ಮುಂಬಯಿ: ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಸರ್ವತೋಮುಖ ಪ್ರದರ್ಶನ ನೀಡಿದ ಗುಜರಾತ್ ಜಯಂಟ್ಸ್ ತಂಡ ಮಹಿಳೆಯರ ಪ್ರೀಮಿಯರ್ ಲೀಗ್ನ (WPL 2023) 14ನೇ ಪಂದ್ಯದಲ್ಲಿ ಎದುರಾಳಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ 11 ರನ್ಗಳಿಂದ ಸೋಲುಣಿಸಿತು. ಇದರೊಂದಿಗೆ ಗುಜರಾತ್ ಜಯಂಟ್ಸ್ ತಂಡ ಒಟ್ಟು ಎರಡು ಗೆಲುವಿನೊಂದಿಗೆ ಅಂಕಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೇರಿತು. ಇದುವರಗೆ ಅದ್ಭುತ ಪ್ರದರ್ಶನ ನೀಡುತ್ತಾ ಬಂದಿದ್ದ ಡೆಲ್ಲಿ ಕ್ಯಾಪಿಟಲ್ಸ್ ಬಳಗ ಈ ಹಣಾಹಣಿಯಲ್ಲಿ ತನ್ನ ದೌರ್ಬಲ್ಯ ಪ್ರದರ್ಶಿಸಿತು.
ಇಲ್ಲಿನ ಬ್ರಬೊರ್ನ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಗುಜರಾತ್ ಜಯಂಟ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ಗೆ 147 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಡೆಲ್ಲಿ ಕ್ಯಾಪಿಟಲ್ಸ್ ಬಳಗ 18.4 ಓವರ್ಗಳಲ್ಲಿ 136 ರನ್ಗಳಿಗೆ ಆಲ್ಔಟ್ ಆಯಿತು.
ಸ್ಪರ್ಧಾತ್ಮಕ ಮೊತ್ತ ಬೆನ್ನಟ್ಟಲು ಮುಂದಾದಾಗ ಗುಜರಾತ್ ಜಯಂಟ್ಸ್ ತಂಡ ಉತ್ತಮ ಆರಂಭ ಪಡೆಯಲಿಲ್ಲ. ಮೆಗ್ಲ್ಯಾನಿಂಗ್ (18 ರನ್), ಶಫಾಲಿ ವರ್ಮಾ (08) ಬೇಗನೆ ವಿಕೆಟ್ ಒಪ್ಪಿಸಿದರು. ಅಲೈಸ್ ಕಾಪ್ಸಿ 22 ಪೇರಿಸಿ ಶಕ್ತಿ ತುಂಬಿದರೂ ಜೆಮಿಮಾ ರೋಡ್ರಿಗಸ್ 1 ರನ್ಗೆ ವಿಕೆಟ್ ಒಪ್ಪಿಸುವ ಮೂಲಕ ಮತ್ತೊಂದು ಬಾರಿ ಹಿನ್ನಡೆಗೆ ಕಾರಣರಾದರು.
ಇದನ್ನೂ ಓದಿ : WPL 2023 : ಆರ್ಸಿಬಿ ಮಹಿಳಾ ತಂಡದ ಕ್ಯಾಂಪ್ಗೆ ಭೇಟಿ ನೀಡಿ ಸಲಹೆ ಕೊಟ್ಟ ವಿರಾಟ್ ಕೊಹ್ಲಿ
ಮಧ್ಯಮ ಕ್ರಮಾಂಕದಲ್ಲಿ ಮರಿಜನೆ ಕಾಪ್, 36 ರನ್ ಬಾರಿಸಿ ರನ್ ಗಳಿಕೆಗೆ ಪುಷ್ಟಿ ಕೊಟ್ಟರು. ಜೆಸ್ ಜೊನಾಸೆನ್ (4), ತಾನಿಯಾ ಭಾಟಿಯಾ (1) ಬೇಗನೆ ವಿಕೆಟ್ ಒಪ್ಪಿಸಿದರು. ಕೊನೆಯಲ್ಲಿ ಅರುಂಧತಿ ರೆಡ್ಡಿ 25 ರನ್ ಬಾರಿಸಿ ಚೈತನ್ಯ ಮೂಡಿಸಿದರು ಅವರಿಗೆ ಗೆಲುವಿನ ದಡ ದಾಟಿಸಲು ಸಾಧ್ಯವಾಗಲಿಲ್ಲ. ಶಿಖಾ ಪಾಂಡೆ 8 ರನ್ ಬಾರಿಸಿದರು.
ಲಾರಾ ಆ್ಯಶ್ಲೀ ಅರ್ಧ ಶತಕ
ಮೊದಲು ಬ್ಯಾಟ್ ಮಾಡಿದ ಗುಜರಾತ್ ತಂಡದ ಪರ ಗುಜರಾತ್ ಪರ ಲಾರಾ ವೋಲ್ವರ್ತ್ (57) ಹಾಗೂ ಆ್ಯಶ್ಲೀ ಗಾರ್ಡ್ನರ್ ( ಅಜೇಯ 51) ಅರ್ಧ ಶತಕಗಳನ್ನು ಬಾರಿಸಿದರು. ಆದರೆ, ಸೋಫಿ ಡಂಕ್ಲಿ (4) ವಿಕೆಟ್ ಔಟಾಗುವುದರೊಂದಿಗೆ ಆತಂಕಕ್ಕೆ ಸಿಲುಕಿತು. ಈ ವೇಳೆ ಜತೆಯಾದ ಲಾರಾ ಹಾಗೂ ಹರ್ಲಿನ್ ಡಿಯೋಲ್ (31) ನಿಧಾನಗತಿಯಲ್ಲಿ ಬ್ಯಾಟ್ ಮಾಡಿ ಇನಿಂಗ್ಸ್ ಕಟ್ಟಿದರು. ಆದರೆ ಜೊನಾಸೆನ್ ಎಸೆತಕ್ಕೆ ಭಾಟಿಯಾಗೆ ಕ್ಯಾಚ್ ನೀಡಿದ ಹರ್ಲಿನ್ ಪೆವಿಲಿಯನ್ ಕಡೆಗೆ ನಿರಾಸೆಯಿಂದ ನಡೆದರು. ಈ ವೇಳೆ ಕ್ರೀಸ್ಗೆ ಇಳಿದ ಆ್ಯಶ್ಲೀ ಗಾರ್ಡ್ನರ್ ಸ್ಫೋಟಕ ಬ್ಯಾಟ್ ಮಾಡಿ 33 ಎಸೆತಗಳಲ್ಲಿ 9 ಫೋರ್ಗಳ ಸಮೇತ ಅರ್ಧ ಶತಕ ಬಾರಿಸಿದರು.