ಮುಂಬಯಿ: ಏಕಮುಖವಾಗಿ ಸಾಗಿದ ವಿಶ್ವ ಕಪ್ ಟೂರ್ನಿಯ (ICC World Cup 2023) 20ನೇ ಪಂದ್ಯದಲ್ಲಿ ಚಾಂಪಿಯನ್ ಇಂಗ್ಲೆಂಡ್ ವಿರುದ್ಧ ದಕ್ಷಿಣ ಆಫ್ರಿಕಾ ತಂಡ ದಾಖಲೆಯ 229 ರನ್ಗಳ ಗೆಲುವು ಸಾಧಿಸಿದೆ. ಇದರೊಂದಿಗೆ ದಕ್ಷಿಣ ಆಫ್ರಿಕಾ ಭರ್ಜರಿ ರನ್ರೇಟ್ ಗಳಿಸುವ ಮೂಲಕ ಪ್ಲೇಆಫ್ ಹಂತದೆಡೆಗೆ ಮುನ್ನಡೆಯುತ್ತಿದೆ. ಅತ್ತ ಜೋಸ್ ಬಟ್ಲರ್ ನೇತೃತ್ವದ ಆಂಗ್ಲರ ಪಡೆಯ ಸೆಮಿಫೈನಲ್ ಪ್ರವೇಶದ ಅವಕಾಶ ಕ್ಷೀಣಗೊಂಡಿದೆ. ದಕ್ಷಿಣ ಆಫ್ರಿಕಾ ತಂಡದ ಬ್ಯಾಟರ್ಗಳು ಹಾಗೂ ಬೌಲರ್ಗಳು ಪಂದ್ಯದುದ್ದಕ್ಕೂ ಇಂಗ್ಲೆಂಡ್ ತಂಡದ ಮೇಲೆ ಸವಾರಿ ಮಾಡಿತು. ಇದು ಇಂಗ್ಲೆಂಡ್ ತಂಡದ ಪಾಲಿಗೆ ವಿಶ್ವ ಕಪ್ನಲ್ಲಿ ಅತ್ಯಂತ ದೊಡ್ಡ ಅಂತರದ ಸೋಲು. ಅದೇ ರೀತಿ ವಿಶ್ವ ಕಪ್ ಇತಿಹಾಸದಲ್ಲಿ ದಾಖಲಾದ ಎರಡನೇ ಅತಿ ದೊಡ್ಡ ಅಂತರದ ಸೋಲಾಗಿದೆ.
400 approaching for South Africa – absolute carnage from the bats of Klaasen and Jansen! 🚀#ENGvSA #CWC23
— ESPNcricinfo (@ESPNcricinfo) October 21, 2023
ಮುಂಬಯಿಯ ವಾಖೆಂಡೆ ಸ್ಟೇಡಿಯಮ್ನಲ್ಲಿ ಇದು ಹಾಲಿ ಆವೃತ್ತಿಯ ವಿಶ್ವ ಕಪ್ನ ಮೊದಲ ಪಂದ್ಯವಾಗಿದೆ. ಟಾಸ್ ಗೆದ್ದ ಇಂಗ್ಲೆಂಡ್ ತಂಡ ಮೊದಲು ಬೌಲಿಂಗ್ ಮಾಡಲು ಮುಂದಾಯಿತು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ ನಿಗದಿತ 50 ಓವರ್ಗಳಲ್ಲಿ ಏಳು ವಿಕೆಟ್ಗೆ 399 ರನ್ ಬಾರಿಸಿತು. ಪ್ರತಿಯಾಗಿ ಆಡಿದ ಇಂಗ್ಲೆಂಡ್ ತಂಡ ಯಾವುದೇ ರೀತಿಯಲ್ಲಿ ಪ್ರತಿರೋಧ ತೋರದೇ 22 ಓವರ್ಗಳಲ್ಲಿ 170 ರನ್ಗಳಿಗೆ ಆಲ್ಔಟ್ ಆಯಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟುವ ಗುರಿ ಪಡೆದ ಇಂಗ್ಲೆಂಡ್ ತಂಡ ಅತ್ಯಂತ ಕಳಪೆ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ತಂಡದ ಯಾವುದೇ ಬ್ಯಾಟರ್ಗಳು ಪ್ರತಿರೋಧ ನೀಡುವ ಗೋಜಿಗೆ ಹೋಗಲಿಲ್ಲ. ಗೆರಾಲ್ಡ್ ಕೊಯೆಟ್ಜಿ (3 ವಿಕೆಟ್), ಲುಂಗಿ ಎನ್ಗಿಡಿ (2 ವಿಕೆಟ್), ಮಾರ್ಕೊ ಜೆನ್ಸನ್ (2 ವಿಕೆಟ್) ಹಾಗೂ ಕೇಶವ್ ಮಹಾರಾಜ್ (1 ವಿಕೆಟ್) ಅವರ ಮಾರಕ ದಾಳಿಗೆ ತತ್ತರಿಸಿತು. ಆರಂಭಿಕ ಬ್ಯಾಟರ್ಗಳಾದ ಜಾನಿ ಬೈರ್ಸ್ಟೋವ್ (10 ರನ್), ಮಲಾನ್ (6 ರನ್) ಬೇಗನೇ ವಿಕೆಟ್ ಒಪ್ಪಿಸಿದರು. ಜೋ ರೂಟ್ 2 ರನ್ಗೆ ಔಟಾದರೆ, ತಂಡಕ್ಕೆ ಮರಳಿದ ಬೆನ್ಸ್ಟೋಕ್ಸ್ ಕೊಡುಗೆ 5 ರನ್. ಹ್ಯಾರಿ ಬ್ರೂಕ್ 17 ರನ್ ಬಾರಿಸಿ ಔಟಾದರೆ, ನಾಯಕ ಬಟ್ಲರ್ 15 ರನ್ ಹೊಡೆದ ಪೆವಿಲಿಯನ್ ಸೇರಿಕೊಂಡರು.
A monumental victory for South Africa against England 🤯#CWC23 #ENGvSA pic.twitter.com/fdavtyu5ZW
— ICC Cricket World Cup (@cricketworldcup) October 21, 2023
ಇವರ ಕಳಪೆ ಆಟದಿಂದಾಗಿ ಇಂಗ್ಲೆಂಡ್ ತಂಡ 100 ರನ್ಗಳಿಗೆ 8 ವಿಕೆಟ್ ಕಳೆದುಕೊಂಡಿತು. ಆದರೆ, 8 ವಿಕೆಟ್ಗೆ ಮಾರ್ಕ್ ವುಡ್ (43) ಹಾಗೂ ಗಸ್ ಅಟ್ಕಿನ್ಸನ್ (35) 70 ರನ್ಗಳ ಜತೆಯಾಡುವ ಮೂಲಕ ಸ್ವಲ್ಪ ಮರ್ಯಾದೆ ಉಳಿಸಿದರು. ಇವರಿಬ್ಬರೇ ಇಂಗ್ಲೆಂಡ್ ತಂಡದ ದೊಡ್ಡ ಮೊತ್ತದ ಬ್ಯಾಟರ್ಗಳು. ಕೊನೇ ಬ್ಯಾಟರ್ ರೀಸ್ ಟಾಪ್ಲೆ ಗಾಯದ ಸಮಸ್ಯೆಯಿಂದಾಗಿ ಬ್ಯಾಟಿಂಗ್ ಮಾಡಲಿಲ್ಲ.
ದ. ಆಫ್ರಿಕಾ ಭರ್ಜರಿ ಬ್ಯಾಟಿಂಗ್
ಅದಕ್ಕಿಂದ ಮೊದಲು ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ ಭರ್ಜರಿ ವಿಶ್ವಾಸದಲ್ಲಿ ಆಡಿತು. ಕ್ವಿಂಟನ್ ಡಿ ಕಾಕ್ ಕೇವಲ 4 ರನ್ಗಳಿಗೆ ಔಟಾಗುವ ಮೂಲಕ ತಂಡದ ನಾಲ್ಕು ರನ್ಗಳಿಗೆ ತಂಡ ಮೊದಲ ವಿಕೆಟ್ ಕಳೆದುಕೊಂಡಿತು. ಆದರೆ, ರೀಜಾ ಹೆಂಡ್ರಿಕ್ಸ್ (85) ಹಾಗೂ ವ್ಯಾನ್ ಡೆರ್ ಡಸ್ಸೆನ್ (60) ಎರಡನೇ ವಿಕೆಟ್ಗೆ 121 ರನ್ಗಳ ಜತೆಯಾಟವಾಡಿದರು. ನಾಯಕ ಏಡೆನ್ ಮಾರ್ಕ್ರಮ್ (42) ಕೂಡ ಉತ್ತಮವಾಗಿ ಬ್ಯಾಟ್ ಬೀಸಿದರು. ಮಿಲ್ಲರ್ 5 ರನ್ಗೆ ವಿಕೆಟ್ ಕಳೆದುಕೊಂಡರೂ ತಂಡ ಮೊತ್ತ 5 ವಿಕೆಟ್ 243 ಆಗಿತ್ತು.
ಇದನ್ನೂ ಓದಿ :
ICC World Cup 2023 : ಶ್ರೀಲಂಕಾ ತಂಡಕ್ಕೆ ಮೊದಲ ಜಯ, ನೆದರ್ಲ್ಯಾಂಡ್ಸ್ಗೆ 5 ವಿಕೆಟ್ ಸೋಲು
ICC World Cup 2023 : ಬಾಂಗ್ಲಾ ಹುಲಿಯ ಹೊಟ್ಟೆ ಸೀಳಿದ ಭಾರತೀಯ ಅಭಿಮಾನಿಗಳು!
Ravindra Jadeja : ಬೆಸ್ಟ್ ಫೀಲ್ಡರ್ ರವೀಂದ್ರ ಜಡೇಜಾಗೂ ಗಾಯದ ಸಮಸ್ಯೆ
ಕ್ಲಾಸೆನ್ ಕ್ಲಾಸ್ ಆಟ
ಆರನೇ ವಿಕೆಟ್ಗೆ ಜತೆಯಾದ ಹೆನ್ರಿಚ್ ಕ್ಲಾಸೆನ್ (109 ರನ್) ಹಾಗೂ ಮಾರ್ಕೊ ಜೆನ್ಸನ್ (ಅಜೇಯ 75 ರನ್) 151 ರನ್ಗಳ ಜತೆಯಾಟವಾಡಿದರು. ಅಂತಿಮ ಹಂತದಲ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಕ್ಲಾಸೆನ್ 62 ಎಸೆತಗಳಿಗೆ ಶತಕ ಬಾರಿಸಿದ್ದು, 67 ಎಸೆತಗಳಿಗೆ 12 ಫೊರ್ ಹಾಗೂ 4 ಸಿಕ್ಸರ್ಗಳ ನೆರವಿನಿಂದ 109 ರನ್ ಪೇರಿಸಿದರು. ಜೆನ್ಸನ್ 42 ಎಸೆತಕ್ಕೆ 3 ಫೋರ್ ಹಾಗೂ 6 ಸಿಕ್ಸರ್ ಬಾರಿಸಿ 75 ರನ್ ಬಾರಿಸಿದರು. ಕೊನೇ 10 ಓವರ್ಗಳಲ್ಲಿ ದ. ಆಫ್ರಿಕಾ ತಂಡ 143 ರನ್ ಬಾರಿಸಿ ಮಿಂಚಿತು. 399 ರನ್ಗಳು ಇಂಗ್ಲೆಂಡ್ ವಿರುದ್ಧ ಏಕ ದಿನ ಕ್ರಿಕೆಟ್ನಲ್ಲಿ ತಂಡವೊಂದು ಬಾರಿಸಿದ ಗರಿಷ್ಠ ಮೊತ್ತವಾಗಿದೆ.