ಧರ್ಮಶಾಲ: ಪ್ಲೇ ಆಫ್ ರೇಸ್ನಲ್ಲಿ ಕ್ಷೀಣ ಅವಕಾಶ ಹೊಂದಿರುವ ಒಂದೇ ದೋಣಿಯ ಎರಡು ಪಯಣಿಗರಾದ ಪಂಜಾಬ್ ಕಿಂಗ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ಶುಕ್ರವಾರದ ಐಪಿಎಲ್ ಪಂದ್ಯದಲ್ಲಿ ಅದೃಷ್ಟ ಪರೀಕ್ಷೆಗೆ ಇಳಿಯಲಿದೆ. ಇಲ್ಲಿ ಸೋತ ತಂಡ ಟೂರ್ನಿಯಿಂದ ಅಧಿಕೃತವಾಗಿ ಹೊರಬೀಳಲಿದೆ. ಈ ತಂಡ ಯಾವುದು ಎಂಬುದು ಪಂದ್ಯದ ಕೌತುಕ. ಇತ್ತಂಡಗಳ ಈ ಹಣಾಹಣಿ ಹಿಮಾಚಲ ಪ್ರದೇಶದ ಧರ್ಮಶಾಲದಲ್ಲಿ ನಡೆಯಲಿದೆ.
ಪಂಜಾಬ್ ತಂಡಕ್ಕೆ ಪ್ಲೇ ಆಫ್ ಪ್ರವೇಶಿಸುವ ಸುವರ್ಣ ಅವಕಾಶವೊಂದಿತ್ತು. ಆದರೆ ಬುಧವಾರದ ಪಂದ್ಯದಲ್ಲಿ ಡೆಲ್ಲಿ ವಿರುದ್ಧ ಸೋಲು ಕಂಡದ್ದೇ ತಂಡಕ್ಕೆ ಮುಳುವಾಗಿ ಪರಿಣಮಿಸಿತು. ಒಂದೊಮ್ಮೆ ಪಂಜಾಬ್ ಈ ಪಂದ್ಯ ಗೆದ್ದರೆ 14 ಅಂಕ ಗಳಿಸಲಿದೆ. ಆದರೂ ಪಂಜಾಬ್ಗೆ ಪ್ಲೇ ಆಫ್ ಪ್ರವೇಶಿಸುವುದು ಕಷ್ಟ. ಏಕೆಂದರೆ ರನ್ರೇಟ್ ಕಳಪೆಯಾಗಿದೆ. ಅತ್ಯಂತ ದೊಡ್ಡ ಅಂತರದಿಂದ ಗೆದ್ದರೂ ತನಗಿಂತ ಮೇಲಿರುವ ತಂಡಗಳು ದೊಡ್ಡ ಅಂತರದಿಂದ ಸೋಲು ಕಂಡರೆ ಆಗ ಪಂಜಾಬ್ಗೆ ಒಂದು ಅವಕಾಶ ಸಿಗಲಿದೆ. ಒಂದೇ ಮಾತಿನಲ್ಲಿ ಹೇಳುವುದಾದರೆ ಪಂಜಾಬ್ ತನಗಿಂತ ಮೇಲಿರುವ ತಂಡಗಳ ಸೋಲನ್ನು ಬಯಸಬೇಕಿದೆ.
ರಾಜಸ್ಥಾನ್ ಸ್ಥಿತಿಯೂ ಪಂಜಾಬ್ನಂತೆಯೇ ಇದೆ. ಆರಂಭಿಕ ಹಂತದಲ್ಲಿ ಅಬ್ಬರ ಆಟವಾಡುವ ಮೂಲಕ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದ್ದ ರಾಜಸ್ಥಾನ್ ಆ ಬಳಿಕ ಸತತ ಪಂದ್ಯಗಳನ್ನು ಸೋಲುತ್ತಾ ಸಾಗಿ ಇದೀಗ ಟೂರ್ನಿಯ ನಿರ್ಗಮನದ ಬಾಗಿಲಿಗೆ ಬಂದು ನಿಂತಿದೆ. ವಿಶ್ವದ ಅಗ್ರ ಕ್ರಿಕೆಟಿಗರನ್ನು ಹೋಂದಿರುವ ತಂಡ ಎಂಬ ಖ್ಯಾತಿ ಪಡೆದಿದ್ದ ಸಂಜು ಪಡೆ ಕಳೆದ ಆರ್ಸಿಬಿ ವಿರುದ್ಧ ಅತ್ಯಂತ ಹೀನಾಯವಾಗಿ ಸೋಲು ಕಂಡಿತ್ತು. ಕೇವಲ 59ರನ್ಗೆ ಆಲೌಟ್ ಆಗಿ ತೀವ್ರ ಮುಖಭಂಗ ಎದುರಿಸಿತ್ತು.
ಇದನ್ನೂ ಓದಿ IPL 2023: ಪ್ಲೇ ಆಫ್ ರೇಸ್ನಲ್ಲಿ ಉಳಿದುಕೊಂಡ ತಂಡಗಳೆಷ್ಟು; ಆರ್ಸಿಬಿ ಸ್ಥಿತಿ ಹೇಗಿದೆ; ಸಂಪೂರ್ಣ ಮಾಹಿತಿ ಇಲ್ಲಿದೆ
ಸಂಭಾವ್ಯ ತಂಡಗಳು
ಪಂಜಾಬ್ ಕಿಂಗ್ಸ್ : ಶಿಖರ್ ಧವನ್ (ನಾಯಕ), ಪ್ರಭ್ಸಿಮ್ರಾನ್ ಸಿಂಗ್, ಮ್ಯಾಥ್ಯೂ ಶಾರ್ಟ್, ಲಿಯಾಮ್ ಲಿವಿಂಗ್ಸ್ಟನ್, ಜಿತೇಶ್ ಶರ್ಮಾ, ಸ್ಯಾಮ್ ಕರನ್, ಶಾರುಖ್ ಖಾನ್, ಹರ್ಪ್ರೀತ್ ಬ್ರಾರ್, ರಿಷಿ ಧವನ್, ರಾಹುಲ್ ಚಹರ್, ಅರ್ಶ್ದೀಪ್ ಸಿಂಗ್.
ರಾಜಸ್ಥಾನ್ ರಾಯಲ್ಸ್ : ಯಶಸ್ವಿ ಜೈಸ್ವಾಲ್, ಜೋಸ್ ಬಟ್ಲರ್, ಸಂಜು ಸ್ಯಾಮ್ಸನ್(ನಾಯಕ), ಜೋ ರೂಟ್, ಧ್ರುವ ಜುರೆಲ್, ಶಿಮ್ರಾನ್ ಹೆಟ್ಮೈಯರ್, ರವಿಚಂದ್ರನ್ ಅಶ್ವಿನ್, ಮುರುಗನ್ ಅಶ್ವಿನ್, ಸಂದೀಪ್ ಶರ್ಮಾ, ಯಜ್ವೇಂದ್ರ ಚಹಲ್, ಟ್ರೆಂಟ್ ಬೌಲ್ಟ್