ಮೊಹಾಲಿ: ಪಜಾಂಬ್ ಕಿಂಗ್ಸ್ ತಂಡದ ವೇಗಿ ಕಗಿಸೊ ರಬಾಡ ಐಪಿಎಲ್ನಲ್ಲಿ(IPL 2023) ನೂತನ ದಾಖಲೆಯೊಂದನ್ನು ಬರೆದಿದ್ದಾರೆ. ಅತಿ ಕಡಿಮೆ ಎಸೆತಗಳಲ್ಲಿ 100 ವಿಕೆಟ್ ಪಡೆದ ಮೊದಲ ಬೌಲರ್ ಎಂಬ ಸಾಧನೆ ಮಾಡಿದ್ದಾರೆ. ಈ ಮೂಲಕ ಲಸಿತ ಮಾಲಿಂಗ ಅವರ ಹೆಸರಿನಲ್ಲಿದ್ದ ದಾಖಲೆಯನ್ನು ಮುರಿದಿದ್ದಾರೆ.
ಮೊಹಾಲಿಯ ಐ.ಎಸ್‌.ಬಿಂದ್ರಾ ಸ್ಟೇಡಿಯಂನಲ್ಲಿ ಗುರುವಾರ ನಡೆದ ಈ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಪಂಜಾಬ್ ಕಿಂಗ್ಸ್ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 153 ರನ್ ಬಾರಿಸಿತು. ಜವಾಬಿತ್ತ ಗುಜರಾತ್ ಟೈಟನ್ಸ್ 19.5 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 154 ರನ್ ಬಾರಿಸಿ ಗೆಲುವು ದಾಖಲಿಸಿತು.
ಸಾಧಾರಣ ಮೊತ್ತವನ್ನು ಬೆನ್ನಟಿದ ಗುಜರಾತ್ಗೆ ಆರಂಭಿಕರಾದ ವೃದ್ಧಿಮಾನ್ ಸಾಹಾ ಮತ್ತು ಶಭಮನ್ ಗಿಲ್ ಉತ್ತಮ ಅಡಿಪಾಯ ಹಾಕಿದರು. ಈ ಜೋಡಿ ಕೇವಲ ನಾಲ್ಕು ಓವರ್ಗಳಲ್ಲಿ 40 ರನ್ ಜತೆಯಾಟ ನಡೆಸಿತು. ಈ ವೇಳೆ ಕಗಿಸೊ ರಬಾಡ ಅವರು ಸಾಹಾ ವಿಕೆಟ್ ಕಿತ್ತರು. ಈ ವಿಕೆಟ್ ಪಡೆಯುತ್ತಿದ್ದಂತೆ ರಬಾಡ ಅವರು ಐಪಿಎಲ್ನಲ್ಲಿ ನೂರು ವಿಕೆಟ್ ಪೂರ್ತಿಗೊಳಿಸಿದ ಸಾಧನೆ ಮಾಡಿದರು.
ನೂರು ವಿಕೆಟ್ ಪಡೆಯುತ್ತಿದ್ದಂತೆ ರಬಾಡ ಅವರು ಅತಿ ಕಡಿಮೆ ಪಂದ್ಯಗಳಲ್ಲಿ ಈ ಸಾಧನೆ ಮಾಡಿದ ಮೊದಲ ಆಟಗಾರ ಎಂಬ ಹಿರಿಮೆಗೆ ಪಾತ್ರರಾದರು. ರಬಾಡ 64 ಪಂದ್ಯ ಮತ್ತು ಕೇವಲ 1,438 ಎಸೆತಗಳಲ್ಲಿ ಈ ಮೈಲುಗಲ್ಲನ್ನು ತಲುಪಿದರು. ಇದಕ್ಕೂ ಮುನ್ನ ಮಾಲಿಂಗ ಅವರು 70 ಪಂದ್ಯ, 1622 ಎಸೆತಗಳ ಮೂಲಕ ಈ ಸಾಧನೆ ಮಾಡಿದ್ದರು. ಇದೀಗ ಮಾಲಿಂಗ ಅವರ ಸಾಧನೆ ಪತನಗೊಂಡಿದೆ. ಆರ್ಸಿಬಿ ತಂಡದ ಹರ್ಷಲ್ ಪಟೇಲ್ ಅವರು ಈ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆದಿದ್ದಾರೆ. ಹರ್ಷಲ್ 1647 ಎಸೆತಗಳ ಮೂಲಕ 100 ವಿಕೆಟ್ಗಳನ್ನು ಕಬಳಿಸಿದ್ದಾರೆ.
ಗುಜರಾತ್ಗೆ ರೋಚಕ ಗೆಲುವು
ಸಣ್ಣ ಮೊತ್ತವನ್ನು ಬೆನ್ನಟ್ಟುವಲ್ಲಿ ಪರದಾಡಿದ ಗುಜರಾತ್ ಅಂತಿಮ ಓವರ್ನಲ್ಲಿ ಗೆಲುವಿಗೆ 7 ರನ್ ತೆಗೆಯುವ ಸವಾಲಿಗೆ ಬಂದು ನಿಂತಿತು. ಇದೇ ವೇಳೆ ಅರ್ಧಶತಕ ಬಾರಿಸಿದ್ದ ಶುಭಮನ್ ಗಿಲ್ ಕ್ಲೀನ್ ಬೌಲ್ಡ್ ಆದರು. ಮುಂದಿನ ಎಸೆತಗಳಲ್ಲಿ ಕೇವಲ ಒಂದೊಂದು ರನ್ ದಾಖಲಾಯಿತು. ಈ ವೇಳೆ ಪಂಜಾಬ್ ಮೇಲುಗೈ ಸಾಧಿಸುತ್ತದೆ ಎಂದು ಭಾವಿಸಲಾಗಿತ್ತು. ಡೇವಿಡ್ ಮಿಲ್ಲರ್ ಅವರು ಸ್ಟ್ರೈಕ್ನಲ್ಲಿದ್ದರೂ ಅವರಿಂದಲೂ ದೊಡ್ಡ ಹೊಡೆ ಬಾರಿಸಲು ಸಾಧ್ಯವಾಗಲಿಲ್ಲ. ಅಂತಿಮ ಎರಡು ಎಸೆತದ ಮುಂದೆ ನಾಲ್ಕು ರನ್ ಬೇಕಿದ್ದಾಗ ತೆವಾಟಿಯ ಬೌಂಡರಿ ಬಾರಿಸಿ ಗೆಲುವನ್ನು ಸಾರಿದರು. ಈ ಮೂಲಕ ಗುಜರಾತ್ ರೋಚಕ ಗೆಲುವು ದಾಖಲಿಸಿತು.