ಅಹಮದಾಬಾದ್: “ಬ್ಯಾಟಲ್‌ ಆಫ್ ಬ್ರದರ್ಸ್” ಎಂದೇ ಕರೆಯಲ್ಪಟ್ಟ ಭಾನುವಾರದ ಐಪಿಎಲ್ನ ಮೊದಲ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಹಾಲಿ ಚಾಂಪಿಯನ್ ಗುಜರಾತ್ ಟೈಟನ್ಸ್ 56 ರನ್ಗಳ ಭರ್ಜರಿ ಗೆಲುವು ದಾಖಲಿಸಿದೆ. ಈ ಮೂಲಕ ಲಕ್ನೋ ವಿರುದ್ಧ ಗುಜರಾತ್ ಅಜೇಯ ದಾಖಲೆಯನ್ನು ಉಳಿಸಿಕೊಂಡಿತು. ಉಭಯ ತಂಡಗಳು ಐಪಿಎಲ್ನಲ್ಲಿ ಇದುವರೆಗೆ ನಾಲ್ಕು ಬಾರಿ ಮುಖಾಮುಖಿಯಾಗಿದ್ದು ನಾಲ್ಕೂ ಪಂದ್ಯದಲ್ಲಿಯೂ ಹಾರ್ದಿಕ್ ಪಡೆ ಮೇಲುಗೈ ಸಾಧಿಸಿದೆ.
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಭಾನುವಾರದ ಐಪಿಎಲ್ನ ಡಬಲ್ ಹೆಡರ್ನ ಮೊದಲ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಗುಜರಾತ್ ತಂಡ ಶುಭಮನ್ ಗಿಲ್(ಅಜೇಯ 94) ಮತ್ತು ವೃದ್ಧಿಮಾನ್ ಸಾಹಾ(81) ಅವರ ಸಿಡಿಲಬ್ಬರದ ಬ್ಯಾಟಿಂಗ್ ನೆರವಿನಿಂದ ನಿಗದಿತ 20 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 227 ರನ್ ಬಾರಿಸಿತು. ಜವಾಬಿತ್ತ ಲಕ್ನೋ ತಂಡ ನಿಗದಿತ 20 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 171 ರನ್ ಗಳಿಸಿ ಶರಣಾಯಿತು. ಗುಜರಾತ್ ಈ ಗೆಲುವಿನೊಂದಿಗೆ 16 ಅಂಕ ಸಂಪಾದಿಸಿ ಪ್ಲೇ ಆಫ್ ಸನಿಹಕ್ಕೆ ಬಂದು ನಿಂತಿದೆ.
ಬೃಹತ್ ಮೊತ್ತವನ್ನು ದಿಟ್ಟ ರೀತಿಯಲ್ಲೇ ಬೆನ್ನಟ್ಟಿದ ಲಕ್ನೋ ಉತ್ತಮ ಆರಂಭ ಪಡೆಯಿತು. 16ನೇ ಆವೃತ್ತಿಯ ಐಪಿಎಲ್ನಲ್ಲಿ ಮೊದಲ ಬಾರಿಗೆ ಆಡಲಿಳಿದ ದಕ್ಷಿಣ ಆಫ್ರಿಕಾದ ಅನುಭವಿ ಬ್ಯಾಟರ್ ಕ್ವಿಂಟನ್ ಡಿ ಕಾಕ್ ಮತ್ತು ಕೈಲ್ ಮೇಯರ್ಸ್ ಗುಜರಾತ್ ಬೌಲರ್ಗಳನ್ನು ಕಾಡಿದರು.
ಗುಜರಾತ್ ಆರಂಭಿಕರಂತೆ ಈ ಜೋಡಿಯೂ ಉತ್ತಮ ಬ್ಯಾಟಿಂಗ್ ನಡೆಸಿತು. 10ರ ಸರಾಸರಿಯಲ್ಲಿ ಬ್ಯಾಟ್ ಬೀಸಿ ಪವರ್ ಪ್ಲೇಯಲ್ಲಿ 72 ರನ್ ರಾಶಿ ಹಾಕಿದರು. ಜಿದ್ದಿಗೆ ಬಿದ್ದವರಂತೆ ಬ್ಯಾಟ್ ಬೀಸುತ್ತಿದ್ದ ಈ ಜೋಡಿಯನ್ನು ಮೋಹಿತ್ ಶರ್ಮ ಬೇರ್ಪಡಿಸಿ ತಂಡಕ್ಕೆ ಆರಂಭಿಕ ಮುನ್ನಡೆ ತಂದುಕೊಟ್ಟರು. ಕಷ್ಟದ ಕ್ಯಾಚ್ ಒಂದನ್ನು ರಶಿದ್ ಖಾನ್ ಅವರು ಸೂಪರ್ ಮ್ಯಾನ್ ರೀತಿಯಲ್ಲಿ ಜಿಗಿದು ಹಿಡಿಯುವ ಮೂಲಕ ಈ ವಿಕೆಟ್ ಉರುಳಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದರು. ಮೇಯರ್ಸ್ 48 ರನ್ ಬಾರಿಸಿದರು.
ಮೇಯರ್ಸ್ ವಿಕೆಟ್ ಪತನದ ಬಳಿಕ ಲಕ್ನೋ ತಂಡದ ರನ್ ಗಳಿಕೆಯ ವೇಗ ಕುಂಠಿತಗೊಂಡಿತು. ದೀಪಕ್ ಹೂಡಾ ಈ ಪಂದ್ಯದಲ್ಲಿಯೂ ಬ್ಯಾಟಿಂಗ್ ವೈಫಲ್ಯ ಕಂಡರು. ಇದರೊಂದಿಗೆ ಹೂಡಾ ಆಡಿದ 11 ಪಂದ್ಯಗಳಲ್ಲಿಯೂ ತೀರಾ ಕಳಪೆ ಮಟ್ಟದ ಬ್ಯಾಟಿಂಗ್ ಪ್ರದರ್ಶನ ತೋರಿದರು. ಆ ಬಳಿಕ ಆಡಲಿಳಿದ ಮಾರ್ಕಸ್ ಸ್ಟೋಯಿನಿಸ್ ಕೂಡ 4 ರನ್ಗೆ ಆಟ ಮುಗಿಸಿದರು. ಡಿ ಕಾಕ್ ಅವರು ಏಕಾಂಗಿ ಹೋರಾಟ ನಡೆಸಿ ತಂಡದ ಮೊತ್ತವನ್ನು ಹಿಗ್ಗಿಸುವ ಪ್ರಯತ್ನ ಮಾಡಿದರು. ಆದರೆ ಅವರಿಗೆ ಯಾರಿಂದಲೂ ಉತ್ತಮ ಸಾಥ್ ಸಿಗಲೇ ಇಲ್ಲ. 70 ರನ್ಗಳಿಸಿದ್ದ ವೇಳೆ ಅವರು ಕೂಡ ವಿಕೆಟ್ ಕೈ ಚೆಲ್ಲಿದರು. ಇಲ್ಲಿಗೆ ಲಕ್ನೋ ತಂಡದ ಸೋಲು ಕೂಡ ಖಚಿತಗೊಂಡಿತು. ನಿಕೋಲಸ್ ಪೂರನ್(3) ಕೂಡ ಅಗ್ಗಕ್ಕೆ ಔಟಾಗಿ ನಿರಾಸೆ ಮೂಡಿಸಿದರು. ಅಂತಿಮ ಹಂತದಲ್ಲಿ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿದ ಆಯುಷ್‌ ಬದೋನಿ ಶಕ್ತಿ ಮೀರಿ ಪ್ರಯತ್ನಿಸಿದರೂ ಅವರಿಂದ ತಂಡವನ್ನು ಗೆಲುವಿನ ದಡ ಸೇರಿಸಲು ಸಾಧ್ಯವಾಗಲಿಲ್ಲ. ಗುಜರಾತ್ ಪರ ಮೋಹಿತ್ ಶರ್ಮ ನಾಲ್ಕು ವಿಕೆಟ್ ಕಿತ್ತು ಮಿಂಚಿದರು. ಬದೋನಿ 21 ರನ್ ಗಳಿಸಿದರು. ನಾಯಕ ಕೃಣಾಲ್ ಪಾಂಡ್ಯ ಗೋಲ್ಡನ್ ಡಕ್ ಸಂಕಟ್ಟಕ್ಕೆ ಸಿಲುಕಿದರು.
ಇದನ್ನೂ ಓದಿ IPL 2023 : ಟಾಸ್ ಗೆದ್ದ ರಾಜಸ್ಥಾನ್ ತಂಡದಿಂದ ಬ್ಯಾಟಿಂಗ್ ಆಯ್ಕೆ
ಸಾಹಾ, ಗಿಲ್ ಬ್ಯಾಟಿಂಗ್ ಅಬ್ಬರ
ಇದಕ್ಕೂ ಮುನ್ನ ಟಾಸ್ ಸೋತು ಬ್ಯಾಟಿಂಗ್ ನಡೆಸಿದ ಗುಜರಾತ್ ಪರ ವೃದ್ಧಿಮಾನ್ ಸಾಹಾ ಆರಂಭದಿಂದಲೇ ವಿಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಲಕ್ನೋ ಬೌಲರ್ಗಳ ಮೇಲೆರಗಿ ಸಿಕ್ಸರ್ ಬೌಂಡರಿಗಳ ಸುರಿಮಳೆಯನ್ನಲೇ ಸುರಿಸಿದರು. ಇವರ ಈ ಬ್ಯಾಟಿಂಗ್ ಪ್ರದರ್ಶನದಿಂದ ನಾಲ್ಕು ಓವರ್ ಮುಕ್ತಾಯದ ವೇಳೆಗೆ ತಂಡದ ಮೊತ್ತ 50ರ ಗಡಿ ದಾಟಿತು. ಇದರಲ್ಲಿ 46 ರನ್ ಸಾಹಾ ಅವರ ಬ್ಯಾಟ್ನಿಂದಲೇ ಹರಿದು ಬಂತು. ಗಿಲ್ ಅವರು ಕೇವಲ 5 ರನ್ ಗಳಿಸಿದ್ದರು. ಪವರ್ ಪ್ಲೇ ಮುಕ್ತಾಯಕ್ಕೆ ವಿಕೆಟ್ ನಷ್ಟವಿಲ್ಲದೆ ಈ ಜೋಡಿ 78 ಒಟ್ಟುಗೋಡಿಸಿ ತಂಡಕ್ಕೆ ಉತ್ತಮ ಅಡಿಪಾಯ ನಿರ್ಮಿಸಿತು. ಇದೇ ವೇಳೆ ವೃದ್ಧಿಮಾನ್ ಸಾಹಾ 20 ಎಸೆಗಳಲ್ಲಿ ಅರ್ಧಶತಕವನ್ನೂ ಪೂರ್ತಿಗೊಳಿಸಿದರು.
ಪವರ್ ಪ್ಲೇ ಬಳಿಕ ಶುಭಮನ್ ಗಿಲ್ ಕೂಡ ಬಿರುಸಿನ ಬ್ಯಾಟಿಂಗ್ಗೆ ಒತ್ತು ಕೊಟ್ಟರು. ಉಭಯ ಆಟಗಾರರು ಜಿದ್ದಿಗೆ ಬಿದ್ದವರಂತೆ ಬ್ಯಾಟ್ ಬೀಸಿ ಪ್ರತಿ ಓವರ್ಗೆ 12 ರನ್ಗಳ ಸರಾಸರಿಯಲ್ಲಿ ರನ್ ಒಟ್ಟುಗೂಡಿಸಿದರು. ಇವರ ಈ ಬ್ಯಾಟಿಂಗ್ ಅಬ್ಬರದ ಮುಂದೆ ಲಕ್ನೋ ತಂಡದ ಬೌಲರ್ಗಳು ದಿಕ್ಕಾಪಾಲಾದರು. 10 ಓವರ್ ಆಗುವ ಮೊದಲೇ ಗುಜರಾತ್ 120 ರನ್ ಬಾರಿಸಿತು.
ಬಿರುಸಿನ ಬ್ಯಾಟಿಂಗ್ ಮೂಲಕ ಮುನ್ನುಗ್ಗುತ್ತಿದ್ದ ವೃದ್ಧಿಮಾನ್ ಸಾಹಾ ಅವರನ್ನು ಕೊನೆಗೂ ಆವೇಶ್ ಖಾನ್ ಔಟ್ ಮಾಡುವಲ್ಲಿ ಯಶಸ್ವಿಯಾದರು. ಸಾಹಾ ಅವರು 43 ಎಸೆತಗಳಿಂದ 81 ರನ್ ಬಾರಿಸಿದರು. ಈ ಮನಮೋಹಕ ಇನಿಂಗ್ಸ್ನಲ್ಲಿ 10 ಬೌಂಡರಿ ಮತ್ತು 4 ಸಿಕ್ಸರ್ ಸಿಡಿಯಿತು. ಗಿಲ್ ಮತ್ತು ಸಾಹಾ ಮೊದಲ ವಿಕೆಟ್ಗೆ ಬರೋಬ್ಬರಿ 142 ರನ್ಗಳ ಜತೆಯಾಟ ನಡೆಸಿದರು. ಇದು ಈ ಆವೃತ್ತಿಯಲ್ಲಿ ಮೊದಲ ವಿಕೆಟ್ಗೆ ಒಟ್ಟುಗೂಡಿದ ದ್ವಿತೀಯ ಗರಿಷ್ಠ ಮೊತ್ತವಾಗಿದೆ. ಇದಕ್ಕೂ ಮುನ್ನ ಮುಂಬೈ ವಿರುದ್ಧ ಆರ್ಸಿಬಿ ತಂಡದ ಆಟಗಾರರಾದ ಫಾಫ್ ಡು ಪ್ಲೆಸಿಸ್ ಮತ್ತು ವಿರಾಟ್ ಕೊಹ್ಲಿ ಮೊದಲ ವಿಕೆಟ್ಗೆ 148 ರನ್ ಬಾರಿಸಿದ್ದರು.
ಅರ್ಧಶತಕ ಬಾರಿಸಿ ಮಿಂಚಿದ ಗಿಲ್
ಆರಂಭದಲ್ಲಿ ನಿಧಾನ ಗತಿಯ ಬ್ಯಾಟಿಂಗ್ ನಡೆಸಿದ್ದರೂ ಬಳಿಕ ಚುರುಕಿನ ಬ್ಯಾಟಿಂಗ್ ನಡೆಸಿದ ಗಿಲ್ 28 ಎಸೆತಗಳಲ್ಲಿ ಅರ್ಧಶತಕ ಪೂರ್ತಿಗೊಳಿಸಿದರು. ಇವರಿಗೆ ಮತ್ತೊಂದು ತುದಿಯಲ್ಲಿ ನಾಯಕ ಹಾರ್ದಿಕ್ ಪಾಂಡ್ಯ ಉತ್ತಮ ಸಾಥ್ ನೀಡಿದರು. ಪಾಂಡ್ಯ 2 ಸಿಕ್ಸರ್ ಮತ್ತು ಒಂದು ಬೌಂಡರಿ ಬಾರಿಸಿ 25 ರನ್ ಗಳಿಸಿ ಅಣ್ಣ ಕೃಣಾಲ್ಗೆ ಕ್ಯಾಚ್ ನೀಡಿ ವಿಕೆಟ್ ಕೈಚೆಲ್ಲಿದರು. 20 ಓವರ್ಗಳ ತನಕ ಬ್ಯಾಟಿಂಗ್ ಕಾಯ್ದುಕೊಂಡ ಗಿಲ್ 51 ಎಸೆತಗಳಲ್ಲಿ ಅಜೇಯ 94 ರನ್ ಬಾರಿಸಿದರು. ಈ ಇನಿಂಗ್ಸ್ನಲ್ಲಿ 7 ಸಿಕ್ಸರ್ ಮತ್ತು 2 ಬೌಂಡರಿ ದಾಖಲಾಯಿತು. ಡೇವಿಡ್ ಮಿಲ್ಲರ್ 21 ರನ್ ಗಳಿಸಿ ಅಜೇಯರಾಗಿ ಉಳಿದರು. ಲಕ್ನೋ ಪರ 8 ಮಂದಿ ಬೌಲಿಂಗ್ ನಡೆಸಿದರೂ ಇವರಿಂದ ಕೀಳಲಾಗಿದ್ದು ಕೇವಲ 2 ವಿಕೆಟ್ ಮಾತ್ರ.
ಸಂಕ್ಷಿಪ್ತ ಸ್ಕೋರ್
ಗುಜರಾತ್ ಟೈಟನ್ಸ್: 20 ಓವರ್ಗಳಲ್ಲಿ 2 ವಿಕೆಟ್ಗೆ 227(ಶುಭಮನ್ ಗಿಲ್ ಅಜೇಯ 94, ವೃದ್ಧಿಮಾನ್ ಸಾಹಾ 81, ಹಾರ್ದಿಕ್ ಪಾಂಡ್ಯ 25, ಡೇವಿಡ್ ಮಿಲ್ಲರ್ ಅಜೇಯ 21, ಆವೇಶ್ ಖಾನ್ 34ಕ್ಕೆ 1). ಲಕ್ನೋ ಸೂಪರ್ ಜೈಂಟ್ಸ್: 20 ಓವರ್ಗಳಲ್ಲಿ7 ವಿಕೆಟ್ಗೆ 171 (ಕ್ವಿಂಟನ್ ಡಿ ಕಾಕ್ 70, ಕೈಲ್ ಮೇಯರ್ಸ್ 48, ಮೋಹಿತ್ ಶರ್ಮ 29ಕ್ಕೆ 4).