ಮೆಲ್ಬೋರ್ನ್‌: ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಟಿ20 ವಿಶ್ವ ಕಪ್‌ನಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ(IND VS PAK) ವಿರುದ್ಧ ಭಾರತ ತಂಡ 4 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಅಜೇಯ 82 ರನ್‌ಗಳಿಸುವ ಮೂಲಕ ಭಾರತ ತಂಡಕ್ಕೆ ಗೆಲುವು ತಂದುಕೊಟ್ಟ ವಿರಾಟ್‌ ಕೊಹ್ಲಿ ಆಟಕ್ಕೆ ಕ್ರಿಕೆಟ್‌ ದಿಗ್ಗಜರು ಟ್ವಿಟರ್‌ ಮೂಲಕ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.
“ವಿರಾಟ್‌ ಕೊಹ್ಲಿ, ನಿಸ್ಸಂದೇಹವಿಲ್ಲದೆ ಇದು ನಿಮ್ಮ ವೃತ್ತಿ ಜೀವನದ ಅತ್ಯುತ್ತಮ ಇನಿಂಗ್ಸ್, ನಿಮ್ಮ ಬ್ಯಾಟಿಂಗ್‌ ನೋಡುವುದೆ ಆನಂದ, 19 ನೇ ಓವರ್‌ನಲ್ಲಿ ರವೂಫ್‌ ವಿರುದ್ಧ ಲಾಂಗ್‌ ಆನ್‌ಗೆ ಬಾರಿಸಿದ ಸಿಕ್ಸರ್‌ ಅದ್ಭುತವಾಗಿತ್ತು. ನಿಮ್ಮ ಆಟವನ್ನು ಮುಂದುವರಿಸಿ” ಎಂದು ಸಚಿನ್‌ ತೆಂಡೂಲ್ಕರ್‌ ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾರೆ.
“ಇದು ನಾನು ಕಂಡಂತಹ ಅತ್ಯಂತ ಅದ್ಭುತವಾದ ಟಿ20 ಇನಿಂಗ್ಸ್, ನಿಮ್ಮ ಆಟ, ಪ್ರಶಂಸೆಗೆ ಅರ್ಹವಾಗಿದೆ ವಿರಾಟ್‌, ಇದೊಂದು ಅದ್ಭುತವಾದ ಪಂದ್ಯ, ದೀಪಾವಳಿ ಹಬ್ಬದ ಶುಭಾಶಯಗಳು” ಎಂದು ಟೀಮ್‌ ಇಂಡಿಯಾದ ಮಾಜಿ ಸ್ಫೋಟಕ ಬ್ಯಾಟರ್‌ ವೀರೇಂದ್ರ ಸೆಹ್ವಾಗ್ ಟ್ವೀಟ್‌ ಮಾಡಿದ್ದಾರೆ.
“ಇದೊಂದು ಕೊನೆಯವರೆಗೆ ಉಸಿರು ಬಿಗಿ ಹಿಡಿದು ನೋಡುವ ಪಂದ್ಯವಾಗಿತ್ತು. ಭಾರತಕ್ಕೆ ಗೆಲುವು ತಂದುಕೊಡಲು ನಮ್ಮ ಆಟಗಾರರು ಪ್ರದರ್ಶಿಸಿದ ಹೋರಾಟ ಅದ್ಭುತವಾಗಿತ್ತು. ಅಭಿನಂದನೆಗಳು ಬಾಯ್ಸ್, ಇದೊಂದು ಅತ್ಯುತ್ತಮ ಗೆಲುವು, ಜೈ ಹಿಂದ್‌” ಎಂದು ಸುರೇಶ್ ರೈನಾ ಟ್ವೀಟ್‌ ಮೂಲಕ ಭಾರತ ತಂಡಕ್ಕೆ ಅಭಿನಂದನೆ ಸಲ್ಲಿಸಿದ್ದಾರೆ.
“ವಿರಾಟ್‌ ಕೊಹ್ಲಿ ಟಿ20 ವಿಶ್ವ ಕಪ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮೊಹಾಲಿಯಲ್ಲಿ ಆಡಿದ್ದ ಇನಿಂಗ್ಸ್ ನಾನು ಕಂಡಂತಹ ಅತ್ಯುತ್ತಮ ಟಿ20 ಇನಿಂಗ್ಸ್, ಆದರೆ ಇದು ಅದಕ್ಕಿಂತ ಉತ್ತಮವಾಗಿದೆ, ಏಕೆಂದರೆ ಇದು ದೊಡ್ಡ ಮೈದಾನ ಹಾಗೂ ಭಾರತ 31ಕ್ಕೆ 4 ವಿಕೆಟ್‌ ಕಳೆದುಕೊಂಡಿದ್ದ ಸಂದರ್ಭದಲ್ಲಿ ವಿರಾಟ್‌ ಯಾವುದೇ ವಿಚಲಿತರಾಗದೆ ಅಜೇಯರಾಗಿ ತಂಡವನ್ನು ಗೆಲುವಿನ ದಡ ಸೇರಿಸಿದ್ದು ಅತ್ಯದ್ಭುತ. ವಿರಾಟ್‌ “ಕ್ಲಾಸ್‌ ಇಸ್‌ ಪರ್ಮನೆಂಟ್‌” ಎಂಬುದನ್ನು ಸಾಬೀತು ಪಡಿಸಿದ್ದಾರೆ. ಇದು ಭಾರತ ತಂಡಕ್ಕೆ ಅತ್ಯುತ್ತಮ ಗೆಲುವಾಗಿದೆ” ಎಂದು ಎನ್‌ಸಿಎ ಅಧ್ಯಕ್ಷ ವಿವಿಎಸ್ ಲಕ್ಷ್ಮಣ್ ಎಂದು ಪ್ರಶಂಸೆ ಮಾಡಿದ್ದಾರೆ.
ಇದನ್ನೂ ಓದಿ | IND VS PAK | ಪಾಕ್‌ ವಿರುದ್ಧ ಗೆಲುವಿಗೆ ಕಾಶ್ಮೀರದಲ್ಲೂ ನಡೆಯಿತು ಸಂಭ್ರಮಾಚರಣೆ! ದೀಪಾವಳಿ ಶುರು ಎಂದ ಅಭಿಮಾನಿಗಳು