ಜೊಹಾನ್ಸ್ಬರ್ಗ್: ಆತಿಥೇಯ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಪ್ರವಾಸಿ ಭಾರತ ಇನಿಂಗ್ಸ್ ಮತ್ತು 32 ರನ್ಗಳ ಸೋಲಿಗೆ ತುತ್ತಾಗಿದೆ. ಮೂರೇ ದಿನಕ್ಕೆ ಈ ಪಂದ್ಯ ಅತ್ಯಂಕಡಿತು. ಭಾರತದ ದ್ವಿತೀಯ ಇನಿಂಗ್ಸ್ನಲ್ಲಿ ಕೊಹ್ಲಿಯ ಏಕಾಂಗಿ ಹೋರಾಟದ ಅರ್ಧಶತಕ ಮಾತ್ರ ಹೈಲೆಟ್ ಆಗಿತ್ತು.
ಇಲ್ಲಿನ ಸೆಂಚುರಿಯನ್ ಸೂಪರ್ಸ್ಪೋರ್ಟ್ಸ್ ಪಾರ್ಕ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ ಮೊದಲ ಇನಿಂಗ್ಸ್ನಲ್ಲಿ ಕನ್ನಡಿಗ ಕೆ.ಎಲ್ ರಾಹುಲ್(101) ಅವರ ಶತಕದ ನೆರವಿನಿಂದ 245ರನ್ಗೆ ಆಲೌಟ್ ಆಯಿತು. ಜವಾಬಿತ್ತ ದಕ್ಷಿಣ ಆಫ್ರಿಕಾ ವಿದಾಯ ಸರಣಿ ಆಡುತ್ತಿರುವ ಡೀನ್ ಎಲ್ಗರ್(185) ಮತ್ತು ವೇಗಿ ಮಾರ್ಕೊ ಜಾನ್ಸೆನ್(ಅಜೇಯ 84) ಬ್ಯಾಟಿಂಗ್ ನೆರವಿನಿಂದ 408 ರನ್ ಬಾರಿಸಿ 163 ರನ್ಗಳ ಮುನ್ನಡೆ ಸಾಧಿಸಿತು.
163 ರನ್ಗಳ ಹಿನ್ನೆಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಭಾರತ ಆರಂಭದಲ್ಲೇ ಸತತವಾಗಿ ವಿಕೆಟ್ ಕಳೆದುಕೊಂಡು ಇನ್ನಿಂಗ್ಸ್ ಮತ್ತು 32 ರನ್ಗಳ ಸೋಲು ಕಂಡಿತು. ನಾಯಕ ರೋಹಿತ್ ಶರ್ಮಾ ಶೂನ್ಯ ಸುತ್ತಿದರೆ, ಅವರ ಜತೆಗಾರ ಯಶಸ್ವಿ ಜೈಸ್ವಾಲ್ 5 ರನ್ಗೆ ಆಟ ಮುಗಿಸಿದರು. ಬರವಸೆಯ ಆಟಗಾರ ಶುಭಮನ್ ಗಿಲ್ ಈ ಪಂದ್ಯದಲ್ಲಿಯೂ ಕೈ ಕೊಟ್ಟರು. ಬಡಬಡನೆ 6 ಬೌಂಡರಿ ಬಾರಿಸಿ 25 ರನ್ಗೆ ವಿಕೆಟ್ ಕೈಚೆಲ್ಲಿದರು.
ಇದನ್ನೂ ಓದಿ Virat Kohli: ಕುಮಾರ ಸಂಗಕ್ಕರ ವಿಶ್ವ ದಾಖಲೆ ಮುರಿದ ‘ಕಿಂಗ್’ ವಿರಾಟ್ ಕೊಹ್ಲಿ
A complete performance from the fast bowlers helps the hosts go 1-0 up in the #SAvIND Test series 🎉#WTC25 📝: https://t.co/Rma4l5S0RO pic.twitter.com/BggeNhDkSp
— ICC (@ICC) December 28, 2023
ಗಿಲ್ ವಿಕೆಟ್ ಪತನದ ಬಳಿಕ ಆಡಲಿಳಿದ ಶ್ರೇಯಸ್ ಅಯ್ಯರ್ 4 ರನ್ ಗಳಿಸಿದ್ದ ವೇಳೆ ಒಂದು ಜೀವದಾನ ಪಡೆದರೂ ಇದರ ಲಾಭವೆತ್ತುವಲ್ಲಿ ವಿಫಲರಾದರು. 6 ರನ್ ಗಳಿಸಿ ಜಾನ್ಸೆನ್ಗೆ ವಿಕೆಟ್ ಒಪ್ಪಿಸಿದರು. ಮೊದಲ ಇನಿಂಗ್ಸ್ನಲ್ಲಿ ಶತಕ ಬಾರಿಸಿ ತಂಡಕ್ಕೆ ಆಸರೆಯಾಗಿದ್ದ ರಾಹುಲ್ ದ್ವಿತೀಯ ಇನಿಂಗ್ಸ್ನಲ್ಲಿ ಒಂದಕಿಂಗೆ ಸೀತರಾದರು. ಅವರ ಗಳಿಕೆ 4. ಇದು ಕೂಡ ಒಂದು ಬೌಂಡರಿ ಮೂಲಕ ದಾಖಲಾಯಿತು.
ಕೊಹ್ಲಿ ಏಕಾಂಗಿ ಹೋರಾಟ
ಒಂದೆಡೆ ವಿಕೆಟ್ ಬೀಳುತ್ತಿದ್ದರೂ ಕೂಡ ವಿರಾಟ್ ಕೊಹ್ಲಿ ಕ್ರೀಸ್ ಕಚ್ಚಿ ನಿಂತು ಎದೆಗುಂದದೆ ರನ್ ಗಳಿಸುತ್ತಿದ್ದರು. ಆದರೆ ಇವರಿಗೆ ಯಾರೋಬ್ಬರು ಕೂಡ ಸಾಥ್ ನೀಡಲಿಲ್ಲ. ಕೊಹ್ಲಿಯನ್ನು ಮೈದಾನದಲ್ಲಿ ನೋಡುವಾಗ ಅಸಹಾಯಕರಂತೆ ಕಂಡು ಬಂತು. ಆದರೂ ಛಲ ಬಿಡದ ಕೊಹ್ಲಿ ಇನಿಂಗ್ಸ್ ಸೋಲನ್ನು ತಪ್ಪಿಸಲು ಪ್ರಯತ್ನಪಟ್ಟರು. ಆದರೆ, ಅಂತಿಮವಾಗಿ ರಬಾಡಗೆ ಕ್ಯಾಚ್ ನೀಡಿ ವಿಕೆಟ್ ಒಪ್ಪಿಸಿದರು. ಈ ವಿಕೆಟ್ ಜಾನ್ಸೆನ್ ಪಾಲಾಯಿತು. 82 ಎಸೆತ ಎದುರಿಸಿ 12 ಬೌಂಡರಿ ಮತ್ತು ಒಂದು ಸಿಕ್ಸರ್ ಬಾರಿಸಿದ ಕೊಹ್ಲಿ 76 ರನ್ ಗಳಿಸಿದರು. ಭಾರತ ಪರ ಕೊಹ್ಲಿ ಮತ್ತು ಗಿಲ್ ಮಾತ್ರ ಎರಡಂಕಿ ಮೊತ್ತ ಕಲೆ ಹಾಕಿದರು. ಉಳಿದ 8 ಮಂದಿ ಬ್ಯಾಟರ್ಗಳದ್ದು ಸಿಂಗಲ್ ಡಿಜಿಟ್ ಮೊತ್ತ. ರೋಹಿತ್, ಬುಮ್ರಾ ಮತ್ತು ಅಶ್ವಿನ್ ಶೂನ್ಯಕ್ಕೆ ಔಟಾದರು. ದಕ್ಷಿಣ ಆಫ್ರಿಕಾ ಪರ ದ್ವಿತೀಯ ಇನಿಂಗ್ಸ್ನಲ್ಲಿ ಬರ್ಗರ್ 4, ಮಾರ್ಕೊ ಜಾನ್ಸೆನ್(3) ಮತ್ತು ರಬಾಡ 2 ವಿಕೆಟ್ ಕಿತ್ತರು.
ಇದಕ್ಕೂ ಮುನ್ನ 140 ರನ್ ಗಳಿಸಿ ಬ್ಯಾಟಿಂಗ್ ಕಾಯ್ದುಕೊಂಡಿದ್ದ ಡೀನ್ ಎಲ್ಗರ್ ಮೂರನೇ ದಿನದಾಟದಲ್ಲಿ 45 ರನ್ ಬಾರಿಸಿದರು. ಅವರ ಒಟ್ಟು ಗಳಿಕೆ 185 ರನ್. ಈ ಸೊಗಸಾದ ಬ್ಯಾಟಿಂಗ್ ಇನಿಂಗ್ಸ್ನಲ್ಲಿ 28 ಬೌಂಡರಿ ದಾಖಲಾಯಿತು. ದ್ವಿಶತಕದತ್ತ ಮುನ್ನುಗ್ಗುತ್ತಿದ್ದ ಅವರನ್ನು ಶಾರ್ದೂಲ್ ಠಾಕೂರ್ ಅವರು ವೈಡ್ ಲೈನ್ನತ್ತ ಬೌಲಿಂಗ್ ಎಸೆದು ಕ್ಯಾಚ್ ನೀಡುವಂತೆ ಮಾಡಿ ವಿಕೆಟ್ ಕಬಳಿಸಿದರು.
Dean Elgar registered his second-highest score in Test cricket and the highest against India 🔥#WTC25 | #SAvIND pic.twitter.com/h5No6LUhki
— ICC (@ICC) December 28, 2023
ಆಲ್ರೌಂಡರ್ ಪ್ರದರ್ಶನ ತೋರಿದ ಜಾನ್ಸೆನ್
ಬೌಲಿಂಗ್ ಆಲ್ರೌಂಡರ್ ಆಗಿರುವ ಮಾರ್ಕೊ ಜಾನ್ಸೆನ್ ಈ ಪಂದ್ಯದಲ್ಲಿ ಆಲ್ರೌಂಡರ್ ಪ್ರದರ್ಶನ ತೋರುವ ಮೂಲಕ ಅಜೇಯ ಅರ್ಧಶತಕ ಬಾರಿಸಿ ತಂಡದ ಬೃಹತ್ ಮೊತ್ತಕ್ಕೆ ಕಾರಣರಾದರು. ಡೀನ್ ಎಲ್ಗರ್ ಜತೆ ಸೇರಿಕೊಂಡು ಉತ್ತಮ ಇನಿಂಗ್ಸ್ ಕಟ್ಟಿ ಭಾರತೀಯ ಬೌಲರ್ಗಳನ್ನು ಕಾಡಿದರು. ಕೊನೆಗೂ ಅವರು ಅಜೇಯರಾಗಿ ಉಳಿದರು. 11 ಬೌಂಡರಿ ಮತ್ತು 1 ಸಿಕ್ಸರ್ ಬಾರಿಸಿ ಅಜೇಯ 84 ರನ್ ಗಳಿಸಿದರು. ಬವುಮಾ ಗಾಯಗೊಂಡು ಬ್ಯಾಟಿಂಗ್ ನಡೆಸದ ಕಾರಣ ಅವರಿಗೆ ಶತಕ ಬಾರಿಸುವ ಅವಕಾಶ ಕೈ ತಪ್ಪಿತು. ಮಾರ್ಕೊ ಜಾನ್ಸೆನ್ ಮತ್ತು ಡೀನ್ ಎಲ್ಗರ್ ಜೋಡಿ 6ನೇ ವಿಕೆಟ್ಗೆ ಭರ್ತಿ 111 ರನ್ಗಳ ಜತೆಯಾಟ ನಡೆಸಿತು.
ಭಾರತ ಪರ ಜಸ್ಪ್ರೀತ್ ಬುಮ್ರಾ 69 ನೀಡಿ 4 ವಿಕೆಟ್ ಕಿತ್ತು ಯಶಸ್ವಿ ಬೌಲರ್ ಎನಿಸಿಕೊಂಡರು. ಮೊಹಮ್ಮದ್ ಸಿರಾಜ್ 2 ವಿಕೆಟ್ ಪಡೆದರು. ಉಳಿದಂತೆ ಠಾಕೂರ್, ಅಶ್ವಿನ್ ಮತ್ತು ಪ್ರಸಿದ್ಧ್ ತಲಾ ಒಂದು ವಿಕೆಟ್ ಕಿತ್ತರು. ಶಾದೂಲ್ ಕೊಂಚ ದುಬಾರಿಯಾಗಿ ಕಂಡು ಬಂದರು.