ಲಕ್ನೋ: ಗುಜರಾತ್ ಟೈಟನ್ಸ್ ವಿರುದ್ಧದ ಅಲ್ಪ ಮೊತ್ತದ ಹೋರಾಟದಲ್ಲಿ ನಾಟಕೀಯ ಕುಸಿತ ಕಂಡ ಲಕ್ನೋ ಸೂಪರ್ ಜೈಂಟ್ಸ್ ತಂಡ 7 ರನ್ಗಳ ವೀರೋಚಿತ ಸೋಲು ಕಂಡಿದೆ. ಸೋಲುವ ಹಂತದಲ್ಲಿದ್ದ ಗುಜರಾತ್ ಫಿನಿಕ್ಸ್ನಂತೆ ಮೇಲೆದ್ದು ಗೆಲುವು ಸಾಧಿಸಿತು. ಮೋಹಿತ್ ಶರ್ಮ ಅವರ ಅಂತಿಮ ಓವರ್ನಲ್ಲಿ 4 ವಿಕೆಟ್ಗಳು ಉದುರಿತು.
ಅಟಲ್ ಬಿಹಾರಿ ವಾಜಪೇಯಿ ಏಕಾನಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಶನಿವಾರದ ಐಪಿಎಲ್ನ ಮೊದಲ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ನಡೆಸಿದ ಗುಜರಾತ್ ಟೈಟನ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ ಕೇವಲ 135 ರನ್ ಗಳಿಸಿತು. ಸುಲಭ ಗುರಿ ಪಡೆದ ಲಕ್ನೋ ಸೂಪರ್ಜೈಂಟ್ಸ್ 20 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 128 ರನ್ ಗಳಿಸಲಷ್ಟೇ ಶಕ್ತವಾಗಿ ವೀರೋಚಿತ ಸೋಲು ಕಂಡಿತು.
ಸಣ್ಣ ಮೊತ್ತವನ್ನು ಬೆನ್ನಟ್ಟಿದ ಲಕ್ನೋ ತಂಡಕ್ಕೆ ನಾಯಕ ಕೆ.ಎಲ್ ರಾಹುಲ್ ಅರ್ಧಶತಕ ಬಾರಿಸಿ ಆಸರೆಯಾದರು. ಕಳೆದ ಹಲವು ಪಂದ್ಯಗಳಲ್ಲಿ ನಿಧಾನಗತಿಯ ಬ್ಯಾಟಿಂಗ್ ನಡೆಸಿ ಕಡಿಮೆ ಸ್ಟ್ರೈಕ್ರೇಟ್ನಿಂದ ಟೀಕೆಗೆ ಒಳಗಾಗಿದ್ದ ಅವರು ಈ ಪಂದ್ಯದಲ್ಲಿ ತಮ್ಮ ಹಳೇಯ ಶೈಲಿಯಲ್ಲೇ ಬ್ಯಾಟಿಂಗ್ ಪ್ರದರ್ಶನ ತೋರುವ ಮೂಲಕ ತಮ್ಮ ವಿರುದ್ಧ ಟೀಕೆ ಮಾಡಿದವರಿಗೆ ಬ್ಯಾಟ್ನಿಂದಲೇ ತಕ್ಕ ಉತ್ತರ ನೀಡಿದರು. ಆದರೆ ಪಂದ್ಯವನ್ನು ಗೆಲ್ಲಿಸುವಲ್ಲಿ ವಿಫಲರಾದರು.
ಟಿ20 ಕ್ರಿಕೆಟ್ನಲ್ಲಿ ದಾಖಲೆ ಬರೆದ ರಾಹುಲ್
ಈ ಪಂದ್ಯದಲ್ಲಿ ರಾಹುಲ್ ಅವರು ಅರ್ಧಶತಕ ಬಾರಿಸುವ ಜತೆಗೆ ಟಿ20 ಕ್ರಿಕೆಟ್ ಮಾದರಿಯಲ್ಲಿ ನೂತನ ದಾಖಲೆಯೊಂದನ್ನು ಬರೆದರು. ಅತಿ ಕಡಿಮೆ ಇನಿಂಗ್ಸ್ನಲ್ಲಿ 7 ಸಾವಿರ ರನ್ ಪೂರೈಸಿದ ಮೊದಲ ಭಾರತೀಯ ಆಟಗಾರ ಎಂಬ ಹಿರಿಮೆಗೆ ಪಾತ್ರರಾದರು. ವಿರಾಟ್ ಕೊಹ್ಲಿ ಅವರು 212 ಇನಿಂಗ್ಸ್ನಲ್ಲಿ ಈ ಸಾಧನೆ ಮಾಡಿ ದ್ವಿತೀಯ ಸ್ಥಾನದಲ್ಲಿದ್ದಾರೆ. ರಾಹುಲ್ ಅವರು 197 ಇನಿಂಗ್ಸ್ನಲ್ಲಿ ಈ ಸಾಧನೆ ಮಾಡಿದರು.
ಈ ಪಂದ್ಯದಲ್ಲಿ ಜೋಶ್ನಿಂದಲೇ ಬ್ಯಾಟ್ ಬೀಸಿದ ರಾಹುಲ್ 38 ಎಸೆತಗಳಲ್ಲಿ ತಮ್ಮ ಅರ್ಧಶತಕ ಪೂರೈಸಿದರು. ಕೈಲ್ ಮೇಯರ್ಸ್ ಜತೆಗೆ ಮೊದಲ ವಿಕೆಟ್ಗೆ 55 ರನ್ಗಳ ಜತೆಯಾಟ ಕೂಡ ನಡೆಸಿದರು. ಮೇಯರ್ಸ್ ಒಂದು ಸಿಕ್ಸರ್ ಮತ್ತು 3 ಬೌಂಡರಿ ಸಿಡಿಸಿ 24 ರನ್ ಗಳಿಸಿದರು.ಮೇಯರ್ಸ್ ವಿಕೆಟ್ ಪತನದ ಬಳಿಕ ಆಡಲು ಬಂದ ಕೃಣಾಲ್ ಪಾಂಡ್ಯ(23) ಅವರು ರಾಹುಲ್ ಜತೆಗೂಡಿ ಬಿರುಸಿನಿಂದಲೇ ಬ್ಯಾಟ್ ಬೀಸಿ ದ್ವಿತೀಯ ವಿಕೆಟ್ಗೆ 51 ರನ್ಗಳ ಅಮೂಲ್ಯ ಜತೆಯಾಟ ನಡೆಸಿದರು. ಆದರೆ ನಿಕೋಲಸ್ ಪೂರನ್ ಒಂದು ರನ್ಗೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಸೋಲುವ ಹಂತದಲ್ಲಿದ್ದ ಗುಜರಾತ್ ಪಂದ್ಯದ ಅಂತಿಮ ಹಂತದಲ್ಲಿ ತಿರುಗಿ ಬಿದ್ದು ಊಹಿಸಲು ಅಸಾಧ್ಯವೆಂಬಂತೆ ಗೆಲುವು ಸಾಧಿಸಿ ಮೆರೆದಾಡಿತು. ರಾಹುಲ್ ಅವರ 68 ರನ್ ಇಲ್ಲಿ ವ್ಯರ್ಥವಾಯಿತು. ಮೋಹಿತ್ ಶರ್ಮ ಅವರ ಅಂತಿಮ ಓವರ್ನಲ್ಲಿ 4 ವಿಕೆಟ್ ಬಿತ್ತು.
ಬ್ಯಾಟಿಂಗ್ ಜೋಶ್ ತೋರದ ಗುಜರಾತ್
ಇದಕ್ಕೂ ಮುನ್ನ ಟಾಸ್ ಗೆದ್ದು ಬ್ಯಾಟಿಂಗ್ ನಡೆಸಿದ ಗುಜರಾತ್ ತಂಡದ ಆರಂಭ ಅಷ್ಟಾಗಿ ಜೋಶ್ನಿಂದ ಕೂಡಿರಲಿಲ್ಲ. ಶುಭಮನ್ ಗಿಲ್ ಅವರು ಶೂನ್ಯಕ್ಕೆ ಔಟಾದರು. ಆದ್ದರಿಂದ ತಂಡಕ್ಕೆ ಆರಂಭಿಕ ಹಿನ್ನಡೆ ಉಂಟಾಯಿತು. ಪವರ್ ಪ್ಲೇಯಲ್ಲಿ ಕೇವಲ 40 ರನ್ ಮಾತ್ರ ಒಟ್ಟುಗೂಡಿತು. ಗಿಲ್ ವಿಕೆಟ್ ಪತನದ ಬಳಿಕ ತಂಡದ ನಾಯಕ ಹಾರ್ದಿಕ್ ಪಾಂಡ್ಯ ಅವರು ಬ್ಯಾಟಿಂಗ್ ಭಡ್ತಿ ಪಡೆದು ಆಡಲಿಳಿದರು. ವೃದ್ಧಿಮಾನ್ ಸಾಹಾ ಜತೆಗೂಡಿ ರಕ್ಷಣಾತ್ಮಕ ಆಡವಾಡುವ ಮೂಲಕ ತಂಡಕ್ಕೆ ಆಸರೆಯಾದರು.
ಮತ್ತೊಂದು ಬದಿಯಲ್ಲಿ ಸಾಹಾ ಅವರು ಎಸೆತವೊಂದರಂತೆ ರನ್ ಗಳಿಸುತ್ತಾ ಸಾಗಿ 47 ರನ್ ವೇಳೆ ಕೃಣಾಲ್ ಪಾಂಡ್ಯಗೆ ವಿಕೆಟ್ ಒಪ್ಪಿಸಿದರು. ಆರಂಭಿಕರಿಬ್ಬರ ವಿಕೆಟ್ ಕೃಣಾಲ್ ಪಾಲಾಯಿತು. ಆದರೆ ಬಳಿಕ ಆಡಲು ಬಂದ ಅಭಿನವ್ ಮನೋಹರ್ ಅವರು ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸಿಕೊಳ್ಳುವಲ್ಲಿ ವಿಫಲರಾದರು.5 ಎಸೆತಗಳಿಂದ ಕೇವಲ ಮೂರು ರನ್ ಗಳಿಸಿ ನಿರಾಸೆ ಮೂಡಿಸಿದರು. ಈ ವಿಕೆಟ್ ಹಿರಿಯ ಸ್ಪಿನ್ನರ್ ಅಮಿತ್ ಮಿಶ್ರಾ ಕೆಡವಿದರು.
ಅಭಿನವ್ ಮನೋಹರ್ ವಿಕೆಟ್ ಪತನದ ಬೆನ್ನಲ್ಲೇ ಡೇಜಂರಸ್ ಬ್ಯಾಟರ್ ವಿಜಯ್ ಶಂಕರ್ ವಿಕೆಟ್ ಕೂಡ ಬಿತ್ತು. ಅಫಘಾನಿಸ್ತಾನದ ಬೌಲರ್ ನವೀನ್ ಉಲ್ ಹಕ್ ಅವರು ಕ್ಲೀನ್ ಬೌಲ್ಡ್ ಮಾಡಿದರು. ಈ ಮೂಲಕ ತಮ್ಮ ಚೊಚ್ಚಲ ಐಪಿಎಲ್ ವಿಕೆಟ್ ಪಡೆದ ಸಾಧನೆ ಮಾಡಿದರು. 94 ರನ್ಗೆ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡ ಗುಜರಾತ್ ಸಂಕಷ್ಟಕ್ಕೆ ಸಿಲುಕಿತು.
ಇದನ್ನೂ ಓದಿ IPL 2023: ವಡಾ ಪಾವ್‌ ಎಂದರೆ ರಬಾಡಗೆ ಪಂಚ ಪ್ರಾಣ
ಲಕ್ನೋ ಬೌಲರ್ಗಳು ಈ ಪಂದ್ಯದಲ್ಲಿ ಉತ್ತಮ ಸಂಘಟಿತ ಬೌಲಿಂಗ್ ದಾಳಿ ನಡೆಸಿ ಗಮನಸೆಳೆದರು. ಇವರ ಈ ಬೌಲಿಂಗ್ ಮುಂದೆ ಗುಜರಾತ್ ಬ್ಯಾಟರ್ಗಳು ರನ್ ಗಳಿಸಲು ಪರದಾಡಿದರು. 17ನೇ ಓವರ್ ತನಕ ನಿಧಾನಗತಿಯ ಬ್ಯಾಟಿಂಗ್ ನಡೆಸಿದ್ದ ಹಾರ್ದಿಕ್ ಪಾಂಡ್ಯ ಕೊಂಚ ಬಿರುಸಿನ ಆಟಕ್ಕೆ ಒತ್ತು ನೀಡಿದರು. ರವಿ ಬಿಷ್ಣೋಯಿ ಅವರ ಓವರ್ನಲ್ಲಿ ಒಂದು ಬೌಂಡರಿ ಮತ್ತು ಸತತ ಎರಡು ಸಿಕ್ಸರ್ ಬಾರಿಸಿದರು. ಇದೇ ವೇಳೆ ತಮ್ಮ ಅರ್ಧಶತಕವನ್ನು ಪೂರೈಸಿದರು. ಈ ಓವರ್ನಲ್ಲಿ ಒಟ್ಟು 19 ರನ್ ಸೋರಿಕೆಯಾಯಿತು. ಜತೆಗೆ ಅವರು ಈ ಪಂದ್ಯದಲ್ಲಿ ದುಬಾರಿಯಾಗಿ ಕಂಡು ಬಂದರು. ನಾಲ್ಕು ಓವರ್ಗೆ 49 ರನ್ ಬಿಟ್ಟುಕೊಟ್ಟು ವಿಕೆಟ್ಲೆಸ್ ಎನಿಸಿಕೊಂಡರು. ಗುಜರಾತ್ ತಂಡದ ಅರ್ಧದಷ್ಟು ಮೊತ್ತ ಬಿಷ್ಣೋಯಿ ಓವರ್ನಿಂದಲೇ ಹರಿದುಬಂತು.
ಡೇವಿಡ್ ಮಿಲ್ಲರ್ ಅವರಿಗೆ ಬ್ಯಾಟಿಂಗ್ ಅವಕಾಶ ಸಿಕ್ಕರೂ ಈ ಪಂದ್ಯದಲ್ಲಿ ಅವರು ರನ್ ಗಳಿಸುವಲ್ಲಿ ವಿಫಲರಾದರು. 12 ಎಸೆತಗಳಲ್ಲಿ ಕೇವಲ 6 ರನ್ ಗಳಿಸಿದರು. ಹಾರ್ದಿಕ್ ಪಾಂಡ್ಯ ಅವರು 49 ಎಸೆತಗಳ ಮುಂದೆ 66 ರನ್ ಸಿಡಿಸಿದರು. ಇದರಲ್ಲಿ 4 ಸಿಕ್ಸರ್ ಮತ್ತು 2 ಬೌಂಡರಿ ಒಳಗೊಂಡಿತು. ಪಾಂಡ್ಯ ಅವರ ಸಮಯೋಚಿತ ಬ್ಯಾಟಿಂಗ್ನಿಂದಾಗಿ ತಂಡ ನೂರರ ಗಡಿದಾಟುವಲ್ಲಿ ಯಶಸ್ವಿಯಾಗಿತು. ಒಂದೊಮ್ಮೆ ಅವರು ಕೂಡ ಬೇಗನೆ ವಿಕೆಟ್ ಕೈ ಚೆಲ್ಲುತ್ತಿದ್ದರೆ ತಂಡದ ಸ್ಥಿತಿ ಮತ್ತಷ್ಟು ಚಿಂತಾಜನಕವಾಗಿರುತ್ತಿತ್ತು. ಲಕ್ನೋ ಪರ ಸ್ಟೋಯಿನಿಸ್ 2 ವಿಕೆಟ್ ಪಡೆದರು.