ಮುಂಬಯಿ: ವಿರಾಟ್ ಕೊಹ್ಲಿಯ ಪ್ರೀತಿಯ ಗೆಳೆಯ, ಆರ್ಸಿಬಿ ತಂಡದ ಮಾಜಿ ಜತೆಗಾರ ಕ್ರಿಸ್ ಗೇಲ್ ಅವರು ತಮ್ಮ ಗೆಳೆಯನಿಗೊಂದು ಎಚ್ಚರಿಕೆ ಸಂದೇಶವೊಂದನ್ನು ನೀಡಿದ್ದಾರೆ. ಆದರೆ ಇದು ಯಾವುದೇ ದ್ವೇಷದ ಮತ್ತು ಕೋಪದ ಸಂದೇಶವಲ್ಲ. ಬದಲಾಗಿ ವಿರಾಟ್ ಕೊಹ್ಲಿ ಅವರು ಐಪಿಎಲ್ ನಿರ್ಮಿಸಿದ ದಾಖಲೆಯನ್ನು ಮುರಿಯಲು ಮತ್ತೆ ಐಪಿಎಲ್ಗೆ ಮರಳುವೆ ಎಂದು ಗೇಲ್ ಹೇಳಿದ್ದಾರೆ.
ಗುಜರಾತ್ ಟೈಟನ್ಸ್ ವಿರುದ್ಧದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅವರು ಶತಕ ಬಾರಿಸುವ ಮೂಲಕ ಕ್ರಿಸ್ ಗೇಲ್ ಅವರ ಹೆಸರಿನಲ್ಲಿದ್ದ ದಾಖಲೆಯೊಂದನ್ನು ಮುರಿದಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡುವ ವೇಳೆ ಗೇಲ್ ಅವರು ಮುಂದಿನ ಆವೃತ್ತಿಯಲ್ಲಿ ಮತ್ತೆ ಐಪಿಎಲ್ ಆಡುವ ಮೂಲಕ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಯಲಿದ್ದೇನೆ ಎಂದು ಹೇಳಿದ್ದಾರೆ. ಈ ಮೂಲಕ ಕೊಹ್ಲಿ ದಾಖಲೆಯನ್ನು ಮುರಿಯುವುದಾಗಿ ವಿಶ್ವಾಸವ್ಯಕ್ತಪಡಿಸಿದ್ದಾರೆ. ಸದ್ಯ ಕೊಹ್ಲಿ 7 ಐಪಿಎಲ್ ಶತಕ ಬಾರಿಸಿದ್ದಾರೆ. ಗೇಲ್ 6 ಶತಕ ಬಾರಿಸಿದ್ದಾರೆ.
ಇದನ್ನೂ ಓದಿ IPL 2023: ನಿಷ್ಠಾವಂತ ಅಭಿಮಾನಿಗಳಿಗಾಗಿ ತಲೆ ಎತ್ತಿ ನಡೆಯುತ್ತೇವೆ; ಕೊಹ್ಲಿ ಭಾವನಾತ್ಮಕ ಪೋಸ್ಟ್
ವಿರಾಟ್ ಕೊಹ್ಲಿಯ ಪ್ರದರ್ಶನಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ ಗೇಲ್ “ಇದೊಂದು ಅದ್ಭುತ ಇನಿಂಗ್ಸ್‌, ಯುನಿವರ್ಸ್ ಬಾಸ್‌ನ ದಾಖಲೆಯನ್ನು ಮೀರಿ ನಿಂತಿದ್ದಾರೆ. ಇರಲಿ, ನಾನು ನಿವೃತ್ತಿಯನ್ನು ಹಿಂಪಡೆದು ಐಪಿಎಲ್ಗೆ ಮರಳುತ್ತೇನೆ. ಮುಂದಿನ ವರ್ಷ ನಿಮ್ಮನ್ನು ನೋಡಿಕೊಳ್ಳುತ್ತೇನೆ, ನಿಮ್ಮ ದಾಖಲೆಯನ್ನು ಮುರಿಯುತ್ತೇನೆ ನೋಡಿ ವಿರಾಟ್” ಎಂಬುದಾಗಿ ಗೇಲ್ ನಗುತ್ತಲೇ ಹೇಳಿದರು. ಗೇಲ್ ಅವರು ಈ ಬಾರಿಯ ಐಪಿಎಲ್ ಟೂರ್ನಿ ಆರಂಭಕ್ಕೂ ಮುನ್ನ ಐಪಿಎಲ್ಗೆ ವಿದಾಯ ಹೇಳಿದ್ದರು. ಸದ್ಯ ಅವರು ಐಪಿಎಲ್ನ ಕಾಮೆಂಟ್ರಿ ಪ್ಯಾನಲ್ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಒಂದೊಮ್ಮೆ ಗೇಲ್ ಅವರು ಅವರು ವಿದಾಯ ಹೇಳಿ ಮುಂದಿನ ಐಪಿಎಲ್ಗೆ ಹೆಸರು ನೊಂದಾಯಿಸಿದರೂ ಅವರನ್ನು ಯಾವ ತಂಡಗಳು ಖರೀದಿ ಮಾಡುವುದು ಅನುಮಾನ ಎನ್ನಲಾಗಿದೆ. ಗೇಲ್ ಅವರಿಗೆ ಈಗಾಗಲೇ 43 ವಯಸ್ಸಾಗಿದೆ, ಜತೆಗೆ ಅವರ ಬ್ಯಾಟಿಂಗ್ ಫಾರ್ಮ್ ಕೂಡ ಇಲ್ಲವಾಗಿದೆ ಹೀಗಾಗಿ ಅವರು ಐಪಿಎಲ್ನತ್ತ ಮುಖಮಾಡಿದರೂ ಅವರ ಖರೀದಿಗೆ ತಂಡಗಳು ಮನಸ್ಸು ಮಾಡುವುದು ಕಷ್ಟ.