ಮುಂಬಯಿ: ಅತ್ಯಂತ ರೋಚಕವಾಗಿ ಸಾಗಿದ ಶನಿವಾರದ ದೊಡ್ಡ ಮೊತ್ತದ ಮೇಲಾಟದಲ್ಲಿ 5 ಬಾರಿಯ ಐಪಿಎಲ್ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್ 13 ರನ್ಗಳ ಗೆಲುವು ದಾಖಲಿಸಿ ನಿಟ್ಟುಸಿರು ಬಿಟ್ಟಿದೆ. ಪಂಜಾಬ್ ಪರ ಅರ್ಶ್ದೀಪ್ ಸಿಂಗ್ ಘಾತಕ ಬೌಲಿಂಗ್ ನಡೆಸಿ ನಾಲ್ಕು ವಿಕೆಟ್ ಕಿತ್ತು ಮಿಂಚಿದರು. ಅದರಲ್ಲೂ ತಿಲಕ್ ವರ್ಮ ಅವರನ್ನು ಬೌಲ್ಡ್ ಮಾಡುವ ಮೂಲಕ ಮಿಡಲ್ ಸ್ಟಂಪ್ ಮುರಿದೇ ಹಾಕಿದರು.
ಮುಂಬಯಿಯ ವಾಂಖೇಡೆ ಸ್ಟೇಡಿಯಂನಲ್ಲಿ ನಡೆದ ಐಪಿಎಲ್ನ 31ನೇ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಪಂಜಾಬ್ ಕಿಂಗ್ಸ್ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 214 ರನ್ ಗಳಿಸಿತು. ಜವಾಬಿತ್ತ ಮುಂಬೈ ಇಂಡಿಯನ್ಸ್ ಸೂರ್ಯಕುಮಾರ್ ಯಾದವ್ ಮತ್ತು ಕ್ಯಾಮರೂನ್ ಗ್ರೀನ್ ಅವರ ಅರ್ಧಶತಕದ ನೆರವಿನಿಂದ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 201 ರನ್ ಗಳಿಸಿ ಸಣ್ಣ ಅಂತರದಿಂದ ಸೋಲು ಕಂಡಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟಿದ ಮುಂಬೈಗೆ ಅರ್ಶ್ದೀಪ್ ಸಿಂಗ್ ಆರಂಭದಲ್ಲೇ ಆಘಾತವಿಕ್ಕಿದರು. ಇಶಾನ್ ಕಿಶನ್(1) ಅವರ ವಿಕೆಟ್ ಕಿತ್ತು ಪಂಜಾಬ್ಗೆ ಮುನ್ನಡೆ ತಂದುಕೊಟ್ಟರು. ಆದರೆ ನಾಯಕ ರೋಹಿತ್ ಶರ್ಮ ಮತ್ತು ಕ್ಯಾಮರೂನ್ ಗ್ರೀನ್ ಸೇರಿಕೊಂಡು ಉತ್ತಮ ಜತೆಯಾಟ ನಡೆಸುವ ಮೂಲಕ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿದರು. ರೋಹಿತ್ ಮೂರು ಸಿಕ್ಸರ್ ಮತ್ತು 4 ಬೌಂಡರಿ ನೆರವಿನಿಂದ 27 ರನ್ಗಳಿಸಿ ಲಿವಿಂಗ್ಸ್ಟೋನ್ ಅವರಿಗೆ ವಿಕೆಟ್ ಒಪ್ಪಿಸಿದರು.
ಈ ವಿಕೆಟ್ ಪತನದ ಬಳಿಕ ಜತೆಯಾದ ಸೂರ್ಯಕುಮಾರ್ ಯಾದವ್ ಮತ್ತು ಕ್ಯಾಮರೂನ್ ಗ್ರೀನ್ ಸೇರಿಕೊಂಡು ಪಂಜಾಬ್ ಬೌಲರ್ಗಳ ಮೇಲೆರಗಿ ಚೆಂಡಾಟ ಆಡಿದರು. ಅಷ್ಟ ದಿಕ್ಕುಗಳಿಗೂ ಸಿಕ್ಸರ್ ಬೌಂಡಿರಿ ಬಾರಿಸಿದ ಉಭಯ ಆಟಗಾರರು ನೆರದಿದ್ದ ಪ್ರೇಕ್ಷಕರಿಗೆ ಭರಪೂರ ಮನರಂಜನೆ ಒದಗಿಸಿದರು. ಜಿದ್ದಿಗೆ ಬಿದ್ದವರಂತೆ ಬ್ಯಾಟ್ ಬೀಸುತ್ತಿದ್ದ ಈ ಆಟಗಾರರ ಬ್ಯಾಟಿಂಗ್ ಆರ್ಭಟದ ಮುಂದೆ ಪಂಜಾಬ್ ಬೌಲರ್ಗಳು ಸಂಪೂರ್ಣ ದಿಕ್ಕೆಟ್ಟರು. ಅದರಲ್ಲೂ ಸೂರ್ಯಕುಮಾರ್ ಅವರ ಬ್ಯಾಟಿಂಗ್ ತುಂಬಾನೆ ಅಬ್ಬರದಿಂದ ಕೂಡಿದ್ದು. ನಟರಾಜ ಶೈಲಿಯಲ್ಲಿ ಬ್ಯಾಟ್ ಬೀಸಿದ ಅವರು ಕೇವಲ 23 ಎಸೆತಗಳಿಂದ ಅರ್ಧಶತಕ ಬಾರಿಸಿದರು.
ಕ್ಯಾಮರೂನ್ ಗ್ರೀನ್ 43 ಎಸೆತಗಳಿಂದ 67 ರನ್ ಗಳಿಸಿದರು. ಸೂರ್ಯಕುಮಾರ್ ಯಾದವ್ 57 ರನ್ ಬಾರಿಸಿದರು. ಉಭಯ ಆಟಗಾರರ ವಿಕೆಟ್ ಪತನಗೊಂಡ ಬಳಿಕ ಪಂಜಾಬ್ ಕಿಂಗ್ಸ್ ಮತ್ತೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿ ಸೋಲಿನ ಬಾಗಿಲಿನಂಚಿನಿಂದ ಸ್ವಲ್ಪ ದರದಲ್ಲೇ ಪಾರಾಗಿ ಗೆಲುವು ದಾಖಲಿಸಿತು. ಅಂತಿಮ ಹಂತದಲ್ಲಿ ಟಿಮ್ ಡೇವಿಡ್ ಹೋರಾಟ ನಡೆಸಿದರು ಅವರಿಗೆ ತಂಡವನ್ನು ಗೆಲುವಿನ ದಡ ಸೇರಿಸಲು ಸಾಧ್ಯವಾಗಲಿಲ್ಲ. ಅವರು 25 ರನ್ ಬಾರಿಸಿ ಅಜೇಯರಾಗಿ ಉಳಿದರು.
ಇದಕ್ಕೂ ಮುನ್ನ ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡ ನಾಯಕ ರೋಹಿತ್ ಶರ್ಮ ಅವರ ನಿರ್ಧಾರಕ್ಕೆ ಬೌಲರ್ಗಳು ಸೂಕ್ತ ನ್ಯಾಯ ಒದಗಿಸಿದರು. ಅರ್ಜುನ್ ತೆಂಡೂಲ್ಕರ್, ಜೇಸನ್ ಬೆಹ್ರೆನ್‌ಡಾರ್ಫ್ ಮತ್ತು ಪಿಯೂಷ್ ಚಾವ್ಲಾ ಸೇರಿಕೊಂಡು ಆರಂಭದಿಂದಲೇ ಪಂಜಾಬ್ ತಂಡದ ವಿಕೆಟ್ ಬೇಟೆಯಾಡುವಲ್ಲಿ ಯಶಸ್ವಿಯಾದರು. ಮ್ಯಾಥ್ಯೂ ಶಾರ್ಟ್(11), ಪ್ರಭಾಸಿಮ್ರಾನ್ ಸಿಂಗ್(26), ಅಥರ್ವ ತೈದೆ(29), ಲಿಯಾಮ್ ಲಿವಿಂಗ್ಸ್ಟೋನ್(10) ರನ್ ಗಳಿಸಿ ತಮ್ಮ ಮೇಲಿಟ್ಟಿದ್ದ ನಿರೀಕ್ಷೆಯನ್ನು ಹುಸಿಗೊಳಿಸಿದರು.
ಸಿಡಿದ ಸ್ಯಾಮ್ ಕರನ್-ಹರ್ಪ್ರೀತ್ ಸಿಂಗ್
ಮಧ್ಯಮ ಕ್ರಮಾಂಕದಲ್ಲಿ ಹಂಗಾಮಿ ನಾಯಕ ಸ್ಯಾಮ್ ಕರನ್ ಮತ್ತು ಹರ್ಪ್ರೀತ್ ಸಿಂಗ್ ಭಾಟಿಯಾ ಅವರು ನಡೆಸಿದ ಅಮೋಘ ಹೋರಾಟದ ನೆರವಿನಿಂದ ಪಂಜಾಬ್ 200 ರನ್ಗಳ ಗಡಿ ದಾಟುವಲ್ಲಿ ಯಶಸ್ವಿಯಾಯಿತು. ಅರ್ಜುನ್ ತೊಂಡೂಲ್ಕರ್ ಅವರ ಮೂರನೇ ಓವರ್ನಲ್ಲಿ ಉಭಯ ಆಟಗಾರರು ಸತತ ಬೌಂಡರಿ ಮತ್ತು ಸಿಕ್ಸರ್ ಬಾರಿಸಿ ತಂಡದ ಮೊತ್ತವನ್ನು ಹಿಗ್ಗಿಸಿದರು. ಮೊದಲ ಎರಡು ಓವರ್ಗಳನ್ನು ಉತ್ತಮ ರೀತಿಯಲ್ಲಿ ನಿರ್ವಹಿಸಿದ್ದ ಅರ್ಜುನ್ ಈ ಓವರ್ನಲ್ಲಿ ಬರೋಬ್ಬರಿ 31 ರನ್ ಬಿಟ್ಟುಕೊಟ್ಟು ಅತ್ಯಂತ ದುಬಾರಿಯಾದರು. ಇದರಲ್ಲಿ ಒಂದು ನೋಬಾಲ್ ಕೂಡ ಎಸೆದರು. ಒಟ್ಟಾರೆ ಮೂರು ಓವರ್ಗಳಲ್ಲಿ 48 ರನ್ ನೀಡಿ 1 ವಿಕೆಟ್ ಪಡೆದರು.
15 ಓವರ್ ತನಕ ಹಿಡಿತ ಸಾಧಿಸಿದ್ದ ಮುಂಬೈ ಬೌಲರ್ಗಳು ಆ ಬಳಿಕ ಬೌಲಿಂಗ್ ಮರೆತವರಂತೆ ಪ್ರದರ್ಶನ ತೋರಿ ಎದುರಾಳಿಗಳಿಗೆ ಸಲೀಸಾಗಿ ರನ್ ಬಿಟ್ಟುಕೊಟ್ಟರು. ಅಲ್ಲಿಯ ವರೆಗೆ ಕುಂಟುತ್ತಾ ಸಾಗುತ್ತಿದ ಪಂಜಾಬ್ ಕ್ಷಿಪ್ರ ಪ್ರಗತಿ ಸಾಧಿಸಿ ಉತ್ತಮ ರನ್ ಗಳಿಸಿತು. ಮುಟ್ಟಿದೆಲ್ಲ ಚಿನ್ನ ಎಂಬಂತೆ ಕರನ್ ಮತ್ತು ಹರ್ಪ್ರೀತ್ ಸಿಂಗ್ ಬ್ಯಾಟ್ ಬೀಸಿದ ಬಹುತೇಕ ಎಸೆತಗಳು ಬೌಂಡರಿ, ಸಿಕ್ಸರ್ ಗೆರೆ ದಾಟಿತು. 24 ಎಸೆತಗಳ ಮುಂದೆ ಈ ಜೋಡಿ ಬರೋಬ್ಬರಿ 65 ರನ್ಗಳನ್ನು ರಾಶಿ ಹಾಕಿತು.
ಇದನ್ನೂ ಓದಿ IPL 2023: ಟಿ20 ಕ್ರಿಕೆಟ್ನಲ್ಲಿ ನೂತನ ದಾಖಲೆ ಬರೆದ ಕೆ.ಎಲ್ ರಾಹುಲ್
ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಸ್ಯಾಮ್ ಕರನ್ ಅವರು ಕ್ಯಾಮರೂನ್ ಗ್ರೀನ್ ಅವರಿಗೆ ಬ್ಯಾಕ್ಟು ಬ್ಯಾಕ್ ಸಿಕ್ಸರ್ ಸಿಡಿಸಿದರು. ಆದರೆ ಉತ್ತಮ ಮತ್ತೊಂದು ತುದಿಯಲ್ಲಿ ಬ್ಯಾಟಿಂಗ್ ನಡೆಸುತ್ತಿದ್ದ ಹರ್ಪ್ರೀತ್ ಸಿಂಗ್ ಭಾಟಿಯಾ ಅವರು ಇನ್ಸೈಡ್ ಎಡ್ಜ್ ಆಗಿ ವಿಕೆಟ್ ಕೈ ಚೆಲ್ಲಿದರು. ಅವರು 28 ಎಸೆತಗಳ ಮುಂದೆ 41 ರನ್ ಬಾರಿಸಿದರು. ಈ ವಿಕೆಟ್ ಪತನದ ಬಳಿಕ ಆಡಲಿಳಿದ ಜಿತೇಶ್ ಶರ್ಮ ಸತತ ಎರಡು ಸಿಕ್ಸರ್ ಬಾರಿಸಿದರು. ಗ್ರೀನ್ ಅವರ ಈ ಓವರ್ನಲ್ಲಿ 25 ರನ್ ಸೋರಿಕೆಯಾಯಿತು. ಬಿರುಸಿನ ಬ್ಯಾಟಿಂಗ್ ನಡೆಸಿದ ಪಂಜಾಬ್ ಕೇವಲ 19 ಎಸೆತಗಳಲ್ಲಿ ಒಂದು ವಿಕೆಟ್ ನಷ್ಟಕ್ಕೆ 79 ರನ್ ದೋಚಿತು.
26 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಸ್ಯಾಮ್ ಕರನ್ ಒಟ್ಟು 55 ರನ್ ಗಳಿಸಿದರು. ಅವರ ಈ ಸ್ಫೋಟಕ ಬ್ಯಾಟಿಂಗ್ ಇನಿಂಗ್ಸ್ನಲ್ಲಿ ಭರ್ಜರಿ 4 ಸಿಕ್ಸರ್ ಮತ್ತು 5 ಬೌಂಡರಿ ಸಿಡಿಯಿತು. ಜಿತೇಶ್ ಶರ್ಮ ಕೇವಲ 7 ಎಸೆತಗಳ ಮುಂದೆ 25 ರನ್ ಬಾರಿಸಿದರು.