ಮುಂಬಯಿ : ಜೈಪುರ ಪಿಂಕ್ ಪ್ಯಾಂಥರ್ಸ್ ತಂಡ 9ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ನ (Pro Kabaddi League) ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಪುಣೇರಿ ಪಲ್ಟನ್ ವಿರುದ್ಧ 33-29 ಅಂಕಗಳ ಅಂತರದ ವಿಜಯ ಸಾಧಿಸಿದ ಜೈಪುರ ತಂಡ ಎರಡನೇ ಬಾರಿಗೆ ಟ್ರೋಫಿ ಗೆದ್ದಿತು. 2014ರ ಉದ್ಘಾಟನಾ ಆವೃತ್ತಿಯಲ್ಲೂ ಪಿಂಕ್ ಪ್ಯಾಂಥರ್ಸ್ ಪ್ರಶಸ್ತಿ ಗೆದ್ದಿತ್ತು.
ಆರಂಭದಿಂದಲೇ ಜಿದ್ದಾಜಿದ್ದಿನಿಂದ ಕೂಡಿದ್ದ ಪಂದ್ಯದಲ್ಲಿ ಪುಣೇರಿ ಪಲ್ಟನ್ ವಿಶ್ವಾಸದಿಂದ ಆಟ ಆರಂಭಿಸಿತು. ಆದರೆ, ತನ್ನ ಅನುಭವ ಬಳಸಿಕೊಂಡು ಆಡಿದ ಜೈಪುರ ತಂಡ ಒಂದೊಂದಾಗಿ ಅಂಕಗಳನ್ನು ಗಳಿಸುತ್ತಾ ಪ್ರಥಮಾರ್ಧ ಮುಕ್ತಾಯದ ವೇಳೆಗೆ 14-12 ಅಂಕಗಳ ಮುನ್ನಡೆ ಸಾಧಿಸಿತು. ಅದೇ ಮಾದರಿಯ ಆಟವನ್ನು ದ್ವಿತೀಯಾರ್ಧದಲ್ಲೂ ಮುಂದುವರಿಸುವ ಜತೆಗೆ ಒಂದು ಪುಣೇರಿ ತಂಡವನ್ನು ಆಲ್ಔಟ್ ಮಾಡಿ 19-17 ಅಂಕಗಳನ್ನು ಸಂಪಾದಿಸಿ ಗೆಲುವು ಸಾಧಿಸಿತು.
ಜೈಪುರ ತಂಡದ ಪರ ರೇಡರ್ಗಳಾದ ಅರ್ಜುನ್ ದೇಸ್ವಾಲ್ ಹಾಗೂ ವಿ ಅಜಿತ್ ತಲಾ 6 ಅಂಕಗಳನ್ನು ಸಂಪಾದಿಸಿದರೆ, ಡಿಫೆಂಡರ್ ಸುನೀಲ್ ಕೂಡ 6 ಅಂಕಗಳನ್ನು ಪಡೆದರು. ಪುಣೇರಿ ತಂಡದ ಪರ ಆಕಾಶ್ ಶಿಂಧೆ ಹಾಗೂ ಅಭಿನೇಷ್ ನಟರಾಜನ್ ತಲಾ 4 ಅಂಕಗಳನ್ನು ಸಂಪಾದಿಸಿದರು.
ತಾರೆಯರ ದಂಡು
ಫೈನಲ್ ಪಂದ್ಯವನ್ನು ಜೈಪುರ ಪಿಂಕ್ ಪ್ಯಾಂಥರ್ಸ್ ತಂಡ ಮಾಲೀಕರಾಗಿರುವ ಅಭಿಷೇಕ್ ಬಚ್ಚನ್. ಪತ್ನಿ ಐಶ್ವರ್ಯಾ ರೈ ಹಾಗೂ ಪುತ್ರಿ ಆರಾಧ್ಯ ಬಚ್ಚನ್ ವೀಕ್ಷಿಸಿದರು. ಜತೆಗೆ ಬಾಲಿವುಡ್ ನಟ ರಣವೀರ್ ಸಿಂಗ್, ನಟಿ ಪೂಜಾ ಹೆಗ್ಡೆ ಹಾಗೂ ನಿರ್ದೇಶಕ ರೋಹಿತ್ ಶೆಟ್ಟಿ ಕೂಡ ಹಾಜರಿದ್ದರು.