IND vs SA: ಪಂದ್ಯ ಗೆದ್ದು ದಕ್ಷಿಣ ಆಫ್ರಿಕಾ ವಿರುದ್ಧ ದಾಖಲೆ ಬರೆದ ಟೀಮ್​ ಇಂಡಿಯಾ

ಜೊಹಾನ್ಸ್​ಬರ್ಗ್​: ಗುರುವಾರ ರಾತ್ರಿ ನಡೆದ ಅಂತಿಮ ಟಿ20 ಪಂದ್ಯದಲ್ಲಿ ಪ್ರವಾಸಿ ಭಾರತ ತಂಡ ದಕ್ಷಿಣ ಆಫ್ರಿಕಾ(IND vs SA) ವಿರುದ್ಧ ಭರ್ಜರಿ 106 ರನ್​ಗಳ ಅಂತರದ ಗೆಲುವು ಸಾಧಿಸಿತು. ಈ ಮೂಲಕ ಸರಣಿಯನ್ನು 1-1 ಸಮಬಲ ಮಾಡಿಕೊಂಡಿತು. ಮೊದಲ ಪಂದ್ಯ ಮಳೆಯಿಂದ ರದ್ದುಗೊಂಡಿತ್ತು. ಭಾರತ ಈ ಗೆಲುವಿನ ಮೂಲಕ ದಾಖಲೆಯೊಂದನ್ನು ಕೂಡ ನಿರ್ಮಿಸಿದೆ.

ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತ ಇದುವರೆಗಿನ ಟಿ20 ಕ್ರಿಕೆಟ್​​ ಇತಿಹಾಸದಲ್ಲಿ ಸಾಧಿಸಿದ ದೊಡ್ಡ ಅಂತರದ ಗೆಲವು ಇದಾಗಿದೆ. ಆದರೆ ದಾಖಲೆ ಆಸ್ಟ್ರೇಲಿಯಾದ ಹೆಸರಿನಲ್ಲಿದೆ. ಆಸೀಸ್​ ತಂಡ ಕ್ರಮವಾಗಿ 111 ಮತ್ತು 107 ರನ್​ ಅಂತರದಿಂದ ದಕ್ಷಿಣ ಆಫ್ರಿಕಾವನ್ನು ಮಣಿಸಿದೆ.

ಟಿ20 ಕ್ರಿಕೆಟ್​ನಲ್ಲಿ ಭಾರತ ತಂಡದ ಅತ್ಯಂತ ದೊಡ್ಡ ಅಂತರದ ಗೆಲುವು 168 ರನ್​. ಇದೇ ವರ್ಷ ಅಹಮದಾಬಾದ್​ನಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ ಈ ಗೆಲುವು ದಾಖಲಾಗಿತ್ತು.

ಇದನ್ನೂ ಓದಿ Ind vs SA : ಮೂರನೇ ಪಂದ್ಯದಲ್ಲಿ ಭಾರತಕ್ಕೆ 106 ರನ್​ ಜಯ, ಸರಣಿ ಸಮಬಲ

See more

Joint winners of the T20I series.

🇮🇳 🤝 🇿🇦 #SAvIND pic.twitter.com/8Zg0aEhKoL

— BCCI (@BCCI) December 14, 2023

ಇಲ್ಲಿನ ದಿ ವಾಂಡರರ್ಸ್​​ ಕ್ರಿಕೆಟ್​ ಸ್ಟೇಡಿಯಮ್​ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಸೋತು ಮೊದಲು ಬ್ಯಾಟ್ ಮಾಡಿದ ಭಾರತ ತಂಡ ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್​ ನಷ್ಟಕ್ಕೆ 201 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾ ತಂಡ 13.5 ಓವರ್​ಗಳಲ್ಲಿ 95 ರನ್​ಗಳಿಗೆ ಆಲ್​ಔಟ್​ ಆಯಿತು. ಭಾರತದ ಬೌಲರ್​ಗಳ ಮುಂದೆ ತಣ್ಣಗಾದ ದಕ್ಷಿಣ ಆಫ್ರಿಕಾ ತಂಡದ ಬ್ಯಾಟರ್​ಗಳು ಸತತವಾಗಿ ವಿಕೆಟ್​ ಒಪ್ಪಿಸಿದರು. ನಾಯಕ ಏಡೆನ್​ ಮಾರ್ಕ್ರಮ್​​ 14 ಎಸೆತಕ್ಕೆ 25 ರನ್ ಬಾರಿಸಿದರೆ, ಡೇವಿಡ್​ ಮಿಲ್ಲರ್ 25 ಎಸೆತಕ್ಕೆ 35 ರನ್​ ಬಾರಿಸಿದ್ದು ಹರಿಣಗಳ ಪಡೆಯ ಪಾಲಿಗೆ ಗರಿಷ್ಠ ರನ್ ಎನಿಸಿಕೊಂಡಿತು. ಡೆನ್ವೊನ್​ ಪೆರೆರಾ 12 ರನ್​ ಬಾರಿಸಿದರೆ ಉಳಿದವರೆಲ್ಲರೂ ಒಂದಂಕಿ ಮೊತ್ತಕ್ಕೆ ಸೀಮಿತಗೊಂಡರು.

ಶತಕ ಬಾರಿಸಿದ ಸೂರ್ಯಕುಮಾರ್ ಯಾದವ್​ (100) ಹಾಗೂ 17 ರನ್​ಗಳಿಗೆ 5 ವಿಕೆಟ್​ ಉರುಳಿಸಿದ ಕುಲ್ದೀಪ್​ ಯಾದವ್ ಮೂರನೇ ಪಂದ್ಯ ಗೆಲುವಿನ ರೂವಾರಿಗಳೆನಿಸಿಕೊಂಡರು. ಬರ್ತ್​ಡೇ ಬಾಯ್​ ಕುಲ್ದೀಪ್​ ಯಾದವ್ ಮಾರಕ ದಾಳಿ ಸಂಘಟಿಸಿ ದಕ್ಷಿಣ ಆಫ್ರಿಕಾದ ಬ್ಯಾಟರ್​ಗಳು ನಿರುತ್ತರರಾಗುವಂತೆ ನೋಡಿಕೊಂಡರು. 2.5 ಓವರ್​ಗಳಲ್ಲಿ 17 ರನ್​ ನೀಡಿದ ಅವರು 5 ವಿಕೆಟ್ ಸಾಧನೆ ಮಾಡಿದರು.

ಶತಕ ಬಾರಿಸಿ ಮಿಂಚಿದ ಸೂರ್ಯ

ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಭಾರತ ತಂಡ ಮೊದಲ ಎರಡು ವಿಕೆಟ್​ಗಳನ್ನು 29 ರನ್​ಗಳಿಗೆ ಕಳೆದುಕೊಂಡಿತು. ಆದರೆ ಆ ಬಳಿಕ ಜತೆಯಾದ ಸೂರ್ಯಕುಮಾರ್ ಯಾದವ್​ ಹಾಗೂ ಯಶಸ್ವಿ ಜೈಸ್ವಾಲ್ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಈ ಜೋಡಿ 132 ರನ್​ಗಳ ಜತೆಯಾಟ ನೀಡುವ ಮೂಲಕ ಕುಸಿದ ಭಾರತಕ್ಕೆ ನೆರವಾದರು. ಇಬ್ಬರೂ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಆದರೆ ಜೈಸ್ವಾಲ್ 60 ರನ್​ಗಳಿಗೆ ಔಟಾದರು. ಆ ಬಳಿಕವೂ ಬ್ಯಾಟಿಂಗ್ ಅಬ್ಬರ ಮುಂದುವರಿಸಿದ ಸೂರ್ಯಕುಮಾರ್ ಶತಕ ಬಾರಿಸಿದರು. ಇದು ಅವರ ಪಾಲಿನ 4ನೇಋ ಟಿ20 ಶತಕವಾಗಿದೆ.