ನವದೆಹಲಿ: ಆ್ಯಪಲ್ ಕಂಪೆನಿಯ ಸಿಇಒ ಟಿಮ್‌ ಕುಕ್ (Apple CEO Tim cook) ಅವರು ಭಾರತ ಪ್ರವಾಸದಲ್ಲಿದ್ದಾರೆ. ಇದೇ ವೇಳೆ ಅವರು ವಿಶ್ವದ ಕ್ಯಾಶ್ ರಿಚ್ ಕ್ರಿಕೆಟ್ ಲೀಗ್ ಐಪಿಎಲ್ ಪಂದ್ಯ ವೀಕ್ಷಿಸಿದ್ದಾರೆ. ಗುರುವಾರ ನಡೆದ ಡೆಲ್ಲಿ ಮತ್ತು ಕೆಕೆಆರ್ ವಿರುದ್ಧದ ಪಂದ್ಯಕ್ಕೆ ಅವರು ಕೂಡ ಸಾಕ್ಷಿಯಾಗಿದ್ದರು. ಅವರು ಪಂದ್ಯ ವೀಕ್ಷಿಸಿದ ಫೋಟೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಕಳೆದ ಸೋಮವಾರ ಭಾರತದ ವಾಣಿಜ್ಯ ರಾಜಧಾನಿ ಮುಂಬೈ ನಗರಿಯಲ್ಲಿ ದೇಶದ ಮೊದಲ ಆ್ಯಪಲ್ ಬಿಕೆಸಿ ಸ್ಟೋರ್ ತೆರೆದ ಬಳಿಕ ದಿಲ್ಲಿಯಲ್ಲಿ ಎರಡನೇ ಮಳಿಗೆಗೆ ಗುರುವಾರ ಟಿಮ್‌ ಕುಕ್ ಚಾಲನೆ ನೀಡಿದ್ದರು. ಇದೇ ವೇಳೆ ಅವರು ದೆಹಲಿಯ ಅರುಣ್ ಜೇಟ್ಲಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಕೆಕೆಆರ್ ಪಂದ್ಯವನ್ನು ವೀಕ್ಷಿಸಿದ್ದಾರೆ. ಇವರ ಜತೆ ಬಾಲಿವುಡ್ ನಟಿ ಸೋನಂ ಕಪೂರ್ ದಂಪತಿ ಕೂಡ ಪಂದ್ಯ ವೀಕ್ಷಣೆ ಮಾಡಿದ್ದಾರೆ. ಸೋನಂ ಕಪೂರ್ ಅವರು ಟಿಮ್‌ ಕುಕ್ ಜತೆಗೆ ಪಂದ್ಯ ವೀಕ್ಷಿಸುತ್ತಿರುವ ಫೋಟೊವನ್ನು ತಮ್ಮ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ IPL 2023 : ಕಳುವಾಗಿದ್ದ ವಾರ್ನರ್ ಕ್ರಿಕೆಟ್ ಕಿಟ್ ಪತ್ತೆ, ಆದರೂ ಕೆಲವೊಂದು ಪರಿಕರಗಳು ನಾಪತ್ತೆ!
ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮಾಲಿಕ ಪಾರ್ಥ್ ಜಿಂದಾಲ್(parth jindal) ಅವರು ಟಿಮ್‌ ಕುಕ್ ಅವರಿಗೆ ತಮ್ಮ ತಂಡದ ಎಲ್ಲ ಆಟಗಾರರ ಸಹಿ ಹಾಕಿದ ಬ್ಯಾಟ್ ಒಂದನ್ನು ಸ್ಮರಣಿಕೆಯಾಗಿ ನೀಡಿದ್ದಾರೆ. ಈ ಫೋಟೊವನ್ನು ಅವರು ಟ್ವಿಟರ್ನಲ್ಲಿ ಪ್ರಕಟಿಸಿದ್ದಾರೆ.
ಐಪಿಎಲ್ ಕುರಿತು ಮಾತನಾಡಿದ ಟಿಮ್‌ ಕುಕ್ ಅವರು ನಾನು ಐಪಿಎಲ್ ಬಗ್ಗೆ ಕೇಳಿದ್ದೆ ಆದರೆ ಪಂದ್ಯ ನೋಡುತ್ತಿರುವುದು ಇದೇ ಮೊದಲು. ಭಾರತದಲ್ಲಿ ಕ್ರಿಕೆಟ್ಗೆ ಇರುವಷ್ಟು ಬೆಂಬಲ ಬೇರೆಲ್ಲೂ ಕಾಣಸಿಗದು. ಇದೊಂದು ನನ್ನ ಜೀವನದ ಸ್ಮರಣೀಯ ನೆನಪುಗಳಲ್ಲಿ ಒಂದಾಗಿರಲಿದೆ. ಇದೇ ರೀತಿ ಟೂರ್ನಿ ಇನ್ನಷ್ಟು ದೊಡ್ಡ ಮಟ್ಟದಲ್ಲಿ ನಡೆಯುವಂತಾಗಲಿ ಎಂದು ಹಾರೈಸಿದರು.
ನಟಿ ಮಾಧುರಿ ದೀಕ್ಷಿತ್ ಜತೆ ವಡಾ ಪಾವ್ ಸವಿದಿದ್ದ ಕುಕ್
ಮುಂಬೈ ನಗರಿಯಲ್ಲಿ ದೇಶದ ಮೊದಲ ಆ್ಯಪಲ್ ಬಿಕೆಸಿ ಸ್ಟೋರ್ (Apple BKC Store) ಆರಂಭಿಸಿದ ಬಳಿಕ ಟಿಮ್‌ ಕುಕ್ ಅವರು ಮಾಧುರಿ ದೀಕ್ಷಿತ್ ಜತೆ ವಡಾ ಪಾವ್ ಸವಿದಿದ್ದರು. ಈ ಫೋಟೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಮಾಧುರಿ ದೀಕ್ಷಿತ್ ಅವರು ನೀಡಿದ ಈ ವಡಾ ಪಾವ್ ಟ್ರೀಟ್ಗೆ ಪ್ರತಿಕ್ರಿಯಿಸಿದ್ದ ಟಿಮ್‌ ಕುಕ್, “ಇದೇ ಮೊದಲ ಬಾರಿಗೆ ನನಗೆ ವಡಾ ಪಾವ್ ಪರಿಚಯಿಸಿದ ಮಾಧುರಿ ದೀಕ್ಷಿತ್ ಅವರಿಗೆ ಧನ್ಯವಾದಗಳು. ವಡಾ ಪಾವ್ ರುಚಿಕಟ್ಟಾಗಿತ್ತು” ಎಂದು ಹೇಳಿದ್ದರು.