ತಿರುವನಂತಪುರ: ಯಶಸ್ವಿ ಜೈಸ್ವಾಲ್ (53 ರನ್, 25 ಎಸೆತ, 9ಫೋರ್, 2 ಸಿಕ್ಸರ್) , ಋತುರಾಜ್ ಗಾಯಕ್ವಾಡ್ (58 ರನ್, 43 ಎಸೆತ, 3 ಫೋರ್, 2 ಸಿಕ್ಸರ್), ಇಶಾನ್ ಕಿಶನ್ (52 ರನ್, 32 ಎಸೆತ, 3 ಫೋರ್, 4 ಸಿಕ್ಸರ್) ಅವರ ಅರ್ಧ ಶತಕಗಳ ನೆರವಿನಿಂದ ಮಿಂಚಿದ ಭಾರತ ತಂಡದ ಆಸ್ಟ್ರೇಲಿಯಾ (ind vs Aus ) ವಿರುದ್ಧದ ಟಿ20 ಸರಣಿಯ ಎರಡನೇ ಪಂದ್ಯದಲ್ಲಿ 44 ರನ್ಗಳಿಂದ ಗೆಲುವು ಸಾಧಿಸಿದೆ. ಇದರೊಂದಿಗೆ ಭಾರತ ತಂಡ ಸರಣಿಯಲ್ಲಿ 2-0 ಮುನ್ನಡೆ ಪಡೆದುಕೊಂಡಿದೆ.
ಇಲ್ಲಿನ ಗ್ರೀನ್ ಫೀಲ್ಡ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ತಂಡದ ನಾಯಕ ಮ್ಯಾಥ್ಯೂ ವೇಡ್ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಆದರೆ, ಎದುರಾಳಿ ತಂಡದ ನಿರೀಕ್ಷೆಗಳನ್ನು ಸುಳ್ಳು ಮಾಡಿದ ಭಾರತ ಬ್ಯಾಟರ್ಗಳು ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 235 ರನ್ ಬಾರಿಸಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ ತಮ್ಮ ಪಾಲಿನ ಓವರ್ಗಳು ಮುಕ್ತಾಯಗೊಂಡಾಗ 9 ವಿಕೆಟ್ಗೆ 191 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ದೊಡ್ಡ ಮೊತ್ತವನ್ನು ಪೇರಿಸಲು ಹೊರಟ ಆಸ್ಟ್ರೇಲಿಯಾ ತಂಡ ಉತ್ತಮ ಆರಂಭವನ್ನು ಪಡೆಯುವ ಯತ್ನ ಮಾಡಿತು. ಮೊದಲ ವಿಕೆಟ್ಗೆ ವೇಗವಾಗಿ 35 ರನ್ ಬಾರಿಸಿತು. ಆದರೆ, ರವಿ ಬಿಷ್ಣೋಯ್ ಎಸೆತಕ್ಕೆ ಮ್ಯಾಥ್ಯೂ ಶಾರ್ಟ್ಸ್ 19 ರನ್ ಬಾರಿಸಿ ಆದರು. ಬಳಿಕ ಬಂದ ಜೋಶ್ ಬೇಗನೆ ವಿಕೆಟ್ ಒಪ್ಪಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ಮಾರ್ಕ್ ಸ್ಟೊಯ್ನಿಸ್ 45 ಹಾಗೂ ಟಿಮ್ ಡೇವಿಡ್ (37) ಭಾರತ ಬೌಲಿಂಗ್ಗೆ ಬೆದರಿಕೆಯೊಡ್ಡಿದರು. ಆದರೆ, ಅವರಿಬ್ಬರನ್ನೂ ಮುಕೇಶ್ ಕುಮಾರ್ ಹಾಗೂ ಬಿಷ್ಣೋಯಿ ಪೆವಿಲಿಯನ್ಗಟ್ಟಿದರು. ಅಲ್ಲಿಂದ ಆಸೀಸ್ ತಂಡ ಚೇತರಿಸಿಕೊಳ್ಳಲಿಲ್ಲ.
ಭಾರತ ತಂಡದ ಪರ ಬೌಲಿಂಗ್ನಲ್ಲಿ ರವಿ ಬಿಷ್ಣೋಯ್ 32ಕ್ಕೆ 3 ವಿಕೆಟ್ ಪಡೆದರು.
ಭಾರತದ ಭರ್ಜರಿ ಬ್ಯಾಟಿಂಗ್
ಬ್ಯಾಟಿಂಗ್ ಆಹ್ವಾನ ಪಡೆದ ಭಾರತ ತಂಡ ಸ್ಪೋಟಕ ಬ್ಯಾಟಿಂಗ್ ಮೊರೆ ಹೋಯಿತು. ಆರಂಭಿಕರಾದ ಋತುರಾಜ್ ಗಾಯಕ್ವಾಡ್ ಹಾಗೂ ಯಶಸ್ವಿ ಜೈಸ್ವಾಲ್ ಮೊದಲ ವಿಕೆಟ್ಗೆ 77 ರನ್ ಬಾರಿಸಿದರು. ಕೇವಲ 5.5 ಓವರ್ಗಳಲ್ಲಿ ಈ ರನ್ ಮೂಡಿಬಂದಿತ್ತು. ಬಳಿಕ ಬಂದ ಇಶಾನ್ ಕಿಶನ್ ಕೂಡ ಸ್ಫೋಟಕ ಬ್ಯಾಟಿಂಗ್ ಮಾಡಿದರು. ಅವರು ಋತುರಾಜ್ ಜತೆಗೂಡಿ ತಂಡವನ್ನು ಮೊತ್ತವನ್ನು 164ಕ್ಕೆ ಕೊಂಡೊಯ್ದರು. ಸೂರ್ಯಕುಮಾರ್ 360 ಡಿಗ್ರಿ ಬ್ಯಾಟಿಂಗ್ ಮಾಡಿದ ಹೊರತಾಗಿಯೂ 19 ರನ್ಗೆ ಸೀಮಿತಗೊಂಡರು. ಆದರೆ, ಫಿನಿಶರ್ ರಿಂಕು ಸಿಂಗ್ ಕೊನೆಯಲ್ಲಿ ಕೇವಲ 9 ಎಸೆತಗಳಲ್ಲಿ 31 ರನ್ ಬಾರಿಸಿ ದೊಡ್ಡ ಮೊತ್ತ ಪೇರಿಸಲು ನೆರವಾದರು. ಆಸೀಸ್ ಪರ ನೇಥಾನ್ ಎಲ್ಲೀಸ್ 45 ರನ್ಗೆ 3 ವಿಕೆಟ್ ಪಡೆದರು. ಮ್ಯಾಥ್ಯೂ ವೇಡ್ ಕೊನೇ ಹಂತದಲ್ಲಿ 23 ಎಸೆತಗಳಲ್ಲಿ ಅಜೇಯ 42 ರನ್ ಬಾರಿಸಿದರು.
ಈ ಸುದ್ದಿಯನ್ನೂ ಓದಿ : Rahul Dravid: ಮತ್ತೆ ಐಪಿಎಲ್ ಕೋಚಿಂಗ್ನತ್ತ ಮುಖ ಮಾಡಿದ ರಾಹುಲ್‌ ದ್ರಾವಿಡ್‌!
ಯಶಸ್ವಿ ಜೈಸ್ವಾಲ್ ಪವರ್ ಪ್ಲೇ ಅವಧಿಯಲ್ಲಿ ಅರ್ಧ ಶತಕ ಬಾರಿಸಿದ ಖ್ಯಾತಿಯನ್ನೂ ತಮ್ಮದಾಗಿಸಿಕೊಂಡರು. ಅವರು 25 ಎಸೆತಗಳಿಗೆ 53 ರನ್ ಬಾರಿಸಿದ್ದರು. ಈ ಮೂಲಕ ಅವರು ಭಾರತ ತಂಡದ ಪರಿವಾಗಿ ಹೊಸ ದಾಖಲೆ ಬರೆದರು.