ನವದೆಹಲಿ: ಅಫಘಾನಿಸ್ತಾನ ತಂಡ ಹಾಲಿ ವಿಶ್ವ ಕಪ್ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ. ಪಾಕಿಸ್ತಾನದಂತಹ ನೆರೆಯ ರಾಷ್ಟ್ರವನ್ನು ಸೋಲಿಸಿ ಸಂಭ್ರಮಿಸಿದೆ. ಜತೆಗೆ ಇಂಗ್ಲೆಂಡ್ ತಂಡವನ್ನೂ ಮಣಿಸಿದೆ. ಒಟ್ಟಾರೆಯಾಗಿ ಆ ತಂಡದ ಪ್ರದರ್ಶನ ಗಮನ ಸೆಳೆಯುವಂತಿದೆ. ಅಂತೆಯೇ ಆಸ್ಟ್ರೇಲಿಯಾ ವಿರುದ್ಧದ ನಿರ್ಣಾಯಕ ವಿಶ್ವಕಪ್ 2023 ರ ಪಂದ್ಯಕ್ಕಾಗಿ ಮುಂಬೈಗೆ ಬಂದಿದ್ದ ಅಫ್ಘಾನಿಸ್ತಾನ ಕ್ರಿಕೆಟ್ ತಂಡಕ್ಕೆ ಭಾರತದ ಮಾಜಿ ಕ್ರಿಕೆಟಿಗ ಇರ್ಫಾನ್ ಪಠಾಣ್ (Irfan Pathan) ಔತಣ ಕೂಟ ಏರ್ಪಡಿಸಿ ಗಮನ ಸೆಳೆದಿದ್ದಾರೆ. ಪಾಕಿಸ್ತಾನ ತಂಡವನ್ನು ಸೋಲಿಸಿದ್ದಕ್ಕಾಗಿ ಈ ಪಾರ್ಟಿ ಎಂದು ಎಂದು ನೆಟ್ಟಿಗರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಭಾರತ ತಂಡದ ಮಾಜಿ ವೇಗಿ ಇರ್ಫಾನ್ ಪಠಾಣ್ ಅವರು ಸ್ಟಾರ್ ಆಟಗಾರರಾದ ರಶೀದ್ ಖಾನ್ ಮತ್ತು ನವೀನ್-ಉಲ್-ಹಕ್ ಮತ್ತಿತರರನ್ನು ಊಟಕ್ಕೆ ಕರೆದಿದ್ದರು. ಸಹೋದರ ಯೂಸುಫ್ ಪಠಾಣ್ ಕೂಡ ಇದರಲ್ಲಿ ಭಾಗಿಯಾಗಿದ್ದರು. ಭಾರತೀಯ ಗಾಯಕ ಅದ್ನಾನ್ ಸಾಮಿ ಮತ್ತು ಹಿರಿಯ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಅವರಂತಹ ಪ್ರಮುಖ ವ್ಯಕ್ತಿಗಳು ಪಠಾಣ್ ಮನೆಯಲ್ಲಿ ಹಾಜರಿದ್ದರು.
ಯಾರೆಲ್ಲ ಇದ್ದರು ಔತಣ ಕೂಟದಲ್ಲಿ?
ಈ ಕಾರ್ಯಕ್ರಮದಲ್ಲಿ ಭಾರತೀಯ ಗಾಯಕ ಅದ್ನಾನ್ ಸಾಮಿ, ಬಾಲಿವುಡ್ ಐಕಾನ್ಗಳಾದ ಸುನಿಲ್ ಶೆಟ್ಟಿ ಮತ್ತು ಸುಭಾಷ್ ಘಾಯ್, ಪ್ರಸಿದ್ಧ ಭಾರತೀಯ ಸ್ಪಿನ್ನರ್ ಹರ್ಭಜನ್ ಸಿಂಗ್, ದಕ್ಷಿಣ ಆಫ್ರಿಕಾದ ಮಾಜಿ ಕ್ರಿಕೆಟಿಗ ಇಮ್ರಾನ್ ತಾಹಿರ್ ಮತ್ತು ಅಫ್ಘಾನಿಸ್ತಾನದ ಬ್ಯಾಟಿಂಗ್ ಕೋಚ್ ಸೇರಿದಂತೆ ಗಣ್ಯ ವ್ಯಕ್ತಿಗಳು ಉಪಸ್ಥಿತರಿದ್ದರು.
ಅಫ್ಘಾನಿಸ್ತಾನದ 2023 ರ ವಿಶ್ವಕಪ್ ಪ್ರಯಾಣವು ಗಮನಾರ್ಹವಾಗಿದೆ ಈಗಾಗಲೇ ನಾಲ್ಕು ಗೆಲುವುಗಳನ್ನು ಗಳಿಸಿದೆ. ಈ ತಂಡವು ಸೆಮೀಸ್ ರೇಸ್ನಲ್ಲಿದೆ. ಏಕೆಂದರೆ ಅವರು ನ್ಯೂಜಿಲೆಂಡ್ ಮತ್ತು ಪಾಕಿಸ್ತಾನದೊಂದಿಗೆ ಸಮಾನ ಅಂಕಗಳನ್ನು ಹಂಚಿಕೊಂಡಿದ್ದಾರೆ. ಜತೆಗೆ ಒಂದು ಕಡಿಮೆ ಪಂದ್ಯವನ್ನು ಆಡಿದ್ದಾರೆ. ನವೆಂಬರ್ 10 ರಂದು ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಬಲಿಷ್ಠ ದಕ್ಷಿಣ ಆಫ್ರಿಕಾ ತಂಡದ ವಿರುದ್ಧ ಪಂದ್ಯದೊಂದಿಗೆ ಅಫ್ಘಾನಿಸ್ತಾನ ತನ್ನ ಅಭಿಯಾನ ಕೊನೆಗೊಳಿಸಲಿದೆ.
ಆಫ್ಘನ್ ತಂಡಕ್ಕೆ ಬೆಂಬಲ
2023 ರ ವಿಶ್ವಕಪ್ನ ಪ್ರಮುಖ ಅಂಶವೆಂದರೆ ಅಫ್ಘಾನಿಸ್ತಾನದ ಗಮನಾರ್ಹ ಅಭಿಯಾನದ ಸಮಯದಲ್ಲಿ ಇರ್ಫಾನ್ ಪಠಾಣ್ ಸತತವಾಗಿ ಬೆಂಬಲ ಕೊಟ್ಟಿರುವುದು. ಪಾಕಿಸ್ತಾನದ ವಿರುದ್ಧ ಅಫ್ಘಾನಿಸ್ತಾನದ ಐತಿಹಾಸಿಕ ಗೆಲುವಿನ ನಂತರ ಚೆನ್ನೈನ ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ಇರ್ಫಾನ್ ಪಠಾಣ್ ಮತ್ತು ರಶೀದ್ ಖಾನ್ ಅವರ ಜತೆ ನೃತ್ಯ ಮಾಡಿದ್ದರು. ಈ ಸ್ಮರಣೀಯ ಕ್ಷಣವು ವ್ಯಾಪಕವಾಗಿ ಸೋಶಿಯಲ್ ಮೀಡಿಯಾಗಳಲ್ಲಿ ಹರಿದಾಡಿತ್ತು.
ಅಫ್ಘಾನಿಸ್ತಾನ ತಂಡದ ಬಗ್ಗೆ ಪಠಾಣ್ ಅವರ ಪ್ರೀತಿ ಇನ್ನಷ್ಟು ಹೆಚ್ಚಾಗಿದ್ದು ಲಂಕಾ ವಿರುದ್ಧದ ಗೆಲುವಿನ ಬಳಿಕ. ಅವರು ಆ ಪಂದ್ಯದ ವೇಳೆಯೂ ತಮ್ಮ ನೃತ್ಯದ ದೃಶ್ಯಗಳನ್ನು ಹಂಚಿಕೊಂಡಿದ್ದರು. ಶ್ರೀಲಂಕಾ ವಿರುದ್ಧದ ವಿಜಯದ ನಂತರ, ಅವರು ನೇರ ಪ್ರಸಾರದ ಸ್ಟುಡಿಯೋದಲ್ಲಿ ಹರ್ಭಜನ್ ಸಿಂಗ್ ಅವರೊಂದಿಗೆ ನೃತ್ಯ ಮಾಡಿದ್ದರ. ಅವರು ‘ಅಫ್ಘಾನಿ ಮಸ್ತ್ ಹಾಡಿಗೆ’ ನೃತ್ಯ ಮಾಡುವ ವೀಡಿಯೊವನ್ನು ಸಹ ಪೋಸ್ಟ್ ಮಾಡಿದ್ದರು.