ಅಡಿಲೇಡ್: ವಿರಾಟ್ ಕೊಹ್ಲಿ (೫೦ ರನ್ ೪೦ ಎಸೆತ, ೪ ಫೋರ್‌, ೧ ಸಿಕ್ಸರ್), ಹಾರ್ದಿಕ್ ಪಾಂಡ್ಯ (೬೩ ರನ್, ೩೩ ಎಸೆತ, ೪ ಫೋರ್‌, ೫ ಸಿಕ್ಸರ್) ಜೋಡಿಯ ಅರ್ಧ ಶತಕಗಳ ನೆರವು ಪಡೆದ ಭಾರತ ತಂಡ ಟಿ೨೦ ವಿಶ್ವ ಕಪ್‌ನ ಸೆಮಿ ಫೈನಲ್‌ ಪಂದ್ಯದಲ್ಲಿ ಎದುರಾಳಿ ಇಂಗ್ಲೆಂಡ್ ತಂಡಕ್ಕೆ ೧೬೯ ರನ್ ಗೆಲುವಿನ ಗುರಿ ಒಡ್ಡಿದೆ. ಅಡಿಲೇಡ್ ಓವಲ್ ಕ್ರಿಕೆಟ್ ಸ್ಟೇಡಿಯಮ್‌ ನಡೆದ ಈ ಮುಖಾಮುಖಿಯಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಟೀಮ್ ಇಂಡಿಯಾ ನಿಗದಿತ 20 ಓವರ್ಗಳಲ್ಲಿ ೬ ವಿಕೆಟ್ಗೆ ೧೬೮ ರನ್ ಗಳಿಸಿತು. ಇಂಗ್ಲೆಂಡ್ ಪರ ವಿಕೆಟ್ ಕಿತ್ತು ಮಧ್ಯಮ ವೇಗಿ ಕ್ರಿಸ್ ಜೋರ್ಡಾನ್‌ ೩ ವಿಕೆಟ್ ಕಿತ್ತು ಭಾರತೀಯ ಬ್ಯಾಟರ್ಗಳನ್ನು ಕಾಡಿದರು.
ಭಾರತಕ್ಕೆ ಆರಂಭಿಕ ಆಘಾತ
ಬಾಂಗ್ಲಾ ಮತ್ತು ಜಿಂಬಾಬ್ವೆ ವಿರುದ್ಧದ ಪಂದ್ಯದಲ್ಲಿ ಸತತ ಅರ್ಧಶತಕ ಬಾರಿಸಿ ಮಿಂಚಿದ್ದ ಕನ್ನಡಿಗ ಕೆ.ಎಲ್. ರಾಹುಲ್ ಈ ಪಂದ್ಯದಲ್ಲಿ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಕ್ರಿಸ್ ವೋಕ್ಸ್ ಅವರ ಮೊದಲ ಓವರ್ನಲ್ಲೇ ಔಟಾಗುವ ಮೂಲಕ ಭಾರತಕ್ಕೆ ಆರಂಭಿಕ ಆಘಾತ ನೀಡಿದರು. ರಾಹುಲ್ ಗಳಿಕೆ 5 ರನ್. ಅದರಲ್ಲಿ ಒಂದು ಬೌಂಡರಿ ಸೇರಿತ್ತು. ರಾಹುಲ್ ವಿಕೆಟ್ ಬಳಿಕ ನಿಧಾನಗತಿಯ ಆಟದ ಮೂಲಕ ತಂಡಕ್ಕೆ ನೆರವಾಗುವ ಸೂಚನೆ ನೀಡಿದ ನಾಯಕ ರೋಹಿತ್ ಕೂಡ 27 ರನ್ಗೆ ಆಟ ಮುಗಿಸಿದರು. ಕೊಹ್ಲಿ ಜತೆ ದ್ವಿತೀಯ ವಿಕೆಟ್ಗೆ 47 ರನ್ ಒಟ್ಟುಗೂಡಿಸಿದ್ದೇ ಸಮಾಧಾನಕರ ಸಂಗತಿ.
ಕೊಹ್ಲಿ ಆಸರೆ
ಒಂದೆಡೆ ತಂಡದ ವಿಕೆಟ್ ಬೀಳುತ್ತಿದ್ದರೂ ಮತ್ತೊಂದು ಬದಿಯಲ್ಲಿ ಕ್ರೀಸ್‌ನಲ್ಲಿ ತಳವೂಡಿ ನಿಂತು ಆಂಗ್ಲರ ಬೌಲಿಂಗ್ ದಾಳಿಯನ್ನು ಸಮರ್ಥವಾಗಿ ಎದುರಿಸುವಲ್ಲಿ ಯಶಸ್ಸು ಕಂಡ ವಿರಾಟ್ ಕೊಹ್ಲಿವ೪ ಫೋರ್‌, ೧ ಸಿಕ್ಸರ್ ಜತೆಗೆ ತಂಡದ ಮೊತ್ತವನ್ನು ಹೆಚ್ಚಿಸಿದರು. ೪೦ ಎಸೆತ ಎದುರಿಸಿದ ಅವರು ಅರ್ಧಶತಕ ಪೂರ್ತಿಗೊಳಿಸಿದ ಬೆನ್ನಲ್ಲೇ ವಿಕೆಟ್ ಒಪ್ಪಿಸಿದರು. ಇನ್ನು ಪ್ರತಿ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ನಡೆಸಿ ತಂಡದ ಬೃಹತ್ ಮೊತ್ತಕ್ಕೆ ಕಾರಣರಾಗುತ್ತಿದ್ದ ಸೂರ್ಯಕುಮಾರ್ ಯಾದವ್ ಆದಿಲ್ ರಶೀದ್ ಅವರ ಎಸೆತದಲ್ಲಿ ಸಿಕ್ಸರ್ ಬಾರಿಸಲು ಪ್ರಯತ್ನಿಸಿ ಸಾಲ್ಟ್ಗೆ ಕ್ಯಾಚ್ ನೀಡುವ ಮೂಲಕ ನಿರಾಶೆ ಮೂಡಿಸಿದರು. ಸೂರ್ಯಕುಮಾರ್ ಗಳಿಕೆ 14 ರನ್ಗೆ ಸೀಮಿತ ಗೊಂಡಿತು. ಹಾರ್ದಿಕ್ ಪಾಂಡ್ಯ ಕೂಡ ೬ ರನ್‌ಗಳಿಗೆ ಔಟಾಗಿ ನಿರಾಸೆ ಮೂಡಿಸಿದರು.
ಸಿಡಿದ ಹಾರ್ದಿಕ್ ಪಾಂಡ್ಯ
ಸತತ ಬ್ಯಾಟಿಂಗ್ ವೈಫಲ್ಯ ಕಂಡಿದ್ದ ಹಾರ್ದಿಕ್ ಪಾಂಡ್ಯ ಈ ಮಹತ್ವದ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಕೇವಲ ೩೩ ಎಸೆತಗಳಲ್ಲಿ ೬೩ ರನ್ ಬಾರಿಸಿ ಕೊನೇ ಹಂತದಲ್ಲಿ ತಂಡಕ್ಕೆ ನೆರವಾದರು. ಅವರ ಇನಿಂಗ್ಸ್‌ನಲ್ಲಿ ೫ ಸಿಕ್ಸರ್ ಹಾಗೂ ೪ ಫೋರ್‌ಗಳು ಸೇರಿಕೊಂಡಿದ್ದವು. ಆದರೆ, ಜೋರ್ಡನ್‌ ಎಸೆದ ಇನಿಂಗ್ಸ್‌ನ ಕೊನೇ ಎಸೆತದಲ್ಲಿ ಹಿಟ್‌ ವಿಕೆಟ್ ಅಗುವ ಮೂಲಕ ನಿರಾಸೆ ಎದುರಿಸಿದರು. ಆ ಎಸೆತವನ್ನು ಅವರು ಬೌಂಡರಿ ಗೆರೆಗಿಂತ ಆಚೆ ಅಟ್ಟಿದ್ದರೂ, ಆ ೪ ರನ್‌ಗಳು ನಷ್ಟವಾದವು.
ಸಂಕ್ಷಿಪ್ತ ಸ್ಕೋರ್: ಭಾರತ 20 ಓವರ್ಗಳಲ್ಲಿ ೬ ವಿಕೆಟ್ಗೆ ೧೬೮ ( ರೋಹಿತ್ ಶರ್ಮಾ 27, ವಿರಾಟ್ ಕೊಹ್ಲಿ ೫೦, ಹಾರ್ದಿಕ್ ಪಾಂಡ್ಯ ೬೩; ಕ್ರಿಸ್ ಜೋರ್ಡಾನ್‌ 43ಕ್ಕೆ೩).
ಇದನ್ನೂ ಓದಿ | IND VS ENG | 35 ವರ್ಷಗಳ ಬಳಿಕ ಭಾರತ-ಇಂಗ್ಲೆಂಡ್ ಮಧ್ಯೆ ಸೆಮಿಫೈನಲ್ ಕಾದಾಟ