ಬೆಂಗಳೂರು: 2024ರ ಆರಂಭದೊಂದಿಗೆ, ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ತನ್ನ ವಾರ್ಷಿಕ ಪ್ರಶಸ್ತಿಗಳಿಗೆ ನಾಮನಿರ್ದೇಶನಗಳನ್ನು ಘೋಷಿಸಿದೆ. ಐಸಿಸಿ ಟಿ20 ರ್ಯಾಂಕಿಂಗ್ನಲ್ಲಿ ನಂ.1 ಸ್ಥಾನದಲ್ಲಿರುವ ಭಾರತದ ಸೂರ್ಯಕುಮಾರ್ ಯಾದವ್ (Suryakumar Yadav) 2023ರ ಟಿ20 ಕ್ರಿಕೆಟರ್ ಆಫ್ ದಿ ಇಯರ್ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ. ನ್ಯೂಜಿಲೆಂಡ್ನ ಮಾರ್ಕ್ ಚಾಪ್ಮನ್, ಜಿಂಬಾಬ್ವೆಯ ಸಿಕಂದರ್ ರಾಜಾ ಮತ್ತು ಉಗಾಂಡಾದ ಅಲ್ಪೇಶ್ ರಾಮ್ಜಾನಿ ಅವರು ಯಾದವ್ ಗೆ ಪೈಪೋಟಿ ನೀಡುತ್ತಿದ್ದಾರೆ.
ಸೂರ್ಯಕುಮಾರ್ ಯಾದವ್: 17 ಟಿ20 ಇನ್ನಿಂಗ್ಸ್ಗಳಲ್ಲಿ ಯಾದವ್ 48.86ರ ಸರಾಸರಿಯಲ್ಲಿ 733 ರನ್ ಗಳಿಸಿದ್ದು, 155.95ರ ಸ್ಟ್ರೈಕ್ ರೇಟ್ ಹೊಂದಿದ್ದಾರೆ. ಶ್ರೀಲಂಕಾ (112*) ಮತ್ತು ದಕ್ಷಿಣ ಆಫ್ರಿಕಾ (100) ವಿರುದ್ಧ ಕ್ರಮವಾಗಿ ಸ್ಮರಣೀಯ ಶತಕಗಳನ್ನು ಬಾರಿಸಿದ 33 ವರ್ಷದ ಸೂರ್ಯ , ದಕ್ಷಿಣ ಆಫ್ರಿಕಾ ವಿರುದ್ಧ ಕೇವಲ 45 ಎಸೆತಗಳಲ್ಲಿ ಶತಕ ಬಾರಿಸಿದ್ದಾರೆ.
ಸಿಕಂದರ್ ರಾಜಾ: 2023 ರಲ್ಲಿ ಜಿಂಬಾಬ್ವೆ ತಂಡ ಹಲವಾರು ಹಿನ್ನಡೆಗಳನ್ನು ಹೊಂದಿರುವ ಹೊರತಾಗಿಯೂ ಬ್ಯಾಟ್ ಮತ್ತು ಬಾಲ್ ಎರಡರಲ್ಲೂ ಪ್ರಭಾವಶಾಲಿ ಪ್ರದರ್ಶನವನ್ನು ನೀಡಿದ ರಾಜಾ ತಂಡದ ಪಾಲಿಗೆ ಯಶಸ್ವಿ ಆಟಗಾರನಾಗಿದ್ದರು. ಅವರು 11 ಪಂದ್ಯಗಳಲ್ಲಿ 515 ರನ್ ಗಳಿಸಿರುವ ಜತೆಗೆ 11 ವಿಕೆಟ್ಗಳನ್ನು ಉರುಳಿಸಿದ್ದಾರೆ. ಐಸಿಸಿ ಟಿ 20 ವಿಶ್ವಕಪ್ ಆಫ್ರಿಕನ್ ಅರ್ಹತಾ ಪಂದ್ಯಗಳಲ್ಲಿ ರಾಜಾ ಮಿಂಚಿದ್ದರು. ಅಲ್ಲಿ ಆಲ್ರೌಂಡರ್ ಅತಿ ಹೆಚ್ಚು ರನ್ ಗಳಿಸಿದ ಮತ್ತು ಮೂರನೇ ಅತಿ ಹೆಚ್ಚು ವಿಕೆಟ್ ಪಡೆದವರಾಗಿದ್ದರು.
ಇದನ್ನೂ ಓದಿ : Virat kohli : ರಾಮ ಧನಸ್ಸು ಭಂಗಿಯೊಂದಿಗೆ ಕೇಶವ್ ಮಹಾರಾಜ್ ಸ್ವಾಗತಿಸಿದ ಕೊಹ್ಲಿ
ಮಾರ್ಕ್ ಚಾಪ್ಮನ್: ವಿಶ್ವಕಪ್ 2023 ರ ಕಾರಣದಿಂದಾಗಿ ಹಲವಾರು ಉನ್ನತ ಆಟಗಾರರಿಗೆ ವಿಶ್ರಾಂತಿ ನೀಡಿದ್ದರಿಂದ ನ್ಯೂಜಿಲ್ಯಾಂಡ್ ತಂಡದ ಪರವಾಗಿ ಮಾರ್ಕ್ ಚಾಪ್ಮನ್ ಟಿ 20 ಪಂದ್ಯಗಳಲ್ಲಿ ಅವಕಾಶ ಪಡೆದುಕೊಂಡರು. ಇದು ಮಧ್ಯಮ ಕ್ರಮಾಂಕದ ಬ್ಯಾಟರ್ಗೆ ಹೆಚ್ಚು ಅವಕಾಶಗಳನ್ನು ನೀಡಿತು. ಚಾಪ್ಮನ್ 17 ಇನ್ನಿಂಗ್ಸ್ಗಳಲ್ಲಿ 50.54 ಸರಾಸರಿಯಲ್ಲಿ 556 ರನ್ ಗಳಿಸಿದ್ದಾರೆ. ನ್ಯೂಜಿಲೆಂಡ್ನ ಪಾಕಿಸ್ತಾನ ಪ್ರವಾಸದಲ್ಲಿ ನಿಷ್ಕಳಂಕ ಕ್ರಿಕೆಟ್ ಪ್ರದರ್ಶಿಸಿದ 29 ವರ್ಷದ ಚಾಪ್ಮನ್ ಐದು ಪಂದ್ಯಗಳ ಸರಣಿಯಲ್ಲಿ 290 ರನ್ ಗಳಿಸಿದ್ದರು. ಇದರಲ್ಲಿ ರಾವಲ್ಪಿಂಡಿಯಲ್ಲಿ ಅಜೇಯ 104* ರನ್ ಸೇರಿದೆ.
ಅಲ್ಪೇಶ್ ರಾಮ್ಜಾನಿ: 2023ರಲ್ಲಿ ಆಫ್ರಿಕಾದ ಮತ್ತೊಂದು ರಾಷ್ಟ್ರವಾದ ಉಗಾಂಡಾ ತಂಡ ನಮೀಬಿಯಾದೊಂದಿಗೆ ಮುಂಬರುವ ಟಿ 20ವಿಶ್ವಕಪ್ 2024ರಲ್ಲಿ ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಗಿದೆ. ಈ ತಂಡದ ಸ್ಪಿನ್ನರ್ ಅಲ್ಪೇಶ್ ರಾಜ್ಮಣಿ ತಂಡದ ಪ್ರೇರಕ ಶಕ್ತಿಯಾದರು. ಎಡಗೈ ಸ್ಪಿನ್ ಬೌಲಿಂಗ್ನೊಂದಿಗೆ ಅವರು ಹೆಚ್ಚು ಸಾಧನೆ ಮಾಡಿದ್ದಾರೆ. 30 ಪಂದ್ಯಗಳಲ್ಲಿ ರಾಮ್ಜಾಜಿ 449 ರನ್ ಹಾಗೂ 55 ವಿಕೆಟ್ ಕಬಳಿಸಿದ್ದಾರೆ.