪಿರಾನಾಕ್ ‘ನಾನು ಫುಟ್ಬಾಲ್ ಅಭಿಮಾನಿಯಾಗಿರಲಿಲ್ಲ, ಆದರೆ ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ಮೇಲಿನ ಪ್ರೀತಿ ನನ್ನನ್ನು ಈ ಕ್ರೀಡೆಯ ಕಡೆ ಒಲವು ಹೆಚ್ಚುವಂತೆ ಮಾಡಿತು. ಕತಾರ್ನಲ್ಲಿ ನಡೆಯುತ್ತಿರುವ ಫಿಫಾ ವಿಶ್ವ ಕಪ್ನಲ್ಲಿ ಪೋರ್ಚುಗಲ್ ತಂಡ ಗೆಲ್ಲಬೇಕು ಜತೆಗೆ ರೊನಾಲ್ಡೊ ಅವರು ಇನ್ನೂ ಹೆಚ್ಚಿನ ಗೋಲ್ ಬಾರಿಸಬೇಕು’ ಎಂದು ಹೇಳಿದರು.
ಇದನ್ನೂ ಓದಿ | Fifa World Cup | ಕೋಸ್ಟರಿಕಾ ವಿರುದ್ಧ ಗೆದ್ದರೂ ಫಿಫಾ ವಿಶ್ವಕಪ್ ಟೂರ್ನಿಯಿಂದ ಜಾರಿ ಬಿದ್ದ ಜರ್ಮನಿ!