ಬೆಂಗಳೂರು: ಇಲ್ಲಿನ ಎಂ. ಚಿನ್ನಸ್ವಾಮಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಸೋಮವಾರ ರಾತ್ರಿ ನಡೆದ ಅತ್ಯಂತ ರೋಚಕ ಐಪಿಎಲ್(IPL 2023) ಪಂದ್ಯದಲ್ಲಿ ರಾಯಲ್ಸ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಲಕ್ನೋ ಸೂಪರ್ಜೈಂಟ್ಸ್ ತಂಡ ಒಂದು ವಿಕೆಟ್ ಅಂತರದಿಂದ ಗೆದ್ದು ಬೀಗಿದೆ. ಈ ಗೆಲುವಿನ ಶ್ರೇಯವನ್ನು ನಾಯಕ ರಾಹುಲ್ ಅವರು ಸ್ಟೋಯಿನಿಸ್ ಮತ್ತು ನಿಕೋಲಸ್ ಪೂರಣ್ಗೆ ಅರ್ಪಿಸಿದ್ದಾರೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಆರ್ಸಿಬಿ ಎರಡೇ ವಿಕೆಟಿಗೆ 212 ರನ್ ಬಾರಿಸಿತು. ಕೊಹ್ಲಿ, ಮ್ಯಾಕ್ಸ್ವೆಲ್, ಫಾಫ್ ಡು ಪ್ಲೆಸಿಸ್ ಸೇರಿಕೊಂಡು ಲಕ್ನೋ ಬೌಲರ್ಗಳ ಬೆವರಿಳಿಸಿದರು. ಅದಾಗಲೇ ಆರ್ಸಿಬಿ ಅಭಿಮಾನಿಗಳು ಈ ಮೂವರು ಆಟಗಾರ ಮೊದಲ ಅಕ್ಷರವನ್ನು ಒಟ್ಟುಗೂಡಿಸಿ ಕೆಜಿಎಫ್ ಅಬ್ಬರ ಎಂದು ಪಂದ್ಯವನ್ನು ಗೆದ್ದೇ ಬಿಟ್ಟಂತೆ ಸಂಭ್ರಮಿಸಲಾರಂಭಿಸಿದ್ದರು. ಆದರೆ ‘ಪಿಚ್ಚರ್ ಅಭಿ ಬಾಕಿ ಹೈ’ ಎಂಬಂತೆ ಸಿಡಿದು ನಿಂತ ಮಾರ್ಕಸ್‌ ಸ್ಟೋಯಿನಿಸ್ ಮತ್ತು ನಿಕೋಲಸ್ ಪೂರಣ್ ಸೇರಿಕೊಂಡು ಲಕ್ನೋಗೆ ರೋಚಕ ಜಯ ತಂದುಕೊಟ್ಟರು. ಅಷ್ಟರ ವರೆಗೆ ಆರ್ಸಿಬಿ…ಆರ್ಸಿಬಿ ಎಂದು ಕೂಗುತ್ತಿದ್ದ ಅಭಿಮಾನಿಗಳು ಸಪ್ಪೆ ಮೋರೆ ಹಾಕಿಕೊಂಡು ಸ್ಟೇಡಿಯಂನಿಂದ ಹೊರನಡೆದರು.
ಪಂದ್ಯದ ಗೆಲುವಿನ ಬಳಿಕ ಮಾತನಾಡಿದ ನಾಯಕ ಕೆ.ಎಲ್ ರಾಹುಲ್, ನಾವು ಗೆದ್ದು ಎರಡು ಅಂಕ ಸಂಪಾದಿಸಿದ್ದೇವೆ ಎಂದರೆ, ಅದಕ್ಕೆ ಸ್ಟೋಯಿನಿಸ್ ಮತ್ತು ಪೂರನ್ ಅವರ ಬ್ಯಾಟಿಂಗ್ ಪ್ರದರ್ಶನವೇ ಕಾರಣ. ಗೆಲುವಿನ ಎಲ್ಲ ಶ್ರೇಯ ಅವರಿಗೆ ಸಲ್ಲಬೇಕು. ಆಯುಷ್ ಬದೋನಿ ಕೂಡ ಉತ್ತಮ ಬ್ಯಾಟಿಂಗ್ ನಡೆಸಿದರು. ಆರಂಭದಲ್ಲಿ ವಿಕೆಟ್ ಕಳೆದುಕೊಂಡಾಗ ನನಗೂ ಚಿಂತೆ ಕಾಡಿತ್ತು. ಆದರೆ ಕೊನೆಯಲ್ಲಿ ಪಂದ್ಯ ಗೆದ್ದಾಗ ಇದನ್ನು ನಂಬಲು ಕೂಡ ಸಾಧ್ಯವಾಗಲಿಲ್ಲ. ಇದು ಚಿನ್ನಸ್ವಾಮಿ ಕ್ರೀಡಾಂಗಣ, ಕೊನೆಯ ಬಾಲ್ನಲ್ಲಿ ಪಂದ್ಯವನ್ನು ಫಿನಿಶ್‌ ಮಾಡಲು ಸಾಧ್ಯವಾಗುವ ಏಕೈಕ ಸ್ಥಳ ಎಂಬುದಕ್ಕೆ ಇದೇ ಪಂದ್ಯ ಸಾಕ್ಷಿ. ನಾನು ಈ ಪಂದ್ಯದಲ್ಲಿ ಉತ್ತಮವಾಗಿ ಆಡಿಲ್ಲ ನಿಜ. ಆದರೆ ಮುಂದಿನ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ತೋರುವ ವಿಶ್ವಾಸವಿದೆ ಎಂದು ರಾಹುಲ್ ಹೇಳಿದರು.
ಇದನ್ನೂ ಓದಿ IPL 2023 : ಲಾಸ್ಟ್ ಬಾಲ್ ಥ್ರಿಲ್ಲರ್ನಲ್ಲಿ ಆರ್ಸಿಬಿಗೆ ವೀರೋಚಿತ ಸೋಲು
ಬೃಹತ್‌ ಮೊತ್ತದ ಚೇಸಿಂಗ್‌ ವೇಳೆ ಲಕ್ನೋ ಆರಂಭದಲ್ಲೇ ಕೈಲ್‌ ಮೇಯರ್ ವಿಕೆಟ್ ಕಳೆದುಕೊಂಡಿತು. ಸಿರಾಜ್‌ ಈ ವಿಕೆಟ್ ಕೆಡವಿ ಆರ್ಸಿಬಿ ಮುನ್ನಡೆ ತಂದುಕೊಟ್ಟರು. ಇದರ ಬೆನಲ್ಲೇ ವೇಯ್ನ್ ಪಾರ್ನೆಲ್‌ ಒಂದೇ ಓವರ್‌ನಲ್ಲಿ ದೀಪಕ್‌ ಹೂಡಾ ಮತ್ತು ಕೃಣಾಲ್‌ ಪಾಂಡ್ಯ ಅವರನ್ನು ಪೆವಿಲಿಯನ್ನಿಗೆ ಅಟ್ಟಿದರು. 23ಕ್ಕೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಲಕ್ನೋಗೆ ಸ್ಟೋಯಿನಿಸ್ ಸ್ಫೋಟಕ ಬ್ಯಾಟಿಂಗ್ ನಡೆಸಿ ಆಧರಿಸಿದರು. 30 ಎಸೆತಗಳಿಂದ 65 ರನ್ ಚಚ್ಚಿ ಗೆಲುವಿನ ವಿಶ್ವಾಸ ಮೂಡಿಸಿದರು. ಈ ವಿಕೆಟ್ ಪತನದ ಬಳಿಕ ಆಡಲಿಳಿದ ನಿಕೋಲಸ್ ಪೂರಣ್ ಕೇವಲ 15 ಎಸೆತಗಳಿಂದ ಅರ್ಧ ಶತಕ ಬಾರಿಸಿ ಸುಂಟರಗಾಳಿಯಾದರು. 19 ಎಸೆತಗಳಿಂದ 62 ರನ್ (4 ಬೌಂಡರಿ, 7 ಸಿಕ್ಸರ್‌) ಪಂದ್ಯದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಬದೋನಿ 30ರನ್ ಕೊಡುಗೆ ನೀಡಿದರು.