IND vs SL : ಶ್ರೀಲಂಕಾ ವಿರುದ್ಧ ಭಾರತಕ್ಕೆ 41 ರನ್​ಗಳ ಭರ್ಜರಿ ಜಯ, ಏಷ್ಯಾ ಕಪ್ ಫೈನಲ್​ಗೆ ಪ್ರವೇಶ

ಕೊಲಂಬೊ: ಏಷ್ಯಾಕಪ್​ನ(Asia Cup 2023) ಮಂಗಳವಾರದ ಸೂಪರ್​ 4(India vs Sri Lanka Super Fours) ಪಂದ್ಯದಲ್ಲಿ ಭಾರತ ಮತ್ತು ಹಾಲಿ ಚಾಂಪಿಯನ್​ ಶ್ರೀಲಂಕಾ(IND vs SL) ವಿರುದ್ಧ 41 ರನ್​ಗಳ ಗೆಲುವು ಸಾಧಿಸಿದೆ. ಇದರೊಂದಿಗೆ ಮೊದಲ ತಂಡವಾಗಿ ಫೈನಲ್​ಗೆ ಪ್ರವೇಶ ಪಡೆದುಕೊಂಡಿದೆ. ಇಲ್ಲಿನ ಪ್ರೇಮದಾಸ ಕ್ರಿಕೆಟ್​ ಸ್ಟೇಡಿಯಮ್​ನಲ್ಲಿ ನಡೆಯುತ್ತಿರುವ ಹಣಾಹಣಿಯಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್​ ಮಾಡಿದ ಟೀಮ್ ಇಂಡಿಯಾ ಲಂಕಾ ಸ್ಪಿನ್ನರ್​ಗಳ ದಾಳಿಗೆ ಸಿಲುಕಿ 49.2 ಓವರ್​ಗಳಲ್ಲಿ 213 ರನ್​ಗಳಿಗೆ ಆಲ್ಔಟ್ ಆಯಿತು. ಪ್ರತಿಯಾಗಿ ಬ್ಯಾಟ್ ಮಾಡಿದ ಲಂಕಾ ತಂಡ 41. 3 ಓವರ್​ಗಳಲ್ಲಿ 172 ರನ್​ಗಳಿಗೆ ಆಲ್​ಔಟ್​ ಆಗಿ ಸೋಲೊಪ್ಪಿಕೊಂಡಿತು.

ಸಣ್ಣ ಮೊತ್ತದ ಗುರಿಯನ್ನು ಬೆನ್ನಟ್ಟಲು ಹೊರಟ ಸ್ಥಳೀಯ ತಂಡ ಶ್ರೀಲಂಕಾ ಭಾರತದ ಬೌಲರ್​ಗಳ ಒತ್ತಡಕ್ಕೆ ಒಳಗಾಯಿತು. ಸತತವಾಗಿ ವಿಕೆಟ್ ಕಳೆದುಕೊಂಡು 171 ರನ್​ಗಳಿಗೆ ಸರ್ವಪತನ ಕಂಡಿತು. ಬೌಲಿಂಗ್​ನಲ್ಲಿ 5 ವಿಕೆಟ್​ ಪಡೆದು ಮಿಂಚಿದ್ದ ದುನಿತ್​ ವೆಲ್ಲಾಲಗೆ ಅಜೇಯರಾಗಿ 42 ರನ್​ ಬಾರಿಸಿ ಭಾರತಕ್ಕೆ ಆತಂಕ ತಂದೊಡ್ಡಿದರು. ಆದರೆ, ಉಳಿದ ಬ್ಯಾಟರ್​ಗಳ ನೆರವು ಸಿಗದ ಕಾರಣ ಅವರಿಗೆ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯಲಾಗಲಿಲ್ಲ. ಒಂದು ವೇಳೆ ಅವರು ತಂಡವನ್ನು ಗೆಲ್ಲಿಸಿದ್ದರೆ ದಿನದ ಹೀರೋ ಆಗುತ್ತಿದ್ದರು.

See more

Consecutive wins in Colombo for #TeamIndia 🙌

Kuldeep Yadav wraps things up in style as India complete a 41-run victory over Sri Lanka 👏👏

Scorecard ▶️ https://t.co/P0ylBAiETu#AsiaCup2023 | #INDvSL pic.twitter.com/HUVtGvRpnG

— BCCI (@BCCI) September 12, 2023

ಮಧ್ಯಮ ಕ್ರಮಾಂಕದಲ್ಲಿ ಧನಂಜಯ ಡಿಸಿಲ್ವಾ ಕೂಡ 41 ರನ್ ಬಾರಿಸಿದರು. ಅವರು ದುನಿತ್ ಜತೆಗೂಡಿ 63 ರನ್​ಗಳ ಜತೆಯಾಟವಾಡಿದರು. ಈ ಜತೆಯಾಟ ಭಾರತ ತಂಡಕ್ಕೆ ಸೋಲಿನ ಆತಂಕ ತಂದೊಡ್ಡಿತು. ಆದರೆ, ಜಡೇಜಾ ಧನಂಜಯ ವಿಕೆಟ್​ ಪಡೆದು ಭಾರತದ ಗೆಲುವಿಗೆ ಹಾದಿ ಮಾಡಿಕೊಟ್ಟರು. ಬಳಿಕ ಕುಲ್ದೀಪ್​ ಯಾದವ್​ ತಮ್ಮ ಸ್ಪೆಲ್​ನ ಕೊನೇ ಓವರ್​ನಲ್ಲಿ ಸತತ ಎರಡು ವಿಕೆಟ್​ಗಳನ್ನು ಕಬಳಿಸಿ ವಿಜಯ ತಂದುಕೊಟ್ಟರು.

ಲಂಕಾ ಸ್ಪಿನ್ ದಾಳಿಗೆ ನಲುಗಿದ ಭಾರತ

ಭಾರತ ತಂಡ ರೋಹಿತ್ ಶರ್ಮಾ (53 ರನ್​) ಅರ್ಧ ಶತಕ ಹಾಗೂ ಶುಭ್​ಮನ್ ಗಿಲ್​ (19) ಅವರ ಸಮಯೋಚಿತ ಬ್ಯಾಟಿಂಗ್ ನೆರವಿನಿಂದ ಮೊದಲ ವಿಕೆಟ್​​ಗೆ 80 ರನ್​ ಜತೆಯಾಟ ಪಡೆಯಿತು. ಆದರೆ, ಆ ಬಳಿಕ ಭಾರತದ ಬ್ಯಾಟಿಂಗ್ ವಿಭಾಗ ಏಕಾಏಕಿ ವೈಫಲ್ಯ ಕಂಡಿತು. ಲಂಕಾದ ಯುವ ಸ್ಪಿನ್ನರ್​ ದುನಿತ್​ ವೆಲ್ಲಾಲಗೆ (40 ರನ್​ಗಳಿಗೆ 5 ವಿಕೆಟ್​), ಚರಿತ್ ಅಸಲಂಕಾ (18 ರನ್​ಗಳಿಗೆ 4 ವಿಕೆಟ್​) ಅವರ ಮಾರಕ ದಾಳಿಗೆ ಸಿಲುಕಿ ನಲುಗಿತು.

ವಿರಾಟ್ ಕೊಹ್ಲಿ 3 ರನ್​ಗಳಿಗೆ ಔಟಾದರೆ, ಇಶಾನ್​ ಕಿಶನ್​ (33) ಹಾಗೂ ಕೆ. ಎಲ್​ ರಾಹುಲ್ (39) ಮಧ್ಯಮ ಕ್ರಮಾಂಕದಲ್ಲಿ ಸ್ವಲ್ಪ ಹೊತ್ತು ಬ್ಯಾಟಿಂಗ್ ಮಾಡಿದರು. ಆದರೆ, ಲಂಕಾದ ಸ್ಪಿನ್ನರ್​ಗಳ ಪ್ರಭಾವ ಹೆಚ್ಚಾಗುತ್ತಿದ್ದಂತೆ ಸತತವಾಗಿ ವಿಕೆಟ್​ಗಳನ್ನು ಕಳೆದಕೊಂಡು ಕನಿಷ್ಠ ಮೊತ್ತಕ್ಕೆ ಸರ್ವಪತನ ಕಂಡಿತು.

ಇದನ್ನೂ ಓದಿ : ind vs sl : ಭಾರತ ಬ್ಯಾಟರ್​ಗಳು ಈ ರೀತಿ ಆಲ್ಔಟ್ ಆಗಿರುವುದು ಇದೇ ಮೊದಲು

ಹಾರ್ದಿಕ್ ಪಾಂಡ್ಯ 5 ರನ್​ ಬಾರಿಸಿದರೆ, ರವೀಂದ್ರ ಜಡೇಜಾ 4 ರನ್​ಗಳಿಗೆ ಸೀಮಿತಗೊಂಡರು. ಅಕ್ಷರ್ ಪಟೇಲ್ ಕೊನೆ ವಿಕೆಟ್​ ಆಗಿ ಔಟಾಗುವ ಮೊದಲು 26 ರನ್​ಗಳ ಕೊಡುಗೆ ಕೊಟ್ಟರು. ಬುಮ್ರಾ 5 ರನ್​, ಕುಲ್ದೀಪ್​ ಯಾದವ್​ ಶೂನ್ಯಕ್ಕೆ ಔಟಾದರು.

ಲಂಕಾ ಪರ ಮಹೀಶ್ ತೀಕ್ಷಣಾ ಒಂದು ವಿಕೆಟ್​ ಪಡೆದರು.