ನಾಗ್ಪುರ: ಬೌಲಿಂಗ್ ಹಾಗೂ ಬ್ಯಾಟಿಂಗ್ನಲ್ಲಿ ಸಮತೋಲಿತ ಪ್ರದರ್ಶನ ನೀಡಿದ ಭಾರತ ತಂಡ ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯ (INDvsAUS) ಮೊದಲ ಪಂದ್ಯದ ಮೊದಲ ದಿನ ಮೇಲುಗೈ ಸಾಧಿಸಿದೆ. ಫೆಬ್ರವರಿ 9ರಂದು ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ 63. 5 ಓವರ್ಗಳಲ್ಲಿ 177 ರನ್ಗಳಿಗೆ ಆಲ್ಔಟ್ ಆಯಿತು. ಪ್ರತಿಯಾಗಿ ಆಡಿದ ಭಾರತ ತಂಡ ದಿನದಾಟ ಮುಕ್ತಾಯದ ವೇಳೆಗೆ 24 ಓವರ್ಗಳಲ್ಲಿ ಒಂದು ವಿಕೆಟ್ ಕಳೆದುಕೊಂಡು 77 ರನ್ ಗಳಿಸಿದೆ. ಟೀಮ್ ಇಂಡಿಯಾಗೆ ಇನಿಂಗ್ಸ್ ಮುನ್ನಡೆ ಪಡೆಯಲು ಇನ್ನೂ 101 ರನ್ಗಳ ಅಗತ್ಯವಿದೆ.
ಇಲ್ಲಿನ ವಿದರ್ಭ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಭಾರತ ಸ್ಪಿನ್ನರ್ಗಳಾದ ರವೀಂದ್ರ ಜಡೇಜಾ (47 ರನ್ಗಳಿಗೆ 5 ವಿಕೆಟ್) ಹಾಗೂ ಆರ್. ಅಶ್ವಿನ್ (42 ರನ್ಗಳಿಗೆ 3 ವಿಕೆಟ್) ಪ್ರವಾಸಿ ತಂಡದ ಮೇಲೆ ಸವಾರಿ ಮಾಡಿದರು. ಇದರೊಂದಿಗೆ ಮೊದಲು ಬ್ಯಾಟ್ ಮಾಡಿ ಆತಿಥೇಯ ತಂಡಕ್ಕೆ ದೊಡ್ಡ ಮೊತ್ತದ ಸವಾಲೊಡ್ಡುವ ಆಸೀಸ್ ಪಡೆಯ ಯೋಜನೆ ನುಚ್ಚು ನೂರಾಯಿತು.
ಆರಂಭಿಕರಾಗಿ ಬ್ಯಾಟ್ ಹಿಡಿದು ಬಂದ ಡೇವಿಡ್ ವಾರ್ನರ್ (1) ಹಾಗೂ ಉಸ್ಮಾನ್ ಖವಾಜ (1) ವಿಕೆಟ್ಗಳನ್ನು ಕ್ರಮವಾಗಿ ಮೊಹಮ್ಮದ್ ಶಮಿ ಹಾಗೂ ಮೊಹಮ್ಮದ್ ಸಿರಾಜ್ ತಮ್ಮದಾಗಿಸಿಕೊಂಡರು. ಆರಂಭಿಕ ಕುಸಿತದಿಂದ ತಂಡವನ್ನು ಕಾಪಾಡಲು ಬಂದ ಮರ್ನಸ್ ಲಾಬುಶೇನ್ (49) ಸ್ವಲ್ಪ ಹೊತ್ತು ಕ್ರೀಸ್ನಲ್ಲಿ ತಳವೂರಿದರೂ ಜಡೇಜಾ ಸ್ಪಿನ್ ಮೋಡಿಗೆ ಒಳಗಾಗಿ ಔಟಾದರು. ಅವರು ಒಂದು ರನ್ನಿಂದ ಅರ್ಧ ಶತಕದಿಂದ ವಂಚಿತರಾದರು. ಸ್ಟಾರ್ ಬ್ಯಾಟರ್ ಸ್ಟೀವ್ ಸ್ಮಿತ್ (37) ನಿಧಾನಗತಿಯ ಬ್ಯಾಟಿಂಗ್ನೊಂದಿಗೆ ಭಾರತ ಬೌಲರ್ಗಳ ಏಕಾಗ್ರತೆಗೆ ಭಂಗ ತಂದರೂ ಜಡೇಜಾ ಅವರ ಮೋಹಕ ಸ್ಪಿನ್ಗೆ ಬೌಲ್ಡ್ ಆಗಿ ಮರಳಿದರು. ಮ್ಯಾಟ್ ರನ್ಶಾ ಅವರನ್ನು ಶೂನ್ಯಕ್ಕೆ ಔಟ್ ಮಾಡಿದ ಜಡೇಜಾ ಭಾರತದ ಮುನ್ನಡೆಗೆ ಕಾರಣರಾದರು. ಅದರ ಜತೆಗೆ ಅವರು ಫೀಟರ್ ಹ್ಯಾಂಡ್ಸ್ಕಾಂಬ್ (31) ವಿಕೆಟ್ ಕೂಡ ತಮ್ಮದಾಗಿಸಿಕೊಂಡರು.
ಇದಾದ ಬಳಿಕ ಕರಾಮತ್ತೊ ತೋರಿದ ಆರ್. ಅಶ್ವಿನ್ ವಿಕೆಟ್ಕೀಪರ್ ಬ್ಯಾಟರ್ ಅಲೆಕ್ಸ್ ಕ್ಯೇರಿ (36) ವಿಕೆಟ್ ಕೂಡ ತಮ್ಮದಾಗಿಸಿಕೊಂಡರು. ನಾಯಕ ಪ್ಯಾಟ್ ಕಮಿನ್ಸ್ 6 ರನ್ಗೆ ಸೀಮಿತಗೊಂಡರೆ ಬಾಲಂಗೋಚಿ ಬ್ಯಾಟರ್ಗಳು ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ಉಳಿಯಲಿಲ್ಲ.
ಸಾಧಾರಣ ಮೊತ್ತದ ಗುರಿಯನ್ನು ಬೆನ್ನಟ್ಟಲು ಆರಂಭಿಸಿದ ಭಾರತ ತಂಡ ಉತ್ತಮ ಆರಂಭವನ್ನೇ ಪಡೆಯಿತು. ನಾಯಕ ರೋಹಿತ್ ಶರ್ಮ ವೇಗದ ಬ್ಯಾಟಿಂಗ್ ಮೂಲಕ (56) ಅರ್ಧ ಶತಕ ಬಾರಿಸಿದರು. ಆದರೆ, ಕೆ. ಎಲ್ ರಾಹುಲ್ 20 ರನ್ಗೆ ಔಟಾಗಿ ನಿರಾಸೆ ಮೂಡಿಸಿದರು. ಅಶ್ವಿನ್ ನೈಟ್ ವಾಚ್ಮನ್ ಆಗಿ ಕ್ರೀಸ್ಗೆ ಇಳಿದಿದ್ದಾರೆ.
ಇದನ್ನೂ ಓದಿ : INDvsAUS : ಐದು ತಿಂಗಳ ಹಿಂದೆ ಗಾಯಾಳು, ಈಗ ಐದು ವಿಕೆಟ್ಗಳ ಸರದಾರ; ಜಡೇಜಾ ಸಾಧನೆಗೆ ಅಭಿಮಾನಿಗಳ ಮೆಚ್ಚುಗೆ
ಸ್ಕೋರ್ ವಿವರ
ಆಸ್ಟ್ತೇಲಿಯಾ ಪ್ರಥಮ ಇನಿಂಗ್ಸ್ : 63.5 ಓವರ್ಗಳಲ್ಲಿ 177 (ಮರ್ನಸ್ ಲಾಬುಶೇನ್ 49, ಸ್ಟೀವ್ ಸ್ಮಿತ್ 37, ಅಲೆಕ್ಸ್ ಕ್ಯೇರಿ 36; ರವೀಂದ್ರ ಜಡೇಜಾ 47ಕ್ಕೆ5, ರವಿಚಂದ್ರನ್ ಅಶ್ವಿನ್ 42ಕ್ಕೆ3).
ಭಾರತ ಪ್ರಥಮ ಇನಿಂಗ್ಸ್ : 24 ಓವರ್ಗಳಲ್ಲಿ 1 ವಿಕೆಟ್ಗೆ 77 (ರೋಹಿತ್ ಶರ್ಮ 56*, ಕೆ. ಎಲ್ ರಾಹುಲ್ 20; ಟಾಡ್ ಮರ್ಫಿ 13ಕ್ಕೆ1).