ಬಾರ್ಬಡೋಸ್: ವೆಸ್ಟ್ ಇಂಡೀಸ್ ವಿರುದ್ಧದ ಏಕ ದಿನ ಸರಣಿಯ ಎರಡನೇ ಪಂದ್ಯದಲ್ಲಿ ಭಾರತ ತಂಡ 181 ರನ್ಗಳ ಸಣ್ಣ ಮೊತ್ತಕ್ಕೆ ಆಲ್ಔಟ್ ಆಗಿದೆ. ಭಯಂಕರ ತಿರುವು ಪಡೆಯುತ್ತಿದ್ದ ಇಲ್ಲಿನ ಕೆನ್ಸಿಂಗ್ಟನ್ ಓವಲ್ ಸ್ಟೇಡಿಯಮ್ನಲ್ಲಿ ನಡೆದ ಈ ಪಂದ್ಯದಲ್ಲಿ ಇಶಾನ್ ಕಿಶನ್ (55 ರನ್) ಒಬ್ಬರನ್ನು ಹೊರತುಪಡಿಸಿ ಉಳಿದ ಆಟಗಾರರು ಸಂಪೂರ್ಣ ವೈಫಲ್ಯ ಕಂಡರು. ಇದರಿಂದಾಗಿ ಆತಿಥೇಯ ವೆಸ್ಟ್ ಇಂಡೀಸ್ ತಂಡಕ್ಕೆ ಕೇವಲ 181 ರನ್ಗಳ ಗೆಲುವಿನ ಗುರಿ ಎದುರಾಗಿದೆ.
ಕಾಯಂ ನಾಯಕ ರೋಹಿತ್ ಶರ್ಮಾ ಅವರ ಅನುಪಸ್ಥಿತಿಯಲ್ಲಿ ತಂಡದ ನೇತೃತ್ವ ವಹಿಸಿದ್ದ ಹಾರ್ದಿಕ್ ಪಾಂಡ್ಯ ಟಾಸ್ ಗೆದ್ದ ಬಳಿಕವೂ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಕೆನ್ಸಿಂಗ್ಟನ್ ಓವಲ್ ಪಿಚ್ ಚೇಸಿಂಗ್ ಗೆಲುವಿಗೆ ಹೆಸರುವಾಸಿಯಾಗಿರುವ ಕಾರಣ ಹಾರ್ದಿಕ್ ಆಯ್ಕೆ ಅಚ್ಚರಿ ಮೂಡಿಸಿತು. ಆದರೂ ಮಳೆಯ ಸಾಧ್ಯತೆಗಳು ಇದ್ದ ಕಾರಣ ಹಾಗೂ ನಿರೀಕ್ಷೆಯಂತೆ ಮಳೆ ಸುರಿದ ಹಿನ್ನೆಲೆಯಲ್ಲಿ ಅವರ ಆಯ್ಕೆ ಸರಿಯಾಗಿದೆ ಎಂದು ಅಂದುಕೊಳ್ಳಲಾಯಿತು. ಆದರೆ, ಭಾರತ ತಂಡದ ಆಟಗಾರರು ಬ್ಯಾಟಿಂಗ್ನಲ್ಲಿ ಸಂಪೂರ್ಣ ವೈಫಲ್ಯ ಎದುರಿಸಿದ ಕಾರಣ ಆಯ್ಕೆ ಬಗ್ಗೆ ಮತ್ತೆ ಪ್ರಶ್ನೆ ಎದ್ದಿತು.
ಬ್ಯಾಟಿಂಗ್ ಅರಂಭಿಸಿದ ಭಾರತ ತಂಡ ಉತ್ತಮ ಆರಂಭವನ್ನೇ ಪಡೆಯಿತು. ಇಶಾನ್ ಕಿಶನ್ ಹಾಗೂ ಶುಭ್ಮನ್ ಗಿಲ್ (34) ಮೊದಲ ವಿಕೆಟ್ಗೆ 90 ರನ್ ಬಾರಿಸಿದರು. ಹೀಗಾಗಿ ಭಾರತ 200ರ ಗಡಿ ದಾಟಿ ದೊಡ್ಡ ಮೊತ್ತದ ಸವಾಲೊಡ್ಡಲಿದೆ ಎಂದು ಅಭಿಮಾನಿಗಳು ಅಂದುಕೊಂಡರು. ಆದರೆ, ಶುಭ್ಮನ್ ಗಿಲ್ ಔಟಾದ ಬಳಿಕ ಭಾರತದ ಬ್ಯಾಟಿಂಗ್ ಬಲ ಏಕಾಏಕಿ ಕುಸಿಯಿತು. ಕೊಹ್ಲಿ ಅನುಪಸ್ಥಿತಿಯಲ್ಲಿ ಅವಕಾಶ ಪಡೆದ ಕೇರಳದ ವಿಕೆಟ್ ಕೀಪರ್ ಬ್ಯಾಟರ್ ಸಂಜು ಸ್ಯಾಮ್ಸನ್ ನಿರೀಕ್ಷೆ ಮೂಡಿಸಲು ವಿಫಲಗೊಂಡು ಕೇವಲ 9 ರನ್ಗೆ ಔಟಾದರು.
ಇದನ್ನೂ ಓದಿ : ind vs wi : 2ನೇ ಏಕದಿನ ಪಂದ್ಯಕ್ಕೆ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಇರಲಿಲ್ಲ ಯಾಕೆ?
ಸ್ಪಿನ್ ಬಲವಾಗಿ ತಂಡ ಸೇರಿಕೊಂಡ ಅಕ್ಷರ್ ಪಟೇಲ್ 1 ರನ್ ಗಳಿಸಿ ಔಟಾದರೆ, ನಾಯಕ ಹಾರ್ದಿಕ್ ಪಾಂಡ್ಯ 7 ರನ್ಗಳಿಗೆ ಸೀಮಿತಗೊಂಡರು. ಆರಂಭದಲ್ಲಿ ವಿಶ್ವಾಸ ಮೂಡಿಸಿದ ಸೂರ್ಯಕುಮಾರ್ ಯಾದವ್ 24 ರನ್ಗಳಿಗೆ ಔಟಾದರೆ ರವೀಂದ್ರ ಜಡೇಜಾ ಗಳಿಕೆ 10 ರನ್. ಶಾರ್ದುಲ್ ಠಾಕೂರ್ 16 ರನ್ ಗಳಿಸಿ ಔಟಾದರೆ ಕುಲ್ದೀಪ್ ಯಾದವ್ 8 ರನ್ ಬಾರಿಸಿ ಸ್ವಲ್ಪ ಹೊತ್ತು ಕ್ರಿಸ್ನಲ್ಲಿ ಉಳಿದರು.
ವಿಂಡೀಸ್ ಪರ ಗುಡ್ಕೇಶ್ ಮೋತಿ ಹಾಗೂ ರೊಮಾರಿಯೊ ಶಫರ್ಡ್ ತಲಾ 3 ವಿಕೆಟ್ ಕಬಳಿಸಿದರೆ ಅಲ್ಜಾರಿ ಜೋಸೆಫ್ 2 ವಿಕೆಟ್ ಉರುಳಿಸಿದರು. ಪಂದ್ಯ ನಡುವೆ ಎರಡೆರಡು ಬಾರಿ ಮಳೆ ಸುರಿಯಿತು. ಹೀಗಾಗಿ ಪಂದ್ಯಕ್ಕೆ ಅಡಚಣೆ ಉಂಟಾಯಿತು. ಜತೆಗೆ ಔಟ್ಫೀಲ್ಡ್ ಇನ್ನಷ್ಟು ತೇವಗೊಂಡು ಚೆಂಡಿನ ತಿರುವು ಇನ್ನಷ್ಟು ಹೆಚ್ಚಾಯಿತು.