ನವ ದೆಹಲಿ: ಹ್ಯುಂಡೈ ಕಂಪನಿಯು ತನ್ನ ಹೊಸ ಸಬ್ ಕಾಂಪ್ಯಾಕ್ಟ್ ಎಸ್ಯುವಿ ಎಕ್ಸ್ಟೆರ್ ಅನ್ನು ದೇಶಿಯ ಮಾರುಕಟ್ಟೆಯಲ್ಲಿ ಬಿಡುಗಡೆಗೊಳಿಸಲು ಸಜ್ಜಾಗಿದೆ. ಈ ಕಾರಿನ ಮುಂಭಾಗ ಮತ್ತು ಹಿಂಭಾಗದ ಹಲವು ಚಿತ್ರಗಳು ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಹ್ಯುಂಡೈ ಈ ಕಾರನ್ನು ಜುಲೈ 10ರಂದು ಭಾರತದ ಮಾರುಕಟ್ಟೆಗೆ ಇಳಿಸಲಿದೆ. ಏತನ್ಮಧ್ಯೆ, ಹ್ಯುಂಡೈ ಎಕ್ಸ್ಟೆರ್ಗಾಗಿ ಹೊಸ ಟಿವಿ ಜಾಹೀರಾತು ಬಿಡುಗಡೆ ಮಾಡಿದೆ. ಈ ವಿಡಿಯೊದಲ್ಲಿ ಭಾರತ ತಂಡದ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ (Hardik Pandya) ಅವರಿದ್ದು, ಹೊಸ ಕಾರಿಗೆ ಅವರೇ ಬ್ರಾಂಡ್ ಅಂಬಾಸಿಡರ್ ಆಗಿರಲಿದ್ದಾರೆ ಎಂದು ಹೇಳಲಾಗಿದೆ. ಇದು ಟಾಟಾ ಪಂಚ್ ಪಾರಮ್ಯ ಸಾಧಿಸಿರುವ ಸಬ್ ಕಾಂಪಾಕ್ಟ್ ಎಸ್ಯುವಿ ಸೆಗ್ಮೆಂಟ್ಗೆ ಪ್ರವೇಶ ಪಡೆಯಲಿದೆ ಎಕ್ಸ್ಟೆರ್.
ಹ್ಯುಂಡೈ ಇಂಡಿಯಾ ತನ್ನ ಅಧಿಕೃತ ಯೂಟ್ಯೂಬ್ ಚಾನೆಲ್ನಲ್ಲಿ ಈ ವೀಡಿಯೊವನ್ನು ಹಂಚಿಕೊಂಡಿದೆ. ಅದರಲ್ಲಿ ಕಾರಿನ ವಿನ್ಯಾಸವನ್ನು ತೋರಿಸಲಾಗಿದೆ. ಸಬ್ ಕಾಂಪ್ಯಾಕ್ಟ್ ಎಸ್ಯುವಿಯಲ್ಲಿ ಎಚ್ ಆಕಾರದ ಡೇಟೈಮ್ ರನ್ನಿಂಗ್ ಎಲ್ಇಡಿಗಳು, ಆಯತಾಕಾರದಎಲ್ಇಡಿ ಪ್ರೊಜೆಕ್ಟರ್ ಲೈಟ್ಗಳು, ಅಗಲ ಗ್ರಿಲ್ ಮತ್ತು ಮುಂಭಾಗದಲ್ಲಿ ಫಾಕ್ಸ್ ಸಿಲ್ವರ್ ಸ್ಕಿಡ್ ಪ್ಲೇಟ್ ಇಡಲಾಗಿದೆ. ಚೌಕಾಕಾರದ ವೀಲ್ ಅಲಾಯ್ಗಳು, ಬಾಡಿ ಕ್ಲಾಡಿಂಗ್ನೊಂದಿಗೆ ಸೈಡ್ ಪ್ರೊಪೈಲ್ ಅತ್ಯಾಕರ್ಷಕವಾಗಿದೆ. ಮುಂಭಾಗದ ಗ್ರಿಲ್ ಮೇಲೆ ಎಕ್ಸ್ಟೆರ್ ಬ್ಯಾಜ್ ಹಾಕಲಾಗಿದೆ.
ಹೇಗಿದೆ ವಿನ್ಯಾಸ?
ಮುಂಭಾಗದಲ್ಲಿ ಕಾರಿನ ಮಾಡೆಲ್ನ ಬ್ಯಾಡ್ಜ್ ಹಾಕಿರುವುದು ಇದೇ ಮೊದಲ ಬಾರಿ ಎನ್ನಲಾಗಿದೆ. ಕಾರು ಚೌಕಾಕಾರದಲ್ಲಿದ್ದು. ಟೇಲ್ ಲ್ಯಾಂಪ್ನಲ್ಲಿಯೂ ಇದೇ ರೀತಿಯ ಎಚ್-ಆಕಾರದ ಎಲ್ಇಡಿ ಇನ್ಸರ್ಟ್ಗಳಿವೆ. ಟೈಲ್ ಗೇಟ್ ನ ಉದ್ದಕ್ಕೂ ಕಪ್ಪು ಬ್ಯಾಂಡ್ ಅಳವಡಿಸಲಾಗಿದೆ . ಹ್ಯುಂಡೈ ಲೋಗೋವನ್ನು ಈ ಕಪ್ಪು ವಿನ್ಯಾಸದ ಬ್ಯಾಂಡ್ ಮೇಲೆ ಇರಿಸಲಾಗಿದೆ. ಹ್ಯುಂಡೈ ಎಕ್ಸ್ಟರ್ ನ ಹಿಂಭಾಗದ ಬಂಪರ್ನ ಕೆಳಭಾಗದಲ್ಲಿರುವ ಕಪ್ಪು ಬಾಡಿ ಕ್ಲಾಡಿಂಗ್ ಮೇಲೆ ಬೃಹತ್ ಫಾಕ್ಸ್ ಸಿಲ್ವರ್ ಸ್ಕಿಡ್ ಪ್ಲೇಟ್ ಹಾಕಲಾಗಿದೆ. ಅದರ ಎರಡೂ ತುದಿಗಳಲ್ಲಿ ರಿಫ್ಲೆಕ್ಟರ್ ಗಳನ್ನು ಇರಿಸಲಾಗುತ್ತದೆ. ರೂಫ್ ಸ್ಪಾಯ್ಲರ್, ಶಾರ್ಕ್ ಫಿನ್ ಆಂಟೆನಾ ಮತ್ತು ರೂಫ್ ರೇಲ್ಸ್ಗಳ ನಡುವೆ ಇರಿಸಲಾದ ಎಲ್ಇಡಿ ಬ್ರೇಕ್ ಲೈಟ್ಗಳಿವೆ.
ಇಂಟೀರಿಯರ್ ಹೇಗಿರಬಹುದು?
ವೀಡಿಯೊ ಹ್ಯುಂಡೈ ಎಕ್ಸ್ಟೆರ್ ಕಾರಿನ ಇಂಟೀರಿಯರ್ ತೋರಿಸಿಲ್ಲ. ಆದರೆ, ಹ್ಯುಂಡೈ ನೀಡಬಲ್ಲ ಕೆಲವು ಫೀಚರ್ಗಳನ್ನು ಅಂದಾಜಿಸಬಹುದು. ಸನ್ ರೂಫ್, ವೈರ್ ಲೆಸ್ ಚಾರ್ಜರ್, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್, ಹೊಸ ಟಚ್ ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್ ಇರಲಿದೆ. ಎಕ್ಸ್ಟೆರ್ ತನ್ನ ಸೆಗ್ಮೆಂಟಿನಲ್ಲಿ ಡ್ಯುಯಲ್ ಕ್ಯಾಮೆರಾಗಳೊಂದಿಗೆ ಬರುವ ಮೊದಲ ಕಾರಾಗಲಿದೆ. ಆರು ಏರ್ಬ್ಯಾಗ್ ಗಳು, ಇಎಸ್ಸಿ, ಇಬಿಡಿಯೊಂದಿಗೆ ಎಬಿಎಸ್, ರಿವರ್ಸ್ ಪಾರ್ಕಿಂಗ್ ಸೆನ್ಸಾರ್ಗಳು ಮತ್ತು ಕ್ಯಾಮೆರಾ ಮತ್ತು ಹಿಲ್ ಸ್ಟಾರ್ಟ್ ಅಸಿಸ್ಟ್ ಫೀಚರ್ಗಳಿವೆ.
ಎಂಜಿನ್ ಸಾಮರ್ಥ್ಯ?
ಹ್ಯುಂಡೈ ಎಕ್ಸ್ಟರ್ 1.2-ಲೀಟರ್ ನಾಲ್ಕು ಸಿಲಿಂಡರ್ ನ್ಯಾಚುರಲಿ-ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್ ಹೊಂದಿರಲಿದೆ. ಅಂದಾಜಿನ ಪ್ರಕಾರ ಇದೊಂದೇ ಆಯ್ಕೆ ಇರಲಿದೆ. ಈ ಎಂಜಿನ್ 5 ಸ್ಪೀಡ್ ಮ್ಯಾನುವಲ್ ಮತ್ತು 5 ಸ್ಪೀಡ್ ಎಎಂಟಿ ಗೇರ್ ಬಾಕ್ಸ್ ಆಯ್ಕೆಗಳೊಂದಿಗೆ ಲಭ್ಯವಿರಲಿದೆ. ಇದು 83 ಬಿಎಚ್ಪಿ ಪವರ್ ಮತ್ತು 114 ಎನ್ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಹ್ಯುಂಡೈ ಗ್ರ್ಯಾಂಡ್ ಐ10 ನಿಯೋಸ್, ಔರಾ ಮತ್ತು ವೆನ್ಯೂವಿನ ಎಂಜಿನ್ ಹೊಂದಿರಲಿದೆ.
ಹ್ಯುಂಡೈ ಎಕ್ಸ್ಟರ್ ಟಾಟಾ ಪಂಚ್ ಮತ್ತು ಸಿಟ್ರೋಯೆನ್ ಸಿ3 ಯಂಥ ಕಾರುಗಳಿಗೆ ಪೈಪೋಟಿ ನೀಡಲಿದೆ. ಪಂಚ್ ಪೆಟ್ರೋಲ್ ಆಯ್ಕೆಯಲ್ಲಿ ಮಾತ್ರ ಲಭ್ಯವಿದೆ. ಭವಿಷ್ಯದಲ್ಲಿ ಸಿಎನ್ಜಿ ಆಯ್ಕೆಯೂ ಸಿಗಬಹುದು.