ಮೀರ್‌ಪುರ್‌ : ಬಾಂಗ್ಲಾದೇಶ ವಿರುದ್ಧದ ಏಕ ದಿನ ಸರಣಿಯ ಎರಡನೇ ಪಂದ್ಯದಲ್ಲೂ ಭಾರತ ತಂಡ 5 ರನ್‌ಗಳ ವೀರೋಚಿತ ಸೋಲಿಗೆ ಒಳಗಾಗಿದೆ. ಈ ಮೂಲಕ ಮೂರು ಪಂದ್ಯಗಳ ಸರಣಿಯನ್ನು ಇನ್ನೊಂದು ಪಂದ್ಯ ಬಾಕಿ ಇರುವಂತೆಯೇ ಕಳೆದುಕೊಂಡಿತು. ಎರಡನೇ ಪಂದ್ಯದಲ್ಲೂ ಭಾರತ ತಂಡ ಬ್ಯಾಟಿಂಗ್‌ ವೈಫಲ್ಯ ಎದುರಿಸುವ ಮೂಲಕ ಅಭಿಮಾನಿಗಳ ಟೀಕೆಗೆ ಒಳಗಾಯಿತು. ಅಲ್ಲದೆ ಮುಂದಿನ ವರ್ಷ ನಡೆಯಲಿರುವ ಏಕ ದಿನ ವಿಶ್ವ ಕಪ್‌ಗೆ ಸಿದ್ಧತೆ ಆರಂಭಿಸಿರುವ ಟೀಮ್‌ ಇಂಡಿಯಾ ತನ್ನ ವೈಫಲ್ಯಗಳನ್ನು ಜಗಜ್ಜಾಹೀರು ಮಾಡಿತು.
ಶೇರ್‌ ಬಾಂಗ್ಲಾ ನ್ಯಾಷನಲ್‌ ಸ್ಟೇಡಿಯಮ್‌ನಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಆತಿಥೇಯ ಬಾಂಗ್ಲಾದೇಶ ಬಳಗ ನಿಗದಿತ ೨೦ ಓವರ್‌ಗಳಲ್ಲಿ ೭ ವಿಕೆಟ್ ಕಳೆದುಕೊಂಡು ೨೭೧ ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಭಾರತ ತಂಡ ತನ್ನ ಪಾಲಿನ ೫೦ ಓವರ್‌ಗಳಲ್ಲಿ ೯ ವಿಕೆಟ್‌ಗೆ ೨೬೬ ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ಭಾರತ ತಂಡದ ಪರ ಶ್ರೇಯಸ್‌ ಅಯ್ಯರ್‌ (೮೨) ಮತ್ತು ಅಕ್ಷರ್ ಪಟೇಲ್‌ (೫೬) ಅರ್ಧ ಶತಕಗಳನ್ನು ಬಾರಿಸಿದರು. ಗಾಯದ ಸಮಸ್ಯೆಯಿಂದಾಗ ಕೊನೇ ಹಂತದಲ್ಲಿ ಬ್ಯಾಟ್‌ ಮಾಡಲು ಬಂದ ನಾಯಕ ರೋಹಿತ್ ಶರ್ಮ ನೋವಿನ ನಡುವೆಯೂ ೨೮ ಎಸೆತಗಳಲ್ಲಿ ಸ್ಫೋಟಕ ೫೧ ರನ್ ಬಾರಿಸಿ ಜಯ ಆಸೆ ಮೂಡಿಸಿದರೂ ಅವರಿಗೆ ಸಾಫಲ್ಯ ದೊರಕಲಿಲ್ಲ.
ಮತ್ತದೇ ಬ್ಯಾಟಿಂಗ್‌ ವೈಫಲ್ಯ
ಸಾಧಾರಣ ಗುರಿಯನ್ನು ಬೆನ್ನಟ್ಟಲು ಆರಂಭಿಸಿದ ಭಾರತ ತಂಡ, ವಿರಾಟ್‌ ಕೊಹ್ಲಿ (೫), ಶಿಖರ್ ಧವನ್‌ (೮) ಬೇಗನೆ ವಿಕೆಟ್ ಒಪ್ಪಿಸುವ ಮೂಲಕ ಆರಂಭಿಕ ಹಿನ್ನಡೆ ಅನುಭವಿಸಿತು. ಕೆ. ಎಲ್‌ ರಾಹುಲ್‌ ೧೪ ರನ್‌ಗಳಿಗೆ ಔಟಾಗಿ ನಿರಾಸೆ ಮೂಡಿಸಿದರು. ಅದರೆ, ಮೂರನೇ ಕ್ರಮಾಂಕದಲ್ಲಿ ಆಡಲು ಇಳಿದ ಶ್ರೇಯಸ್‌ ಅಯ್ಯರ್‌ ೮೨ ರನ್ ಬಾರಿಸಿ ತಂಡಕ್ಕೆ ಆಧಾರವಾದರು. ಅಕ್ಷರ್ ಪಟೇಲ್‌ (೫೨) ಅರ್ಧ ಶತಕ ಬಾರಿಸಿ ಶ್ರೇಯಸ್‌ಗೆ ಸಾಥ್‌ ಕೊಟ್ಟರು. ರೋಹಿತ್ ಶರ್ಮ ಅವರ ಕೊನೇ ಹಂತದ ಹೋರಾಟವೂ ವ್ಯರ್ಥಗೊಂಡಿತು.
ಮೆಹೆದಿ ಹಸನ್ ಸಾಹಸ
ಮೊದಲು ಬ್ಯಾಟ್‌ ಮಾಡಿದ ಬಾಂಗ್ಲಾದೇಶ ತಂಡದ ಆರಂಭವೂ ಉತ್ತಮವಾಗಿ ಇರಲಿಲ್ಲ. ಆರಂಭಿಕರಾದ ಅನ್ಮುಲ್‌ ಹಕ್‌ (೧೧) ಹಾಗೂ ಲಿಟನ್‌ ದಾಸ್‌ (೦೭) ಬೇಗನೆ ಪೆವಿಲಿಯನ್‌ಗೆ ಮರಳುವ ಮೂಲಕ ಆಘಾತ ಎದುರಿಸಿತು. ನಜ್ಮುಲ್ ಹೊಸೈನ್‌ (೨೧) ಹಾಗೂ ಶಕಿಬ್‌ ಅಲ್ ಹಸನ್ (೦೮) ಕೂಡ ತಂಡಕ್ಕೆ ನೆರವಾಗಲಿಲ್ಲ. ಅಫಿಫ್‌ ಹೊಸೈನ್‌ ಕೂಡ ಶೂನ್ಯ ಸುತ್ತಿದರು. ಈ ಹಂತದಲ್ಲಿ ೬೯ ರನ್‌ಗಳಿಗೆ ೬ ವಿಕೆಟ್ ಕಳೆದುಕೊಂಡು ಕನಿಷ್ಠ ಮೊತ್ತಕ್ಕೆ ಆಲ್‌ಔಟ್‌ ಸ್ಥಿತಿಗೆ ತಲುಪಿದ್ದ ಬಾಂಗ್ಲಾದೇಶ ತಂಡ ಆ ಬಳಿಕ ಮರು ಹೋರಾಟ ಸಂಘಟಿಸಿ ೨೭೧ ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು.
ಕಳೆದ ಪಂದ್ಯದ ಹೀರೊ ಮೆಹೆದಿ ಹಸನ್ (೧೦೦*) ಅವರ ಸಮಯೋಚಿತ ಶತಕ ಹಾಗೂ ಮಹಮದುಲ್ಲಾ (77) ಅವರ ಅರ್ಧ ಶತಕದ ನೆರವಿನಿಂದ ಉತ್ತಮ ಮೊತ್ತ ಪೇರಿಸಿತು. ಅದರಲ್ಲೂ ಮೆಹೆದಿ ಹಸನ್ ೮೩ ಎಸೆತಗಳಲ್ಲಿ ೪ ಸಿಕ್ಸರ್‌, ೮ ಫೋರ್‌ ಸಮೇತ ಅಜೇಯ ಶತಕ ಬಾರಿಸಿ ಭಾರತಕ್ಕೆ ಸವಾಲೊಡ್ಡಿದರು.
ಭಾರತ ಪರ ಬೌಲಿಂಗ್‌ನಲ್ಲಿ ಮೊಹಮ್ಮದ್ ಸಿರಾಜ್‌ ೭೩ ರನ್‌ಗಳಿಗೆ ೦೨ ವಿಕೆಟ್ ಕಬಳಿಸಿದರೆ, ವಾಷಿಂಗ್ಟನ್‌ ಸುಂದರ್‌ ೩೭ ರನ್‌ಗಳಿಗೆ ೩ ವಿಕೆಟ್ ಕಬಳಿಸಿದರು.
ಸ್ಕೋರ್‌ ವಿವರ
ಬಾಂಗ್ಲಾದೇಶ: ೫೦ ಓವರ್‌ಗಳಲ್ಲಿ ೭ ವಿಕೆಟ್‌ಗೆ ೨೭೧ (ಮಹಮದುಲ್ಲಾ ೭೭,ಮೆಹೆದಿ ಹಸನ್ ೧೦೦* ವಾಷಿಂಗ್ಟನ್‌ ಸುಂದರ್‌೩೭ಕ್ಕೆ೩, ಮೊಹಮ್ಮದ್ ಸಿರಾಜ್‌ ೭೩ಕ್ಕೆ೨).
ಭಾರತ: ೫೦ ಓವರ್‌ಗಳಲ್ಲಿ ೯ ವಿಕೆಟ್‌ಗೆ ೨೬೬ (ಶ್ರೇಯಸ್‌ ಅಯ್ಯರ್‌ ೮೨, ಅಕ್ಷರ್ ಪಟೇಲ್‌ ೫೬, ರೋಹಿತ್ ಶರ್ಮ ೫೧*; ಎಬಾದತ್‌ ಹೊಸೈನ್‌ ೪೫ಕ್ಕೆ೩, ಶಕಿಬ್‌ ಅಲ್ ಹಸನ್ ೩೯ಕ್ಕೆ೨).
ಇದನ್ನೂ ಓದಿ | INDvsBAN | ಏಳು ವರ್ಷದ ಬಳಿಕ ಬಾಂಗ್ಲಾದೇಶ ತಂಡಕ್ಕೆ ಮಂಡಿಯೂರಿದ ಭಾರತ ತಂಡ