ಬೆಂಗಳೂರು: ಬ್ಯಾಟರ್ಗಳ ವೈಫಲ್ಯಕ್ಕೆ ಬೆಲೆ ತೆತ್ತ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಐಪಿಎಲ್ 16ನೇ ಆವೃತ್ತಿಯ 36ನೇ ಪಂದ್ಯದಲ್ಲಿ ಕೋಲ್ಕೊತಾ ನೈಟ್ ರೈಡರ್ಸ್ ವಿರುದ್ಧ 21 ರನ್ಗಳ ಸೋಲಿಗೆ ಒಳಗಾಯಿತು. ಈ ಮೂಲಕ ತವರು ನೆಲದ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿತು ಆರ್ಸಿಬಿ ಬಳಗ. ಹಾಲಿ ಆವೃತ್ತಿಯ ಐಪಿಎಲ್ನ ಮೊದಲ ಚರಣದ ಪಂದ್ಯದಲ್ಲೂ ಆರ್ಸಿಬಿ ತಂಡ ಕೋಲ್ಕೊತಾಗೆ ಮಣಿದಿತ್ತು. ಆ ಪಂದ್ಯ ಈಡನ್ಗಾರ್ಡನ್ಸ್ ಸ್ಟೇಡಿಯಮ್ನಲ್ಲಿ ನಡೆದಿತ್ತು.
ಕೋಲ್ಕೊತಾ ತಂಡದ ಆರಂಭಿಕ ಬ್ಯಾಟರ್ ಜೇಸನ್ ರಾಯ್ (56) ಅವರ ಅರ್ಧ ಶತಕ ಹಾಗೂ ನಾಯಕ ನಿತೀಶ್ ರಾಣಾ (48) ಸ್ಫೋಟಕ ಬ್ಯಾಟಿಂಗ್ ಮಾಡುವ ಮೂಲಕ ಗೆಲುವಿನ ರೂವಾರಿಗಳೆಸಿಕೊಂಡರು. ನಾರಾಯಣ ಜಗದೀಶನ್ (27) ಹಾಗೂ ವೆಂಕಟೇಶ್ ಅಯ್ಯರ್ (31) ಕೂಡ ಆತಿಥೇಯರ ಬಳಕ್ಕೆ ದೊಡ್ಡ ಮೊತ್ತದ ಗುರಿಯೊಡ್ಡಲು ನೆರವಾದರು.
ಚಿನ್ನಸ್ವಾಮಿ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಆರ್ಸಿಬಿ ತಂಡ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ಕೆಕೆಆರ್ ಬಳಗ ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 200 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಆರ್ಸಿಬಿ ತನ್ನ ಪಾಲಿನ ಓವರ್ಗಳು ಮುಕ್ತಾಯಗೊಂಡಾಗ 8 ವಿಕೆಟ್ ನಷ್ಟಕ್ಕೆ 178 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟಲು ಆರಂಭಿಸಿದ ಆರ್ಸಿಬಿ ತಂಡ ಯಾವ ಹಂತದಲ್ಲೂ ಕೆಚ್ಚೆದೆ ತೋರಲಿಲ್ಲ. ಆರಂಭದಿಂದಲೂ ವಿಕೆಟ್ ಕಳೆದುಕೊಳ್ಳುತ್ತಾ ಸಾಗಿತು. ವಿರಾಟ್ ಕೊಹ್ಲಿ (54) ಹಾಲಿ ಆವೃತ್ತಿಯ ಐಪಿಎಲ್ನಲ್ಲಿ ಐದನೇ ಅರ್ಧ ಶತಕ ಬಾರಿಸಿದ್ದೇ ಪಂದ್ಯದ ವಿಶೇಷ.
ಇನಿಂಗ್ಸ್ ಆರಂಭಿಸಿದ ಆರ್ಸಿಬಿ 31 ರನ್ಗಳಿಗೆ ಮೊದಲ ವಿಕೆಟ್ ಕಳೆದುಕೊಂಡಿತು. ಫಾಫ್ ಡುಪ್ಲೆಸಿಸ್ 17 ರನ್ಗಳಿಗೆ ಔಟಾದರು. ಬಳಿಕ ಬಂದ ಶಹಬಾಜ್ ಅಹಮದ್ 2 ರನ್ಗೆ ಔಟಾದರೆ ಗ್ಲೆನ್ ಮ್ಯಾಕ್ಸ್ವೆಲ್ 5 ರನ್ಗೆ ವಿಕೆಟ್ ಒಪ್ಪಿಸಿದರು. 58 ರನ್ಗಳಿಗೆ 3 ವಿಕೆಟ್ ಕಳೆದುಕೊಂಡ ಆರ್ಸಿಬಿ ಸಂಕಷ್ಟಕ್ಕೆ ಬಿತ್ತು. ಬಳಿಕ ಬಂದ ಮಹಿಪಾಲ್ ಲಾಮ್ರೋರ್ 18 ಎಸೆತಕ್ಕೆ 34 ರನ್ ಬಾರಿಸಿ ವಿಶ್ವಾಸ ಮೂಡಿಸಿದರು. ಕೊಹ್ಲಿ ಜತೆ ಸೇರಿ 55 ರನ್ಗಳ ಜತೆಯಾಟ ನೀಡಿದರು. ಆದರೆ, ಲಾಮ್ರೋರ್ ವಿಕೆಟ್ ಒಪ್ಪಿಸಿದ ಬೆನ್ನೆಲ್ಲೇ ವಿರಾಟ್ ಕೊಹ್ಲಿಯೂ ಔಟಾದರು. ಈ ವೇಳೆ ಆರ್ಸಿಬಿಯ ಸೋಲು ಖಚಿತಗೊಂಡಿತು. ದಿನೇಶ್ ಕಾರ್ತಿಕ್ 22 ರನ್ಗಳಿಗೆ ಔಟಾಗಿ ಅಭಿಮಾನಿಗಳ ಟೀಕೆಗೆ ಒಳಗಾದರು.
ಇನಿಂಗ್ಸ್ ಆರಂಭಿಸಿದ ಕೋಲ್ಕೊತಾ ಬಳಗ ಉತ್ತಮ ಆರಂಭ ಪಡೆಯಿತು. ಜೇಸನ್ ರಾಯ್ ಹಾಗೂ ಜಗದೀಶನ್ ಮೊದಲ ವಿಕೆಟ್ಗೆ 83 ರನ್ ಬಾರಿಸಿ ಭದ್ರ ಅಡಿಪಾಯ ಹಾಕಿದರು. ಜಗದೀಶನ್ ವಿಕೆಟ್ ಪಡೆಯುವ ಮೂಲಕ ಕರುನಾಡ ಹುಡುಗ ವಿಜಯ್ಕುಮಾರ್ ವೈಶಾಖ್ ಈ ಜೋಡಿಯನ್ನು ಬೇರ್ಪಡಿಸಿದರು. ಮೂರನೇ ಕ್ರಮಾಂಕದಲ್ಲಿ ಆಡಲು ಬಂದ ವೆಂಕಟೇಶ್ ಅಯ್ಯರ್ ನಿಧಾನಗತಿಯಲ್ಲಿ ಆಡಿ 31 ರನ್ ಗಳಿಸಿದರು. 11.4 ಓವರ್ಗಳಲ್ಲಿ 100 ರನ್ ಪೂರೈಸಿದ ಕೆಕೆಆರ್ ದೊಡ್ಡ ಮೊತ್ತ ಪೇರಿಸಲು ಸುಳಿವು ಕೊಟ್ಟಿತು. ಏತನ್ಮಧ್ಯೆ, ವೈಶಾಖ್ ಕೆಕೆಆರ್ ಅಬ್ಬರದ ಬ್ಯಾಟಿಂಗ್ ಮಾಡುತ್ತಿದ್ದ ಜೇಸನ್ ರಾಯ್ ಅವರನ್ನು ಪೆವಿಲಿಯನ್ಗೆ ಕಳುಹಿಸಿದರು.
ಇದನ್ನೂ ಓದಿ : IPL 2023: ಪತ್ನಿಯೊಂದಿಗೆ ಮಸ್ತ್ ಸ್ಟೆಪ್ಸ್‌ ಹಾಕಿ ಗಾಯಗೊಂಡ ವಿರಾಟ್ ಕೊಹ್ಲಿ; ಆರ್ಸಿಬಿ ಗತಿಯೇನು?
ಈ ವೇಳೆ ಕ್ರೀಸ್ಗೆ ಇಳಿದ ನಾಯಕ ನಿತೀಶ್ ರಾಣಾ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ತೋರಿದರು ಅವರು 21 ಎಸೆತಗಳಲ್ಲಿ 48 ರನ್ ಬಾರಿಸಿದರು. ಆದರೆ, ವೆಂಕಟೇಶ್ ಅಯ್ಯರ್ ಹಾಗೂ ನಿತೀಶ್ ರಾಣಾ ಇನ್ನಷ್ಟು ಹೊತ್ತು ಮೈದಾನದಲ್ಲಿ ಇರದಂತೆ ಶ್ರೀಲಂಕಾದ ಸ್ಪಿನ್ನರ್ ವಾನಿಂದು ಹಸರಂಗ ನೋಡಿಕೊಂಡರು. ಬಳಿಕ ಬಂದ ವಿಂಡೀಸ್ ದೈತ್ಯ ಆ್ಯಂಡ್ರೆ ರಸೆಲ್ 1 ರನ್ಗೆ ವಿಕೆಟ್ ಒಪ್ಪಿಸಿ ಕೆಕೆಅರ್ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದರು. ಆದರೆ, ಕೊನೇ ಹಂತದಲ್ಲಿ ರಿಂಕು ಸಿಂಗ್ 10 ಎಸೆತಗಳಲ್ಲಿ 18 ಹಾಗೂ ಡೇವಿಡ್ ವೈಸ್ 3 ಎಸೆತಗಳಲ್ಲಿ 12 ರನ್ ಬಾರಿ ತಂಡದ ಮೊತ್ತವನ್ನು 200ಕ್ಕೆ ಏರಿಸಿದರು.