ಮುಂಬಯಿ: ವಿರಾಟ್ ಕೊಹ್ಲಿ ಮತ್ತು ನವೀನ್ ಉಲ್-ಹಕ್ ಅವರ ನಡುವಿನ ಶೀತಲ ಸಮರವೊಂದು ಇದೀಗ ಅಂತ್ಯ ಕಂಡಂತೆ ಕಾಣುತ್ತಿದೆ. ಇದಕ್ಕೆ ಕಾರಣ ನವೀನ್ ಉಲ್-ಹಕ್ ಅವರ ಕ್ಷಮಾಪಣ ಪತ್ರ. ಹೌದು ವಿರಾಟ್ ಕೊಹ್ಲಿಗೆ ಟ್ವೀಟ್ ಮಾಡುವ ಮೂಲಕ ನವೀನ್ ಉಲ್-ಹಕ್ ಅವರು ಕ್ಷಮೆ ಕೇಳಿದ ಪೋಸ್ಟ್ ಇದೀಗ ಬಾರಿ ವೈರಲ್ ಆಗಿದೆ.
ಮೇ 1ರಂದು ಲಕ್ನೋದ ಏಕಾನ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಮತ್ತು ನವೀನ್ ಉಲ್-ಹಕ್ ಮಧ್ಯೆ ಮೈದಾನದಲ್ಲಿಯೇ ಕಿರಿಕ್ ಆಗಿತ್ತು. ಬಳಿಕ ಪಂದ್ಯ ಮುಗಿದ ಬಳಿಕ ಗಂಭೀರ್ ಅವರು ಇದೇ ವಿಚಾರವಾಗಿ ಕೊಹ್ಲಿ ಜತೆ ವಾಗ್ವಾದ ನಡೆಸಿದ್ದರು. ಈ ಘಟನೆ ನಡೆದ ಬಳಿಕ ನವೀನ್ ಅವರು ವಿರಾಟ್ ಕೊಹ್ಲಿ ಮತ್ತು ಆರ್ಸಿಬಿ ಸೋತ ಬಳಿಕ ಮಾವಿನ ಹಣ್ಣಿನ ಫೋಟೊ ಹಾಕಿ ಪರೋಕ್ಷವಾಗಿ ಟ್ರೋಲ್ ಮಾಡಿದ್ದರು. ಇಲ್ಲಿಂದ ಆರಂಭಗೊಂಡ ಈ ಸಮರವನ್ನು ಮುಂದೆ ವಿರಾಟ್ ಅಭಿಮಾನಿಗಳು ಮುಂದುವರಿಸಿದರು.
ನವೀನ್ ಉಲ್-ಹಕ್ ಅವರು ಎಲ್ಲೇ ಹೋದರೂ ವಿರಾಟ್ ಅಭಿಮಾನಿಗಳು ಕೀಟಲೆ ನೀಡುತ್ತಿದ್ದರು. ಅವರನ್ನು ಕಂಡೊಡನೆ ಕೊಹ್ಲಿ…ಕೊಹ್ಲಿ ಎಂದು ಜೋರಾಗಿ ಕೂಗುತ್ತಿದ್ದರು. ಇದರಿಂದ ಬೇಸತ್ತು ಹೋಗಿದ್ದ ನವೀನ್ ಉಲ್ ಹಕ್ ಅವರು ಇದೀಗ ತಾನು ವಿರಾಟ್ ಕೊಹ್ಲಿಯ ಅಪ್ಪಟ ಅಭಿಮಾನಿ, ಅವರು ನನಗೆ ಸ್ಫೂರ್ತಿ, ನನ್ನ ಮನೆಯ ಕೋಣೆಯ ತುಂಬಾ ಅವರದ್ದೇ ಫೋಟೊಗಳಿಗೆ. ಅವರ ಬಳಿ ನಾನು ಕ್ಷಮೆಯಾಚಿಸುತ್ತೇನೆ. ಮುಂದಿನ ಆವೃತ್ತಿಯಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತೊರೆದು ಆರ್ಸಿಬಿ ಪರ ಆಡಲು ಇಚ್ಛಿಸುತ್ತೇನೆ” ಎಂದು ಬರೆಯಲಾಗಿದೆ.
ಸದ್ಯ ಈ ಟ್ವೀಟ್ ವೈರಲ್ ಆಗುತ್ತಿದ್ದಂತೆ ಈ ಟ್ವೀಟ್ನ ಅಸಲಿಯತ್ತು ಬಯಲಾಗಿದೆ. ವಿರಾಟ್ ಕೊಹ್ಲಿ ಅವರ ಅಭಿಮಾನಿಯೊಬ್ಬರು ನವೀನ್ ಉಲ್ ಹಕ್ ಹೆಸರಿನಲ್ಲಿ ನಕಲಿ ಖಾತೆ ತೆರೆದು ಈ ಟ್ವೀಟ್ ಮಾಡಿದ್ದಾರೆ. ಕೆಲವರು ಈ ಟ್ವೀಟ್ ಸುಳ್ಳು ಎಂದು ತಿಳಿದಿದ್ದರೂ ಶೇರ್ ಮಾಡುವ ಮೂಲಕ ನವೀನ್ ಉಲ್ ಹಕ್ ಅವರನ್ನು ಪರೋಕ್ಷವಾಗಿ ಟ್ರೋಲ್ ಮಾಡುತ್ತಿದ್ದಾರೆ.
I’m Sorry @imVkohli Sir🥺💔
— Naveen Ul Haq (@naveenulhaq66) May 24, 2023
ಇದನ್ನೂ ಓದಿ IPL 2023 : ಮುಂಬಯಿ ಇಂಡಿಯನ್ಸ್ ಸ್ಟಾರ್ ಬೌಲರ್ಗೆ ಅವರ ಊರಲ್ಲಿ ಬ್ಯಾನ್!
ಮುಂಬೈ ಆಟಗಾರರಿಂದಲೂ ಟ್ರೋಲ್ ಆಗಿದ್ದ ನವೀನ್
ಕಳೆದ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ಎಲಿಮಿನೇಟ್ ಪಂದ್ಯದಲ್ಲಿ ಗೆಲುವು ದಾಖಲಿಸಿದ ಬಳಿಕ ಮುಂಬೈ ತಂಡದ ಆಟಗಾರರಾದ ಸಂದೀಪ್ ವಾರಿಯರ್, ವಿಷ್ಣು ವಿನೋದ್ ಮತ್ತು ಕುಮಾರ್ ಕಾರ್ತಿಕೇಯ ಅವರು ಮೂರು ಮಾವಿನ ಹಣ್ಣುಗಳನ್ನು ಇಟ್ಟು ನವೀನ್ ಉಲ್-ಹಕ್ ಅವರನ್ನು ಟ್ರೋಲ್ ಮಾಡಿದ್ದರು. ಮಹಾತ್ಮ ಗಾಂಧೀಜಿ ಅವರು ಹೇಳಿದ ಮೂರು ಕೋತಿಗಳ ಸಣ್ಣ ನೀತಿ ಕಥೆಯಾದ ಕೆಟ್ಟದನ್ನು ಕೇಳಬೇಡ, ಕೆಟ್ಟದ್ದನ್ನು ಮಾತನಾಡಬೇಡ, ಕೆಟ್ಟದ್ದನ್ನು ನೋಡಬೇಡ ಎಂಬಂತೆ ಮುಂಬೈ ತಂಡ ಈ ಮೂವರು ಆಟಗಾರು ಟೇಬಲ್ನಲ್ಲಿ ಮೂರು ಮಾವಿನ ಹಣ್ಣು ಇಟ್ಟು ನವೀನ್ ಉಲ್ ಹಕ್ ಅವರನ್ನು ಪರೋಕ್ಷವಾಗಿ ಟ್ರೋಲ್ ಮಾಡಿದ್ದರು.