ಭಾರತ ತಂಡದ ನಾಯಕ ರೋಹಿತ್​ ಶರ್ಮ ವಿರುದ್ಧ ಟಾಸ್​ ಫಿಕ್ಸಿಂಗ್ ಆರೋಪ!

ಮುಂಬಯಿ: ಜಟ್ಟಿ ಬಿದ್ದರೂ ಮೀಸೆ ಮಣ್ಣಾಗಲಿಲ್ಲ ಎಂಬ ಮಾತಿನಂತೆ ಹಾಲಿ ವಿಶ್ವಕಪ್​ ಟೂರ್ನಿಯಲ್ಲಿ ಹೀನಾಯವಾಗಿ ಸೋಲು ಕಂಡರೂ ಪಾಕಿಸ್ತಾನದ ತಕರಾರು ಮಾತ್ರ ಇನ್ನೂ ಮುಗಿದಿಲ್ಲ. ಒಂದಲ್ಲ ಒಂದು ವಿಚಾರದಲ್ಲಿ ಭಾರತದ ವಿರುದ್ಧ ಇಲ್ಲ ಸಲ್ಲದ ಆರೋಪ ಮಾಡುತ್ತಲೇ ಇದೆ. ಇದೀಗ ಹೊಸ ಸೇರ್ಪಡೆ ಎಂಬಂತೆ ರೋಹಿತ್​ ಶರ್ಮ(Rohit Sharma) ಅವರು ಟಾಸ್​ ಫಿಕ್ಸಿಂಗ್​(Rohit Sharma fixing toss) ಮಾಡಿದ್ದಾರೆ ಎಂದು ಪಾಕಿಸ್ತಾನದ ಮಾಜಿ ವೇಗಿ ಸಿಕಂದರ್ ಬಖ್ತ್(Sikandar Bakht) ಆರೋಪಿಸಿದ್ದಾರೆ.

ಪಾಕಿಸ್ತಾನದಲ್ಲಿ ನಡೆದ ಕ್ರಿಕೆಟ್​ ಚರ್ಚೆಯ ಕಾರ್ಯಕ್ರಮದಲ್ಲಿ ಸಿಕಂದರ್ ಬಖ್ತ್ ಈ ಆರೋಪ ಮಾಡಿದ್ದಾರೆ. “ಐಸಿಸಿ ಮತ್ತು ಬಿಸಿಸಿಐ ಜತೆ ಸೇರಿಕೊಂಡು ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಟಾಸ್ ಫಿಕ್ಸ್ ಮಾಡಿದ್ದಾರೆ” ಎಂದು ಹೇಳಿದ್ದಾರೆ. ಅವರ ಈ ಹೇಳಿಕೆ ವಿವಾದಕ್ಕೆ ಕಾರಣವಾಗಿದೆ. ಈ ವಿಡಿಯೊ ವೈರಲ್ ಆಗಿದೆ.

See more

Former Pakistan bowler Sikandar Bakht indicates India captain Rohit Sharma throws the coin far away at the toss so the opposition captain doesn't see it and he gets the decision in his favour 🤦🏽‍♂️🤦🏽‍♂️
A new controversy 👀 #CWC23 #INDvsNZpic.twitter.com/zdzd3Zwrc7

— Farid Khan (@_FaridKhan) November 15, 2023

“ರೋಹಿತ್​ ಅವರು ಬುಧವಾರದ ಸೆಮಿಫೈನಲ್​ ಪಂದ್ಯದ ವೇಳೆ ಟಾಸ್ ಹಾರಿಸಿದ್ದನ್ನು ಗಮನಿಸುವಾಗ ಫಿಕ್ಸಿಂಗ್​ ನಡೆದಿರುವುದು ತಿಳಿಯುತ್ತದೆ. ರೋಹಿತ್​ ಎದುರಾಳಿ ನಾಯಕನಿಂದ ಬಹಳ ಅಂತರ ಕಾಯ್ದುಕೊಂಡು ಟಾಸ್​ ಹಾರಿಸಿದ್ದಾರೆ. ಇದರಿಂದ ಎದುರಾಳಿ ತಂಡದ ನಾಯಕನಿಗೆ ಸರಿಯಾಗಿ ಕಾಯಿನ್​ ಪರೀಕ್ಷಿಸಲು ಸಾಧ್ಯವಾಗುದಿಲ್ಲ. ಮ್ಯಾಚ್​ ರೆಫ್ರಿ ಹೇಳಿದ್ದೇ ಇಲ್ಲಿ ಫೈನಲ್ ಆಗುತ್ತದೆ. ಇದಲ್ಲವೂ ಪೂರ್ವಯೋಜಿತ ಸಿದ್ಧತೆ. ಹೀಗಾಗಿ ರೋಹಿತ್​ ದೂರಕ್ಕೆ ಟಾಸ್​ ಕಾಯಿನ್​ ಹಾರಿಸಿ ಫಿಕ್ಸಿಂಗ್​ ಮಾಡಿದ್ದಾರೆ” ಎಂದು ಸಿಕಂದರ್ ಬಖ್ತ್ ಹೇಳಿದ್ದಾರೆ.

ಯಾರು ಈ ಸಿಕಂದರ್ ಬಖ್ತ್

66 ವರ್ಷದ ಸಿಕಂದರ್ ಬಖ್ತ್, ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ. ಪಾಕಿಸ್ತಾನ ಪರ ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್​ನಲ್ಲಿ ಒಂದು ಕಾಲದಲ್ಲಿ ಶ್ರೇಷ್ಠ ಬೌಲರ್​ ಆಗಿದ್ದರು. 50 ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿ 100ಕ್ಕೂ ಅಧಿಕ ವಿಕೆಟ್‌ಗಳನ್ನು ಪಡೆದಿದ್ದಾರೆ. 1976ರಲ್ಲಿ ಟೆಸ್ಟ್‌ ಆಡುವ ಮೂಲಕ ಪಾಕ್ ಅಂತಾರಾಷ್ಟ್ರೀಯ ತಂಡಕ್ಕೆ ಪದಾರ್ಪಣೆ ಮಾಡಿದ್ದರು. 1989 ರಲ್ಲಿ ಕ್ರಿಕೆಟ್‌ಗೆ ನಿವೃತ್ತಿ ಹೇಳಿದ್ದರು.

ಇದನ್ನೂ ಓದಿ IND vs NZ: ಹಾಟ್​​ಸ್ಟಾರ್​ನಲ್ಲಿ ದಾಖಲೆ ಬರೆದ ಭಾರತ-ನ್ಯೂಜಿಲ್ಯಾಂಡ್​ ಸೆಮಿ ಪಂದ್ಯ

ಕೆಲ ದಿನಗಳ ಹಿಂದೆ ಹಸನ್​ ರಾಝಾ ಅವರು ಭಾರತ ತಂಡಕ್ಕೆ ಐಸಿಸಿ ಮತ್ತು ಬಿಸಿಸಿಐ(ICC And BCCI) ಸೇರಿಕೊಂಡು ವಿಶೇಷ ಚೆಂಡನ್ನು ನೀಡುತ್ತಿದೆ. ಹೀಗಾಗಿ ಶಮಿ ಮತ್ತು ಉಳಿದ ಬೌಲರ್​ಗಳು ವಿಕೆಟ್​ ಈ ರೀತಿ ವಿಕೆಟ್​ ಕೀಳುತ್ತಿದ್ದಾರೆ ಎಂದು ಹೇಳಿದ್ದರು. ಅಲ್ಲದೆ ಆಸ್ಟ್ರೇಲಿಯಾ ಮತ್ತು ಅಫಘಾನಿಸ್ತಾನ ನಡುವಣ ಪಂದ್ಯದ ಬಳಿಕವೂ ನಾಲಗ ಹರಿಬಿಟ್ಟಿದ್ದ ರಾಝಾ, ಭಾರತಕ್ಕೆ ನೀಡಿದ್ದ ಚೆಂಡನ್ನು ಅಫಘಾನಿಸ್ತಾನಕ್ಕೆ ನೀಡಿದ್ದಾರೆ ಎಂದು ಆರೋಪ ಮಾಡಿದ್ದರು.

ಹಸನ್​ ರಾಝಾಗೆ ಚಳಿ ಬಿಡಿಸಿದ್ದ ವಾಸಿಂ ಅಕ್ರಮ್​

ಭಾರತ ವಿರುದ್ಧ ಆರೋಪ ಮಾಡಿದ್ದ ರಾಝಾ ಅವರ ಹೇಳಿಕೆಗೆ ಪ್ರತಿಕ್ರಿಕೆ ನೀಡಿದ್ದ ಪಾಕಿಸ್ತಾನ ದಿಗ್ಗಜ ಆಟಗಾರ ವಾಸಿಂ ಅಕ್ರಮ್​ ಅವರು, “ಅಸಂಬದ್ದ ಹೇಳಿಕೆ ನೀಡುವುದರಿಂದ ನಿಮ್ಮಗೆ ಮಾತ್ರವಲ್ಲದೆ ನಮಗೂ ಮುಜುಗರವನ್ನುಂಟು ಮಾಡುತ್ತಿದ್ದೀರಿ” ಎಂದು ಬಹಿರಂಗವಾಗಿಯೇ ಟಿವಿ ಸಂದರ್ಶನದಲ್ಲಿ ರಾಝಾ ಹೇಳಿಕೆಯನ್ನು ಕಡ್ಡಿ ಮುರಿದಂತೆ ಖಂಡಿಸಿದ್ದರು.