ತಿರುವನಂತಪುರ : ವಿರಾಟ್ ಕೊಹ್ಲಿ (166* ರನ್, 110 ಎಸೆತ, 13 ಪೋರ್, 8 ಸಿಕ್ಸರ್), ಶುಭಮನ್ ಗಿಲ್ (116 ರನ್, 97 ಎಸೆತ, 14 ಫೋರ್, 2 ಸಿಕ್ಸರ್) ಜೋಡಿಯ ಅಮೋಘ ಶತಕಗಳ ನೆರವು ಪಡೆದ ಭಾರತ ತಂಡ ಶ್ರೀಲಂಕಾ ವಿರುದ್ಧದ ಏಕ ದಿನ ಸರಣಿಯ (INDvsSL ODI) ಮೂರನೇ ಪಂದ್ಯದಲ್ಲಿ 390 ರನ್ಗಳ ಬೃಹತ್ ಮೊತ್ತ ಪೇರಿಸಿದೆ. ಮೂರು ಪಂದ್ಯಗಳ ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ವಿಜಯ ಸಾಧಿಸಿ ಸರಣಿ ತನ್ನದಾಗಿಸಿಕೊಂಡಿರುವ ಭಾರತ ತಂಡದ ಆಟಗಾರರು ನಿರಾಳವಾಗಿ ಆಡಿ ಎದುರಾಳಿ ತಂಡಕ್ಕೆ 391 ರನ್ಗಳ ಗೆಲುವಿನ ಗುರಿಯನ್ನೊಡ್ಡಿದರು.
ತಿರುವನಂತಪುರದ ಗ್ರೀನ್ ಫೀಲ್ಡ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದು ಟೀಮ್ ಇಂಡಿಯಾ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ತಮ್ಮ ಆಯ್ಕೆಯನ್ನು ಸಮರ್ಥಿಸಿಕೊಂಡು ಆಡಿದ ಭಾರತ ತಂಡ 50 ಓವರ್ಗಳಲ್ಲಿ 5 ವಿಕೆಟ್ಗೆ 390 ಬಾರಿಸಿತು.
ಆರಂಭಿಕರಾಗಿ ಬ್ಯಾಟ್ ಮಾಡಿದ ರೋಹಿತ್ ಶರ್ಮ (42) ಹಾಗೂ ಶುಬ್ಮನ್ ಗಿಲ್ ಜೋಡಿ ಮೊದಲ ವಿಕೆಟ್ಗೆ 95 ರನ್ ಬಾರಿಸಿ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಆದರೆ, 2 ಪೋರ್ ಹಾಗೂ ಮೂರು ಮನಮೋಹಕ ಸಿಕ್ಸರ್ ಬಾರಿಸಿ ಪ್ರೇಕ್ಷಕರಿಗೆ ರಂಜನೆ ನೀಡಿದ್ದ ನಾಯಕ ರೋಹಿತ್ ಶರ್ಮ ಅರ್ಧ ಶತಕ ಬಾರಿಸುವ ಅವಕಾಶದಿಂದ ವಂಚಿತರಾದರು.
ಬಳಿಕ ಜತೆಯಾದ ಶುಭ್ಮನ್ ಮತ್ತು ಕೊಹ್ಲಿ ಜೋಡಿ ಲಂಕಾ ಬೌಲರ್ಗಳನ್ನು ನಿರಂತರವಾಗಿ ದಂಡಿಸಿದರು. ಅವರಿಬ್ಬರೂ 131 ರನ್ಗಳ ಜತೆಯಾಟ ನೀಡಿದರು. 89 ಎಸೆತಗಳಲ್ಲಿ ಎರಡನೇ ಏಕ ದಿನ ಶತಕ ಬಾರಿಸಿದ ಗಿಲ್ 97 ಎಸೆತಗಳಲ್ಲಿ 116 ರನ್ ಬಾರಿಸಿ ಔಟಾದರು. ಬಳಿಕ ಸಿಡಿಲಬ್ಬರದ ಬ್ಯಾಟಿಂಗ್ ಮಾಡಿದ ಕೊಹ್ಲಿ 85 ಎಸೆತಗಳಲ್ಲಿ ಶತಕ ಬಾರಿಸಿದರು. ಇದು ಅವರ 74 ನೇ ಅಂತಾರಾಷ್ಟ್ರೀಯ ಶತಕ ಹಾಗೂ 46ನೇ ಏಕ ದಿನ ಶತಕವಾಗಿದೆ.
ಈ ಸರಣಿಯ ಮೊದಲ ಪಂದ್ಯದಲ್ಲೂ ವಿರಾಟ್ ಶತಕ ಬಾರಿಸಿದ್ದರು. ಅಲ್ಲದೆ ವರ್ಷಾರಂಭದಲ್ಲೇ ಎರಡು ಶತಕಗಳನ್ನು ಬಾರಿಸಿದ್ದಾರೆ. ಮುಂದುವರಿದ ಅವರು 110 ಎಸೆತಗಳಲ್ಲಿ 166 ರನ್ ಬಾರಿಸಿ ದೊಡ್ಡ ಮೊತ್ತ ಪೇರಿಸಲು ನೆರವಾದರು. ಮೊದಲ ನೂರು ರನ್ ಬಾರಿಸಲು 85 ಎಸೆತ ತೆಗೆದುಕೊಂಡ ಕೊಹ್ಲಿ, ನಂತರದ 25 ಎಸೆತಗಳಲ್ಲಿ 66 ರನ್ ಬಾರಿಸಿದರು. ಶ್ರೇಯಸ್ ಅಯ್ಯರ್ (38) ರನ್ಗಳ ಕೊಡುಗೆ ಕೊಟ್ಟರೆ, ಕೆ. ಎಲ್ ರಾಹುಲ್ (7) ಹಾಗೂ ಸೂರ್ಯಕುಮಾರ್ ಯಾದವ್ (4) ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ.
ಲಂಕಾ ತಂಡದ ಪರ ಕಸುನ್ ರಜಿತ ಹಾಗೂ ಲಾಹಿರು ಕುಮಾರ ತಲಾ ಎರಡು ವಿಕೆಟ್ ಕಬಳಿಸಿದರು.
ಇದನ್ನೂ ಓದಿ | VIrat Kohli | 74ನೇ ಶತಕ ಬಾರಿಸಿದ ರನ್ ಮಷಿನ್ ವಿರಾಟ್ ಕೊಹ್ಲಿ; ಭಾರತ ತಂಡ ಸುಸ್ಥಿತಿಯಲ್ಲಿ