India vs Nepal: ಏಷ್ಯಾಡ್​ನಲ್ಲಿ ಸೊಗಸಾದ ಶತಕ ಬಾರಿಸಿದ ಯಶಸ್ವಿ ಜೈಸ್ವಾಲ್​

ಹ್ಯಾಂಗ್‌ಝೌ: ಟೀಮ್​ ಇಂಡಿಯಾದ ಯುವ ಆರಂಭಿಕ ಡ್ಯಾಶಿಂಗ್​ ಓಪನರ್​ ಯಶಸ್ವಿ ಜೈಸ್ವಾಲ್(100)​ ಅವರು ಏಷ್ಯನ್​ ಗೇಮ್ಸ್​ನಲ್ಲಿ(asian games 2023) ನೇಪಾಳ(India vs Nepal) ವಿರುದ್ಧ ಶತಕ ಬಾರಿಸಿ ಸಂಭ್ರಮಿಸಿದ್ದಾರೆ. ಅವರ ಶತಕದ ನೆರವಿನಿಂದ ಭಾರತ ಬೃಹತ್​ ಮೊತ್ತ ಪೇರಿಸಿದೆ. ಇದು ಜೈಸ್ವಾಲ್​ ಅವರ ಚೊಚ್ಚಲ ಟಿ20 ವಿಶ್ವಕಪ್​ ಶತಕವಾಗಿದೆ.

ಇಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದುಕೊಂಡ ಭಾರತ ಜೈಸ್ವಾಲ್​ ಅವರ ಶತಕ ಮತ್ತು ಅಂತಿಮ ಹಂತದಲ್ಲಿ ಸ್ಫೋಟಕ ಬ್ಯಾಟಿಂಗ್​ ನಡೆಸಿದ ರಿಂಕು ಸಿಂಗ್​ ಸಾಹಸದಿಂದ ಭಾರತ ನಿಗದಿತ 20 ಓವರ್​ಗಳಲ್ಲಿ 4 ವಿಕೆಟ್​ಗೆ 202 ರನ್​ ಬಾರಿಸಿದೆ.

ಚೊಚ್ಚಲ ಶತಕ ಸಂಭ್ರಮ

ವೆಸ್ಟ್​ ಇಂಡೀಸ್​ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಮೊದಲ ಪ್ರಯತ್ನದಲ್ಲೇ ಶತಕ ಬಾರಿಸಿ ಮಿಂಚಿದ್ದ ಐಪಿಎಲ್​ ಸ್ಟಾರ್​ ಜೈಸ್ವಾಲ್​ ನೇಪಾಳ ವಿರುದ್ಧವು ಸಿಡಿದು ನಿಂತರು. ಆರಂಭದಿಂದಲೇ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದ ಅವರು ಸಿಕ್ಸರ್​, ಬೌಂಡರಿಯ ಮಳೆಯನ್ನೇ ಸುರಿಸಿದರು. ಅವರ ಬ್ಯಾಟಿಂಗ್​ ಆರ್ಭಟಕ್ಕೆ ನೇಪಾಳ ಬೌಲರ್​ಗಳು ಬಳಲಿ ಬೆಂಡಾದರು. 49 ಎಸೆತಗಳಿಂದ ಶತಕವನ್ನು ಪೂರ್ತಿಗೊಳಿಸಿದರು. ಇದರಲ್ಲಿ 74 ರನ್​ಗಳು ಬೌಂಡರಿ ಮತ್ತು ಸಿಕ್ಸರ್​ ಮೂಲಕವೇ ದಾಖಲಾಯಿತು. ಒಟ್ಟು 8 ಬೌಂಡರಿ ಮತ್ತು 7 ಸಿಕ್ಸರ್​ ಸಿಡಿಯಿತು. ಭರ್ತಿ 100 ರನ್​ಗಳಿಸಿದ ವೇಳೆ ಸಿಕ್ಸರ್​ ಬಾರಿಸುವ ಯತ್ನದಲ್ಲಿ ಕ್ಯಾಚ್​ ನೀಡಿ ಔಟಾದರು.

ಇದನ್ನೂ ಓದಿ Asian Games 2023: ಪಿ.ಟಿ ಉಷಾ ರಾಷ್ಟ್ರೀಯ ದಾಖಲೆ ಸರಿಗಟ್ಟಿ ಪದಕ ಸುತ್ತಿಗೇರಿದ ವಿತ್ಯಾ

ಐಪಿಎಲ್​ ಹಾಗೂ ವಿಂಡೀಸ್​ ಎದುರಿನ ಟಿ20 ಸರಣಿಯಲ್ಲಿ ಉತ್ತಮ ಬ್ಯಾಟಿಂಗ್​ ಪ್ರದರ್ಶನ ತೋರಿದ್ದ ತಿಲಕ್​ ವರ್ಮ ಈ ಪಂದ್ಯದಲ್ಲಿ ನಿರೀಕ್ಷಿತ ಮಟ್ಟದ ಬ್ಯಾಟಿಂಗ್​ ನಡೆಸುವಲ್ಲಿ ವಿಫಲರಾದರು. ಕೇವಲ 2 ರನ್​ಗೆ ಆಟ ಮುಗಿಸಿದರು. ನಾಯಕ ಗಾಯಕ್ವಾಡ್​ 25 ರನ್​ಗಳ ಕೊಡುಗೆ ನೀಡಿದರು.

See more

One of the best innings by Yashasvi Jaiswal.

Asian Games Quarter Finals and Yashasvi stepped up on a tough pitch. pic.twitter.com/Rl31ZENse6

— Mufaddal Vohra (@mufaddal_vohra) October 3, 2023

ಅಂತಿಮ ಹಂತದಲ್ಲಿ ಸಿಡಿದ ರಿಂಕು

ಈ ಬಾರಿಯ ಐಪಿಎಲ್​ನಲ್ಲಿ ಅಸಾಮಾನ್ಯ 5 ಸಿಕ್ಸರ್ ಬಾರಿಸಿ​ ಸಿಕ್ಸರ್​ ಕಿಂಗ್​ ಎಂದೇ ಖ್ಯಾತಿ ಪಡೆದಿರುವ ರಿಂಕು ಸಿಂಗ್​ ತಮ್ಮ ಎಂದಿನ ಶೈಲಿಯಲ್ಲಿಯೇ ಬ್ಯಾಟಿಂಗ್​ ಪ್ರದರ್ಶನ ತೋರಿದರು. ಕ್ರೀಸ್​ಗೆ ಬಂದ ತಕ್ಷಣವೇ ಆಕ್ರಮಣಕಾರಿ ಆಟವಾಡಿದ ಅವರು ಕೇವಲ 15 ಎಸೆತಗಳಲ್ಲಿ 2 ಬೌಂಡರಿ ಮತ್ತು 4 ಸಿಕ್ಸರ್​ ನೆರವಿನಿಂದ ಅಜೇಯ 37 ರನ್​ ಬಾರಿಸಿದರು. ಕಳೆದ ಐರ್ಲೆಂಡ್​ ವಿರುದ್ಧದ ಸರಣಿಯಲ್ಲೂ ರಿಂಕು ಉತ್ತಮ ಬ್ಯಾಟಿಂಗ್​ ನಡೆಸಿದ್ದರು. ರಿಂಕುಗೆ ಮತ್ತೊಂದು ತುದಿಯಲ್ಲಿ ಶಿವಂ ದುಬೆ ಕೂಡ ಉತ್ತಮ ಸಾಥ್​ ನೀಡಿದರು. ದುಬೆ 19 ಎಸೆತಗಳಿಂದ 25 ರನ್​ ಬಾರಿಸಿ ಅಜೇಯರಾಗಿ ಉಳಿದರು. ನೇಪಾಳ ಪರ ದೀಪೇಂದ್ರ ಸಿಂಗ್ ಐರಿ 31 ರನ್​ ನೀಡಿ 2 ವಿಕೆಟ್​ ಪಡೆದರು.

ಭಾರತ ತಂಡ

ಋತುರಾಜ್ ಗಾಯಕ್ವಾಡ್ (ನಾಯಕ), ಯಶಸ್ವಿ ಜೈಸ್ವಾಲ್, ತಿಲಕ್ ವರ್ಮಾ, ರಿಂಕು ಸಿಂಗ್, ಜಿತೇಶ್ ಶರ್ಮಾ (ವಿ.ಕೀ), ವಾಷಿಂಗ್ಟನ್ ಸುಂದರ್, ರವಿ ಬಿಷ್ಣೋಯ್, ಅವೇಶ್ ಖಾನ್, ಅರ್ಶ್​ದೀಪ್ ಸಿಂಗ್, ಸಾಯಿ ಕಿಶೋರ್​, ಶಿವಂ ದುಬೆ.