ಮೆಲ್ಬೋರ್ನ್: ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ಉತ್ಕೃಷ್ಟ ಮಟ್ಟದ ಪ್ರದರ್ಶನ ತೋರಿದ ಟೀಮ್ ಇಂಡಿಯಾ ಐಸಿಸಿ ಟಿ20 ವಿಶ್ವ ಕಪ್ನ ಅಂತಿಮ ಸೂಪರ್-12 ಪಂದ್ಯದಲ್ಲಿ ಜಿಂಬಾಬ್ವೆ (IND VS ZIM) ವಿರುದ್ಧ 71 ರನ್ಗಳ ಭರ್ಜರಿ ಗೆಲುವು ದಾಖಲಿಸಿದೆ. ಈ ಮೊದಲೇ ಭಾರತ ಸೆಮಿಫೈನಲ್ ಪ್ರವೇಶಿಸಿದ್ದರಿಂದ ಇದೊಂದು ಭಾರತದ ಪಾಲಿಗೆ ಔಪಚಾರಿಕ ಪಂದ್ಯದಂತಿತ್ತು. ಇದರಲ್ಲಿಯೂ ಮೇಲುಗೈ ಸಾಧಿಸಿದ ರೋಹಿತ್ ಪಡೆ ಬಿ ಗ್ರೂಪ್ನ ಅಗ್ರ ಸ್ಥಾನಿಯಾಗಿ ತನ್ನ ಲೀಗ್ ಪಂದ್ಯಕ್ಕೆ ಅಂತ್ಯ ಹಾಡಿತು. ಅದರಂತೆ ಭಾರತ ಸೆಮಿಫೈನಲ್ನಲ್ಲಿ ಎ ಗ್ರೂಪ್ನ ದ್ವಿತೀಯ ಸ್ಥಾನಿ ಇಂಗ್ಲೆಂಡ್ ವಿರುದ್ಧ ಸೆಣಸಾಟ ನಡೆಸಲಿದೆ. ಈ ಮುಖಾಮುಖಿ ನವೆಂಬರ್ 10ರಂದು ಅಡಿಲೇಡ್ ಓವಲ್ ಮೈದಾನದಲ್ಲಿ ನಡೆಯಲಿದೆ.
ಮೆಲ್ಬೋರ್ನ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಭಾನುವಾರ ನಡೆದ ಈ ಮುಖಾಮುಖಿಯಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ ತಂಡ ರಾಹುಲ್(51) ಮತ್ತು ಸೂರ್ಯಕುಮಾರ್(ಅಜೇಯ61) ಅವರ ಅರ್ಧಶತಕದ ಬ್ಯಾಟಿಂಗ್ ಸಾಹಸದಿಂದ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 186 ರನ್ ಪೇರಿಸಿತು. ಬಳಿಕ ಬೃಹತ್ ಮೊತ್ತ ಬೆನ್ನಟ್ಟಿದ ಜಿಂಬಾಬ್ವೆ ತಂಡ 17.2 ಓವರ್ಗಳಲ್ಲಿ 115 ರನ್ ಗಳಿಸಿ ಶರಣಾಯಿತು.
ಗುರಿ ಬೆನ್ನಟ್ಟಿದ ಜಿಂಬಾಬ್ವೆ ಬೃಹತ್ ಮೊತ್ತವನ್ನು ಕಂಡು ಆರಂಭದಲ್ಲೆ ಮಂಕಾಯಿತು. ತಂಡದ ಖಾತೆ ತೆರೆಯುವ ಮುನ್ನವೇ ವೆಸ್ಲಿ ಮಾಧೆವೆರೆ(0) ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತ ಅನುಭವಿಸಿತು. ಭುವನೇಶ್ವರ್ ಕುಮಾರ್ ಮೊದಲ ಓವರ್ನಲ್ಲಿಯೇ ಮೇಡನ್ ಸಹಿತ ಈ ವಿಕೆಟ್ ಕಿತ್ತು ಭಾರತಕ್ಕೆ ಮುನ್ನಡೆ ತಂದುಕೊಟ್ಟರು. ಇದರ ಬೆನ್ನಲ್ಲೆ ಮುಂದಿನ ಓವರ್ ಎಸೆಯಲು ಬಂದ ಎಡಗೈ ವೇಗಿ ಅರ್ಶ್ದೀಪ್ ಸಿಂಗ್ ಕೂಡ ರೆಗಿಸ್ ಚಕಬ್ವಾ(0) ವಿಕೆಟ್ ಉರುಳಿಸಿದರು. ಜಿಂಬಾಬ್ವೆ ತಂಡ 30 ರನ್ ಗಡಿದಾಡುವ ವೇಳೆ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಿತು. ಇನ್ನೇನು 50 ರನ್ ಒಳಗಡೆ ಗಂಟು ಮೂಟೆ ಕಟ್ಟಲಿದೆ ಎನ್ನುವಾಗ ಮಧ್ಯಮ ಕ್ರಮಾಂಕದಲ್ಲಿ ಆಡಲಿಳಿದ ಸಿಕಂದರ್ ರಾಜಾ ಮತ್ತು ರಿಯಾನ್ ಬರ್ಲ್ ಜತೆಗೂಡಿ ಸಣ್ಣ ಮಟ್ಟದ ಹೊರಟವೊಂದನ್ನು ನಡೆಸಿದರು. ಈ ಉಭಯ ಆಟಗಾರರ ನೆರವಿನಿಂದ ಜಿಂಬಾಬ್ವೆ ನೂರರ ಗಡಿದಾಟಿತು. ಜತೆಗೆ ಸೋಲಿನ ಅಂತರವನ್ನು ತಗ್ಗಿಸಿತು. ರಿಯಾನ್ ಬರ್ಲ್ 35 ರನ್ ಸಿಡಿಸಿ ಅಶ್ವಿನ್ಗೆ ವಿಕೆಟ್ ಒಪ್ಪಿಸಿದರು. ಸಿಕಂದರ್ ರಾಜಾ 24 ಎಸೆತದಿಂದ 34 ರನ್ ಕಲೆಹಾಕಿದರು.
ಸೂರ್ಯಕುಮಾರ್ ಬ್ಯಾಟಿಂಗ್ ಆರ್ಭಟ
ವಿರಾಟ್ ಕೊಹ್ಲಿ ಮತ್ತು ರಾಹುಲ್ ವಿಕೆಟ್ ಪತನಗೊಂಡಾಗ ಒಂದು ಹಂತದಲ್ಲಿ ಭಾರತ ತಂಡದ ಸ್ಕೋರ್ 160ರ ಗಡಿ ದಾಟುವುದು ಕಷ್ಟ ಎಂಬಂತಿತ್ತು. ಇದೇ ವೇಳೆ ಬ್ಯಾಟಿಂಗ್ಗೆ ಇಳಿದ ಸೂರ್ಯಕುಮಾರ್ ಯಾದವ್, ಪತ್ರಿ ಪಂದ್ಯದಂತೆ ಈ ಪಂದ್ಯದಲ್ಲಿಯೂ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಆರಂಭದಿಂದಲೇ ಸಿಕ್ಸರ್ ಮತ್ತು ಬೌಂಡರಿ ಮೂಲಕ ಜಿಂಬಾಬ್ಬೆ ಬೌಲರ್ಗಳನ್ನು ಮನಬಂದಂತೆ ಡಂಡಿಸಿದರು. ಅವರ ಈ ಬ್ಯಾಟಿಂಗ್ ಆರ್ಭಟದಿಂದ ಕೊನೇ 5 ಓವರ್ಗಳಲ್ಲಿ 79 ರನ್ ಹರಿದು ಬಂದು ತಂಡ ಬೃಹತ್ ಮೊತ್ತ ದಾಖಲಿಸಿತು. ಒಟ್ಟು 25 ಎಸೆತ ಎದುರಿಸಿ ಸೂರ್ಯಕುಮಾರ್ ಅಜೇಯ 61 ರನ್ ಬಾರಿಸಿದರು. ಈ ಸೊಗಸಾದ ಇನಿಂಗ್ಸ್ ವೇಳೆ 6 ಬೌಂಡರಿ ಮತ್ತು 4 ಸಿಕ್ಸರ್ ಸಿಡಿಯಿತು. ಉಳಿದಂತೆ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ 18 ರನ್ ಗಳಿಸಿದರು. ಜಿಂಬಾಬ್ವೆ ಪರ ಸೇನ್ ವಿಲಿಯಮ್ಸನ್ 9 ರನ್ಗೆ 2 ವಿಕೆಟ್ ಕಿತ್ತು ಮಿಂಚಿದರು.
ರಾಹುಲ್ ಅರ್ಧಶತಕ
ಬಾಂಗ್ಲಾದೇಶದ ವಿರುದ್ಧ ಅರ್ಧಶತಕ ಸಿಡಿಸಿ ಮಿಂಚಿದ್ದ ಕೆ.ಎಲ್. ರಾಹುಲ್ ಬ್ಯಾಟಿಂಗ್ ಪ್ರದರ್ಶನ ಈ ಪಂದ್ಯದಲ್ಲಿಯೂ ಮುಂದುವರಿಯಿತು. ಆರಂಭಿಕ ವಿಕೆಟ್ಗೆ ನಾಯಕ ರೋಹಿತ್ ಜತೆಗೂಡಿ ತಂಡಕ್ಕೆ 27 ರನ್ ಒಟ್ಟುಗೂಡಿಸಿದ ಅವರು ಬಳಿಕ ವಿರಾಟ್ ಕೊಹ್ಲಿ ಜತೆ ದ್ವಿತೀಯ ವಿಕೆಟ್ಗೆ 60 ರನ್ ಜತೆಯಾಟ ನಡೆಸಿ ತಂಡಕ್ಕೆ ನೆರವಾದರು. ಆರಂಭದಲ್ಲಿ ಕೊಂಚ ನಿಧಾನಗತಿಯ ಬ್ಯಾಟಿಂಗ್ಗೆ ಮುಂದಾದ ರಾಹುಲ್ ನಾಲ್ಕು ಎಸೆತದ ಬಳಿಕ ರನ್ ಖಾತೆ ತೆರೆದರು. ಬಳಿಕ ಬಿರುಸಿನ ಆಟಕ್ಕೆ ಮುಂದಾಗಿ 35 ಎಸೆತಗಳಲ್ಲಿ ಮೂರು ಬೌಂಡರಿ ಮತ್ತು ಮೂರು ಸಿಕ್ಸರ್ ನೆರವಿನಿಂದ 51 ರನ್ ಗಳಿಸಿದರು. ಉಳಿದಂತೆ ವಿರಾಟ್ ಕೊಹ್ಲಿ 25 ಎಸೆತದಿಂದ 26 ರನ್ ಬಾರಿಸಿದರು. ಕಳೆದ ಪಂದ್ಯಕ್ಕೆ ಹೋಲಿಕೆ ಮಾಡಿದರೆ ವಿರಾಟ್ ಕೊಹ್ಲಿ ಈ ಪಂದ್ಯದಲ್ಲಿ ನಿಧಾನ ಗತಿಯ ಆಟವಾಡಿದಂತೆ ಕಂಡುಬಂತು. ಎಸೆತಕ್ಕೆ ಒಂದರಂತೆ ರನ್ ಗಳಿಸಿದರು. ಒಟ್ಟಾರೆ ಕೊಹ್ಲಿ ಈ ಪಂದ್ಯದಲ್ಲಿ 2 ಬೌಂಡರಿ ಮಾತ್ರ ಸಿಡಿಸಿದರು.
ರೋಹಿತ್ ಮತ್ತೆ ವಿಫಲ
ಭಾರತ ತಂಡದ ನಾಯಕ ರೋಹಿತ್ ಶರ್ಮ ಈ ಪಂದ್ಯದಲ್ಲಿಯೂ ಮತ್ತೆ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. 13 ಎಸೆತದಲ್ಲಿ 15 ರನ್ಗೆ ವಿಕೆಟ್ ಒಪ್ಪಿಸಿದರು. ಈ ವಿಕೆಟ್ ಬ್ಲೆಸಿಂಗ್ ಮುಜರಬಾನಿ ಪಾಲಾಯಿತು. ದಿನೇಶ್ ಕಾರ್ತಿಕ್ ಬದಲು ಆಡಲಿಳಿದ ರಿಷಭ್ ಪಂತ್ ಕೇವಲ ಮೂರು ರನ್ಗೆ ಔಟಾದರು. ಈ ಮೂಲಕ ಸಿಕ್ಕ ಅವಕಾಶವನ್ನು ಸರಿಯಾಗಿ ಬಳಸಿಕೊಳ್ಳುವಲ್ಲಿ ವಿಫಲರಾದರು.
ಸಂಕ್ಷಿಪ್ತ ಸ್ಕೋರ್:
ಭಾರತ: 20 ಓವರ್ಗಳಲ್ಲಿ 5 ವಿಕೆಟ್ಗೆ 186 (ರಾಹುಲ್ 51, ಸೂರ್ಯಕುಮಾರ್ ಅಜೇಯ 61, ವಿರಾಟ್ ಕೊಹ್ಲಿ 26, ಸೇನ್ ವಿಲಿಯಮ್ಸನ್ 9ಕ್ಕೆ 2).
ಜಿಂಬಾಬ್ವೆ: 17.2 ಓವರ್ಗಳಲ್ಲಿ 115ಕ್ಕೆ ಆಲೌಟ್ (ರಿಯಾನ್ ಬರ್ಲ್ 35, ಸಿಕಂದರ್ ರಾಜಾ 24, ಅಶ್ವಿನ್ 22ಕ್ಕೆ 3, ಮೊಹಮ್ಮದ್ ಶಮಿ 14ಕ್ಕೆ2, ಹಾರ್ದಿಕ್ ಪಾಂಡ್ಯ 16ಕ್ಕೆ2) ಪಂದ್ಯಶ್ರೇಷ್ಠ: ಸೂರ್ಯಕುಮಾರ್ ಯಾದವ್
ಇದನ್ನೂ ಓದಿ |PAK VS BANGLA | ಬಾಂಗ್ಲಾದೇಶದ ವಿರುದ್ಧ ಗೆದ್ದು ಸೆಮಿಫೈನಲ್ ಪ್ರವೇಶಿಸಿದ ಪಾಕಿಸ್ತಾನ