ಹೈದರಾಬಾದ್: ಪ್ರವಾಸಿ ಇಂಗ್ಲೆಂಡ್(IND vs ENG) ಮತ್ತು ಭಾರತ ನಡುವಣ ಮೊದಲ ಟೆಸ್ಟ್ ಪಂದ್ಯ(India vs England 1st Test) ರೋಚಕ ಹಂತ ತಲುಪಿದೆ. ಓಲಿ ಪೋಪ್(ಅಜೇಯ 148) ನಡೆಸಿದ ದಿಟ್ಟ ಬ್ಯಾಟಿಂಗ್ ಹೋರಾಟದಿಂದ ಇಂಗ್ಲೆಂಡ್ ತಂಡ ದ್ವಿತೀಯ ಇನಿಂಗ್ಸ್ನಲ್ಲಿ ಚೇತರಿಕೆಯ ಹಾದಿ ಹಿಡಿದಿದೆ. ಆದರೆ, ಗೆಲುವಿನ ಅವಕಾಶ ಭಾರತದ ಪರವಾಗಿದೆ.
ಹೈದರಾಬಾದ್ನ ರಾಜೀವಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಈ ಪಂದ್ಯದ ಮೂರನೇ ದಿನವಾದ ಶನಿವಾರ 421 ರನ್ಗಳಿಂದ ಬ್ಯಾಟಿಂಗ್ ಮುಂದುವರಿಸಿದ ಭಾರತ ಕೇವಲ 15 ರನ್ಗಳಿಸಿ ಆಲೌಟ್ ಆಯಿತು. ಒಟ್ಟು 436 ರನ್ ಗಳಿಸಿ 190ರನ್ಗಳ ಮುನ್ನಡೆ ಸಾಧಿಸಿತು. 190 ರನ್ ಹಿನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ನಾಟಕೀಯ ಕುಸಿತ ಕಂಡರೂ, ಆ ಬಳಿಕ ಚೇತರಿಕೆ ಕಂಡು 6 ವಿಕೆಟ್ಗೆ 316 ರನ್ ಗಳಿಸಿ 126 ರನ್ಗಳ ಮುನ್ನಡೆ ಕಾಯ್ದುಕೊಂಡಿದೆ. ಇನ್ನು 2 ದಿನಗಳ ಆಟ ಬಾಕಿ ಇದೆ.
ಪೋಪ್ ದಿಟ್ಟ ಹೋರಾಟ
ಭಾರಿ ಹಿನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ಗೆ ಆರ್.ಅಶ್ವಿನ್ ಆರಂಭದಲ್ಲೇ ಆಘಾತವಿಕ್ಕಿದರು. 31 ರನ್ ಗಳಿಸಿದ್ದ ಜಾಕ್ ಕ್ರಾಲಿ ವಿಕೆಟ್ ಕಿತ್ತು ಭಾರತಕ್ಕೆ ಮೊದಲ ಮುನ್ನಡೆ ತಂದುಕೊಟ್ಟರು. ಈ ವಿಕೆಟ್ ಪತನದ ಬಳಿಕ ಕ್ರೀಸ್ಗಿಳಿದ ಓಲಿ ಪೋಪ್ ಅವರು ಬೆನ್ ಡಕೆಟ್ ಜತೆ ಸೇರಿ ಉತ್ತಮ ಜತೆಯಾಟವೊಂದನ್ನು ನಿರ್ವಹಿಸಿದರು. ಆದರೆ ಈ ಜೋಡಿಯನ್ನು ಬುಮ್ರಾ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸಲು ಬಿಡಲಿಲ್ಲ. ಫಾತಕ ಯಾರ್ಕರ್ ಎಸೆದು ಡಕೆಟ್ ಅವರನ್ನು ಕ್ಲೀನ್ ಬೌಲ್ಡ್ ಮಾಡಿದರು. ಡಕೆಟ್ 47 ರನ್ಗಳಿಸಿದರು. ಪೋಪ್ ಮತ್ತು ಡಕೆಟ್ ದ್ವಿತೀಯ ವಿಕೆಟ್ಗೆ 68 ರನ್ ಒಟ್ಟುಗೂಡಿಸಿದರು.
Ollie Pope's counter-attacking century brings England back into the Hyderabad Test 🔥#WTC25#INDvENG: https://t.co/QwctE3j4Xi pic.twitter.com/kkNv9O9PT4
— ICC (@ICC) January 27, 2024
ಬೆನ್ ಡಕೆಟ್ ವಿಕೆಟ್ ಪತನದ ಬಳಿಕ ಬಂದ ಜೋ ರೂಟ್(2), ನಾಯಕ ಬೆನ್ ಸ್ಟೋಕ್ಸ್(6) ಮತ್ತು ಜಾನಿ ಬೇರ್ ಸ್ಟೋ(10) ರನ್ ಗಳಿಸಿ ಬೇಗನೆ ವಿಕೆಟ್ ಕೈಚೆಲ್ಲಿದರು. 163ಕ್ಕೆ 5 ವಿಕೆಟ್ ಕಳೆದುಕೊಂಡು ನಾಟಕೀಯ ಕುಸಿತ ಕಂಡ ಇಂಗ್ಲೆಂಡ್ ಇನ್ನೇನು ಕೆಲವೇ ಹೊತ್ತಲ್ಲಿ ಆಲೌಟ್ ಆಗಿ ಭಾರತ ಇನ್ನಿಂಗ್ಸ್ ಗೆಲುವು ಸಾಧಿಸುತ್ತದೆ ಎಂದು ಕ್ರಿಕೆಟ್ ಅಭಿಮಾನಿಗಳು ನಿರೀಕ್ಷೆ ಮಾಡಿದ್ದರು. ಆದರೆ ಛಲ ಬಿಡದೆ, ಯಾವುದೇ ಆತಂಕಕ್ಕೆ ಒಳಗಾಗದೆ ಟೊಂಕ ಕಟ್ಟಿ ನಿಂತ ಪೋಪ್ ಏಕಾಂಗಿಯಾಗಿ ಬ್ಯಾಟಿಂಗ್ ಹೋರಾಟ ನಡೆಸಿದರು. ಭಾರತದ ಬೌಲರ್ಗಳ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ನಿಂತು ಅಜೇಯ ಶತಕ ಬಾರಿಸಿ ತಂಡಕ್ಕೆ ನೆರವಾದರು. ಇದು ಪೋಪ್ ಅವರ ಭಾರತ ವಿರುದ್ಧದ ಮೊದಲ ಶತಕವಾಗಿದೆ. ಒಟ್ಟಾರೆ ಮೂರನೇ ಟೆಸ್ಟ್ ಶತಕ.
ಇದನ್ನೂ ಓದಿ Ravindra Jadeja : ವಿಕೆಟ್ಗಳ ದಾಖಲೆಯಲ್ಲಿ ಜಾವಗಲ್ ಶ್ರೀನಾಥ್ ಹಿಂದಿಕ್ಕಿದ ಜಡೇಜಾ
7ನೇ ಕ್ರಮಾಂಕದಲ್ಲಿ ಆಡಲಿಳಿದ ಕೀಪರ್ ಬೆನ್ ಫೋಕ್ಸ್ ಅವರು ಸಣ್ಣ ಬ್ಯಾಟಿಂಗ್ ಹೋರಾಟವೊಂದನ್ನು ನಡೆಸಿ ಪೋಪ್ಗೆ ಉತ್ತಮ ಸಾಥ್ ನೀಡಿದರು. 34 ರನ್ಗಳಿಸಿ ಅಕ್ಷರ್ ಪಟೇಲ್ಗೆ ವಿಕೆಟ್ ಒಪ್ಪಿಸಿದರು. ಈ ಜೋಡಿ 6ನೇ ವಿಕೆಟ್ಗೆ 112 ರನ್ಗಳ ಅತ್ಯಮೂಲ್ಯ ಜತೆಯಾಟ ನಡೆಸಿತು. ಈ ಪರಿಣಾಮ ಇಂಗ್ಲೆಂಡ್ ಮುನ್ನಡೆ ಸಾಧಿಸುವಂತಾಯಿತು.
A remarkable hundred from Ollie Pope 🤩#WTC 25 | #INDvENG pic.twitter.com/KpXsweZNu7
— ICC (@ICC) January 27, 2024
ಪೋಪ್ 208 ಎಸೆತ ಎದುರಿಸಿ ಅಜೇಯ 148* ರನ್ ಬಾರಿಸಿ ನಾಲ್ಕನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಮತ್ತೊಂದು ತುದಿಯಲ್ಲಿ ರೆಹಾನ್ ಅಹ್ಮದ್(16*) ರನ್ ಗಳಿಸಿದ್ದಾರೆ. ಭಾರತ ಪರ ದ್ವಿತೀಯ ಇನಿಂಗ್ಸ್ನಲ್ಲಿ ಜಸ್ಪ್ರೀತ್ ಬುಮ್ರಾ ಮತ್ತು ಆರ್.ಅಶ್ವಿನ್ ತಲಾ 2 ವಿಕೆಟ್ ಉರುಳಿಸಿದರು. ಇನ್ನೂ 2 ದಿನಗಳ ಆಟ ಬಾಕಿ ಇರುವ ಕಾರಣ ಭಾರತಕ್ಕೆ ಗೆಲ್ಲುವ ಅವಕಾಶ ಹೆಚ್ಚು ಎನ್ನಲಡ್ಡಿಯಿಲ್ಲ.
ಸಂಕ್ಷಿಪ್ತ ಸ್ಕೋರು
ಇಂಗ್ಲೆಂಡ್ ಮೊದಲ ಇನಿಂಗ್ಸ್: 64.3 ಓವರ್‌ಗಳಲ್ಲಿ 246.
ಭಾರತ ಮೊದಲ ಇನಿಂಗ್ಸ್: 121 ಓವರ್‌ಗಳಲ್ಲಿ 436
ಇಂಗ್ಲೆಂಡ್ ದ್ವಿತೀಯ ಇನಿಂಗ್ಸ್: 316-6 (77) ಬ್ಯಾಟಿಂಗ್ ಕಾಯ್ದುಕೊಂಡಿದೆ.