ಅಹಮದಾಬಾದ್: ಭಾರತ ಮತ್ತು ಆಸ್ಟ್ರೇಲಿಯಾ(IND VS AUS) ವಿರುದ್ಧದ ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸರಣಿಯ ಅಂತಿಮ ಪಂದ್ಯ ಡ್ರಾದಲ್ಲಿ ಮುಕ್ತಾಯಕಂಡಿದೆ. ಈ ಮೂಲಕ ಭಾರತ 2-1 ಅಂತರದಿಂದ ಸರಣಿ ಗೆದ್ದು ಬೀಗಿದೆ. ಇದಕ್ಕೂ ಮುನ್ನ ಶ್ರೀಲಂಕಾ ತಂಡ ನ್ಯೂಜಿಲ್ಯಾಂಡ್ ವಿರುದ್ಧ ಸೋಲು ಕಂಡ ಕಾರಣ ಭಾರತ ಐಸಿಸಿ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೆ ಪ್ರವೇಶ ಪಡೆದಿತ್ತು.
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಆಸ್ಟ್ರೇಲಿಯಾ 480 ರನ್ ಗಳಿಸಿತು. ಗುರಿ ಬೆನ್ನಟ್ಟಿದ ಭಾರತ 571 ರನ್ ಗಳಿಸಿತು. 91 ರನ್ ಹಿನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಆಸ್ಟ್ರೇಲಿಯಾ 2 ವಿಕೆಟ್ಗೆ 175 ರನ್ ಗಳಿಸಿದ ವೇಳೆ ಉಭಯ ತಂಡದ ನಾಯಕರು ಪಂದ್ಯವನ್ನು ಡ್ರಾ ಮಾಡಲು ನಿರ್ಧರಿಸಿದರು. ದ್ವಿತೀಯ ಇನಿಂಗ್ಸ್ ವೇಳೆ ಆಸ್ಟ್ರೇಲಿಯಾದ ಟ್ರಾವಿಸ್ ಹೆಡ್ 90 ಮತ್ತು ಮಾರ್ನಸ್ ಲಬುಶೇನ್ ಅಜೇಯ 63 ರನ್ ಬಾರಿಸಿದರು.
ಭಾರತ ಪರ ಮೊದಲ ಇನಿಂಗ್ಸ್ನಲ್ಲಿ ಶುಭಮನ್ ಗಿಲ್(Shubman Gill) 128, ವಿರಾಟ್ ಕೊಹ್ಲಿ(Virat Kohli) 186 ರನ್ ಬಾರಿಸಿದ್ದರು. ಹಿರಿಯ ಸ್ಪಿನರ್ ಆರ್. ಅಶ್ವಿನ್ ಈ ಪಂದ್ಯದಲ್ಲಿ ಒಟ್ಟು 7 ವಿಕೆಟ್ ಕಿತ್ತು ಮಿಂಚಿದರು. ಆಸೀಸ್ ಪರ ನಥಾನ್ ಲಿಯೋನ್ ಮತ್ತು ಟಾಡ್ ಮರ್ಫಿ ತಲಾ ಮೂರು ವಿಕೆಟ್ ಕಿತ್ತರು.
ಭಾರತ ಮತ್ತು ಆಸ್ಟ್ರೇಲಿಯಾ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿ ಮಾರ್ಚ್ 17ರಿಂದ ಆರಂಭಗೊಳ್ಳಲಿದೆ. ಇದಾದ ಬಳಿಕ ಐಪಿಎಲ್ ಟೂರ್ನಿ ಆರಂಭಗೊಳ್ಳಲಿದೆ.
ಸಂಕ್ಷಿಪ್ತ ಸ್ಕೋರ್: ಆಸ್ಟ್ರೇಲಿಯಾ ಮೊದಲ ಇನಿಂಗ್ಸ್: 480; (ಉಸ್ಮಾನ್ ಖಾವಾಜ 180, ಕ್ಯಾಮೆರೂನ್ ಗ್ರೀನ್ 114, ಆರ್. ಆಶ್ವಿನ್ 91ಕ್ಕೆ 6). ಭಾರತ ಮೊದಲ ಇನಿಂಗ್ಸ್: 571; ವಿರಾಟ್ ಕೊಹ್ಲಿ 186, ಶುಭಮನ್ ಗಿಲ್ 128, ಅಕ್ಷರ್ ಪಟೇಲ್ 79, ನಥಾನ್ ಲಿಯೋನ್ 90ಕ್ಕೆ 3, ಟಾಡ್ ಮರ್ಫಿ 113ಕ್ಕೆ 3). ಆಸ್ಟ್ರೇಲಿಯಾ ದ್ವಿತೀಯ ಇನಿಂಗ್ಸ್: 175ಕ್ಕೆ 2; ಟ್ರಾವಿಸ್ ಹೆಡ್ 90, ಮಾರ್ನಸ್ ಲಬುಶೇನ್ ಅಜೇಯ 63, ಅಕ್ಷರ್ ಪಟೇಲ್ 36ಕ್ಕೆ 1). ಪಂದ್ಯಶ್ರೇಷ್ಠ: ವಿರಾಟ್ ಕೊಹ್ಲಿ. ಸರಣಿ ಶ್ರೇಷ್ಠ: ಆರ್. ಅಶ್ವಿನ್ ಮತ್ತು ರವೀಂದ್ರ ಜಡೇಜಾ.