ಜೊಹಾನ್ಸ್ಬರ್ಗ್: ವಿದಾಯದ ಸರಣಿಯನ್ನಾಡುತ್ತಿರುವ ಡೀನ್ ಎಲ್ಗರ್(140*) ಬಾರಿಸಿದ ಅಜೇಯ ಶತಕದ ನೆರವಿನಿಂದ ದಕ್ಷಿಣ ಆಫ್ರಿಕಾ(IND vs SA) ತಂಡ ಭಾರತ ವಿರುದ್ಧದ ಮೊದಲ ಟೆಸ್ಟ್ನಲ್ಲಿ(South Africa vs India, 1st Test) 11 ರನ್ಗಳ ಮುನ್ನಡೆ ಕಾಯ್ದುಕೊಂಡಿದೆ. ಸದ್ಯ ದಕ್ಷಿಣ ಆಫ್ರಿಕಾ 5 ವಿಕೆಟ್ಗೆ 256 ರನ್ ಗಳಿಸಿ ಮೂರನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದೆ. ಇಂದು ಕೂಡ ಪಂದ್ಯ ನಿಗದಿತ ಸಮಯದವರೆಗೆ ನಡೆಯಲಿಲ್ಲ. ಮಂದ ಬೆಳಕಿನ ಕಾರಣ ಪಂದ್ಯವನ್ನು ಅರ್ಧಕ್ಕೆ ನಿಲ್ಲಿಸಲಾಯಿತು. ಮೊದಲ ದಿನದ ಆಟಕ್ಕೆ ಮಳೆ ಅಡ್ಡಿಪಡಿಸಿತ್ತು.
8 ವಿಕೆಟ್ ಕಳೆದುಕೊಂಡು 208 ಗಳಿಸಿದ್ದಲ್ಲಿಂದ ಎರಡನೇ ದಿನದಾಟ ಆರಂಭಿಸಿದ ಭಾರತ 245 ರನ್ ಗಳಿಸಿ ಆಲೌಟ್ ಆಯಿತು. 70 ರನ್ ಗಳಿಸಿದ್ದ ರಾಹುಲ್(KL Rahul) ದ್ವಿತೀಯ ದಿನದಾಟದಲ್ಲಿ 31 ರನ್ ಬಾರಿಸಿ ಶತಕ ಪೂರ್ತಿಗೊಳಿಸಿದರು. ಒಟ್ಟು 14 ಬೌಂಡರಿ ಮತ್ತು 4 ಸೊಗಸಾದ ಸಿಕ್ಸರ್ ನೆರವಿನಿಂದ 101 ರನ್ ಗಳಿಸಿ ಬರ್ಗರ್ಗೆ ವಿಕೆಟ್ ಒಪ್ಪಿಸಿದರು. ಸಿರಾಜ್ 5 ರನ್ ಗಳಿಸಿದರೂ ರಾಹುಲ್ಗೆ ಮತ್ತೊಂದು ತುದಿಯಲ್ಲಿ ಉತ್ತಮ ಸ್ಟ್ಯಾಂಡ್ ನೀಡಿದರು. ಅವರು 22 ಎಸೆತಗಳನ್ನು ಎದುರಿಸಿ ನಿಂತರು. ಅವರ ಈ ಸಾಥ್ನಿಂದಾಗಿ ರಾಹುಲ್ ಶತಕ ಪೂರ್ತಿಗೊಳಿಸಿದರು.
ಇದನ್ನೂ ಓದಿ IND vs SA: ರಾಹುಲ್ ಅಮೋಘ ಶತಕ; 245 ರನ್ ಗಳಿಸಿದ ಭಾರತ
Dean Elgar's unbeaten ton has put South Africa in the driving seat in Centurion 👏
— ICC (@ICC) December 27, 2023
📝 #SAvIND: https://t.co/xSuVJrjWI9 | #WTC25 pic.twitter.com/p5An0tC7Sh
ಕಾಡಿದ ಎಲ್ಗರ್
ಭಾರತ ನೀಡಿದ ಗುರಿಯನ್ನು ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾಕ್ಕೆ ಆಸರೆಯಾದದ್ದು ಡೀನ್ ಎಲ್ಗರ್. ಟೆಸ್ಟ್ ಕ್ರಿಕೆಟ್ಗೆ ತಕ್ಕ ಶೈಲಿಯ ಬ್ಯಾಟಿಂಗ್ ಪ್ರದರ್ಶನ ತೋರುವ ಮೂಲಕ ಅಜೇಯ ಶತಕ ಬಾರಿಸಿ ಭಾರತಕ್ಕೆ ಕಾಡಿದರು. ಇದು ಎಲ್ಗರ್ ಅವರ 1ನೇ ಟೆಸ್ಟ್ ಶತಕವಾಗಿದೆ. ಆರಂಭಿಕ ವಿಕೆಟ್ 11 ರನ್ಗೆ ಬಿದ್ದರೂ ಕೂಡ ಎಲ್ಗರ್ ಮತ್ತು ಡಿ ಜೋರ್ಜಿ ಸೇರಿಕೊಂಡು 93 ರನ್ಗಳ ಜತೆಯಾಟ ನಡೆಸಿದರು. ಜೋರ್ಜಿ 28 ರನ್ ಬಾರಿಸಿ ಬುಮ್ರಾಗೆ ವಿಕೆಟ್ ಒಪ್ಪಿಸಿದರು.
ಜೋರ್ಜಿ ವಿಕೆಟ್ ಪತನದ ಬಳಿಕ ಬಂದ ಕೀಗನ್ ಪೀಟರ್ಸನ್ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸುವಲ್ಲಿ ವಿಫಲರಾದರು. ಕೇವಲ 2 ರನ್ ಗಳಿಸಿ ಔಟಾದರು. ಆದರೆ ಡೇವಿಡ್ ಬೆಡಿಂಗ್ಹ್ಯಾಮ್ ಅರ್ಧಶತಕ ಬಾರಿಸಿ ಮತ್ತೆ ತಂಡದ ಚೇತರಿಕೆಗೆ ಕಾರಣರಾದರು. 7 ಬೌಂಡರಿ ಮತ್ತು 2 ಸಿಕ್ಸರ್ ಬಾರಿಸಿ 56 ರನ್ ಗಳಿಸಿದರು. ಆದರೆ ಎಲ್ಗರ್ ವಿಕೆಟ್ ಕೀಳಲು ಸಾಧ್ಯವಾಗಿಲ್ಲ.
211 ಎಸೆತ ಎದುರಿಸಿ 23 ಬೌಂಡರಿ ನೆರವಿನಿಂದ ಅಜೇಯ 140 ರನ್ ಬಾರಿಸಿ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಸದ್ಯ ಅವರ ಬ್ಯಾಟಿಂಗ್ ಪ್ರದರ್ಶನ ನೋಡುವಾಗ ದ್ವೀಶತಕ ಬಾರಿಸುವ ಮುನ್ಸೂಚನೆ ಇದೆ. ಭಾರತ ಪರ ಜಸ್ಪ್ರೀತ್ ಬುಮ್ರಾ ಮತ್ತು ಮೊಹಮ್ಮದ್ ಸಿರಾಜ್ ತಲಾ 2 ವಿಕೆಟ್ ಕಿತ್ತರೆ, ಪದಾರ್ಪಣ ಟೆಸ್ಟ್ ಪಂದ್ಯ ಆಡುತ್ತಿರುವ ಪ್ರಸಿದ್ಧ್ ಕೃಷ್ಣ ಒಂದು ವಿಕೆಟ್ ಪಡೆದಿದ್ದಾರೆ.
2021 ➡ 2023
— ICC (@ICC) December 27, 2023
KL Rahul loves batting in Centurion 🏏
📝 #SAvIND: https://t.co/REqMWoHhqd | #WTC25 pic.twitter.com/Ba6WCWd5xG
ದಾಖಲೆ ಬರೆದ ರಾಹುಲ್
ದ್ವಿತೀಯ ದಿನದಾಟದಲ್ಲಿ ಬಿರುಸಿನ ಆಟಕ್ಕೆ ಒತ್ತು ಕೊಟ್ಟ ರಾಹುಲ್ ಶತತ ಸಿಕ್ಸರ್ ಮತ್ತು ಬೌಂಡರಿ ಬಾರಿಸಿದರು. ದ್ವಿತೀಯ ದಿನದಾಟದಲ್ಲಿ 2 ಸಿಕ್ಸರ್ ಮತ್ತು 4 ಬೌಂಡರಿ ಬಾರಿಸಿದರು. ಅದರಲ್ಲೂ ಸಿಕ್ಸರ್ ಮೂಲಕವೇ ಶತಕ ಪೂರ್ತಿಗೊಳಿಸಿದರು. ಇದು ಅವರ 8ನೇ ಟೆಸ್ಟ್ ಶತಕವಾಗಿದೆ. ಸೆಂಚುರಿಯನ್ ಮೈದಾನದಲ್ಲಿ ಸತತ 2 ಶತಕ ಬಾರಿಸಿದ ಮೊದಲ ವಿದೇಶಿ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ರಾಹುಲ್ ಪಾತ್ರರಾದರು. ರಾಹುಲ್ ಹೊರತುಪಡಿಸಿ ಸೆಂಚುರಿಯನ್ನಲ್ಲಿ ಉಳಿದ ಯಾವುದೇ ವಿದೇಶಿ ಬ್ಯಾಟರ್ ಟೆಸ್ಟ್ನಲ್ಲಿ ಒಂದಕ್ಕಿಂತ ಹೆಚ್ಚು ಶತಕ ಬಾರಿಸಿಲ್ಲ. 2021ರಲ್ಲಿ ರಾಹುಲ್ ಇಲ್ಲಿ ಆರಂಭಿಕನಾಗಿ ಕಣಕ್ಕಿಳಿದು 123 ರನ್ ಬಾರಿಸಿದ್ದರು.