ಮೆಲ್ಬೋರ್ನ್: ಟಿ20 ವಿಶ್ವ ಕಪ್ (T20 World Cup) ನ ಅರ್ಹತಾ ಸುತ್ತಿನ ಪಂದ್ಯಗಳು ಬಹುತೇಕ ಮುಕ್ತಾಯದ ಹಂತಕ್ಕೆ ಬಂದು ನಿಂತಿವೆ. ‘ಎ’ ಗ್ರೂಪ್ನಿಂದ ಈಗಾಗಲೇ ಶ್ರೀಲಂಕಾ ಹಾಗೂ ನೆದರ್ಲೆಂಡ್ಸ್ ತಂಡಗಳು ಕ್ವಾಲಿಫೈ ಆಗಿದೆ. ಆದರೆ ‘ಬಿ’ ಗ್ರೂಪ್ನಿಂದ ಇನ್ನೂ ಎರಡು ತಂಡ ಆಯ್ಕೆಯಾಗಬೇಕಿದೆ. ಈ ಮಧ್ಯೆ ಭಾರತ ತಂಡದ ದ್ವಿತೀಯ ಎದುರಾಳಿ ಯಾರೆಂದು ಫಿಕ್ಸ್ ಆಗಿದೆ.
ಗ್ರೂಪ್ ‘ಎ’ ಪಾಯಿಂಟ್ ಟೇಬಲ್ನಲ್ಲಿ ಶ್ರೀಲಂಕಾ ತಂಡವು ಮೂರು ಪಂದ್ಯಗಳಲ್ಲಿ 2 ಜಯ ಸಾಧಿಸಿ ಅಗ್ರ ತಂಡವಾಗಿ ಹೊರಹೊಮ್ಮಿದೆ. ಇದರೊಂದಿಗೆ ಲಂಕಾ ಸೂಪರ್-12 ನಲ್ಲಿ ಗ್ರೂಪ್- 1 ರಲ್ಲಿ ಸ್ಥಾನ ಪಡೆದಿದೆ. ಇನ್ನು 2ನೇ ಸ್ಥಾನಗಳಿಸಿರುವ ನೆದರ್ಲೆಂಡ್ಸ್ ಗ್ರೂಪ್-2 ನಲ್ಲಿ ಅವಕಾಶ ಪಡೆದಿದೆ. ಈ ಗ್ರೂಪ್ನಲ್ಲಿ ಭಾರತ, ಪಾಕಿಸ್ತಾನ, ಬಾಂಗ್ಲಾದೇಶ, ದಕ್ಷಿಣ ಆಫ್ರಿಕಾ ತಂಡಗಳಿದ್ದು, ಈ ಪಟ್ಟಿಗೆ ಐದನೇ ತಂಡವಾಗಿ ನೆದರ್ಲೆಂಡ್ಸ್ ಎಂಟ್ರಿ ಕೊಟ್ಟಿದೆ.
ಭಾರತ ತನ್ನ ಮೊದಲ ಪಂದ್ಯವನ್ನು ಪಾಕಿಸ್ತಾನ ವಿರುದ್ಧ ಆಡುವ ಮೂಲಕ ಟಿ20 ವಿಶ್ವ ಕಪ್ ಅಭಿಯಾನ ಆರಂಭಿಸಲಿದೆ. ಇದೀಗ ಅಕ್ಟೋಬರ್ 27 ರಂದು ನಡೆಯಲಿರುವ 2ನೇ ಪಂದ್ಯದಲ್ಲಿ ನೆದರ್ಲೆಂಡ್ಸ್ ವಿರುದ್ಧ ಸೆಣಸಲಿದೆ. ಸದ್ಯ ಗ್ರೂಪ್-ಬಿ ಅರ್ಹತಾ ಪಂದ್ಯಗಳು ನಡೆಯುತ್ತಿದ್ದು, ಇದರಲ್ಲಿ ಅಗ್ರಸ್ಥಾನ ಅಲಂಕರಿಸುವ ತಂಡವನ್ನು ಭಾರತ ನವೆಂಬರ್ 6 ರಂದು ಎದುರಿಸಲಿದೆ. ಈ ಪಟ್ಟಿಯಲ್ಲಿ ವೆಸ್ಟ್ ಇಂಡೀಸ್, ಐರ್ಲೆಂಡ್, ಸ್ಕಾಟ್ಲೆಂಡ್, ಜಿಂಬಾಬ್ವೆ ತಂಡಗಳಿವೆ. ಇದರಲ್ಲಿ ಒಂದು ತಂಡ ಟೀಮ್ ಇಂಡಿಯಾದ ಎದುರಾಳಿ ಆಗಲಿದೆ.
ಭಾರತದ ವೇಳಾಪಟ್ಟಿ
ಅಕ್ಟೋಬರ್ 23 – ಭಾರತ vs ಪಾಕಿಸ್ತಾನ
ಅಕ್ಟೋಬರ್ 27- ಭಾರತ vs ನೆದರ್ಲೆಂಡ್ಸ್
ಅಕ್ಟೋಬರ್ 30- ಭಾರತ vs ದಕ್ಷಿಣ ಆಫ್ರಿಕಾ
ನವೆಂಬರ್ 02- ಭಾರತ vs ಬಾಂಗ್ಲಾದೇಶ
ನವೆಂಬರ್ 06- ಭಾರತ vs ಬಿ ಗುಂಪಿನ ವಿಜೇತ ತಂಡ
ಇದನ್ನೂ ಓದಿ | T20 World Cup | ಭಾರತ-ಪಾಕ್ ಪಂದ್ಯಕ್ಕೆ ಮಳೆ ಬಂದರೆ ಫಲಿತಾಂಶ ನಿರ್ಧಾರ ಹೇಗೆ?