ಮುಂಬಯಿ: ಮುಂದಿನ ವರ್ಷ ನಡೆಯುವ 17ನೇ ಆವೃತ್ತಿಯ ಐಪಿಎಲ್ಗೆ(IPL 2024) ಈಗಾಗಲೇ ಸಿದ್ಧತೆಗಳು ಆರಂಭವಾಗಿದೆ. ಆಟಗಾರರ ಮಿನಿ ಹರಾಜು ಡಿಸೆಂಬರ್ 19ರಂದು ದುಬೈನಲ್ಲಿ ನಡೆಯಲಿದೆ. ಇದರ ಬೆನ್ನಲ್ಲೇ ಐಪಿಎಲ್ನ ಬ್ರಾಂಡ್ ಮೌಲ್ಯದ(IPL brand value) ವರದಿ ಹೊರಬಿದ್ದಿದೆ. 2023ರಲ್ಲಿ ಶೇ. 28 ಪ್ರಗತಿ ಕಂಡಿದ್ದು, 89,263 ಕೋಟಿ ರೂ. ತಲುಪಿದೆ ಎಂದು ವರದಿಯಾಗಿದೆ. ಜತೆಗೆ ತಂಡ ಬ್ರಾಂಡ್ ಮೌಲ್ಯದಲ್ಲಿಯೂ ಭಾರಿ ಏರಿಕೆ ಕಂಡಿದೆ ಎಂದು ತಿಳಿದುಬಂದಿದೆ.
ಐಪಿಎಲ್ನ ಯಶಸ್ವಿ ತಂಡಗಳಲ್ಲಿ ಒಂದಾದ ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಗರಿಷ್ಠ ಮೌಲ್ಯ ಹೊಂದಿರುವ ತಂಡವಾಗಿ ಕಾಣಿಸಿಕೊಂಡಿದೆ. 725 ಕೋಟಿ ರೂ. (87 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯ ಹೊಂದಿದೆ. ಮುಂದಿನ ಆವೃತ್ತಿಗಾಗಿ ಮುಂಬೈ ಫ್ರಾಂಚೈಸಿ ಹಾರ್ದಿಕ್ ಪಾಂಡ್ಯ ಅವರನ್ನು ಗುಜರಾತ್ ತಂಡದಿಂದ ಟ್ರೇಡ್ ಮಾಡಿ ಮತ್ತೆ ತಂಡಕ್ಕೆ ಸೇರಿಸಿಕೊಂಡಿದೆ. ಹೀಗಾಗಿ ಬಲಿಷ್ಠವಾಗಿರುವ ಮುಂಬೈ 6ನೇ ಕಿರೀಟ ಗೆಲ್ಲುವ ವಿಶ್ವಾಸದಲ್ಲಿದೆ.
ಬ್ರಾಂಡ್ ಮೌಲ್ಯಮಾಪನ ಸಲಹಾ ಸಂಸ್ಥೆ “ಬ್ರಾಂಡ್ ಫಿನಾನ್ಸ್ ರಿವೀಲ್ಸ್’ ಸಿದ್ಧಪಡಿಸಿರುವ ವರದಿಯ ಪ್ರಕಾರ, ಐಪಿಎಲ್ ಬ್ರಾಂಡ್ ಮೌಲ್ಯ 2008ರ ಆರಂಭಿಕ ವರ್ಷದಿಂದ ಈಗ ಶೇ. 433ರಷ್ಟು ಪ್ರಗತಿ ಕಂಡಿದೆ ಎಂದು ತಿಳಿಸಿದೆ. ಕಳೆದ ವರ್ಷ ಅಂದರೆ, 2022ರಲ್ಲಿ ಐಪಿಎಲ್ 70,070 ಕೋಟಿ ರೂ. (8.4 ಬಿಲಿಯನ್ ಡಾಲರ್) ಬ್ರಾಂಡ್ ಮೌಲ್ಯ ಹೊಂದಿತ್ತು.
ಇದನ್ನೂ ಓದಿ IPL 2024: ಯಾರಿಗೆ ಒಲಿಯಲಿದೆ ಐಪಿಎಲ್ ಟ್ರೋಫಿಯ ಶೀರ್ಷಿಕೆ ಪ್ರಾಯೋಜಕತ್ವ?
ಮಹೇಂದ್ರ ಸಿಂಗ್ ಧೋನಿ ಸಾರಥ್ಯದ ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ಕಿಂಗ್ಸ್ ತಂಡ 675 ಕೋಟಿ ರೂ. (81 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯ ಹೊಂದಿದೆ. 2 ಬಾರಿಯ ಚಾಂಪಿಯನ್ ಕೋಲ್ಕತಾ ನೈಟ್ರೈಡರ್ಸ್ 655 ಕೋಟಿ ರೂ. (78.6 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯದೊಂದಿಗೆ ಕ್ರಮವಾಗಿ 2 ಮತ್ತು 3ನೇ ಸ್ಥಾನ ಪಡೆದಿದೆ.
ಆರ್ಸಿಬಿಗೆ 4ನೇ ಸ್ಥಾನ
ಕನ್ನಡಿಗರ ನೆಚ್ಚಿನ ತಂಡದವಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಇದುವರೆ ಕಪ್ ಗೆಲ್ಲದಿದ್ದರೂ ಬ್ರಾಂಡ್ ಮೌಲ್ಯದಲ್ಲಿ ಮಾತ್ರ ತನ್ನ ಹವಾ ಇಟ್ಟಿದೆ. ಆರ್ಸಿಬಿ ತಂಡ 582 ಕೋಟಿ ರೂ. (69.8 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯದೊಂದಿಗೆ 4ನೇ ಸ್ಥಾನದಲ್ಲಿದೆ.
𝗧𝗵𝗲 𝗖𝗼𝘂𝗻𝘁𝗱𝗼𝘄𝗻 𝗶𝘀 🔛! ⏳
— IndianPremierLeague (@IPL) December 12, 2023
A week left for the #IPLAuction. 👏 👏
How excited are you for the auction❓#IPL pic.twitter.com/ZQj18nc06y
2022ರಲ್ಲಿ ಚೊಚ್ಚಲ ಬಾರಿ ಐಪಿಎಲ್ ಪ್ರವೇಶಿಸಿದ ಗುಜರಾತ್ ಟೈಟಾನ್ಸ್ ತಂಡ ಆ ಆವೃತ್ತಿಯಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿತ್ತು. ಇದೇ ವರ್ಷ ನಡೆದಿದ್ದ ಆವೃತ್ತಿಯಲ್ಲಿ ಚೆನ್ನೈ ವಿರುದ್ಧ ಸೋತು ರನ್ನರ್ ಅಪ್ ಸ್ಥಾನ ಪಡೆದಿತ್ತು. ಈ ಸಾಧನೆಯಿಂದಾಗಿ ತಂಡದ ಬ್ರಾಂಡ್ ಮೌಲ್ಯ ಕೂಡ ಏರಿಕೆ ಕಂಡಿದೆ. ಶೇ. 38 ಪ್ರಗತಿ ಕಂಡು 545 ಕೋಟಿ ರೂ. (65.4 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯದೊಂದಿಗೆ 5ನೇ ಸ್ಥಾನಕ್ಕೇರಿದೆ. ಕನ್ನಡಿಗ ಕೆ.ಎಲ್ ರಾಹುಲ್ ಸಾರಥ್ಯದ ಲಕ್ನೋ ಸೂಪರ್ಜೈಂಟ್ಸ್ ತಂಡ ಶೇ. 48 ಪ್ರಗತಿ ಸಾಧಿಸಿ 392 ಕೋಟಿ ರೂ. (47 ದಶಲಕ್ಷ ಡಾಲರ್) ಬ್ರಾಂಡ್ ಮೌಲ್ಯದೊಂದಿಗೆ 9ನೇ ಸ್ಥಾನದಲ್ಲಿದೆ. ಪಂಜಾಬ್ ಕಿಂಗ್ಸ್ ತಂಡ 377 ಕೋಟಿ ರೂ. ಬ್ರಾಂಡ್ ಮೌಲ್ಯದೊಂದಿಗೆ ಕೊನೆಯ 10ನೇ ಸ್ಥಾನದಲ್ಲಿದೆ.
ಐಪಿಎಲ್ ತಂಡಗಳ ಬ್ರಾಂಡ್ ಮೌಲ್ಯ
ಮುಂಬೈ ಇಂಡಿಯನ್ಸ್: 725 ಕೋಟಿ ರೂ.
ಚೆನ್ನೈ ಸೂಪರ್ಕಿಂಗ್ಸ್: 675 ಕೋಟಿ ರೂ.
ಕೋಲ್ಕತಾ ನೈಟ್ರೈಡರ್ಸ್: 655 ಕೋಟಿ ರೂ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು: 582 ಕೋಟಿ ರೂ.
ಗುಜರಾತ್ ಟೈಟಾನ್ಸ್: 545 ಕೋಟಿ ರೂ.
ಡೆಲ್ಲಿ ಕ್ಯಾಪಿಟಲ್ಸ್: 534 ಕೋಟಿ ರೂ.
ರಾಜಸ್ಥಾನ ರಾಯಲ್ಸ್: 521 ಕೋಟಿ ರೂ.
ಸನ್ರೈಸರ್ಸ್ ಹೈದರಾಬಾದ್: 402 ಕೋಟಿ ರೂ.
ಲಖನೌ ಸೂಪರ್ಜೈಂಟ್ಸ್: 392 ಕೋಟಿ ರೂ.
ಪಂಜಾಬ್ ಕಿಂಗ್ಸ್: 377 ಕೋಟಿ ರೂ.